Йаһоwа Рʹийа Жийинеда Рʹебәрийа Щьмәʹта Хwә Дькә

1, 2. а) Бь сайа чь әʹмьре гәләк мәрьва хьлаз бу? (Бьньһерʹә шькьле әʹwльн.) б) Щьмәʹта Хwәде кʹижан рʹебәрийе дьстинә, йа кӧ дькарә әʹмьре wана хьлаз кә?

«БЬСӘКЬНӘ, БЬНЬҺЕРʹӘ, БЬБЬҺЕ». Әwан хәбәра әʹмьре гәләк мәрьва хwәй кьрьнә. Нишанед мәзьн пе wан хәбәра һатьнә данине Амәрикайа Бакʹуреда сәр рʹийа трене. Ле гәло чьрʹа әw нишан данибун? Әw нишан һатьн данин, сәва кӧ чахе трен дәрбаз дьбә, мәкʹинед ажотьне нәкʹәвьнә сәр рʹийа трене. Бәле, гӧһдайина ве ширәте әʹмьре гәләка хьлаз кьрийә.

² Йаһоwа нишана данайнә сәва кӧ мә хwәй кә. Әw тьштәки һе баш дькә. Әw кʹеләка щьмәʹта хwә йә, сәва кӧ wана бәрбь жийина һʹәта-һʹәтайе бьвә. Һьн жи, әw wана жь qәзийа хwәй дькә. Әw мина шьванәки һʹьзкьри йә, йе кӧ рʹебәрийе кәрийе хwә дькә, у wана хwәй дькә кӧ нәкʹәвьнә сәр рʹейед бь qәзийа. (Бьхунә Ишайа 30:20, 21.)

ЙАҺОWА ТʹЬМЕ РʹЕБӘРИЙА ЩЬМӘʹТА ХWӘ ДЬКЬР

3. Ча инсанәт кʹәтә сәр рʹийа мьрьне?

³ Йаһоwа тʹьме тʹәмийед конкрет, йан рʹебәри дьда мәрьва. Мәсәлә, бахче Әдәнеда, Йаһоwа тʹәмийед зәлал да мәрьва, кʹижан кӧ дькарьбун әwана хwәй кьрана, сәва кӧ бьжин һʹәта-һʹәтайе бәхтәwарийеда (Дәстп. 2:15-17). Һәрге Адәм у Һеwайе гӧһ бьдана тʹәмийед Хwәде, wана wе хwә жь ахьрийа хьраб хwәй кьрана. Демәк wана wе бь жийина зор-щәфа нәжитана у нәмьрана. Ле дәwса кӧ гӧрʹа Хwәде бькьрана, Һеwайе гӧһ да ширәта һʹәйwанәке, демәк мәʹр. Адәм жи, гӧһ да Һеwайе. Бь ве йәке wан һʹәрда жи пьшта хwә данә рʹебәрийа Баве хwәйи һʹьзкьри. Ле йазьх, сәва шашийа wана, һʹәму инсанәт кʹәтә сәр рʹийа мьрьне.

4. а) Чьрʹа паши Селаве лазьм бун рʹебәрийед тʹәзә? б) Чаwа тʹәмийед тʹәзә ньһерʹандьна Хwәде әʹйан кьрьнә?

⁴ Йаһоwа рʹебәри да Нӧһ, у бь ве рʹебәрийе әʹмьр хьлаз бунә. Паши Селаве, Йаһоwа тʹәми да дәрһәqа qәдәхәкьрьна хуне. Ле чьрʹа лазьм бу әw рʹебәрийа тʹәзә? Чьмки тьштәк һатә гӧһастьне. Йаһоwа ида изьн дьда мәрьва, кӧ әwана гоште һʹәйwана бьхwьн. Ләма лазьм бун рʹебәрийед тʹәзә. Хwәде тʹәми да: «Тʹәне гошт сахийеда, аwа готи хунева нәхwьн» (Дәстп. 9:1-4, ПКʹМ). Әw гӧһастьн әʹйан дьдә кʹьфше ньһерʹандьна Хwәде дәрһәqа әʹмьр. Чаwа Әʹфьрандар у Жийиндар, изьна wи һәйә кӧ тʹәмийа бьдә дәрһәqа жийине. Мәсәлә, әwи тʹәми да мәрьва, кӧ һәвдӧ нәкӧжьн. Чьмки Хwәде жийине у хуне һʹәсаб дькә ча пироз. У әw wе диwана wан бькә йед кӧ ван тьшта qимәт накьн (Дәстп. 9:5, 6).

