Бәрдәwам кьн бь Шабуне Йаһоwарʹа Хьзмәт кьн
БЬФЬКЬРӘ дәрһәqа ве рʹожа кӧ тӧ пʹьрʹ шабуйи. Дьбәкә әw рʹож бу чахе тӧ зәwьщийи йан чахе зарʹа тәйә пешьн һатә буйине. Йан жи әw рʹожа кӧ тә хwә тʹәсмили Йаһоwа кьр у һати ньхӧмандьне. Дьбәкә чахе тӧ әве рʹоже тини бира хwә, тӧ һʹәсаб дьки кӧ әw рʹожәкә лапә фәрз у пʹьрʹ ша бу. У хушк-бьра чьqас ша бун, чахе дитьн кӧ тӧ бь ньхӧмандьне әʹйан избат дьки кӧ Хwәде һʹьз дьки бь тʹәмамийа дьле хwә, бь тʹәмамийа щанийа хwә, бь тʹәмамийа һʹьше хwә у бь тʹәмамийа qәwата хwә (Марq. 12:30).
Бәле, һьнгеда чахе тӧ һати ньхӧмандьне, тӧ шабунәкә мәзьн дьстини жь хьзмәткьрьна хwә Йаһоwарʹа. Ле һьнә мьзгинванед Пʹадшатийе әв шабуна кӧ пешийе щәм wан һәбу ӧнда кьрьнә. Ле гәло чьрʹа әw йәк дьqәwьмә? У кʹижан мәʹнийед мә һәнә кӧ диса бәрдәwам кьн бь шабуне Йаһоwарʹа хьзмәт кьн?
ЧЬРʹА ҺЬНӘКА ШАБУНА ХWӘ ӦНДА КЬРЬНӘ
Бешьк, мьзгина Пʹадшатийе бона мә мәʹнийа шабуна мәзьн ә. Чьмки әw соз дьдә кӧ Йаһоwа wе зутьрәке хьлазийа ве дьнйа зӧлм бинә у wе дьнйа тʹәзә бе. Сефанйа 1:14 мә дьлгәрм дькә: «Рʹожа мәзьн йа Хӧдан нез ә [незик ә], нез ә у зәʹф бьләзи те, дәнге рʹожа Хӧдан!» Әм гәләк һивийа wе рʹоже нә. Ле дьбәкә әм һивийе нибун кӧ wе һаqас дьреж бькʹьшинә. У ләма жи дькарә ӧса бьqәwьмә кӧ әм шабуна хwәйә пешийе ӧнда кьн у ӧса жи хьзмәткьрьнеда сьст бьн (Мәтʹлк. 13:12).
Чьмки әм нава щьмәʹта Хwәдеда ньн, әм һелан дьбьн кӧ бәрдәwам кьн Йаһоwарʹа бь шабуне хьзмәт кьн. Дьбәкә рʹабун-рʹуньштандьна хьзмәткʹаред Хwәде әм кʹьшандьн бәрбь рʹастийе у али мә кьр кӧ бь шабуне дәстпекьн Хwәдерʹа хьзмәт кьн (1 Пәт. 2:12). Ле чь дькарә бьqәwьмә һәрге Мәсиһик бь принсипед Хwәде нажи? Һьнге, әwед кӧ рʹабун-рʹуньштандьна щьмәʹта Йаһоwайә баш дитьн у һатьнә нава рʹастийе, дькарьн дьлтәнг бьн у шабуна хwә ӧнда кьн.
Әw дьнйа Шәйтʹанә зӧлм жи, кʹижан кӧ һәбуне у комерсийайе реклам дькә, дькарә шабуне жь мә бьстинә. Мире-щьн бь ве дьнйа хwә дьхwазә мә бьдә баwәркьрьне кӧ әм һʹәwще wан тьшта нә, кʹижан кӧ бь рʹастийе мәрʹа лазьм ниньн. Ле wе баш бә кӧ әм тʹьме ван гьлийед Иса бира хwәда хwәй кьн: «Тʹӧ кәс нькарә дӧ ахарʹа хӧламтийе бькә, чьмки йан wе һʹиле wи жь йәки һәрʹә у йе дьне һʹьз бькә, йан жи wе qәдьре йәки бьгьрә у йе дьне беһӧрмәт кә. Һун нькарьн һьн Хwәдерʹа, һьн жи һәбукерʹа хӧламтийе бькьн» (Мәт. 6:24). Демәк, әм нькарьн һьн Хwәдерʹа бь шабуне хьзмәт кьн, һьн жи пәй тьштед ве дьнйайе кʹәвьн.
