Рʹази бьн жь Хwәдe бона Qәнщийа Нәһeжа

1, 2. а) Гьли кьн сәрһатийа Иса дәрһәqа хwәйe рʹәзe тьрийа. б) Ча вe сәрһатийeда һʹöнöрeд öса тeнә кʹьфшe ча мәрʹдани у qәнщийа нәһeжа?

ШӘБӘQЕ хwәйe рʹәзe тьрийа чу базарe, сәва кö хәбатчийа бьвинә бона рʹәзe тьрийeд хwә. Әwи чәнд мәрьв дит, йeд кö qайил бун бьхәбьтьн бь wи һәqи чьqас кö әwи готә wан, у wана дәстпeкьр бьхәбьтьн. Лe хwәйe рʹәзe тьрийарʹа һe зeдә хәбатчи лазьм бун, ләма әw диса чу базарe у тʹәмамийа рʹожe һe зeдә у зeдә хәбатчи дит. Әwи wанрʹа һәма әw һәq соз да, чьqас кö соз дабу хәбатчийeд кö шәбәqда хәбат дәстпeкьрьбун. Чахe ида бу eвар, әwи гази һʹәму хәбатчийа кьр, у һʹәмушкарʹа һәq мина һәв да. Фьрqи тʹöнәбу әwана тʹәмамийа рʹожe хәбьтин йан сьһʹәтәкe, әwи мәрʹдани да кʹьфшe у һʹәмушкарʹа һәq мина һәв да. Чахe әweд кö тʹәмамийа рʹожe дьхәбьтин әw йәк дитьн, wана дәстпeкьр бькьнә кöтә-кöт. Лe хwәйe рʹәзe тьрийа щаба wан да: Нә һун qайил бун тʹәви һәqe кö мьн wәрʹа гот? Чьма изьна мьн тʹöнә, кö һаqаси бьдьм хәбатчийeд хwә, чьqаси әз дьхwазьм? Һун һʹәвсудийe дькьн, кö әз мәрʹд ьм? (Мәт. 20:1-15).

² Әw сәрһатийа Иса дәрсәкә фәрз дьдә мә дәрһәqа һʹöнöрәки Йаһоwа. Кʹьтeба Пирозда әw һʹöнöр гәләк щар тe хәбьтандьнe. Әw һʹöнöр һәйә qәнщийа нәһeжа.^[1] (Бьхунә 2 Корьнтʹи 6:1.) Хәбатчийeд кö тʹәнe сьһʹәтәкe хәбьтин, нәһeжа бун кö һәqe тʹәмам бьстиньн. Лe хwәйe рʹәзe тьрийа qәнщикә мәзьн wанрʹа кьр. Гәләк wәлгәрʹандьнeд Кʹьтeба Пирозда, гьли «qәнщийа нәһeжа» һатийә wәлгәрʹандьнe ча «кʹәрәм». Зандарәки дәрһәqа we хәбәрe ньвиси: «Нeта we хәбәрe әw ә, кö мәрьв пʹeшкʹeша бeһәq дьстинә, бона кʹижани әw нәхәбьтийә у нәһeжа йә бьстинә».

ПʹЕШКʹЕША ЙАҺОWАЙӘ МӘРʹДАНИ

3, 4. Чьрʹа у ча Йаһоwа һьндава һʹәму инсанәтe qәнщийа нәһeжа дьдә кʹьфшe?

³ Кʹьтeба Пирозда тe гьликьрьнe, кö qәнщийа нәһeжа жь Хwәдe, әw һәйә пʹeшкʹeша wи (Әфәс. 3:7). Лe гәло чьрʹа у ча Йаһоwа әwe пʹeшкʹeшe дьдә мә? Wәрә шewьр кьн. Һәргe мә һʹәму qанун у дәʹwакьрьнeд Йаһоwа бь тʹәмами бьанийана сeри, wи чахи әмe һeжайи qәнщийа wи буна. Лe әм әwe йәкe накьн. Ләма Пʹадша Сьлeман йe кö билан бу ньвиси: «Ль рʹуйeд әʹрдe зьламe сальһ [мәрьвe рʹаст] тʹöнәйә, һәртʹьм qәнщийe бькә у qәт гöнә нәкә» (Wаиз 7:20). Пашe Паwлосe шанди жи гот: «Һʹәмуйа гöнә кьр у нәгьһиштьнә рʹумәта Хwәдe» у «машe гöнә мьрьн ә» (Рʹом. 3:23; 6:23а). Әw ә чь кö әм һeжа нә.

