Чьма Гәрәке Qәдьре Сәрwертийе Бьгьрьн?

1, 2. (а) Чьма мәрʹа щарна чәтьн дьбә qәдьре сәрwертийе бьгьрьн? (б) Дәрһәqа кʹижан пьрса әме хәбәр дьн?

ТӘ QӘ тʹәхмин кьрийә, wәки зарʹ чаwа хwә кʹьфш дькә, чахе жь wи дьхwазьн кö әw тьштәки öса бькә, чь кö әw нахwазә? Әw мәʹде хwә дькә, у жь сәр чʹәʹве wи нәqайилбуна wи те кʹьфше. Әw фәʹм дькә кö гәрәке гöрʹа де-баве хwә бькә, ле ве дәме нахwазә öса бькә. Щар-щара әм жи дькʹәвьнә дәрәще öса.

² Нәһеса йә һәр гав qәдьре сәрwертийе бьгьрьн. Ле qә бал тә öса qәwьмийә, wәки тәрʹа чәтьн буйә qәдьре wан бьгьри, йед кö ль сәр тә сәрwер бунә? Һәрге бәле, бәрхwә нәкʹәвә, тʹәне тʹәви тә нәqәwьмийә. Әм wәʹдәки öсада дьжин, кö qәдьре сәрwертийе qә найе гьртьне. Ле Кʹьтеба Пироз дьбежә, wәки әм гәрәке qәдьре wан бьгьрьн, йед кö ль сәр мә сәрwертийе дькьн (Мәтʹәлок 24:21). Һәрге әм дьхwазьн хwә нава һʹьзкьрьна Хwәдеда хwәй кьн, әм гәрәке öса бькьн. Дәрһәqа ве йәке һьнә пьрс пешда тен. Чьма мәрʹа щарна чәтьн ә qәдьре сәрwертийе бьгьрьн? Чьма Йаһоwа әве йәке жь мә дәʹwа дькә, у чь wе али мә бькә әве дәʹwакьрьне бьqәдиньн? Әм ча дькарьн нишан кьн, wәки qәдьре сәрwертийе дьгьрьн?

ЧЬМА ӘВ ЙӘК ÖСА ЧӘТЬН Ә

3, 4. Ча гöнә у qöсури пешда һатьн, у чьрʹа мәрʹа жь бо qöсурийе чәтьн ә qәдьре сәрwертийе бьгьрьн?

³ Wәрен әм кьн хәбәр дьн дәрһәqа дö мәʹнийа, жь бо чь жи мәрʹа чәтьн дьбә qәдьре wан бьгьрьн йе кö сәрwертийе дькьн. Йа пешьн, әм qöсурдар ьн, ле йа дöда әw ә, wәки мәрьвед кö ль сәр мә сәрwер ьн, әwана жи qöсурдар ьн. Гöнә у qöсурийа мәрьва һәла һе зудава дь бахче Адәнеда пешда һатьн, чахе Адәм у Һеwа мьqабьли сәрwертийа Йаһоwа дәркʹәтьн. Ча те кʹьфше, гöнә жь бо мьqабьлибуне дәстпебу. У әв мьqабьлибун жь буйина мә щәм мә һәйә (Дәстпебун 2:15-17; 3:1-7; Зәбур 51:5; Рʹомайи 5:12).

⁴ Гәләк мәри жь бо qöсурийе, тʹьме qöрʹә у бабах дьбьн, ле мьлуктийа wана зәʹф кем дьбә, ләма жи мәрʹа лазьм ә qәwате бьдьнә хәбате wәки мьлукти нав хwәда зедә кьн у хwәй кьн. Һәла һе мәрьве кö гәләк сал Хwәдерʹа амьн хьзмәт кьрийә, дькарә qöрʹә у хwәрʹази бә. Wәрен әм бьньһерʹьн мәсәла Qорах, йе кö wәʹде Муса пʹехәмбәрда дьжит. Әwи Йаһоwарʹа бь амьни хьзмәт дькьр у һәла һе тʹәви щьмәʹта wи жи гәләк чәтьнайи дәрбаз кьр. Ле паше әw зәʹф һʹьзрәт бу сәрwертийе һьлдә дәсте хwә у сәва ве йәке әw мьqабьли Муса дәркʹәт йе кö мәрьвәки һәри мьлук бу дь wан wәʹдада. Öса Qорах мәрийед дьн жи мьqабьли Муса рʹакьр (Жьмар 12:3; 16:1-3). Бьфькьрә дәрһәqа Узийа Пʹадша, йе кö жь бо бабахбуна хwә, кʹәтә ль пʹарьстгәһа Йаһоwа, сәва qöльхкьрьна пироз бькә, кʹижан кö кʹаһинарʹа дькʹәт (2 Дирок 26:16-21). Qорах у Узийа, жь бо мьqабьлибуна хwә һатьнә щәзакьрьне. Жь мәсәла wанә хьраб жи әм дькарьн дәрсе хwәрʹа һьлдьн. Демәк әм гәрәке бьхәбьтьн, кö бабахбуне нав хwәда бьдьнә һьлдане, чьмки бабахбун наһелә кö әм qәдьре сәрwертийе бьгьрьн.

