Һʹәму Хәмед Хwә Бавежә сәр Йаһоwа
«Һʹәму хәмед хwә бавежьнә сәр [Йаһоwа], чьмки әw бона wә хәм дькә» (1 ПӘТ. 5:7).
1, 2. а) Чьрʹа әм әʹщебмайи наминьн, кö щара әм дьлтәнг дьбьн? (Бьньһерʹә шькле әʹwльн.) б) Ве тʹемайеда әме дәрһәqа чь шеwьр кьн?
ӘМ ДЬЖИН рʹожед гәләк чәтьнда, чьмки Мире-щьн гәләк һерс ә у «мина шер мьрʹә-мьрʹа wи йә, дьгәрʹә кʹа кʹе һʹуфи хwә кә» (1 Пәт. 5:8; Әʹйан. 12:17). Ләма әм әʹщебмайи наминьн, wәки әм ча хьзмәткʹаред Хwәде, щара дьлтәнг дьбьн у кöл-дәрда дьвиньн. Бәре жи хьзмәткʹаред Хwәде щара дьлтәнг дьбун. Мәсәлә, Кʹьтеба Пирозда те готьне, wәки Даwьд пʹадша жь хәмед хwә дьнәʹлийа (Зәб. 13:2). Öса жи биньн бира хwә, wәки Паwлос жи сәва һʹәму щьвина хәм дькьр (2 Корн. 11:28). Ле һәрге әм ида кöл-дәрдада дьхәньqьн, әм чь дькарьн бькьн?
2 Баве мәйи әʹзмана кö мә һʹьз дькә, чаwа бәре али хьзмәткʹаред хwә дькьр, öса жи иро әw али мә дькә чахе әм кöл-дәрда дькʹьшиньн. Кʹьтеба Пироз мә ширәт дькә: «Һʹәму хәмед хwә бавежьнә сәр wи, чьмки әw бона wә хәм дькә» (1 Пәт. 5:7). Ле ча әм дькарьн әве йәке бькьн? Ве тʹемайеда әме шеwьр кьн дәрһәqа чар тьшта. Йа пешьн әw һәйә дöа, йа дöда Хәбәра Хwәде бьхуньн у сәр бьфькьрьн, йа сьсийа жь Хwәде рʹöһʹе wийи пироз бьхwазьн, у йа чара, дәрһәqа хәмед хwә гьли кьн wи кәсирʹа, итʹбарийа хwә кʹе жи тиньн. Чахе әм әwан тьшта шеwьр кьн, бьфькьрьн һәла чьда wәрʹа лазьм ә һе пешда һәрʹьн.
«ТÖ БАРЕ ХWӘ БЬДӘ ХÖДАН ӘWЕ ҺЬЛГЬРӘ ДӘWСА ТӘ»
3. Ча һун дькарьн бь сайа дöа «баре хwә» бьдьнә Йаһоwа?
3 Гава пешийе, кö чаwа баре хwә бьдьнә Хwәде, әw һәйә дöа. Йаһоwа баве мәйи әʹзмана мә гәләк һʹьз дькә. У ләма чахе һун сәва тьштәки бәрхwә дькʹәвьн, дьлтәнг дьбьн, йан дьчәрчьрьн, дьле хwә жерʹа вәкьн у гьли кьн дәрһәqа чәтьнайед хwә. Даwьде зәбурбеж жь Йаһоwа рʹәща дькьр: «Хwәдейо, гöһ бьдә дöайе мьн». Паше диса ве зәбуреда, әwи гот: «Тö баре хwә бьдә Хöдан әwе һьлгьрә дәwса тә» (Зәб. 55:1, 22). Чахе һун алийе хwәда һʹәму тьшти дькьн, сәва чәтьнайе дәрбаз кьн, ле чәтьнайи диса дьминә, бәрхwә нәкʹәвьн, бь дьл дöа бькьн Хwәдерʹа. Ле ча дöа дькарә али мә бькә, чахе дәрд-кöл дьле мәда зедә дьбьн? (Зәб. 94:18, 19).
4. Чахе әм дьлтәнг ьн, чьрʹа дöа гәләк фәрз ә?
