Һʹьзкьрьна Хԝәде Һʹәта-һʹәтайе Йә

1, 2. Чьрʹа тӧ Хԝәде Йаһоԝа һʹьз дьки?

ТӦ ХԜӘДЕ һʹьз дьки? Һәрге тә әʹмьре хԝә тʹәсмили ԝи кьрийә, әԝ йәк дьдә кʹьфше кӧ тӧ ԝи һʹьз дьки у һʹәсаб дьки ча Досте хԝәйи незик. Ле пешийа кӧ тә Хԝәде һʹьз кьра, әԝи тӧ һʹьз кьри. Жь Кʹьтеба Пироз әм дьхуньн: «Әм һʹьз дькьн, чьмки әԝи пешда әм һʹьзкьрьн» (1 Йуһʹәнна 4:19).

² Бьфькьрә дәрһәԛа ԝе йәке, Йаһоԝа һʹьзкьрьне чь щурʹәйи мәрʹа дьдә кʹьфше. Әԝи маләкә бәдәԝ дайә мә, демәк әʹрд у һәр тьштед сәр, сәва кӧ әм жь жийине шабуне бьстиньн (Мәтта 5:43-48; Әʹйанти 4:11). Йаһоԝа дьхԝазә, ԝәки һәләԛәтийа мә тʹәви ԝи незик бә, у сәва ԝе йәке әԝи мәщал да мә, кӧ һе зедә дәрһәԛа ԝи пебьһʹәсьн. Чахе әм Кʹьтеба Пироз дьхуньн, бь ԝе йәке әм гӧһ дьдьнә Йаһоԝа. Ле чахе әм дӧа дькьн, әԝ гӧһ дьдә мә (Зәбур 65:2). Йаһоԝа бь сайа рʹӧһʹе хԝәйи пироз рʹебәрийе у ԛәԝате дьдә мә (Луԛа 11:13). Әԝи һәла һе Кӧрʹе хԝәйи һʹьзкьри жи шандә сәр әʹрде, ԝәки мә жь гӧнә у мьрьне аза кә. (Бьхунә Йуһʹәнна 3:16; Рʹомайи 5:8.)

3. Чаԝа әм дькарьн һәләԛәтийа незик тʹәви Йаһоԝа хԝәй кьн?

³ Һәла бьфькьрә дәрһәԛа һәвале хԝәйи незик, йе кӧ ԝәʹде баш у ԝәʹде чәтьн жи тʹәви тә бу. Лазьм ә ԛәԝате бьдьнә хәбате, ԝәки һәвалтийа незик ԛәԝи хԝәй кьн. Әԝе йәке әм дькарьн бежьн дәрһәԛа достийа мә тʹәви Йаһоԝа, кʹижан кӧ дькарә бьбә Досте мәйи лапи незик. Достийа мә тʹәви ԝи дькарә һʹәта-һʹәтайе бә. Кʹьтеба Пирозда те готьне: «Хԝә нава ԝе һʹьзкьрьна Хԝәдейә һьндава хԝәда хԝәй кьн» (Щьһуда 21). Ча әм дькарьн әԝе йәке бькьн? Кʹьтеба Пироз щаба ԝе пьрсе дьдә: «Бь ве йәке әм һʹьзкьрьна хԝә һьндава Хԝәдеда дьдьнә кʹьфше, гава әм тʹәмийед ԝи дьԛәдиньн. У тʹәмийед ԝи нә гьран ьн» (1 Йуһʹәнна 5:3).

«БЬ ВЕ ЙӘКЕ ӘМ ҺʹЬЗКЬРЬНА ХԜӘ ҺЬНДАВА ХԜӘДЕДА ДЬДЬНӘ КʹЬФШЕ»

4, 5. а) Чь те һʹәсабе «һʹьзкьрьна хԝә һьндава Хԝәдеда»? б) Чаԝа һʹьзкьрьна тә һьндава Йаһоԝа зедә дьбу?