5. Чаwа мәрьвед qöсур сәрwертийа хwә, нәрʹаст дьданә хәбате?

⁵ Хенщи ве йәке, мәрьвед кö сәрwертийе дькьн, qöсурдар ьн у щарна тьштед öса дькьн жь бо чь жи мәрьв qәдьр һьндава wанда öнда дькьн. Чьмки гәләк жь сәрwера, зöлмкʹар у зорбәт бун у qәдьре мәрьва жи пʹепәс дькьрьн. Бәле, тʹәрихийа дьнйайе жи әʹшкәрә дьдә кʹьфше, кö мәрьв тʹьме сәрwертийа хwә нәрʹаст у бона кʹара хwә дьдьнә хәбате. (Бьхунә Wаиз 8:9). Мәсәлә, чахе Йаһоwа, Шаwул бьжарт ча пʹадша, әw йәки баш у мьлук бу. Ле паше әw бабах бу, у дәстпекьр һʹәвсудийе Даwьде амьн бькә у пәй wи кʹәвә (1 Самуйел 9:20, 21; 10:20-22; 18:7-11). Wәʹдә шунда Даwьд бу йәк жь пʹадшед Исрайелейә лапи баш. Ле ахьрийе әwи жи сәрwертийа хwә нәрʹаст да хәбате, чахе жьна Урийайе Һитти сьтанд. Даwьд, Урийа шандә мәйдана шерʹ, ль мәйдане рʹеза пешьнда әw да сәкьнандьне, wәки бе кöштьне (2 Самуйел 11:1-17). Бь рʹасти жи, жь бо qöсурдарийе мәрьварʹа чәтьн ә, сәрwертийа хwә рʹаст бьдьн хәбате. Илаһи һьнге чахе әwана qәдьре Йаһоwа нагьрьн. Хьзмәткʹарәки дәwләтейи Британи гьли дькә, кö чаwа папед дера Католика, пәйкʹәтьнед мәзьн дәстпекьрьн. Әw дьньвисә: «Һʹöкöмәти хьраб дькә, ле һʹöкöмәтийа мәзьн һе хьраб дькә». Ле wәки öса нә, чьма әм гәрәке qәдьре сәрwертийе бьгьрьн?

ЧЬМА ГӘРӘКЕ QӘДЬРЕ СӘРWЕРТИЙЕ БЬГЬРЬН?

6, 7. (а) Һʹьзкьрьна мә һьндава Йаһоwа, мә һелан дькә чь бькьн у чьма? (б) Ньһерʹандьна мә ль сәр гöһдарийе гәрәке чаwа бә, у әм ча дькарьн гöһдарийа хwә бьдьнә кʹьфше?