4 Бьхунә Филипи 4:6, 7. Йаһоwа дькарә щаба дöа у рʹәщайед мә бьдә. Ле гәло чаwа? Чахе дьле мәда у һʹьше мәда дәрд һәнә, Хwәде дьлрʹьһʹәтийе дьдә мә, wәки әм аза бьн жь wан дәрда. Гәләк хушк-бьред мә сәр хwә тʹәхмин кьрьнә, wәки wәʹде тәнгасийа, әwана нә кö тʹәвһәв бунә у тьрс кʹәтийә дьле wан, ле Хwәде әʹдьлайи у дьлрʹьһʹәти дайә wан кö жь һʹьш-аqьле мәрьва зедәтьр ә. Һун жи дькарьн сәр хwә тʹәхмин кьн әве йәке. «Әʹдьлайийа Хwәде» дькарә али мә бькә һәр тәнгаси у чәтьнайа дәрбаз кьн! Бь тʹәмами итʹбарийа хwә ви созе Хwәде биньн: «Тö нәтьрсә, жь бәр кö әз бь тәрʹа мә; ль дора хwә нәньһерʹә, жь бәр кö Хwәдайе тә әз ьм; . . . бәле, әзе али тә бькьм» (Иша. 41:10).
ДЬЛРʹЬҺʹӘТИ ЖЬ ХӘБӘРА ХWӘДЕ
5. Хәбәра Хwәде ча дькарә дьлрʹьһʹәтийе бьдә мә?
5 Гава дöда, кö әм ча дькарьн дьлрʹьһʹәтийе бьстиньн, әw ә кö Кʹьтеба Пироз бьхуньн у сәр бьфькьрьн. Гәло чьрʹа әw йәк фәрз ә? Кʹьтеба Пирозда һәнә рʹебәри у ширәт кʹижан кö дькарьн али мә бькьн, wәки кем хәмгин бьн, у щара хwә жь хәма хwәй кьн жи. Хәбәра Хwәде дькарә али мә бькә у мә һеса кә, чьмки ль wедәре гьлийед Хwәде ньвисар ьн кʹижан кö билани нә. Чахе һун һәр рʹож бьфькьрьн сәр гьлийед Хwәде, у дьшьрмиш бьн кö ча ширәт у рʹебәрийа wи бьдьнә хәбате, һуне гәләк qәwи бьн. Хwәха Йаһоwа мәрʹа дьбежә wәки хwәндьна Хәбәра wи, дькарә qәwат у мерхасийе бьдә мә (Йешу 1:7-9).
6. Һун чь кʹаре дькарьн бьстиньн жь гьлийед Иса?
6 Әм жь Хәбәра Хwәде педьһʹәсьн, кö Иса ча хәбәрдьда тʹәви мәрьва. Гьлийед wи у һинкьрьнед wи бона wан мәрьва ча дәрман бу, у әwана дьлрʹьһʹәт дьбун. Әʹлаләт дьһатә щәм wи, чьмки әw бәр дьле дьлшкәстийада дьһат, йед сьст qәwи дькьр, у бәрдьли дьда йед дьлтәнг. (Бьхунә Мәтта 11:28-30.) Әwи һʹәму алийава сәва мәрьва хәм дькьр ча рʹöһʹанида, емосийалида öса жи һʹәwщед физикида (Марq. 6:30-32). Созе Иса, кö әwи Мәттада гот бона мә йә жи. Чаwа әwи али шандийед хwә дькьр, öса жи wе али мә бькә. Сәва кö аликʹарийе жь Иса бьстиньн, әʹсәйи нинә әw кʹеләка мә бә, ча тʹәви шандийед хwә. Әw ньһа сәр әʹзмана Пʹадша йә, ле диса жи бәр дьле мәда те. У чахе әм дьлтәнг дьбьн, әw дькарә wәʹдәда аликʹарийе бьдә мә. Бәле, Иса wәʹде тәнгасийа дькарә али wә бькә wәки сәбьр кьн, у әw дькарә öса жи дьлрʹьһʹәтийе у мерхасийе бьдә wә (Ибрн. 2:17, 18; 4:16).
ҺʹÖНÖР КÖ БЬ САЙА РʹÖҺʹЕ ПИРОЗ ПЕШДА ТЕН
7. Чахе һун жь Хwәде рʹöһʹе пироз бьхwазьн, һуне чь кʹаре бьстиньн?