ША ДЬБЬН БЬ ХWӘДЕЙЕ МӘ ХЬЛАЗКʹАРРʹА
Кʹе кӧ Йаһоwа һʹьз дькә, бона wи баргьрани нинә кӧ Йаһоwарʹа хьзмәт кә (1 Йуһʹн. 5:3). Биньн бира хwә Иса чь гот: «Wәрьнә щәм мьн һʹәмуйед wәстийайи у баргьран у әзе рʹьһʹәтийе бьдьмә wә. Нире мьн һьлдьнә сәр хwә у жь мьн һин бьн, чьмки әз шкәсти мә у дьлмьлаһим ьм у һуне хwәрʹа рʹьһʹәтийе бьбиньн. Чьмки нире мьн рʹьһʹәт ә у баре мьн сьвьк ә» (Мәт. 11:28-30). Нире кӧ шагьртед Мәсиһи һьлдьдьнә сәр хwә рʹьһʹәтийе у шабуне тинә. У бь рʹастийе мәʹни һәйә кӧ әм бәхтәwар ьн кӧ Йаһоwарʹа хьзмәт дькьн. Wәрә әм шеwьр кьн се мәʹнийед фәрз, кӧ чьрʹа әм дькарьн ша бьн бь Хwәдайе мә Хьлазкʹаррʹа (Һәбq. 3:18).
Әм хьзмәт дькьн Хwәдайе бәхтәwаррʹа, йе кӧ әʹмьр дьдә (Кʹар. Шанд. 17:28; 1 Тимтʹ. 1:11). Әм фәʹм дькьн кӧ әм бь сайа Хwәде дьжин. Ләма әм бәрдәwам дькьн wирʹа бь шабуне хьзмәт кьн, у фьрqи тʹӧнә әм чьqас wәхт ньхӧманди нә.
Һектор шабуна хwә хwәй дькә чьмки бира wида ньн созед Пʹадшатийе у чьмки әw шьхӧле Хwәдеда тʹьме кʹар дькә
Wәрә шеwьр кьн мәсәла Һектор, йе кӧ 40 сали чаwа бәрпьрсийаре мьһале хьзмәт кьрийә. Әw һәла һе wәʹде әʹмьре хwәйи мәзьн жи гәш ә (Зәб. 92:12-14). Һектор жь бо бесьһʹәтбуна жьна хwә, ида һаqас нькарьбу Хwәдерʹа хьзмәт кьра. Ле әwи шабуна хwә ӧнда нәкьр. Әw дьбежә: «Рʹаст ә гәләк чәтьн ә бьвиньм кӧ сьһʹәт-qәwата жьна мьн һе хьраб дьбә, у гәләк чәтьн ә мьqати wе бьм, ле мьн нәһишт кӧ әw чәтьнайи шабуне жь мьн бьстинә хьзмәткьрьнеда йа Хwәдейе рʹастрʹа. Әз заньм кӧ Йаһоwа әʹмьр дайә мьн, у әw йәк мьн һелан дькә кӧ әз qайим wи һʹьз кьм, у бь дьл у щан wирʹа хьзмәт кьм. Әз ӧса дькьм кӧ шьхӧле бәлакьрьна мьзгинеда кʹар бькьм, у әз һʹьше хwәда бәре әʹwльн созед Пʹадшатийе хwәй дькьм, сәва кӧ шабуна хwә ӧнда нәкьм».
Йаһоwа Кӧрʹе хwә qӧрбан кьр, сәва кӧ әм бькарьбьн бь жийина бәхтәwар бьжин. Бь рʹастийе жи, «Хwәде ӧса дьнйа һʹьз кьр, кӧ Кӧрʹе хwәйи тайе тʹәне бәрва да, wәки һәр кәсе кӧ wи баwәр бькә ӧнда нәбә, ле жийина wийә һʹәта-һʹәтайе һәбә» (Йуһʹн. 3:16). Гӧнед мә дькарьн бенә бахшандьне у әм дькарьн жийина һʹәта-һʹәтайе бьстиньн, һәрге әм баwәр дькьн qӧрбана Иса, йе кӧ Хwәде жь бо һʹьзкьрьне да. Гәло әw йәк мәщал нинә кӧ әм гәләк рʹази бьн жь Хwәде? У гәло рʹазибуна мә һьндава ве qӧрбане гәрәке мә һелан накә кӧ Йаһоwарʹа бь шабуне хьзмәт кьн?