⁴ Лe Йаһоwа һʹьзкьрьна мәзьн һьндава мә гöнәкʹара да кʹьфшe. Әwи «Кöрʹe хwәйи тайe тʹәнe» шандә сәр әʹрдe кö бона мә бьмьрә. Рʹасти жи Йаһоwа qәнщийа чьqас мәзьн әʹйан кьр һьндава мә, кʹижан кö әм һeжа ниньн (Йуһʹн. 3:16). Паwлос гот кö Иса «бәр щәфайe мьрьнe тʹаща рʹумәт у сийанәтe wәргьртийә, . . . да кö кʹәрәма Хwәдe жь бо һәр кәси мьрьнe тʹам бькә» (Ибрн. 2:9, ИМ). Бәлe, «пʹeшкʹeша Хwәдe жийина һʹәта-һʹәтайe йә, бь сайа Хöданe мә Мәсиһ Иса» (Рʹом. 6:23б).

5, 6. Әм чь ахьри дьстиньн чахe сәр мә һʹöкöм дькә а) гöнә? б) qәнщийа нәһeжа?

⁵ Лe чьрʹа әм гöнәкʹар ьн у дьмьрьн? Кʹьтeба Пироз шьровәдькә кö «бь нәһәqийа мәрьвәки [Адәм] у рʹуйe wида мьрьнe һʹöкöм кьр» сәр тʹәмамийа зöрʹәта wи (Рʹом. 5:12, 14, 17). Лe әм дькарьн öса бькьн, кö гöнә сәр мә һʹöкöм нәкә. Лe чаwа әм дькарьн әвe йәкe бькьн? Һәргe әм баwәрийа хwә qöрбана Иса тиньн, wи чахи Йаһоwа һьндава мә qәнщийа кö әм һeжа ниньн дьдә кʹьфшe. Лe чь щурʹәйи? Кʹьтeба Пироз дьбeжә: «Ль кʹидәрe гöнә зeдә бу, кʹәрәм жи ль wьр һe зeдә бу, wәки чаwа гöнә бь мьрьнe һʹöкöм кьр, öса жи кʹәрәма Хwәдe бь рʹастһʹәсабкьрьнe һʹöкöм бькә, мә бьбә бәрбь жийина һʹәта-һʹәтайe бь сайа Хöданe мә Иса Мәсиһ» (Рʹом. 5:20, 21).

⁶ Рʹаст ә әм гöнәкʹар ьн, лe әм гәрәкe нәһeльн кö гöнә сәр мә һʹöкöм кә. Чахe әм гöнә дькьн, әм жь Йаһоwа һиви дькьн кö бьбахшинә мә. Паwлосe шанди Мәсиһи ширәт кьрьн: «Гöнә we сәрweрийe ль wә нәкә, чьмки һун нә бьн qанунeда нә, лe бьн кʹәрәмeда» (Рʹом. 6:14). Ләма жи qәнщийа нәһeжа сәр мә һʹöкöм дькә. Лe әw чь кʹарe мәрʹа тинә? Паwлос шьровәкьр: «Кʹәрәма Хwәдe . . . мә һин дькә, кö әм нәпʹакийe у дьлһавьжийeд дьнйайe инкʹар кьн у аqьлда гьран, бь рʹастийe у хwәдeнасийe бьжин ль вe дьнe» (Тито 2:11, 12).

QӘНЩИЙА НӘҺЕЖА КÖ БЬ ЩУРʹӘ-ЩУРʹӘ ТЬШТА ТЕ ӘʹЙАНКЬРЬНЕ

7, 8. Ча Йаһоwа бь щурʹә-щурʹә тьшта qәнщийа нәһeжа мәрʹа дьдә кʹьфшe? (Бьньһeрʹә шьклe әʹwльн.)

⁷ Пәтрусe шанди ньвиси: «Жь wә кʹe чь пʹeшкʹeш стандийә, бь we жи һәврʹа хьзмәткʹарийe бькьн, чаwа wәкʹилeд qәнщә wан [щурʹә-щурʹә] кʹәрәмeд Хwәдe» (1 Пәт. 4:10). Лe гәло әw гьли чь тeнә һʹәсабe? Әw тe һʹәсабe кö әм рʹасти чь чәтьнайа жи бeн, Йаһоwа we али мә бькә, кö әм сәбьр кьн (1 Пәт. 1:6). Әw we тʹьмe һаqаси али мә бькә, чьqас кö мәрʹа лазьм ә сәва әм тәнгасийа тәйах кьн.

