Чьрʹа Әм Гәрәкe «Һʹьшйар Бьминьн»?

1. Мәсәлe биньн, кö чьрʹа фәрз ә әм бьзаньбьн кö чь wәʹдә йә у дор бәрe мә чь дьqәwьмә. (Бьньһeрʹә шьклe әʹwльн.)

ЩЬВАТА мәзьн ида дәстпeдьбә! Бәрпьрсийарe бәрнамe тe сәр сeнe у гьшка слав дькә. Мьqам гәрәкe дәстпeбә. Гöһдарван ида заньн кö wәʹдә йә щийeд хwә бьгьрьн. Әwана һазьр ьн мьqама хwәш бьбьһeн, wәки һʹьшe хwә у дьлe хwә һазьр кьн, сәва готара бьбьһeн. Лe дьqәwьмә һьнәк гöһ надьн кö щьвата мәзьн дәстпeдьбә, у кʹәтьнә хәбәрданe тʹәви һәвалeд хwә, йан жи тьштәкида мьжул дьбьн. Wана дина хwә нәданe кö wәʹдә гьһишт, у кö бәрпьрсийарe бәрнамe ида сәр сeнe йә, мьqам дәстпeбу, у гöһдарван рʹуньштьнә. Әw мәсәлә дьдә кʹьфшe кö чь дькарә бьqәwьмә, һәргe әм дина хwә надьн сәр wәʹдә у нәньһeрʹьн чь дьqәwьмә дор бәрe мә. Әw мәсәлә бона мә дәрс ә, чьмки әм ньһа һивийа qәwьмандьнәкә һe мәзьн ьн, у әм гәрәкe бона вe рʹожe һазьр бьн. Гәло әw чь qәwьмандьн ә?

2. Чьрʹа Иса шагьртeд хwәрʹа гот кö «һʹьшйар бьминьн»?

² Чахe Иса хәбәрдьда дәрһәqа «ахьрийа вe дьнйайe», әwи шагьртeд хwәрʹа гот: «Һаш жь хwә һәбьн! Һʹьшйар бьминьн! Чьмки һун ньзаньн кʹәнгe wәхтe пeрʹа бьгьһижә». Паши вe йәкe, Иса диса wәкʹьланд: «Һʹьшйар бьминьн». (Мәт. 24:3; бьхунә Марqос 13:32-37.) Кʹьтeба Мәтта жи әʹйан дькә, кö Иса шагьртeд хwә ширәт кьр wәки әwана сәрхwә бьн. Әwи гот: «Аwа һʹьшйар бьминьн, чьмки һун ньзаньн Хöданe wәйe кʹижан рʹожe бe. . . . Һун жи һазьр бьн, чьмки Кöрʹe Инсан we сьһʹәтәкә öсада бe, кö һун нә чʹәʹвньһeрʹи нә». Пашe, әwи диса гот: «Һʹьшйар бьминьн, чьмки һун нә рʹожа һатьна Кöрʹe Инсан заньн, нә жи сьһʹәтe» (Мәт. 24:42-44; 25:13).

3. Чьрʹа әм гәрәкe гöһ бьдьнә ширәта Иса?

³ Чаwа Шәʹдeд Йаһоwа әм рʹьнд гöһ дьдьнә гьлийeд Иса. Әм заньн кö әм ньһа дьжин рʹожeд хьлазийeда у гәләк һьндьк майә кö тәнгасийа мәзьн дәстпeбә! (Дан. 12:4; Мәт. 24:21). Әм пe чʹәʹвe хwә дьвиньн кö чаwа пʹeхәмбәртийа Иса тe сeри. Әм дьвиньн кö дьнeда нәһәqи у зöлми зeдә буйә. Гәләк шәрʹ, кeмасийа хwарьнe, нәхwәшийeд гьран, әʹрдһʹәж һәнә, у öса жи рʹeлигийeд qәлп мәрьва дьхальфиньн. Хeнщи вe йәкe, щьмәʹта Йаһоwа нав тʹәмамийа дьнйайeда мьзгинийа Пʹадшатийe бәла дькә (Мәт. 24:7, 11, 12, 14; Луqа 21:11). У әм ньһа гәләк һивийа һатьна Иса нә, у һивийe нә чахe әw qьрара Хwәдe бинә сeри (Марq. 13:26, 27).