⁴ Кʹьтеба Пироз бь ван гьлийа «һʹьзкьрьна хԝә һьндава Хԝәдеда», чь дьхԝазә бежә? Әԝ набежә дәрһәԛа һʹьзкьрьна Хԝәде һьндава мә, ле дәрһәԛа һʹьзкьрьна мә һьндава ԝи. Ле те бира тә кʹәнге һʹьзкьрьна тә һьндава Йаһоԝа пешда һат?

⁵ Һәла бинә бира хԝә, тә чь сәр хԝә тʹәхмин кьр, гава тә щара пешийе бьһист, ԝәки Йаһоԝа дьхԝазә тӧ һʹәта-һʹәтайе сәр әʹрде щьнәт бьжийи. У тӧ пеһʹәсийайи кӧ Йаһоԝа сәва ԝе йәке чь кьр. Тә фәʹм кьр, ԝәки Йаһоԝа пʹешкʹешәкә чьԛас ԛимәт да мә, гава Кӧрʹе хԝәйи һʹьзкьри шандә сәр әʹрде (Мәтта 20:28; Йуһʹәнна 8:29; Рʹомайи 5:12, 18). Чахе тӧ пеһʹәсийайи, ԝәки Йаһоԝа чьԛас тә һʹьз дькә, әԝе йәке дьле тә гьрт у һʹьзкьрьна тә һьндава ԝи дьһа зедә бу. (Бьхунә 1 Йуһʹәнна 4:9, 10.)

6. Чь те һʹәсабе кәсәки һʹьз бьки? Һʹьзкьрьна һьндава Йаһоԝа, тә һелан дькә чь бьки?

⁶ Чахе тӧ тʹәхмин дьки, кӧ һʹьзкьрьна тә һәйә һьндава Хԝәде, әԝ тʹәне дәстпебун ә. Мәсәлә, кʹәнге әм кәсәки һʹьз дькьн, әм нә тʹәне дьбежьн «әз тә һʹьз дькьм». Ле һʹьзкьрьн һелане дьдә мә, кӧ ԝе йәке бькьн, чь кӧ ԝи кәси дькарә ша кә. Бь ԝи щурʹәйи, һʹьзкьрьна тә һьндава Йаһоԝа ԝе һелане бьдә тә, ԝәки тӧ ӧса бьжийи, чаԝа кӧ ԝи хԝәш те. Чахе һʹьзкьрьна тә мәзьн бә, тӧйе сафи ки хԝә тʹәсмили Йаһоԝа бьки у бейи ньхӧмандьне. Гава тӧ әԝе йәке бьки, ӧса тӧйе соз бьди Йаһоԝа, ԝәки те һʹәта-һʹәтайе ԝирʹа хьзмәт ки. (Бьхунә Рʹомайи 14:7, 8.) Ле чаԝа тӧ дькари созе хԝә бини сери?

«ӘМ ТʹӘМИЙЕД ԜИ ДЬԚӘДИНЬН»

7. Һәрге әм Йаһоԝа һʹьз дькьн, демәк әм гәрәке чь бькьн? Һьнә жь тʹәмийед ԝи кʹижан ьн?

⁷ Әм Йаһоԝа һʹьз дькьн, ләма жи «тʹәмийед ԝи дьԛәдиньн». Жь Кʹьтеба Пироз әм педьһʹәсьн, ԝәки Йаһоԝа дьхԝазә әм ча бьжин. Мәсәлә, әԝ ԛәдәхә дькә гәләк ичʹке вәхԝьн, дьзийе, дәрәԝа у бенамусийе бькьн, ӧса жи сәре хԝә бәр тьштәки йан кәсәки дьн дайньн, хенщи Йаһоԝа (1 Корьнтʹи 5:11; 6:18; 10:14; Әфәси 4:28; Колоси 3:9).

8, 9. Чаԝа әм дькарьн ньһерʹандьна Йаһоԝа пебьһʹәсьн, һәрге дәрәща мә ӧса йә, кӧ Кʹьтеба Пирозда бона ԝе дәрәще ԛанун нәһатийә дайине? Мәсәле бинә.