⁶ Мәʹникә лапә фәрз, кö чьма әм qәдьре сәрwертийе дьгьрьн, әw һәйә һʹьзкьрьн һьндава Йаһоwа, хушк-бьра у һәла һьндава хwә жи. Әм Йаһоwа жь һʹәмушка зәʹфтьр һʹьз дькьн, ләма жи әм дьхwазьн дьле wи ша кьн. (Бьхунә Мәтʹәлок 27:11; Марqос 12:29, 30). Әм заньн кö жь бо мьqабьлибуна дь Адәнеда, изьна Хwәде сәрwертийе ль сәр әʹрде бькә, кʹәтә бьн шьке у ниве зәʹф жь мәрийа, пьшта Шәйтʹан гьртьн у сәрwертийа Йаһоwа инкʹар кьрьн. Ле әм бь шабун хwә ль сәрwертийа Йаһоwа дьгьрьн. Чахе әм хәбәред жь кʹьтеба Әʹйанти 4:11 дьхуньн, әм гәләк дьлшад дьбьн. Чьмки мәрʹа әʹйан ә, кö Йаһоwа йә сәрwере qануни ль сәр тʹәмамийа әʹрд у әʹзмен! Ләма жи әм пьштгьрийа сәрwертийа Йаһоwа дькьн у дьһельн wәки әw һәр рʹож рʹебәрийа жийина мә бькә.

⁷ Сәва кö qәдьре сәрwертийа Йаһоwа бьгьри, тʹәне гöһдари бәс нинә. Әм бь һазьрбуне гöрʹа Йаһоwа дькьн, чьмки әм wи һʹьз дькьн. Бе шьк, дь жийина мәда wе һәбьн дәрәщед öса жи, кö мәрʹа wе чәтьн бә гöһдарийа хwә бьдьнә кʹьфше. Һьнге мәрʹа, чаwа жи wе зарʹерʹа дәрһәqа кʹижани кö дь абзаса пешьнда һатьбу ньвисаре, лазьм бә һин бьн гöһдар бьн. Те бира мә, кö Иса Мәсиһ wи чахи жи гöрʹа Баве хwәда бу, чахе әв йәк гәләк чәтьн бу. Әwи Баве хwәрʹа гот: «Бьра хwәстьна тә бә, нә кö йа мьн» (Луqа 22:42).

8. (а) Рʹожа иройин әм ча дькарьн нишан кьн, кö qәдьре сәрwертийа Йаһоwа дьгьрьн у жь чь әм педьһʹәсьн ньһерʹандьна Йаһоwа дәрһәqа ве йәке? (б) Чь wе али мә бькә гöһ бьдьнә тʹәми у ширәта ? (Бьньһерʹә чаргошә «Гöһ Бьдә Ширәте у Һинкьрьне Qәбул Кә»).

⁸ Фәʹмдари йә wәки иро, Йаһоwа хwәха тʹәви мә һәр йәки башqә хәбәр надә, ле чь кö лазьм ә, әw бь Хәбәра хwә у хьзмәткʹаред хwә әʹлами мә дькә. Ләма жи әм нишан дькьн кö qәдьре сәрwертийа Йаһоwа дьгьрьн, һәрге qәдьре wан мәрийа жи дьгьрьн, йед кö алийе Йаһоwада һатьнә кʹьфшкьрьне, йан жи кʹижанарʹа кö Йаһоwа изьн дайә wәки ль сәр мә сәрwертийе бькьн. Ле һәрге әм мьqабьли ван мәрийа һәрʹьн, мәсәлә инкʹар кьн ширәт у рʹасткьрьнед wан, йед кö ль сәр һʹиме Кʹьтеба Пироз ьн, бь ве йәке әме нишан кьн кö мьqабьли Йаһоwа дәртен. Чахе щьмәʹта Исраели мьqабьли Муса рʹадьбу у дькьрә кöтә-кöт, Йаһоwа әв йәк һʹәсаб дькьр кö мьqабьли wи рʹадьбьн (Жьмар 14:26, 27).

9. Чьма һʹьзкьрьна мә һьндава хушк-бьра, мә һелан дькә кö qәдьре сәрwертийе бьгьрьн? Бинә мәсәлә.