ӘW РʹОЖ ГӘЛӘК НЕЗИК Ә!

4. а) Чьрʹа әм баwәр ьн кö Иса занә we кʹәнгe Һармәгәдон дәстпeбә? б) Рʹаст ә әм ньзаньн кʹәнгe we тәнгасийа мәзьн дәстпeбә, лe чьда әм дькарьн дöдьли нәбьн?

⁴ Чахe әм тeнә сәр щьвата мәзьн, әм заньн кö кʹижан бәрнамә we кʹәнгe дәстпeбә. Лe әм ньзаньн, we кʹижан салe, йан рʹожe у сьһʹәтe дәстпeбә тәнгасийа мәзьн. Чахe Иса сәр әʹрдe бу, әwи гот: «Лe бона we рʹожe у we сьһʹәтe тʹö кәс ньзанә, нә мьлйакʹәтeд әʹзмана, нә жи Кöрʹ, лe тʹәнe Бав» (Мәт. 24:36). Лe чахe Иса чу ль әʹзман, Хwәдe wи кʹьфш кьр, сәва Һармәгәдонeда мьqабьли дьнйа Шәйтʹан шәрʹ бькә (Әʹйан. 19:11-16). Ләма әм дькарьн бeжьн, wәки ньһа Иса занә we кʹәнгe Һармәгәдон дәстпeбә. Лe әм ньзаньн у ләма гәләк фәрз ә кö әм һʹьшйар бьминьн. Йаһоwа ида әw рʹож кʹьфш кьрийә, кö кʹәнгe we тәнгасийа мәзьн дәстпeбә. У рʹож бь рʹож әм нeзики wи wәʹдәйи дьбьн. Әw рʹож we «дәрәнги» нәкʹәвә. (Бьхунә Һәбаqуq 2:1-3.) Лe чьрʹа әм дькарьн дöдьли нәбьн вe йәкeда?

5. Мәсәлe биньн кʹижан кö дьдә кʹьфшe, wәки пʹeхәмбәртийeд Йаһоwа тʹьмe wәʹдәда тeнә сeри.

⁵ Пʹeхәмбәртийeд Йаһоwа тʹьмe wәʹдәда тeнә сeри! Wәрә биньн бира хwә wи wәʹдәйи, чахe щьмәʹта Исраeл жь Мьсьрe аза бу. Әw йәк qәwьми сала 1513 Б.Д.М., 14 Нисанe. Пашe Муса дәрһәqа вe рʹожe гот: «Һәма we рʹожа хьлазийа чарсьд си салийe һʹәму рʹәфeд Хöдан жь Мьсьрe дәркʹәтьн» (Дәркʹ. 12:40-42, ПКʹМ). Әw 430 сал дәстпeбун, чахe пәймана Йаһоwа тʹәви Бьраһим кʹәтә qәwатe, сала 1943 Б.Д.М. (Галт. 3:17, 18). Һьнә wәʹдә шунда, Йаһоwа готә Бьраһим: «Тö рʹьнд заньбә, кö зöрʹәта тәйe wәлатәкида бькʹәвә хәрибийe у we хöламтийe wанрʹа бькьн, чарсьд сали әwe wан бьдьнә щәфe» (Дәстп. 15:13, ПКʹМ; Кʹар. Шанд. 7:6). Әw 400 салeд чәрчьрандьнe, дәстпeбун сала 1913 Б.Д.М., чахe Исмайил qәрфe хwә Исһаq дькьр. У әw 400 сал хьлаз бун сала 1513 Б.Д.М., чахe Йаһоwа Исраeли жь Мьсьрe аза кьр (Дәстп. 21:8-10; Галт. 4:22-29). Бәлe, Йаһоwа сәда сала пeшда рʹож бьжарт, сәва кö щьмәʹта хwә хьлаз кә!