5. Дь ве тʹемайеда әме дәрһәqа чь шеwьр кьн, у чьрʹа?

⁵ Wәрә әм шеwьр кьн һьнә мәсәла, кӧ чаwа нава qьрʹнада Хwәде бәрдәwам дькьр рʹебәрийе бьдә щьмәʹта хwә. Әw йәк wе мә һелан кә кӧ әм дьнйа тʹәзәда жи пәй рʹебәрийа Йаһоwа һәрʹьн.

ЩЬМӘʹТА ТʹӘЗӘ, РʹЕБӘРИЙЕД ТʹӘЗӘ

6. Чьрʹа Исраелийарʹа лазьм бу qанунед кӧ Хwәде бь Муса дабу, у ньһерʹандьна wан гәрәке ча буйа?

⁶ Wәʹде Мусада жи лазьм бун рʹебәрийед тʹәзә дәрһәqа рʹабун-рʹуньштьне у хьзмәткьрьна Хwәдерʹа. Ле чьрʹа? Чьмки диса дәрәщә һатьнә гӧһастьне. Рʹькʹьнийата Аqуб дӧ qьрʹна зедәтьр бьн сәрwертийа Мьсьреда дьжитьн, wи wәлатида, кʹидәре кӧ мәрьва пʹут у мьри дьһʹәбандьн, у тьштед ӧса дькьн йед кӧ Хwәде беһӧрмәт дькьрьн. Чахе щьмәʹта Хwәде жь дилтийа Мьсьре дәркʹәтьн, лазьм бун рʹебәрийед тʹәзә. Щьмәʹта Хwәде wе ида нәжита чаwа мәрьвед дил, ле чаwа щьмәʹта аза, бьн Qануна Йаһоwада. Һьнә кʹьтебада те готьне кӧ хәбәра Ибранийә кӧ те һʹәсабе «qанун», гьредайи тʹәви һʹиме хәбәред «сәрwери, рʹебәри, у ширәткьрьн». Qануна Муса щьмәʹт хwәй дькьр wәки мина щьмәʹтед дьн бенамусийе, әʹдәт у кьред qәлп нәкьн. Чахе Исраелийа гӧрʹа Хwәде дькьрьн, wана тʹьме кʹәрәма Хwәде дьстандьн. Ле чахе wана гӧрʹа wи нәдькьрьн, wана бәред хьраб дьстандьн. (Бьхунә Qануна Дӧщари 28:1, 2, 15.)

7. а) Диса мәʹникә дьн чь бу кӧ Йаһоwа рʹебәри да щьмәʹта хwә. б) Qанун чь щурʹәйи щьмәʹта Исраелийарʹа хьлазкʹар бу?

⁷ Диса мәʹникә дьн һәбу кӧ чьрʹа тʹәми у рʹебәри лазьм бу. Әwе Qануне, Исраели һазьр дькьрьн бона qәwьмандьна фәрз дь qьрара Хwәдеда. Әw һәбу һатьна Иса Мәсиһ. Әwе Qануне дьани бира Исраелийа кӧ әwана гӧнәкʹар ьн. Әве ӧса жи али wан дькьр wәки әwана фәʹм кьн кӧ wанрʹа лазьм ә кʹьрʹин, демәк qӧрбана беqьсур, сәва әwана бь тʹәмами жь гӧнә хьлаз бьн (Галт. 3:19; Ибрн. 10:1-10). Хенщи ве йәке, пе аликʹарийа wе Qануне дьһатә хwәйкьрьне әw рʹькʹьнийат, жь кʹижане кӧ Иса гәрәке бьһата. Бәле, Qанун мина «хьлазкʹаре» wәʹдәлу бу, кʹижан кӧ бәрбь Мәсиһ дьбьр (Галт. 3:23, 24).

8. Чьрʹа әм гәрәке бьфькьрьн сәр принсипед Qануна Муса?