⁹ Әм öса жи жь бо һʹьзкьрьна һьндава хушк-бьра, qәдьре сәрwертийе дьгьрьн. Чь щурʹәйи? Бьдә һʹәсабе хwә wәки тö әскәр и. Пешдачуйин у хьлазкьрьна тʹәмамийа ордийе ве йәкева гьредайи йә, кö әскәр ча гöһ бьдьнә тʹәмийед сәрәскәре хwә у тʹәви wи шьхöлкʹарийе бькьн. Һәрге тö гöһ нәди wан тʹәмийа, бь ве йәке тö жийина әскәред дьн дькари бьки бьн qәзийайе. Ләма жи иро гәләк щар öса дьqәwьмә, кö ордийед әскәред мәрьва, зийан дьдьнә нә кö тʹәне хwә, ле öса жи тʹәмамийа инсанәте. Ордийа Йаһоwа жи һәйә, у әw тʹәне qәнщийе у кʹаре тинә. Дь Кʹьтеба Пирозда бь сәда щара ль сәр Йаһоwа те готьне, wәки әw хwәйе әскәра йә (1 Самуйел 1:3). Йаһоwа һәйә Сәрәскәре ордийа әʹфьринед рʹöһʹани, һʹәсабе кʹижана кö пʹьрʹ гәләк ә. Хенщи wе йәке, әw хьзмәткʹаред хwәйә ль сәр әʹрде жи һьмбәри әскәра дькә (2 Тимотʹейо 2:3; Һәзәqел 37:1-10). Һәрге әм мьqабьли wан мәрийа һәрʹьн, йед кö Йаһоwа ль сәр мә сәрwер кʹьфш кьрьнә, бь ве йәке әме жийина wан мәрийед кö тʹәви мә шәрʹе рʹöһʹанида шәрʹ дькьн, бькьнә бьн qәзийайе. Чахе Мәсиһи мьqабьли рʹуспийед кʹьфшкьри дьчә, әв йәк дькарә зийане бьдә Мәсиһийед дьн дь щьватеда (1 Корьнтʹи 12:14, 25, 26). Ле чахе зарʹ мьqабьли де-баве хwә дьчә, һьнге тʹәмамийа малбәте зийане дькʹәвә. Ләма жи, һәрге әм qәдьре сәрwертийе бьгьрьн у шьхöлкʹарийеда йәк бьн, бь ве йәке әме бьдьнә кʹьфше кö әм хушк-бьред хwә һʹьз дькьн.

10, 11. Ча хwәстьна мә дәрһәqа һʹалхwәшийе, мә һелан дькә qәдьре сәрwертийе бьгьрьн?

¹⁰ Әм öса жи qәдьре сәрwертийе дьгьрьн, чьмки фәʹм дькьн кö әв йәк сәва һʹалхwәшийа мә йә. Чахе Йаһоwа жь мә дәʹwа дькә qәдьре сәрwертийе бьгьрьн, әw öса жи мәрʹа әʹйан дькә, wәки әв йәк wе чь кʹаре мәрʹа бинә. Мәсәлә, Йаһоwа жь зарʹа дьхwазә кö әwана гöрʹа де-баве хwәда бьн, wәки бәхтәwар бьн у дьреж бьжин (Qануна Дöщари 5:16; Әфәси 6:2, 3). Йаһоwа мәрʹа дьбежә, wәки әм qәдьре рʹуспийед щьвате бьгьрьн, чьмки һәрге әм öса нәкьн, әв йәк дькарә рʹöһʹанида зийане бьдә мә (Ибрани 13:7, 17). Әw öса жи дьхwазә, wәки әм гöрʹа сәрwеред дьнйайе бькьн, чьмки әв йәк бона кʹара мә йә (Рʹомайи 13:4).

¹¹ Wе мәрʹа һеса бә qәдьре сәрwертийе бьгьрьн, һәрге әм фәʹм кьн кö чьрʹа Йаһоwа әве йәке жь мә дәʹwа дькә. Wәрен әм бьньһерʹьн һәла кʹижан се дәрәщада әм дькарьн нишан кьн, кö qәдьре сәрwертийе дьгьрьн.

QӘДЬРГЬРТЬН ДЬ МАЛБӘТЕДА

12. Йаһоwа чь щабдари да дәсте мер, у әw ча гәрәке әве щабдарийе бьqәдинә?

¹² Йаһоwа Әʹфьрандаре малбәте йә. Әw Хwәдейе пʹәргалийе йә, ләма жи әwи малбәт öса әʹфьрандийә, wәки әʹдьлайи теда һәбә у бәхтәwар бә (1 Корьнтʹи 14:33). Хwәде мер кʹьфш кьрийә ча сәре малбәте. Мер жи һьндава Сәре хwә, демәк Иса Мәсиһ qәдьр нишан дьк һьнге, һәрге сәрwертийеда чʹәʹв дьдә Иса кö чаwа әwи һьндава щьватеда хwә кʹьфш дькьр (Әфәси 5:23). Ләма жи мер гәрәке жь борще хwә нәрʹәвә, у бь мерхаси сәрwертийа хwә бьqәдинә; әw гәрәке йәки сәрʹт у зöлм нибә, ле дәwсе әw гәрәке бь һʹьзкьрьн бә, öса жи һʹәйф у сәрwахт бә. Әw гәрәке бира хwәда хwәй кә, кö сәрwертийа wи дь малбәтеда бәрамбәри сәрwертийа Йаһоwа нинә у wи ньмьзтьр ә.