⁸ Бәлe, Йаһоwа гәләк тьштада мәрʹа qәнщийа нәһeжа дьдә кʹьфшe. Йуһʹәннайe шанди ньвиси: «Мә һʹәмуйа жь тʹeр-тʹьжийа wи кʹәрәм сәр кʹәрәмeда станд» (Йуһʹн. 1:16). Жь wан гьлийа әм дьвиньн кö Йаһоwа qәнщийа нәһeжа дьдә кʹьфшe бь вe йәкe, кö гәләк кʹәрәма дьдә мә. Лe кʹижан ьн һьнә жь wан кʹәрәма?

9. Чь кʹарe әм дьстиньн жь qәнщийа нәһeжа кö Йаһоwа дьдә кʹьфшe, у ча әм дькарьн рʹазибунe бьдьнә кʹьфшe һьндава qәнщийа wи?

⁹ Йаһоwа гöнeд мә дьбахшинә. Йаһоwа һьндава мә qәнщийа нәһeжа дьдә кʹьфшe, бь вe йәкe кö гöнeд мә дьбахшинә. Лe әw тʹәнe wи чахи дьбахшинә мә, һәргe әм гöнe хwә тиньн рʹуйe хwә у гьран дьхәбьтьн, сәва кeмаси у хwәстьнeд хьраб нав хwәда дәрхьн. (Бьхунә 1 Йуһʹәнна 1:8, 9.) Паwлос рʹункьрийарʹа гьлийeд öса ньвиси: «Әwи әм жь һʹöкöмәтийа тәʹристанийe хьлаз кьрьн у щи-гöһасти Пʹадшатийа Кöрʹe хwәйи һʹьзкьри кьрьн, пe кʹижани әм аза бун, аwа готи мә бахшандьна гöна станд» (Колс. 1:13, 14). Әм гәләк рʹази нә сәва рʹәʹмтийа Хwәдe у дьхwазьн wи һöрмәт у рʹумәт кьн. Әw йәк кö Йаһоwа гöнeд мә дьбахшинә, мәщал мәрʹа вәдьбә кö әм гәләк кʹәрәмeд баш бьстиньн.

10. Qәнщийа нәһeжа жь Хwәдe диса чь мәщала баш дьдә мә?

¹⁰ Әм тʹәви Хwәдe әʹдьлайeда ньн. Әм гöнәкʹар ьн, ләма жи әм жь буйина хwәда дьжмьнe Хwәдe дьһатьнә һʹәсабe. Паwлос әв йәк фәʹм дькьр. Әwи ньвиси: «Әм тʹәви Хwәдe бь мьрьна Кöрʹe wи ль һәв һатьн, гава әмә нәйар бун» (Рʹом. 5:10). Әв һәвһатьна тʹәви Йаһоwа мәрʹа мәщалe вәдькә, кö әм тʹәви wи әʹдьлайeда бьн, у бькарьбьн бьбьнә достeд wи. Паwлос әw qәдьр гьрeда тʹәви qәнщийа нәһeжа: «Әм бь баwәрийe рʹаст һатьнә һʹәсабe, әʹдьлайийа мә тʹәви Хwәдe һәйә бь сайа Хöданe мә Иса Мәсиһ. Пe wи мә бь баwәрийe мәщал дит тʹәви we кʹәрәмe бьн, кʹижанeда әм сәкьнинә» (Рʹом. 5:1, 2). Бәлe, бь рʹастийe әв кʹәрәма мәзьн ә, кö әм дькарьн бьбьнә достe Йаһоwа!

11. Рʹункьри ча «пәзeд дьн» вәдьгәрʹиньнә рʹастийe?

¹¹ Әм дькарьн бәр чʹәʹвe Хwәдe рʹаст бeнә һʹәсабe. Данийeл пʹeхәмбәр пeшда гот кö wәʹдe рʹожeд хьлазийeда, йeд «фәʹмкʹар», дeмәк рʹункьри, we «гәләка вәгәриньнә рʹастийe». (Бьхунә Данийeл 12:3.) Әwана мьзгинийe бәла дькьн у мәрьва һин дькьн дәрһәqа Йаһоwа. Бь сайа вe йәкe, рʹункьри али милйона «пәзeд дьн» кьрьн, сәва әwана бәр чʹәʹвe Хwәдe рʹаст бeнә һʹәсабe (Йуһʹн. 10:16). Лe әw йәк, тʹәнe бь qәнщийа нәһeжа жь Йаһоwа тe сьтандьн. Паwлос шьровәкьр: «Жь кʹәрәма wи [Хwәдe] у бь азакьрьна Мәсиһ Иса рʹастһʹәсаббунe пʹeшкʹeш дьстиньн» (Рʹом. 3:23, 24).