⁸ Ча Мәсиһи, әм жи дькарьн кʹаре бьстиньн жь wан рʹебәрийа кӧ Qанунеда Исраелийарʹа һатьнә дайине. Ле чаwа? Әм дькарьн бьфькьрьн Qанун сәр һʹиме кʹижан принсипа йә. Рʹаст ә әм бьн ван qанунада ниньн, ле йәкә әм дькарьн wан qанунада рʹебәрийед керһати бьвиньн, чаwа жийина хwәйә һәррʹожида, ӧса жи хьзмәткьрьна хwәда Йаһоwарʹа. Йаһоwа әw qанун Кʹьтеба Пирозда дайә ньвисаре, сәва кӧ әм бькарьбьн жь wан qануна һин бьн, пәй принсипед wан һәрʹьн, у рʹази бьн бона wан принсипа кӧ Мәсиһийарʹа һатийә дайине. Дина хwә бьдьне кӧ Иса чь гот: «Wә бьһистийә кӧ һатийә готьне: ‹Зьнийе нәкә›. Ле әз wәрʹа дьбежьм, кʹи бь тәме хьраб жьнәке бьньһерʹә, әwи дьле хwәда иди тʹәви wе зьнекʹари кьр». Демәк, әм гәрәке нә кӧ тʹәне хwә жь бенамусийе хwәй кьн, ле ӧса жи жь фькьр у хwәстьнед бенамуси (Мәт. 5:27, 28).

9. Чь дәрәща тʹәзә qәwьми кӧ лазьм бу рʹебәрийа Хwәдейә тʹәзә?

⁹ Чахе Иса һатә сәр әʹрде, рʹебәрийед Хwәдейи тʹәзә лазьм бун у зәлалкьрьна qьрара Йаһоwа. Ле гәло чьрʹа? Чьмки диса дәрәщә һатә гӧһастьне. Сала 33 Д.М., Йаһоwа щьмәʹта Исраел инкʹар кьр у щьвата Мәсиһи жьбарт чаwа щьмәʹта хwә. Ләма бона щьмәʹта тʹәзә лазьм бун рʹебәрийед тʹәзә.

РʹЕБӘРИ БОНА ИСРАЕЛА ТʹӘЗӘЙӘ РʹӦҺʹАНИ

10. Чьрʹа щьвата Мисиһирʹа qанунед тʹәзә һатьнә дайине, у чь фьрqи һәйә ортʹа wан qанунада у qанунед кӧ Исраелрʹа һатә дайине?

¹⁰ Qьрʹна йәкеда, щьвата Мәсиһийарʹа, демәк щьмәʹта Хwәдейә тʹәзәрʹа, лазьм бун рʹебәрийед тʹәзә дәрһәqа хьзмәткьрьне у рʹабун-рʹуньштьне. Әw хьзмәткʹаред Хwәде кʹәтьнә нава пәймана тʹәзә. Чьмки Qануна Муса тʹәне щьмәʹта Исраелрʹа һатә дайине. Ле Исраела рʹӧһʹани, нә жь мьләтәки бу. Щурʹә-щурʹә мьләт дькʹәтә нава Исраела рʹӧһʹани. Жь ве йәке әʹйан ә, кӧ «Хwәде рʹасти жи фьрqийе накә нава мьләта», ле «жь нав һәр мьләтида, йе кӧ жь wи хоф дькә у рʹастийе дькә ль wи qәбул ә» (Кʹар. Шанд. 10:34, 35). Qануна Муса кӧ Исраелрʹа һатә дайине, сәр кәвьр дьһатә ньвисаре. Ле бона Исраела рʹӧһʹани, «qануна Мәсиһ», кʹижан кӧ һʹәчʹи зәʹф сәр һʹиме принсипа йә, гәрәке дьле wанда бә. У әв «qануна Мәсиһ» гәрәке рʹебәре Мәсиһийа бә, у фьрqи тʹӧнә әwана жь кʹидәре нә (Галт. 6:2).

11. «Qануна Мәсиһ» чь дӧ тьштада сәр жийина Мәсиһи һʹӧкӧм дькә?

¹¹ Исраела рʹӧһʹани кʹарәкә мәзьн станд жь рʹебәрийа Йаһоwа кӧ әwи бь сайа Иса дайә. Пешийа кӧ Иса пәймана тʹәзә гьреда, әwи дӧ тʹәмийед фәрз да. Тʹәмийа пешийе, тʹәви шьхӧле бәлакьрьна мьзгине гьредайи йә. Йа дӧда, дьда кʹьфше кӧ Мәсиһи хwә ча гәрәке бьдьнә кʹьфше у гәрәке ча бьн һьндава һәвдӧда. Әw тʹәми бона һʹәму Мәсиһийа бун. Демәк әw иро бона мә нә жи, у фьрqи тʹӧнә әм һивийа жийина сәр әʹзмана нә, йан сәр әʹрде.

12. Чь тʹәзә бу бәлакьрьна мьзгинеда?