13. Ча жьн у де дькарә рола хwәйә малбәтеда öса бьqәдинә, кö дьле Йаһоwа хwәш бе?

¹³ Жьн кʹомәкдара мере хwә йә. Дь малбәтеда сәрwертийа wе жи һәйә, чьмки Кʹьтеба Пироз зарʹарʹа дьбежә, кö «жь һинкарийед дийа хwә нәqәтә» (Мәтʹәлок 1:8). Һәмьки сәрwертийа wе синор кьрийә, чьмки әw сәрwертийа мере хwәва гьредайи йә. Жьн кö Мәсиһи йә, гәрәке али мере хwә бькә, кö әw рола хwә ча сәре малбәте бьqәдинә, у бь ве йәке әw qәдьре сәрwертийа мере хwә дьгьрә. Жьн мере хwә ньмьз накә у нә жи öса дькә wәки сәрwертийа wи бьгьрә дәсте хwә. Ле әw пьшта мере хwә дьгьрә у тʹәви wи шьхöлкʹарийе дькә. Чахе сафикьрьна мере wе ле хwәш найе, һьнге әw дькарә бь мәʹрифәти фькьред хwә мере хwәрʹа бежә, ле диса әw гöрʹа мере хwәда дьминә. Һәрге мере wе нә Шәʹде Йаһоwа йә, һьнге әw дькарә рʹасти чәтьнайа бе, ле бь гöһдарибун у рʹабун-рʹуньштьна хwәйә баш, әw дькарә wи һелан кә, кö әw незики Йаһоwа бә. (Бьхунә 1 Пәтрус 3:1).

14. Ча зарʹ дькарьн дьле де-баве хwә у Йаһоwа ша кьн?

¹⁴ Чахе зарʹ гöрʹа де-баве хwә дькьн, öса әwана дьле Йаһоwа ша дькьн. Һьм жи öса әwана дьле де-баве хwә жи ша дькьн у qәдьре wана бьльнд дькьн (Мәтʹәлок 10:1). Гöһдарибуне әw зарʹ жи нишан дькьн, йед кö тʹәви бав йан де дьминә, чьмки әw фәʹм дькә кö әв де йан бав һе зәʹф һʹәwще кʹомәкдари у пьштгьрийа wи йә. Дь wе малбәтеда, кʹидәре кö һәр кәс ль гора кʹьфшкьрьна Йаһоwа щабдарийа хwә дьqәдинә, әʹдьлайи у шабун һәйә. Әв йәк һöрмәте тинә Әʹфьрандаре һʹәму малбәтарʹа, демәк Йаһоwа Хwәдерʹа (Әфәси 3:14,15).

QӘДЬРГЬРТЬН ДЬ ЩЬВАТЕДА

15. (а) Ча әм дькарьн нишан кьн, кö дь щьватеда qәдьре сәрwертийа Йаһоwа дьгьрьн? (б) Чь принсип wе али мә бькьн, wәки гöһдарийа хwә бьдьнә кʹьфше һьндава wан мәрьва, йед кö рʹебәрийе һьлдьдьнә дәсте хwә? (Бьньһерʹә чаргошә «Гöһдарийа Рʹебәред Хwә Бькьн у Гöрʹа Wанда Бьн»).