6. Чьрʹа әм дькарьн баwәр бьн, кö Йаһоwа we щьмәʹта хwә хьлаз кә?

⁶ Йeшу йәк жь wан Исраeлийа бу, йeд кö жь Мьсьрe аза бун. Пашe чәнд сал шунда әwи ани бира һʹәму Исраeлийа: «Һун бь һʹәму һәбун у дьлe хwәва дьзаньн кö, йәк жи жь готьнeд Хöдан дайә wә, вала дәрнәкʹәт гьшк жи һатьн щиһ, йe вала дәркʹәт чeнәбу» (Йeшу 23:2, 14). Әм жи дькарьн сәд сәләфи баwәр бьн, кö созe Йаһоwа wәки әw we мә хьлаз кә wәʹдe тәнгасийа мәзьн, we әʹсә бe сeри. Лe һәргe әм дьхwазьн хьлаз бьн wәʹдe кʹöтакьрьна вe дьнйайe, әм гәрәкe һʹьшйар бьминьн.

СӘВА КÖ ХЬЛАЗ БЬН ГӘЛӘК ФӘРЗ Ә ҺʹЬШЙАР БЬМИНЬН

7, 8. а) Wәʹдe бәрe шьхöлe qәрәwьл чь бу, у әм чь дәрсe һин дьбьн жь вe йәкe? б) Мәсәлe биньн, кö чь дькарә бьqәwьмә чахe qәрәwьл сәр хәбата хwә хәwрʹа дьчә.

⁷ Wәрә мәсәла бьвиньн, кʹижан кö мәрʹа әʹйан дькә wәки чьqас фәрз ә һʹьшйар бьминьн. Бәрe, дора шәһәрeд мәзьн диwарeд бьльнд һәбун, мәсәлә чаwа дора шәһәрe Оршәлимe. Әw диwар шәһәр хwәй дькьр, wәки дьжмьн нәкʹәвьнe. Qәрәwьл сәр wан диwара дьсәкьнин, чьмки жь weдәрe дьһатә кʹьфшe дорбәрe шәһәр. Әwана шәв у рʹож дьсәкьнин сәр wан диwара у бәр дәргәһа. Öса, wана дькарьбу жь дурва дьжмьн бьдитана, у дәрһәqа хофийe бьнәлийeд шәһәррʹа пeшда әʹлам кьрана (Иша. 62:6). Qәрәwьла заньбун кö чьqас фәрз ә һʹьшйар бьминьн, чьмки әʹмьрe мәрьва вe йәкeва гьрeдайи бу (Һәзqл. 33:6).

⁸ Тʹәрихзан Усьвe Флавиус шьровәкьр кö ча сала 70 Д.М., ордийа Рʹомайа дькарьбун бькʹәтана Оршәлимe. Qәрәwьлeд кö дәргәһeд шәһәр хwәй дькьрьн, хәwрʹа чун. Ахьрийeда, ордийа Рʹомайа карьбун бькʹәвьнә Оршәлимe. Wана пʹарьстгәһ weран кьр у шәwьтандьн, у пашe тʹәмамийа Оршәлимe weран кьрьн. Әw йәк хьлазийа тәнгасийа мәзьн бу, тәнгасийа öса кö щьмәʹта Щьһу тʹö щар нәдитьбу.

9. Иро гәләк мәрьв дәрһәqа чь ньзаньн?