¹² Wәрә шеwьр кьн шьхӧле бәлакьрьна мьзгине, кʹижан кӧ Иса пәйчуйед хwәрʹа готьбу. Мьзгин гәрәке ида бь щурʹәки майин бәла буйа. Бәре, щьмәʹтед дьн хwәха дьһатьнә бал Исраелийа сәва Йаһоwарʹа хьзмәт кьн (1 Пʹадш. 8:41-43). Ле әw йәк пешийа тʹәмидайина Иса бу, кʹижан ньвисар ә Мәтта 28:19, 20-да. (Бьхунә.) Иса шагьртед хwәрʹа гот кӧ «һәрʹьн» һʹәму мьләта һин кьн. Сала 33 Д.М.-да, әʹйан бу кӧ Йаһоwа дьхwазә, wәки ида мьзгин сәр тʹәмамийа дьнйайе бәла бә. Чьмки ве рʹоже, бь рʹӧһʹе wийи пироз, wәкә 120 әндәмед щьвата тʹәзә, дәстпекьрьн сәр щурʹә-щурʹә зьмана хәбәрдьн тʹәви Щьһуйа у йед нәщьһу (Кʹар. Шанд. 2:4-11). Паше, мьзгин бәла бу һʹәта мәрьвед Самәри жи. Паше жи, сала 36 Д.М., мьзгин гьһиштә һәла һе мәрьвед пʹутпʹарьстә нәсьнәткьри жи. Әw йәк дьһатә һʹәсабе кӧ Мәсиһи гәрәке бьчуна чьqас дькарьбун гьшкарʹа нав тʹәмамийа дьнйайе мьзгин бәла кьрана!

13, 14. а) Чь дьһатә һʹәсабе «тʹәмикә ну» кʹижан кӧ Иса да? б) Әм жь Иса чь дькарьн һин бьн?

¹³ Ньһа wәрә шеwьр кьн кӧ әм гәрәке ча бьн һьндава хушк-бьред хwәда. Иса «тʹәмикә ну» да шагьртед хwә. (Бьхунә Йуһʹәнна 13:34, 35.) Бәле, әw тʹәми найе һʹәсабе кӧ әм гәрәке тʹәне жийина хwәйә һәррʹожида һәвдӧрʹа һʹьзкьрьне бьдьнә кʹьфше. Ле әм гәрәке һазьр бьн һәла һе әʹмьре хwә жи бона хушк-бьред хwә бьдьн. Qануна Муса әw йәк дәʹwа нәдькьр (Мәт. 22:39; 1 Йуһʹн. 3:16).

¹⁴ Иса ве йәкеда нәхшәки мәзьн мәрʹа һиштийә. Әw хwәһʹьз нибу у шагьртед хwә гәләк һʹьз дькьр. Жь бо ве һʹьзкьрьна qайим, Иса һазьр бу әʹмьре хwә жи бона wан бьдә. У әw жь wана жи һивийе бу кӧ әwана ӧса бькьн. Демәк, әм гәрәке һазьр бьн кӧ дьбәкә бона хушк-бьред хwә щәфа бькʹьшиньн у бона wан һәла һе әʹмьре хwә жи бьдьн (1 Тʹеслн. 2:8).

РʹЕБӘРИ БОНА РʹОЖА ИРОЙИН У БОНА АХЬРИЙЕ

15, 16. Ньһа чь дәрәщед мәйә тʹәзә һәнә, у Хwәде ча рʹебәрийа мә дькә?

¹⁵ Иса «хӧламе амьн у сәрwахт» кʹьфш кьр, сәва кӧ «wәхтда хwарьна» рʹӧһʹани бьдә пәйчуйед wи (Мәт. 24:45-47). Рʹебәрийед фәрз жи дькʹәвьнә нава ве хwарьне, анәгори дәрәщед тʹәзә.

¹⁶ Мәсәлә, ньһа әм дьжин «рʹожед ахьрийеда», у ида гәләк незик ьн бәрбь тәнгасийа мәзьн, кʹижан кӧ тʹӧ щар тʹӧнә буйа (2 Тимтʹ. 3:1; Марq. 13:19). Һьн жи, Шәйтʹан у щьнед wи жь әʹзмен жорда һатьнә авитьне сәр әʹрде. Ләма жи инсанәт иро гәләк дьчәрчьрә у кӧл-дәрда дькʹьшинә (Әʹйан. 12:9, 12). Хенщи ве йәке, әм тʹәмийа Иса тиньн сери, кӧ нав тʹәмамийа дьнйайеда һʹәму мәрьварʹа мьзгине бәла дькьн. У тʹӧ щар ӧса нибуйә кӧ сәр һаqас гәләк зьмана мьзгин бе бәлакьрьне!