¹⁵ Йаһоwа Кöрʹе хwә кьрийә сәрwере щьвата Мәсиһийа (Колоси 1:13). Ле Иса шьхöл да «хöламе амьн у сәрwахт», wәки әwана алийе рʹöһʹанида хәм бькьн бона һʹәwщед щьмәʹта Хwәде (Мәтта 24:45-47). Кʹома Рʹебәрийе йа Шәʹдед Йаһоwа, әв «хöламе амьн у сәрwахт ә». Чаwа дь щьватед Мәсиһийада qьрʹна йәкеда, иро жи рʹуспи рʹебәри у ширәта дьстиньн жь Кʹома Рʹебәрийе, йан бь нәʹма йан жи бь wәкʹила, мәсәлә жь бәрпьрсийаред рʹеви. Чахе әм qәдьре сәрwертийа рʹуспийа дьгьрьн, бь ве йәке әм гöһдарийа хwә һьндава Йаһоwа дьдьнә кʹьфше. (Бьхунә 1 Тʹесалоники 5:12; Ибрани 13:17).

16. Чьма әм дькарьн бежьн кö рʹуспи бь рʹöһʹе пироз тенә кʹьфшкьрьне?

¹⁶ Рʹаст ә рʹуспи у бәрдәстийед щьвате qöсур ьн. У әwана жи мина мә шашийа дькьн. Ле йәкә әwана «пʹешкʹеш бь щурʹе мәрьва нә», йед кö али щьвате дькьн һәләqәтийа хwә тʹәви Йаһоwа qәwи кьн (Әфәси 4:8, ДТʹ). Рʹуспи бь рʹöһʹе пироз тенә кʹьфшкьрьне (Кʹаред Шандийа 20:28). Әм чьма дькарьн öса бежьн? Чьмки пешийа кö бьра бьбьнә рʹуспи, әwана гәрәке wан дәʹwакьрьна пек биньн, чь кö бь рʹöһʹе пироз дь Хәбәра Хwәдеда һатьбу ньвисаре (1 Тимотʹейо 3:1-7, 12; Тито 1:5-9). Чахе рʹуспи дьвиньн кö әw бьра анәгори wан дәʹwакьрьна дькә, wи чахи әwана Йаһоwарʹа бь дьл у щан дöа дькьн бона рʹебәрийа рʹöһʹе Йаһоwайи пироз.

17. Чьма хушк чахе һьнә щабдарийа дьqәдиньн, сәре хwә гьредьдьн,?

¹⁷ Щарна дькарә öса бьqәwьмә кö дь щьватеда рʹуспи у бәрдәстийед щьвате тʹöнә бьн, сәва кö борще хwә бьqәдиньн. Мәсәлә щьвате сәва даннасинкьрьне дәрбаз кьн. Һьнге бьредед майин, йе ньхöманди дькарьн әви борщи бьqәдиньн. Һәрге бьред öса жи тʹöнә нә, һьнге әве щабдарийе дькарьн хушкед лайиq бьqәдиньн. Ле чахе хушк щабдарийед öса дьqәдинә кö бьрайе ньхöмандирʹа дькʹәвә, һьнге әw гәрәке сәре хwә гьредә (1 Корьнтʹи 11:3-10).a Бь ве йәке, әw ньмьз набә. Әw мәщале дьстинә кö qәдьре сәрwертийе бьдә кʹьфше, йе кö Йаһоwа чаwа дь малбәтеда öса жи дь щьватеда кʹьфш кьрийә.

QӘДЬРГЬРТЬН ҺЬНДАВА ҺʹÖКÖМӘТИЙА

18, 19. (а) Ча тö шьровәки принсипед жь кʹьтеба Рʹомайи 13:1-7? (б) Ча әм дькарьн һьндава һʹöкöмәтийа qәдьр нишан кьн?

¹⁸ Мәсиһийед рʹаст бь исафа тʹәмьз хwә ль wан принсипа дьгьрьн, йед кö дь кʹьтеба Рʹомайи 13:1-7-да ньвисар ьн. (Бьхунә). Һʹәта кö Йаһоwа дьһелә кö һʹöкöмәти һәбьн, әwана шьхöлед фәрз дькьн, мәсәлә мьqат дьбьн кö һʹәму тьшт щийе хwәда бә у бь пʹәргали бә, öса жи хәм дькьн дәрһәqа щурʹә-щурʹә һʹәwщедед бажарванед хwә. Әме бьдьнә кʹьфше кö qәдьре һʹöкöмәтийа дьгьрьн, һәрге qануна бьqәдиньн. Мәсәлә, әм бь исафа тʹәмьз һʹәму хәрще дәwләте дьдьн, öса жи һʹәму кʹахаз у документед кö дәwләт жь мә дәʹwа дькә, әм рʹаст тʹьжә дькьн у щурʹә-щурʹә qануна жи дьqәдиньн, чь кö гьредайи йә тʹәви мә, малбәта мә, хәбат у һәбука мә. Ле чахе һʹöкöмәти жь мә дәʹwа дькә кö мьqабьли qануна Хwәде тьштәки бькьн, һьнге әм гöрʹа wана накьн. Әм хwә wәк шандийа кʹьфш дькьн, йед кö готьн: «Әм гәрәке гöрʹа Хwәде бькьн, нә кö йа мәрьва» (Кʹаред Шандийа 5:28, 29; бьньһерʹә чаргошә «Әз Гәрәке Тʹәсмили Сәрwертийа Кʹе Бьм?»).