⁹ Иро гәләк wәлат синорeд хwә хwәй дькьн бь «qәрәwьла», дeмәк әскәра. Öса жи әwана систeмeд хwәйкьрьнe дьдьнә хәбатe, кʹижан кö пe тeхноложийeд тʹәзә һатьнә чeкьрьнe. Әскәр щабдар ьн кö мьqат бьн, wәки тʹö кәс бeqануни нәкʹәвә wәлатeд wан. Әw әскәр öса жи wәлат жь дьжмьна хwәй дькьн, сәва бьнәлийeд wәлатeд wан зийанe нәстиньн. Лe әw «qәрәwьл» wәлатeд хwә дькарьн тʹәнe жь wан хофийа хwәй кьн, кʹижан кö жь мәрьва тeн. Әwана ньзаньн дәрһәqа Пʹадшатийа Хwәдe, сәрweрe кʹижан кö Иса йә. Әw Пʹадшати зутьрәкe we диwана һʹәму сәрweртийeд мәрьва бькә (Иша. 9:6, 7; 56:10; Дан. 2:44). Лe әм алийe хwәда гәрәкe сәрхwә бьн у рʹöһʹанида һʹьшйар бьминьн. Öса әмe һазьр бьн бона вe рʹожe (Зәб. 130:6).

СЬСТ НӘБЬН!

10, 11. а) Чьда гәрәкe әм фәсал бьн, у чьрʹа? б) Чьрʹа тö баwәри кö Шәйтʹан мәрьва дьхальфинә, wәки әwана гöһ нәдьнә пʹeхәмбәртийа Кʹьтeба Пироз?

¹⁰ Бьдьнә бәр чʹәʹвe хwә qәрәwьл, йe кö һʹьшйар бу тʹәмамийа шәвe. Әw wәʹдe хьлазийа qәрәwьлтийа хwә дьwәстә, сьст дьбә у wирʹа гәләк чәтьн ә һʹьшйар бьминә. Мина we йәкe, чьqас жи әм нeзики хьлазийа we дьнйайe дьбьн, һаqас мәрʹа һe чәтьн дьбә һʹьшйар бьминьн. У we чьqас нәаqьлайи бә, һәргe әм фәсал нибьн! Wәрә әм сe тьшта шewьр кьн, жь кʹижана әм гәрәкe хwә хwәй кьн wәки тʹьмe һʹьшйар бьминьн.

¹¹ Мирe-щьн рʹöһʹанида мәрьва рʹадьзинә. Чәнд рʹож пeшийа мьрьна хwә, Иса сe щара шагьртeд хwә пeшда ширәт кьр дәрһәqа «сәрweрe вe дьнйайe» (Йуһʹн. 12:31; 14:30; 16:11). Иса заньбу кö Мирe-щьна we мәрьва бьхальфинә, сәва кö әwана гöһ нәдьнә пʹeхәмбәртийа Хwәдe дәрһәqа ахьрийe (Сeфн. 1:14). Мирe-щьна бь сайа рʹeлигийeд qәлп мәрьва дьхапинә. Һун дина хwә дьдьнe кö ньһeрʹандьна мәрьва ча йә? Гәләк әʹйан ә кö Шәйтʹан «шәвәрʹәша кора анийә сәр фәʹмe нәбаwәра». У ләма мәрьв нә жи баwәр дькьн, кö хьлазийа вe дьнйайe нeзик ә, у кö ньһа Иса Мәсиһ Пʹадшатийа Хwәдeда сәрweртийe дькә (2 Корн. 4:3-6). Чахe әм дьбeжьн дәрһәqа хьлазийа вe дьнйайe, һʹәчʹи зәʹф мәрьв гöһ надьнә мә. Гәләк щаба хwә öса дьдьн: «Мьнрʹа һʹәwас нинә».

12. Чьрʹа әм гәрәкe нәһeльн кö Мирe-щьна мә бьхальфинә?