17, 18. Әм ча гәрәке бьньһерʹьн сәр wан рʹебәрийа кӧ әм дьстиньн?

¹⁷ Тʹәшкиләта Йаһоwа мәрʹа гәләк һащәта дьдә, кʹижан кӧ али мә дькьн бәлакьрьна мьзгинеда. Ле һун дьдьнә хәбате әwан һащәта? Әм сәр щьватед хwә рʹебәрийе дьстиньн, кӧ чаwа әм дькарьн әwан һащәта һе баш бьдьнә хәбате. Һун һʹәсаб дькьн кӧ әw рʹебәри жь Хwәде нә?

¹⁸ Бәле, сәва кӧ кʹәрәма Хwәде бьстиньн, әм гәрәке гӧрʹа һʹәму рʹебәрийа бькьн кӧ бь сайа щьвате әм дьстиньн. Һәрге әм ньһа гӧһ бьдьнә wан рʹебәрийа, әw йәк wе али мә бькә кӧ гӧһ бьдьнә рʹебәрийед wәʹде «тәнгасийа мәзьнда» жи. Wи чахи Шәйтʹан у әв дьнйа wе бенә кʹӧтакьрьне (Мәт. 24:21). У паше, мәрʹа ида wе лазьм бен рʹебәрийед тʹәзә, чьмки әме дьнйа тʹәзәда бьжин, кʹидәре кӧ ида Шәйтʹан wе тʹӧнә бә.

19, 20. Кʹижан кʹьтеб wе вәбьн дьнйа тʹәзәда, у бь сайа wан әме дәрһәqа чь пебьһʹәсьн?

¹⁹ Щьмәʹта Исраелрʹа лазьм бун рʹебәрийед тʹәзә, у Хwәде wанрʹа бь Муса Qанун да. Wәʹдә дәрбаз бу, щьвата Мәсиһирʹа рʹебәри һатә дайине кӧ пе «qануна Мәсиһ» бьжитана. Ӧса жи бона жийина дьнйа тʹәзәда, әме рʹебәрийед тʹәзә бьстиньн. Кʹьтеба Пироз мәрʹа әʹйан дькә кӧ дьнйа тʹәзәда «кʹьтеб» wе вәбьн, бь кʹижана әме рʹебәрийед тʹәзә бьстиньн. (Бьхунә Әʹйанти 20:12.) Дьqәwьмә кӧ әw кʹьтеб wе мәрʹа шьровәкьн qьрара Йаһоwа һьндава инсанәта дьнйа тʹәзәда. У һʹәму мәрьв, ӧса жи йед кӧ wе сах бьн, wе әwан кʹьтеба һин бьн, у бькарьбьн пебьһʹәсьн кӧ qьрара Хwәде һьндава wан чь йә. Бь wан кʹьтеба дьбәкә әме һе зәʹф пебьһʹәсьн дәрһәqа Йаһоwа у фькьред wи. Ӧса жи, әме һе рʹьнд Кʹьтеба Пироз фәʹм кьн. Хенщи ве йәке, щьнәтеда һʹәмушк wе һьндава һәвдӧда бь һʹьзкьрьн у бь qәдьр бьн (Иша. 26:9). Һәла бьдьнә бәр чʹәʹве хwә, чахе бьн рʹебәрийа Пʹадша Иса Мәсиһда, әме чьqас гәләк тьшт пебьһʹәсьн, у һьн жи йед дьн һин кьн!

²⁰ Һәрге әм пәй wан рʹебәрийа һәрʹьн кӧ wан «кʹьтебада» ньвисар ьн, у ӧса жи wәʹде щерʹьбандьна хьлазийе Йаһоwарʹа амьн бьминьн, әw wе әʹсә наве мә «кʹьтеба жийинеда» бьньвисә. Демәк әме әʹмьре һʹәта-һʹәтайе бьстиньн. Жь ве четьр чь дькарә һәбә! Ләма wәрә әм тʹьме Хәбәра Хwәде бьхуньн, бьфькьрьн чь те һʹәсабе бона мә чь кӧ әм дьхуньн, у гӧрʹа рʹебәрийа Хwәде бькьн кʹижан әw иро дьдә мә. Һәрге әм ӧса бькьн, әме тәнгасийа мәзьнда хьлаз бьн у һʹәта-һʹәтайе бәрдәwам кьн пебьһʹәсьн дәрһәqа Йаһоwа Хwәдейе мәйи билан у һʹьзкьрьн! (Wаиз 3:11; Рʹом. 11:33).