Пьрсeд Хwәндәвана

Чь тe һʹәсабe тʹәвкьрьна дö дара, кʹижан кö Һәзәqeл сәрe 37-да тe гьликьрьнe?

Йаһоwа бь Һәзәqeл пʹeхәмбәр гот кö щьмәʹта Исраeл, we вәгәрʹьнә Әʹрдe Создайи у чаwа щьмәʹтәк диса тʹәви һәв бьн. Әw пʹeхәмбәрти öса жи һатә готьнe дәрһәqа йәктийа щьмәʹта Хwәдe, wәʹдe рʹожeд ахьрийeда.

Йаһоwа готә Һәзәqeл wәки әw дö дара һьлдә у сәр wан бьньвисә. Сәр дарәки әwи гәрәкe бьньвисийа, «Бона Щьһудайe у бона лаweд Исраeл йeд кö һәвалeд wи нә», у сәр йe дьн бьньвисә, «Бона Усьв чойe [дарe] Әфрайим у бона һʹәмуйа мала Исраeлe йeд һәвалeд wи». Әw дö дар әwи гәрәкe тʹәвкьра, сәва әw дар дәстe wида «йәк бьбьн» (Һәзqл. 37:15-17).

Лe кʹe дьһатә һʹәсабe «Әфрайим»? Бәрәка Әфрайим жь һʹәму бәрәкeд Исраeли йа сәрәкә бу. Пʹадшайe пeшийe сәр пʹадшатийа бакʹурeйә дәһ бәрәки, Йәровам бу, кʹижан кö жь бәрәка Әфрайим бу (Qан. Дщр. 33:13, 17; 1 Пʹадш. 11:26). Әw бәрәк жь Әфрайимe кöрʹe Усьв дәркʹәт (Жьмар 1:32, 33). Усьв жь бавe хwә Аqуб кʹәрәма мәхсус сьтанд. Ләма фәʹмдари йә кö дарe «Әфрайим» бь симболик дьһатә һʹәсабe пʹадшатийа бакʹурeйә дәһ бәрәки. Пeшийа кö Һәзәqeл әw пʹeхәмбәртийа дәрһәqа дö дара бьньвисийа, Ашурийа пʹадшатийа Исраeлeйә дәһ бәрәки зәфт кьрьн, у щьмәʹт дилти бьрьн. Әw йәк сала 740 Б.Д.М. qәwьми (2 Пʹадш. 17:6). Пашe һьнә wәʹдә шунда, Бабилонийа Импeрийа Ашурe зәфт кьрьн. У ләма чахe Һәзәqeл әw пʹeхәмбәрти ньвиси бу, һʹәчʹи зәʹф Исраeли нава Импeрийа Бабилонeда бәлабуйи бун.

Сала 607 Б.Д.М., Бабилонийа пʹадшатийа башурeйә Щьһуда йа дö бәрәки, зәфт кьрьн, у щьмәʹт дилти бьрьн. Дьqәwьмә кö Бабилонийа öса жи һьнәкeд жь пʹадшатийа бакʹурe дилти бьрьн. Пʹадшeд пʹадшатийа башурe, жь бәрәка Щьһуда бун. У һʹәму кʹаһинти, йeд кö пʹарьстгәһeда хьзмәт дькьрьн, пьштгьрийа wан дькьрьн (2 Дир. 11:13, 14; 34:30). Дeмәк әʹйан ә кö әw пʹадшатийа дәһ бәрәки, тe һʹәсабe дарe «бона Щьһудайe».

Лe гәло кʹәнгe әw дö дар тʹәви һәв бун? Әw йәк сала 537 Б.Д.М., qәwьми, чахe Исраeлийа жь дилтийа Бабилонe аза бун у вәгәрʹийанә сәва кö тʹәзәда пʹарьстгәһe ава кьн. Wи чахи әw һәр дö пʹадшати, дeмәк йа бакʹурe у йа башурe, тʹәви һәв бун. Дeмәк, щьмәʹта Исраeл ида бәлабуйи нибу (Һәзqл. 37:21, 22). Әwана диса жи йәктийeда Йаһоwа дьһʹәбандьн. Әw йәкти öса жи һатә пʹeхәмбәртикьрьнe бь Ишайа у Йeрәмйа пʹeхәмбәр (Иша. 11:12, 13; Йeрәм. 31:1, 6, 31).

Әw пʹeхәмбәртийа Һәзәqeл чь әʹйан кьр дәрһәqа һʹәбандьна рʹаст? Әв пʹeхәмбәрти әʹйан кьр кö Йаһоwа we öса бькә, wәки һʹәму хьзмәткʹарeд wи «бьбьнә йәк» (Һәзqл. 37:18, 19). Лe гәло әw йәкти кö Хwәдe соз да, wәʹдe мәда жи һатә сeри? Бәлe. Әw пʹeхәмбәрти сала 1919 дәстпeбу бe сeри. Пeшийа we йәкe Шәйтʹан дьхwәст щьмәʹта Хwәдe бь тʹәмами жь һәв бәла кә, лe жeрʹа һәв нәһат. Сала 1919 Хwәдe щьмәʹта хwә паqьж кьр, тʹәзәда организә кьр, у диса әwана кьрьнә йәк.

Wи чахи һʹәчʹи зәʹф жь щьмәʹта Хwәдe, йeд кö бунә йәк, һивийe бун кö we тʹәви Иса сәр әʹзмана бьбьнә пʹадша у кʹәшиш (Әʹйан. 20:6). Бь симболик, әwана мина дарe бона Щьһуда бун. Лe wәʹдә дәрбаз дьбу, у әweд кö һивийа жийина сәр әʹрдe бун, һe зeдә у зeдә дьбун, у тʹәви Щьһуйeд рʹöһʹани дьбун (Зәкәр. 8:23). Әwана бь симболик мина дарe бона Усьв бун, у әwана һивийe нибун кö тʹәви Иса we сәрweртийe бькьн.

Иро әw һәрдö кʹом тʹәвайи йәктийeда Йаһоwарʹа хьзмәт дькьн. Пʹадшайe wан йәк ә, Иса Мәсиһ. Пʹeхәмбәртийа Һәзәqeлда Йаһоwа сәр Иса дьбeжә «qулe [хьзмәткʹарe] мьн Даwьд» (Һәзqл. 37:24, 25). Иса сәва пәйчуйeд хwә, Бавe хwәрʹа дöа дькьр, кö әwана «һʹәму жи бьбьнә йәк»a (Йуһʹн. 17:20, 21). Иса öса жи пʹeхәмбәрти кьр кö кәрийe wийи бьчʹук, дeмәк рʹункьри, we тʹәви «пәзeд дьн . . . бьбьнә кәрик». У әw «кәрик» we бьн рʹeбәрийа «шьванәки» бьн (Йуһʹн. 10:16). Чаwа кö Иса гот, иро щьмәʹта Хwәдe йәктийeда ньн, у фьрqи тʹöнә әwана һивийа жийина сәр әʹзмана нә йан сәр әʹрдe!