⁸ Ле сәва кӧ әм Йаһоԝа хԝәш бен, бәс нинә тʹәне гӧһ бьдьнә тʹәмийед ԝи. Әԝи бона һʹәму дәрәщед әʹмьре мә ԛанун нәдайә. Щарна әме бькʹәвьнә дәрәщед ӧса, кӧ Кʹьтеба Пирозда найе готьне, ԝәки әм гәрәке чь бькьн. Дәрәщед ӧсада әм ча дькарьн сафикьрьнед рʹаст бькьн? (Әфәси 5:17). Жь Кʹьтеба Пироз әм дькарьн пебьһʹәсьн дәрһәԛа ԝан принсипа, йед кӧ һʹиме рʹастийед сәрәкә нә у ньһерʹандьна Йаһоԝа мәрʹа әʹйан дькьн. Чахе әм Кʹьтеба Пироз дьхуньн, әм дәстпедькьн Йаһоԝа рʹьнд нас кьн. Әм педьһʹәсьн чаԝа Йаһоԝа дьфькьрә, чь һʹьз дькә у чь бәр чʹәʹве ԝи рʹәш ә (Бьхунә Зәбур 97:10; Мәтʹәлок 6:16-19; бьньһерʹә Әʹламәтийа Зедә 1).

⁹ Мәсәлә, әм ча сафи дькьн, кӧ жь телевизийон йан жь интернете чь бьньһерʹьн? Йаһоԝа рʹастә-рʹаст набежә чь әм гәрәке бькьн. Ле бь сайа принсипед хԝә, әԝ али мә дькә сафикьрьнед рʹаст бькьн. Ԝәʹдәдәрбазкьрьнед рʹожа иройинда гәләк зӧлми у бенамуси һәнә. Жь Кʹьтеба Пироз әм педьһʹәсьн, ԝәки Йаһоԝа «дьжәнә нәпʹак у йе зӧлме һʹьз дькә» у ԝәки әԝ «ԝе диԝана чʹәʹвдәр у зьнекʹара бькә» (Зәбур 11:5; Ибрани 13:4). Чаԝа әԝ принсип али мә дькьн сафикьрьнед рʹаст бькьн? Чахе әм заньн, ԝәки Йаһоԝа фьлан тьшти нәфрʹәт дькә, йан һʹәсаб дькә ча бенамуси, әм гәрәке хԝә жь ԝи тьшти дур бьгьрьн.

10, 11. Чьрʹа әм гӧрʹа Йаһоԝа дькьн?

¹⁰ Чьрʹа әм гӧрʹа Йаһоԝа дькьн? Әм гӧрʹа Йаһоԝа дькьн нә жь бо ԝе йәке, кӧ әм дьтьрсьн бенә щәзакьрьне йан жи рʹасти ԝан чәтьнайа бен, кʹижан кӧ ԝе жь бо сафикьрьнед мәйә нәрʹаст бьн (Галати 6:7). Ле әм гӧрʹа Йаһоԝа дькьн, чьмки ԝи һʹьз дькьн. Чаԝа зарʹ дьхԝазә дьле баве хԝә ша кә, ӧса жи әм дьхԝазьн дьле Баве хԝәйи әʹзмана ша кьн. Гава тӧ зани, ԝәки Йаһоԝа тә ԛәбул дькә, ԝе йәке четьр тӧ тьшт тʹӧнә! (Зәбур 5:12; Мәтʹәлок 12:2; бьньһерʹә Әʹламәтийа Зедә 2).

¹¹ Әм гӧрʹа Йаһоԝа дькьн нә тʹәне ԝи чахи, гава мәрʹа һеса йә, йан жь бо ԝе йәке кӧ тʹӧ рʹекә дьн тʹӧнә. Әм ԛанунед ԝи нажберьн, кӧ кʹижане бьԛәдиньн у кʹижане на (Ԛануна Дӧщари 12:32). Ле әм бь тʹәмами гӧһ дьдьнә һʹәму тʹәмийед ԝи, мина зәбурбеж йе кӧ ньвиси: «Әʹмьред Тәрʹа әзе ша бьм, кʹижана кӧ әз һʹьз дькьм» (Зәбур 119:47; Рʹомайи 6:17). Әм дьхԝазьн мина Нӧһ бьн, йе кӧ һʹәму тʹәмийед Йаһоԝа дьани сери у бь ԝе йәке һʹьзкьрьна хԝә һьндава ԝи әʹйан дькьр. Кʹьтеба Пирозда дәрһәԛа Нӧһ те готьне, ԝәки «әԝи ӧса жи кьр» (Дәстпебун 6:22). Гәло тӧ дьхԝази, ԝәки Йаһоԝа дәрһәԛа тә жи ӧса бежә?