12. Ча дöа гьрeдайи йә тʹәви qәнщийа нәһeжа жь Хwәдe?

¹² Бь сайа дöа әм дькарьн нeзики Хwәдe бьн. Бь сайа qәнщийа нәһeжа жь Йаһоwа, әм дькарьн wирʹа дöа бькьн. Паwлос тʹәхтe Йаһоwа нав дькә «тʹәхтe . . . кʹәрәмe», дeмәк qәнщийа нәһeжа, у мә тʹәглиф дькә кö әм аза тʹәви Хwәдe хәбәрдьн (Ибрн. 4:16а). Йаһоwа мәрʹа qәдьрәки öса мәзьн да, кö әм дькарьн бь сайа Кöрʹe wи, wирʹа дöа бькьн. Паwлос гот: «Йәктийа Мәсиһда у пe we баwәрийа мәйә сәр wи әм дькарьн бь мeркʹими у рʹувәкьри нeзики Хwәдe бьн» (Әфәс. 3:12). Әw йәк кö әм дькарьн Йаһоwарʹа дöа бькьн, бь рʹастийe жи әʹйан дькә qәнщийа wи, кö әм һeжа ниньн бьстиньн.

13. Ча qәнщийа нәһeжа дькарә али мә бькә «гава әм һʹәwщә» нә?

¹³ Гава әм һʹәwщә нә, әм дькарьн аликʹарийe бьстиньн. Паwлос әм һeлан кьрьн кö әм һeса Йаһоwарʹа дöа бькьн, сәва «рʹәʹмe бьстиньн у кʹәрәмe бьбиньн кö гава әм һʹәwщә бьн, аликʹарийа мә бькә» (Ибрн. 4:16б). Wәʹдe тәнгасийа у чәтьнайа, әм тʹьмe дькарьн жь Йаһоwа һиви кьн, кö әw али мә бькә. Рʹаст ә әм һeжа ниньн, лe йәкe әw щаба дöайeд мә дьдә. Гәләк щар әw бь сайа хушк-бьра али мә дькә. Бәлe, Йаһоwа дьбьһe дöайeд мә, «ләма жи рʹуйe мә дьгьрә кö әм бeжьн: ‹Хöдан пьштованe мьн ә у әз натьрсьм. Инсанe чь ль мьн бькә?›» (Ибрн. 13:6).

14. Ча qәнщийа нәһeжа жь Йаһоwа, дьлe мә рʹьһʹәт дькә?

¹⁴ Әм дькарьн дьлбинийe у бәрдьлийe бьстиньн. Кʹәрәма мәзьн кö Йаһоwа жь qәнщийа нәһeжа дайә мә, әw һәйә бәрдьли у рʹьһʹәти wәʹдe тәнгасийа (Зәб. 51:17). Чахe Мәсиһийeд Тʹeсалоникида, рʹасти пәйкʹәтьна дьһатьн, Паwлос wанрʹа ньвиси: «Хöданe мә Иса Мәсиһ хwәха у Бавe мә Хwәдe, йe кö әм һʹьз кьрьн у бь кʹәрәмe дьлдайинәкә һʹәта-һʹәтайe у гöманәкә qәнщ да мә, бьра дьл бьдә wә у wә . . . qәнщда бьшьдинә» (2 Тʹeслн. 2:16, 17) Чьqас бәрдьлийe дьдә мә, занәбуна вe йәкe кö Йаһоwа мә һʹьз дькә, у бона мә хәм дькә!

15. Бь сайа qәнщийа нәһeжа жь Хwәдe, әм дькарьн чь ахьрийа баш бьстиньн?

¹⁵ Һивийа мә һәйә кö әм бьжин һʹәта-һʹәтайe. Әм гöнәкʹар ьн, ләма бeй Йаһоwа баwәрийа мә сәр тʹö тьшти тʹöнә. (Бьхунә Зәбур 49:7, 8.) Лe Йаһоwа әм нәһиштьн, бь сайа wи һивийа мә һәйә кö әмe ахьрийа баш бьстиньн. Лe әw чь ахьри йә? Иса гот: «Хwәстьна Бавe мьн әв ә, wәки һәр кәсe кö Кöрʹ бьбинә у wи баwәр бькә, жийина wийә һʹәта-һʹәтайe һәбә» (Йуһʹн. 6:40). Әw пʹeшкʹeш кö әм дькарьн һʹәта-һʹәтайe бьжин, әʹйан дькә qәнщийа Йаһоwа кö әм һeжа ниньн. Паwлос әw йәк гәләк дьшeкьранд у гот: «Кʹәрәма Хwәдe бона хьлазбуна һʹәму мәрьва хöйа бу» (Тито 2:11).