¹⁹ Qәдьргьртьна мә һьндава һʹöкöмәтийе wе йәкеда те кʹьфше, һәла әм һьмбәри мәрьва чаwа ньн. Щарна дькарә бьqәwьмә кö шьхöле мә тʹәви хьзмәтчийед дәwләте һәбә. Паwлосе шанди рʹасти сәрwеред öса дьһат чаwа Һеродәс Әгрипа пʹадша у Фестойе сәрwер. Рʹаст ә әв мәрьв шашийед гьран дькьрьн, ле йәкә Паwлосе шанди бь qәдьр тʹәви wан хәбәр дьда (Кʹаред Шандийа 26:2, 25). Әм жи гәрәке мина Паwлос, бь qәдьр хәбәр дьн тʹәви һʹәму мәрьва, фьрqи тʹöнә әw сәрwер бә, йан полис бә. Дь мәкʹтәбеда Мәсиһийед щаһьл жи qәдьргьртьна хwә дьдьнә кʹьфше һьндава дәрсдара, сәрwере мәкʹтәбе у хәбатчийед майин. Һәмьки әм нә кö тʹәне һьндава wан мәрийа qәдьр нишан дькьн кʹи кö һʹәбандьна мә qәбул дькә, ле һьндава мьqабьла жи. Бь рʹасти жи, мәрьвед кö нә Шәʹдед Йаһоwа нә, гәрәке бьвиньн wәки әм qәдьре wан жи дьгьрьн. (Бьхунә Рʹомайи 12:17, 18; 1 Пәтрус 3:15.)

20, 21. Әме чь кʹәрәма бьстиньн, һәрге qәдьре һʹöкöмәтийе бьгьрьн?

²⁰ Wәрен әм һәр гав һазьр бьн qәдьргьртьне бьдьнә кʹьфше. Паwлосе шанди ньвиси: «Qәдьре һʹәмуйа бьгьрьн» (1 Пәтрус 2:17). Чахе мәри дьвиньн кö тö qәдьре wан дьгьри, әв йәк дькарә ль сәр wана баш һʹöкöм кә. Бьзаньбә кö һьндьк ьн әw мәрьв, йед кö qәдьргьртьне дьдьнә кʹьфше. У һәрге әм qәдьре мәрийа заньн, һьнге әм дина хwә дьдьн ль сәр тʹәмийа Иса Мәсиһ «бьра рʹонайа wә бәр мәрьва шәwq бьдә, кö әwана кьрьнед wәйә qәнщ бьвиньн у пәсьне Баве wәйи әʹзмана бьдьн» (Мәтта 5:16).

²¹ Рʹожа иро мәрьвед мьлук незики рʹастийа Хwәде дьбьн. Ләма жи, чахе әм qәдьргьртьне нишан дькьн дь малбәтеда, дь щьватеда у щийед дьнда, әв йәк дькарә һʹöкöм кә ль сәр һьнә мәрийа у wана һелан кә тʹәви мә Хwәдерʹа хьзмәт кьн. Бь рʹасти жи әв qәдьрәки пʹьрʹ мәзьн ә! Ле һәрге ль сәр мәрийа әв йәк һʹöкöм нәкә жи, әм диса жи qәдьргьртьна хwәйә һьндава мәрийа нишан кьн, чьмки öса әм дьле Йаһоwа ша дькьн у али хwә дькьн кö нава һʹьзкьрьна wида бьминьн. Жь wе четьр ида чь һәйә?