12. Чаԝа әм дькарьн дьле Йаһоԝа ша кьн?

¹² Чь Йаһоԝа тʹәхмин дькә, чахе әм гӧрʹа ԝи дькьн? Бь ԝе йәке әм дьле ԝи ша дькьн (Мәтʹәлок 11:20; 27:11). Һәла бьдә бәр чʹәʹве хԝә! Әм дьле Әʹфьрандаре әʹрд у әʹзмана ша дькьн, гава гӧрʹа ԝи дькьн. Ле әԝ тʹӧ щар зоре мә накә әԝе йәке бькьн, чьмки әԝи азайа бьжартьне дайә мә. Әԝ те һʹәсабе, ԝәки әм хԝәха дькарьн бьжберьн, кӧ тьштед рʹаст йан тьштед нәрʹаст бькьн. Йаһоԝа дьхԝазә, ԝәки һʹьзкьрьна мә һьндава ԝи мә һелан кә, сафикьрьнед рʹаст бькьн, сәва бәхтәԝар бьн (Ԛануна Дӧщари 30:15, 16, 19, 20; бьньһерʹә Әʹламәтийа Зедә 3).

«ТʹӘМИЙЕД ԜИ НӘ ГЬРАН ЬН»

13, 14. Әм жь кʹӧ заньн, ԝәки тʹәмийед Йаһоԝа нә гьран ьн, сәва биньн сери? Мәсәле гьли кә.

¹³ Ле һәрге әм дьфькьрьн, ԝәки тʹәмийед Йаһоԝа мә дькьнә нав синора у чәтьн ә гӧһ бьдьнә ԝан? Кʹьтеба Пирозда әʹйан те готьне: «Тʹәмийед ԝи нә гьран ьн» (1 Йуһʹәнна 5:3). Рʹезед дьнда хәбәра Йунани, кӧ те һʹәсабе «гьран», те хәбьтандьне чахе дәрһәԛа сәрԝере нәбаш те гьликьрьне, йе кӧ зийане дьдә мәрьва (Мәтта 23:4; Кʹаред Шанди йа 20:29, 30). Ле тʹәмийед Йаһоԝа нә гьран ьн, демәк чәтьн нинә ԝан тʹәмийа биньн сери. Һәр тʹәмийед ԝи кʹаре мәрʹа тиньн.

¹⁴ Бәʹса хәбәре, тӧ али һәвале хԝә дьки, ԝәки әԝ дәрбази мала тʹәзә бә. Әԝи һур-муре хԝә кьрийә ԛӧтʹийада. Һьнәк жь ԝан ԛӧтʹийа сьвьк ьн, ле һьнәк гьран ьн у сәва вана һьлдьн дӧ мәрьв лазьм ьн. Гәло һәвале тә ԝе тәрʹа бежә, ԝәки ԛӧтʹийа гьран һьлди? Һәмьки на! Ле чьрʹа? Чьмки әԝ нахԝазә, ԝәки тӧ зийане бьстини. Мина ԝи һәвали, Йаһоԝа жи тʹӧ щар ԝе жь мә дәʹԝа нәкә ве йәке бькьн, чь кӧ дькарә зийане бьдә мә (Ԛануна Дӧщари 30:11-14). Йаһоԝа занә ԛәԝата мә чьԛас ә. «Әԝ занә . . . у бир тинә кӧ әм хали нә» (Зәбур 103:14).

15. Чьрʹа әм дькарьн баԝәр бьн, ԝәки тʹәмийед Йаһоԝа бона мә керһати нә?