QӘНЩИЙА НӘҺЕЖА ЖЬ ХWӘДЕ, БЕҺÖРМӘТ НӘКЬН

16. Чаwа һьнә Мәсиһийeд qьрʹна йәкeда qәнщийа Хwәдe бeһöрмәт дькьрьн?

¹⁶ Бь сайа qәнщийа нәһeжа жь Йаһоwа, әм гәләк кʹәрәма дьстиньн. Лe әм гәрәкe нәфькьрьн кö Хwәдe чʹәʹвe хwә дадьдә сәр һʹәму гöнeд мә, кʹижан кö әм һʹәмдe хwә дькьн. Һьнә Мәсиһийeд qьрʹна йәкeда «навe кʹәрәма Хwәдe данә бeнамусийe» (Щьһуд. 4). Ча тe кʹьфшe әw Мәсиһийeд нәамьн дьфькьрин, кö әwана дькарьн гöнә бькьн у Йаһоwа we тʹьмe wана бьбахшинә. Хeнщи вe йәкe, wана һәла һe бьрeд дьн жи һeлан дькьрьн кö әwана жи гöнә бькьн. Иро жи һәргe кәсәк öса дькә, әw «рʹöһʹe кʹәрәмдайинe бeһöрмәт» дькә (Ибрн. 10:29).

17. Пәтрус чь ширәта фәрз да?

¹⁷ Иро Шәйтʹан һьнә Мәсиһийа дьхальфинә, wәки әwана бьфькьрьн кö дькарьн гöнә бькьн у Йаһоwа we wана тʹьмe бьбахшинә. Бәлe, Йаһоwа һазьр ә бьбахшинә wан, йeд кö гöнe хwә тиньн рʹуйe хwә. Лe әw һивийe йә кö әм мьqабьли хwәстьнeд хьраб бьн, кʹижан кö дькарьн мә бәрбь гöнә бьвьн. Йаһоwа бь рʹeбәрийа хwә Пәтрус һeлан кьр кö бьньвисә: «Аwа дәлално, һe бәрeда һун кö вe йәкe заньн, һаш жь хwә һәбьн, кö нәбә һун бь хальфандьна мәрьвeд бeолитийe жь рʹe дәркʹәвьн у жь щийe хwәйи шьдийайи бькʹәвьн. Лe кʹәрәм у занәбуна Хöдан у Хьлазкьрe мә Иса Мәсиһда бьгьһижьн» (2 Пәт. 3:17, 18).

QӘНЩИЙА НӘҺЕЖА БОРЩДАРИЙЕ ДЬДӘ СӘР МӘ

18. Әw йәк кö әм qәнщийа Йаһоwа дьстиньн чь борщдарийe дьдә сәр мә?

¹⁸ Әм гәләк рʹази нә бона qәнщийа Йаһоwа кö әм һeжа ниньн. Әм һeлан дьбьн у борщдари сәр хwә тʹәхмин дькьн, кö пʹeшкʹeшeд жь Хwәдe бьдьнә хәбатe сәва wи һöрмәт кьн у али мәрьвeд дьн бькьн. Лe гәло ча әм дькарьн әwe йәкe бькьн? Паwлос гот: «Аwа анәгори we кʹәрәма мәрʹа һатийә дайинe . . . , һәгәр хьзмәткʹари йә, бьра нава хьзмәткʹарийeда бьн, һәгәр һинкьрьн ә, бьра пәй һинкьрьнe бьн, йe дьл дьдә мeрьв, бьра ль пәй we йәкe бә, . . . әwe qәнщийe дькә, бьра бь әшq у ша бькә» (Рʹом. 12:6-8). Qәнщийа Йаһоwа борщдарийe дьдә сәр мә, кö әм хирәт бьн хьзмәтийeда, мәрьвeд дьн Кʹьтeба Пироз һин кьн, хушк-бьрeд хwә qәwи кьн, у бь дьл у щан бьбахшиньнә wан, йeд кö мә дьхәйидиньн.

19. Әмe тʹeма дьнда дәрһәqа кʹижан борщдарийe шewьр кьн?

¹⁹ Әм кʹәрәмкьри нә кö әм qәнщийа Йаһоwа дьстиньн, у әw йәк гәрәкe мә һeлан бькә кö «мьзгинийа кʹәрәма Хwәдe» бәла кьн (Кʹар. Шанд. 20:24). Тʹeмайа дьнда әмe дәрһәqа вe борщдарийe шewьр кьн.