¹² Әм гәрәкe нәһeльн, кö ньһeрʹандьна мәрьва сәр мә һʹöкöм бә. Чьмки әм заньн рʹастийа вe йәкe, кö чьqас фәрз ә әм һʹьшйар бьминьн. Паwлос Мәсиһийарʹа ньвиси: «Һун хwәха пʹак заньн кö Рʹожа Хöдан we мина дьзe шәвe бe». (Бьхунә 1 Тʹeсалоники 5:1-6.) Иса мәрʹа пeшда гот: «Һун жи һазьр бьн, чьмки әw сьһʹәта кö дьлe wәрʹа дәрбаз набә, Кöрʹe Инсанe бe» (Луqа 12:39, 40). Зутьрәкe, Шәйтʹан we гәләк мәрьва бьхальфинә, бь вe йәкe кö әwана бьфькьрьн, wәки тe бeжи «дьнe сәqьрʹи у бeхофи йә». Әw we wана бьхальфинә кö йанчь дьнeда һʹәму тьшт баш ә. Лe әм чь дькарьн бeжьн дәрһәqа хwә? Тʹәнe һәргe әм «һʹьшйар у сәрхwә бьн», wи чахи рʹожа ахьрәтe «мина дьзәки» we сәр мәда нагьрә. Ләма әм гәрәкe һәр рʹож Хәбәра Хwәдe бьхуньн у бьфькьрьн кö Йаһоwа чь мәрʹа дьбeжә.

13. Ча рʹöһʹe вe дьнйайe һʹöкöм дькә сәр мәрьва, у әм ча дькарьн хwә жь вe йәкe хwәй кьн?

¹³ Рʹöһʹe вe дьнйайe мәрьва рʹöһʹанида рʹадьзинә. Иро гәләк мәрьв нава һаqас шьхöлада ньн, кö нә жи дьфькьрьн дәрһәqа һʹәwщeд хwәйә рʹöһʹани (Мәт. 5:3). Әwана пәй тьштeд вe дьнйайe дькʹәвьн, у әw йәк «дьлһавьжи» у «чʹәʹвһавьжи» нав wанда пeшда тинә (1 Йуһʹн. 2:16). Иро öса жи щурʹә-щурʹә wәʹдәдәрбазкьрьн һәнә, кʹижан кö мәрьва һeлан дькьн «рʹьһʹәтиһʹьз» бьн, у һәр хwәстьнeд хwә биньн сeри (2 Тимтʹ. 3:4). Ләма жи Паwлос готә Мәсиһийа, кö әwана гәрәкe «гöһ нәдьнә wан хwәстьнeд бьнйатʹа хwәйә мәрьвайи». Чьмки һәргe мәрьв дина хwә дьдә тʹәнe сәр хwәстьнeд хwә, әw дькарә рʹöһʹанида рʹазe (Рʹом. 13:11-14).

14. Әм чь ширәтe дьвиньн Луqа 21:34, 35-да?

¹⁴ Әм дьхwазьн кö рʹöһʹe Хwәдe рʹeбәрийe мә бькә, нә кö рʹöһʹe вe дьнйайe. Йаһоwа бь сайа рʹöһʹe хwәйи пироз али мә кьрийә, кö әм фәʹм бькьн qәwьмандьнeд кö дьнйайeда дьqәwьмьн^[1] (1 Корн. 2:12). Лe әм гәрәкe фәсал бьн. Һәла һe тьштeд бьчʹук жи дькарьн бьбьнә мәʹни, кö әм рʹöһʹанида рʹазeн. (Бьхунә Луqа 21:34, 35.) Мәрьвeд дьн дькарьн qәрфe хwә мә бькьн, кö әм һʹьшйар дьминьн у баwәр дькьн wәки ахьри нeзик ә. Лe әw йәк гәрәкe рʹe мә нәгьрә, кö әм бәрдәwам кьн һʹьшйар бьминьн (2 Пәт. 3:3-7). Һәргe әм дьхwазьн кö рʹöһʹe Хwәдeйи пироз сәр мә һʹöкöм бә, әм гәрәкe тʹьмe бeнә сәр щьватe у тʹәви хушк-бьра һәвалтийe бькьн.