¹⁵ Муса готә щьмәʹта Исраеле, ԝәки әм гәрәке бь нормед Йаһоԝа бьжин, сәва кӧ «тʹәмамийа рʹожед мәда мәрʹа ԛәнщ бә» у әԝ мә «сах бьһелә» (Ԛануна Дӧщари 5:28-33; 6:24). Әԝ тʹәми бона мәйә жи. Чь кӧ Йаһоԝа жь мә дәʹԝа дькә, гьшк бона кʹара мә йә. (Бьхунә Ишайа 48:17.) Баве мә Йаһоԝа занә кӧ бона мә чь йә лапә баш (Рʹомайи 11:33). Кʹьтеба Пирозда те готьне: «Хԝәде һʹьзкьрьн ә» (1 Йуһʹәнна 4:8). Һʹәму тьштед кӧ Йаһоԝа дьбежә у дькә, жь бо һʹьзкьрьна ԝи йә.

16. Рʹаст ә әм гӧнәкʹар ьн у дьнйа зӧлмда дьжин, ле чьма әм баԝәр ьн, ԝәки дькарьн гӧрʹа Хԝәдеда бьминьн?

¹⁶ Тʹьме һеса нинә гӧрʹа Хԝәде бькьн. Әм дьжин дьнйа зӧлмда, сәрԝере кʹижани Мире-щьна йә. Әԝ сәр мәрьва һʹӧкӧм дькә, ԝәки әԝана хьрабийе бькьн (1 Йуһʹәнна 5:19). Әм ӧса жи гәрәке мьԛабьли һәст у фькьред хԝәйи нәрʹаст шәрʹ кьн, йед кӧ дькарьн мә бәрбь гӧнә бьвьн у мьԛабьли Хԝәде дәрхьн (Рʹомайи 7:21-25). Ле һʹьзкьрьна мә һьндава Йаһоԝа, али мә дькә ԝан тьшта бькьн чь кӧ рʹаст ә. Әԝ дьвинә, ԝәки әм чьԛас ԛәԝат дьдьнә хәбате, сәва кӧ гӧрʹа ԝида бьминьн, ләма жи әԝ али мә дькә, демәк рʹӧһʹе пироз дьдә мә (1 Самуйел 15:22, 23; Кʹаред Шандийа 5:32). Әм дькарьн бь сайа рʹӧһʹе пироз хәйсәт-һʹӧнӧред ӧса нав хԝәда пешда биньн, йед кӧ али мә дькьн гӧрʹа Хԝәдеда бьминьн (Галати 5:22, 23).

17, 18. а) Жь ве әʹдәбйәте әме чь һин бьн? б) Сәре дьнда әме дәрһәԛа чь шеԝьр кьн?

¹⁷ Жь ԝе әʹдәбйәте, әме пебьһʹәсьн, ԝәки әм чь щурʹәйи гәрәке бьжин, сәва кӧ Хԝәде хԝәш бен. Әме ӧса жи пебьһʹәсьн чаԝа ширәт у принсипед ԝи, әʹмьре хԝәйи шәхсида бьдьнә хәбате. Бир нәкьн, ԝәки Йаһоԝа тʹӧ щар зоре мә накә, кӧ гӧһдарийа ԝи бькьн. Һәрге әм сафи дькьн гӧрʹа ԝи бькьн, әʹмьре мә ԝе дьһа баш бә у ахьрийа баш жи һивийа мә бә. Йа лапә фәрз әԝ ә, ԝәки гӧһдарикьрьна мә дьдә кʹьфше, кӧ әм чьԛас зәʹф Хԝәде һʹьз дькьн. (Бьньһерʹә Әʹламәтийа Зедә 4.)

¹⁸ Хԝәде мәрʹа исаф дайә, сәва әм бькарьбьн рʹастийе у хьрабийе жь һәв дәрхьн. Чахе әм исафа хԝә һин дькьн, әԝ йәк али мә дькә тʹәмийед Йаһоԝа бьԛәдиньн. Гәло исафа мә чь щурʹәйи йә у чаԝа әм дькарьн ве һин кьн? Ԝәрә әм пебьһʹәсьн.