Щесус жийина хwә һеса кьр у әw бь сала Йаһоwарʹа бь шабуне хьзмәт дькә
Бьраки жь Мәксикайе кӧ наве wи Щесус ә, гот: «Әз хӧламе хәбата хwә бум, щара әз һәла һе рʹож пәй рʹожерʹа бе һʹәмде хwә гәләк сьһʹәта дьхәбьтим, ле йәкә һʹәwщәти нибу ӧса бьхәбьтьм. Мьн тʹәне дьхwаст кӧ һе зедә пʹәра чекьм. Паше, әз пеһʹәсийам дәрһәqа Йаһоwа, у кӧ ча әwи Кӧрʹе хwәйи дәлал qӧрбан да бона инсанәте. Бал мьн хwәстьна qайим пешда һат кӧ wирʹа хьзмәт кьм. Ләма мьн әʹмьре хwә тʹәсмили Йаһоwа кьр, у паши 28 сале дь компанйайеда, мьн сафи кьр кӧ әве хәбате бьһельм у дәстпекьм хьзмәткьрьна һәртʹьм. Әw хьзмәткьрьна Йаһоwарʹа бу дәстпека салед мьнә бәхтәwар».
Әw бәр кʹижан кӧ әм тиньн, мәрʹа шабуне тинә нә кӧ дьлтәнги. Те бира тә кӧ әʹмьре тә чаwа бу, пешийа кӧ тә Йаһоwа нас кьра? Паwлосе шанди ани бира Мәсиһийед Рʹоме кӧ әwана «wәхтәке хӧламед гӧнә бун», ле паше «бунә хӧламед рʹастийе». Wана «бәре һʹәлалийә» дьанин, кʹижан кӧ wе жийина һʹәта-һʹәтайе бинә (Рʹом. 6:17-22). Әм пәй wе рʹийа пироз дьчьн, йе кӧ аза йә жь дьлтәнгийе, кʹижан кӧ жь кьред хьраб у бенамуси пешда те. Бь рʹастийе жи әw йәк мәʹнийа шабуне йә!
«Салед мьнә бәхтәwар әw бун, кʹижан кӧ мьн хәрщ кьр хьзмәткьрьна Йаһоwарʹа» (Щеим).
Wәрә әм шеwьр кьн мәсәла дәрһәqа Щеим, йе кӧ атеист у еволусйонист бу, у ӧса жи кӧ бокс дьлист. Щеим дәстпекьр бе сәр щьвина Мәсиһити у гәләк дьле wи гьрт кӧ ча щьватеда һʹьзкьрьн дьданә кʹьфше һьндава wи. Сәва кӧ Щеим жийина хwә бьгӧһезә, wирʹа лазьм бу кӧ жь Йаһоwа һиви кә, сәва кӧ әw али wи бькә кӧ Wи баwәр кә. Щеим дьбежә: «Һеди-һеди, мьн фәʹм кьр кӧ бь рʹастийе Баве һʹьзкьри у Хwәдейе рʹәʹм һәйә. Чахе мьн принсипед Йаһоwа дьани сери, әwе йәке әз хwәй дькьрьм. Һәрге әз нәһатама гӧһастьне, ньһа әз кӧшти бум, чаwа кӧ һьнә һәвалед мьнә бәре йе кӧ бокс дьлистьн. Салед мьнә бәхтәwар әw бун, кʹижан кӧ мьн хәрщ кьр хьзмәткьрьна Хwәдерʹа».
БӘРДӘWАМ КЬН ШАБУНА ХWӘ ХWӘЙ КЬН
Әм һивийе нә чахе хьлазийа ве дьнйа зӧлм бе. Ләма әм гәрәке чь бькьн? Биньн бира хwә, кӧ әм «бона рʹӧһʹ» дьчиньн у әме «жийина һʹәтаһʹәтайе» бьчьньн. Ләма, әм гәрәке «жь qәнщикьрьне жи ащьз нәбьн, чьмки әме wәхтда бьчьньн һәгәр әм нәдьнә дәр» (Галт. 6:8, 9). Тʹәне бь аликʹарийа Йаһоwа әм дькарьн сәбьр кьн, у һʹӧнӧред ӧса нав хwәда пешда биньн, кʹижан мәрʹа лазьм ьн сәва кӧ wәʹде «тәнгасийа мәзьн» хьлаз бьн. У әw ӧса жи дькарә али мә бькә кӧ бь шабуне wирʹа бәрдәwам кьн хьзмәт кьн һәла һе wәʹде чәтьнайа жи (Әʹйан. 7:9, 13, 14; Аqуб 1:2-4).
Әм гәрәке дӧдьли нәбьн кӧ сәбьркьрьна мә wе бе кʹәрәмкьрьне. Чьмки Хwәде рʹьнд занә кьред мә у һʹьзкьрьна мә һьндава wи у наве wи. Һәрге әм бәрдәwам кьн бь шабуне Йаһоwарʹа хьзмәт кьн, әме мина Даwьде зәбурбеж бьн, йе кӧ гот: «Әз һәргав Хӧдан датиньм пеш хwә, жь бәр кӧ жь мьле мьни рʹасте йә, мьн нәди ләрз ль хwә. Жь бәр wе һьндӧре мьн бь кʹеф, дьле мьн ша йә, бәдәна мьн дь әʹwләһийеда йә» (Зәб. 16:8, 9, ИМ).