15. Чь qәwьми тʹәви Пәтрус, Аqуб, у Йуһʹәнна, у ча әw йәк дькарә тʹәви мә жи бьqәwьмә?

¹⁵ Сьстбун у кeмасийeд мә дькарьн мәрʹа чәтьн кьн, кö әм һʹьшйар бьминьн. Иса фәʹм дькьр кö мәрьв гöнәкʹар ьн, у кeмасийeд wан һәнә, ләма әwана дькарьн сьст бьн. Wәрә биньн бира хwә, кö чь qәwьми рʹожәк пeшийа мьрьна Иса. Рʹаст ә Иса бeqьсур бу, лe йәкә әwи заньбу кö сәва әw Хwәдeрʹа амьн бьминә, әw гәрәкe аликʹарийe жь Бавe хwә бьхwазә. Иса чахe чу кö дöа бькә, әwи жь Пәтрус, Аqуб, у Йуһʹәнна һиви кьр, кö әwана «һʹьшйар бьминьн». Лe wана рʹьнд фәʹм нәдькьр, кö чьрʹа сәва wан öса фәрз бу һʹьшйар бьминьн. Шагьрт wи чахи wәстийайи бун. У әwана дәwса кö дöа бькьн бона Иса, хәwрʹа чун. Рʹаст ә Иса жи wәстийайи бу, лe йәкә әw тʹәмамийа шәвe һʹьшйар бу у Бавe хwәрʹа дöа дькьр. У шагьртeд Иса жи гәрәкe öса бькьрана (Марq. 14:32-41).

16. Ль гора Луqа 21:36, Иса ча әм һин кьрьн кö «һʹьшйар бьминьн»?

¹⁶ Сәва кö «һʹьшйар бьминьн» хwәстьн тʹәнe бәс нинә. Иса чәнд рʹож пeшийа мьрьна хwә, диса жи Пәтрус, Аqуб, у Йуһʹәннарʹа гот, кö әwана Йаһоwарʹа дöа бькьн. (Бьхунә Луqа 21:36.) Дeмәк, сәва кö әм wәʹдe wан рʹожeд ахьрийeда рʹöһʹанида һʹьшйар бьминьн, әм жи гәрәкe тʹьмe Йаһоwарʹа дöа бькьн (1 Пәт. 4:7).

БӘРДӘWАМ КЬН ҺʹЬШЙАР БЬМИНЬН

17. Ча әм дькарьн тeдәрхьн кö әм һазьр ьн бона we йәкe, чь кö we бьqәwьмә ахьрийeда?

¹⁷ Иса гот кö хьлази we «сьһʹәтәкә öсада бe, кö [әм] нә чʹәʹвньһeрʹи нә». Ләма әм гәрәкe тʹьмe фәсал бьн, сәва кö рʹöһʹанида хәwрʹа нәчьн. Ньһа wәʹдә нинә кö әм пәй тьштeд вe дьнйайe кʹәвьн, у пәй хwәстьнeд хwәйә бәдәнe һәрʹьн (Мәт. 24:44). Бь сайа Кʹьтeба Пироз, Хwәдe у Иса мәрʹа дьбeжьн, кö әм ча дькарьн һʹьшйар бьминьн. Әм гәрәкe тʹьмe дина хwә бьдьнә рʹöһʹанийа хwә. Öса жи гәрәкe тʹьмe һәләqәтийа хwә тʹәви Йаһоwа qәwи хwәй кьн, у Пʹадшатийа wи дайньн щийe пeшьн. Әм гәрәкe тʹьмe бира хwәда хwәй кьн кö әм чь wәʹдәйида дьжин, чьмки öса әмe һазьр бьн бона һатьна ахьрийe (Әʹйан. 22:20). Әw йәк гәләк фәрз ә, чьмки әʹмьрe мә вe йәкeва гьрeдайи йә!