7 Иса соз да wәки чахе әм жь Баве мәйи әʹзмана рʹöһʹе пироз бьхwазьн, әw wе әʹсә бьдә мә (Луqа 11:10-13). Демәк, йа сьсийа әw һәйә бәре рʹöһʹе пироз, йане qәwата Хwәде, кʹижан кö дькарә али мә бькә кем хәмгин у дьлтәнг бьн. Әw һʹöнöред кö бь рʹöһʹе Хwәдейи пироз пешда тен, рʹьнд әʹйан дькьн wәки Хwәдейе Һьмзор йәки ча нә. (Бьхунә Галати 5:22, 23; Колс. 3:10.) Һәрге әм әwан һʹöнöра пешда биньн, һәләqәтийа мә тʹәви мәрьва wе баш бә. Демәк әме һе кем рʹасти wан дәрәща бен, кʹижан кö дькарьн мә дьлтәнг кьн у дьле мә бешиньн. Wәрә шеwьр кьн кö ча бәре рʹöһʹе пироз дькарә гәләк али мә бькә.
8-12. Бәре рʹöһʹе Хwәдейи пироз ча дькарә али мә бькә, wәки кем хәма бькьн у дьлтәнг нәбьн?
8 «Һʹьзкьрьн, шабун, әʹдьлайи». Һәрге һун һьндава мәрьва бь qәдьр бьн, һуне бьвиньн, wәки мәʹнийа хәмгинийе щәм wә wе һе кем бә. Ле чаwа? Чахе һун һʹьзкьрьне дьдьнә кʹьфше һьндава хушк-бьра, һьндава wанда шәwат ьн, у бь qәдьр ьн, һуне һе кем рʹасти wан дәрәща бен, кö дькарьн wә дьлтәнг кьн у баргьран кьн (Рʹом. 12:10).
9 «Сәбьркьрьн, ширьнайи, qәнщи». Кʹьтеба Пироз мә ширәт дькә, wәки чаwа әм дькарьн тʹәви мәрьва әʹдьлайе хwәй кьн: «Һәврʹа ширьн у дьлшәwат бьн, ль һәв бьбахшиньн» (Әфәс. 4:32). Һәрге әм öса бькьн, әме әw чәтьнайед кö дькарьн дәрдед мә зедә кьн, һе зу сафи кьн. Һьн жи, мәрʹа wе дьһа һеса бә чәтьнайед ортʹа мә у мәрьвада сафи кьн, кʹижан кö жь бо qьсуртийа мә пешда тен.
10 «Амьни», у баwәри. Иро әм дьһа зәʹф бәрхwә дькʹәвьн у хәма дькьн сәва пʹәра у тьштед дьн кö әм дьхwазьн qазанщ кьн (Мәтʹлк. 18:11). Сәва кö әм кем хәмгин бьн бона wан тьшта, әм гәрәке qайим баwәр кьн wәки Йаһоwа wе wан чәтьнайада али мә бькә. Һьн жи, ширәта Паwлос кö пе рʹебәрийа Хwәде һатә ньвисаре, дькарә али мә бькә, wәки әм сәва wан тьшта гәләк бәрхwә нәкʹәвьн. Паwлос гот: «Дәстед wәда чьqас һәйә, рʹази бьн». Паши wан гьлийа әwи зедә кьр: «Хwәде гот: ‹Әзе тʹö щар жь тә нәчьм у тʹö щар тә бәрʹнадьм›. Ләма жи рʹуйе мә дьгьрә кö әм бежьн: ‹Хöдан пьштоване мьн ә у әз натьрсьм. Инсане чь ль мьн бькә?›» (Ибрн. 13:5, 6).
11 «Мьлукти, хwәгьртьн». Бьфькьрьн wәки әw һʹöнöр жи чьqас кʹаре дькарьн мәрʹа биньн. Әw һʹöнöр али мә дькьн, wәки кьред öса нәкьн кö хwәрʹа дәрда зедә кьн. Һьн жи әw али мә дькьн, кö әм нәкʹәвьнә wан дәрәща, кʹижанада әм дькарьн тьштед нәрʹаст бькьн, мәсәлә, «тәʹлайи, һерс, бәрзәqи, qарʹә-qарʹ у кʹьфьри-зьфьри» (Әфәс. 4:31).
12 Мьлукти öса жи мәрʹа лазьм ә, сәва кö әм итʹбарийа хwә «дәсте Хwәдейи зор» биньн у «һʹәму хәмед хwә бавежьнә сәр wи» (1 Пәт. 5:6, 7). Һәрге һун мьлук ьн, Йаһоwа wе әʹсә али wә бькә у чʹәʹве wи wе сәр wә бә (Мих. 6:8). У чахе һун фәʹм дькьн wәки һʹәму тьшт дәсте wәда нинә, һуне итʹбарийа хwә Хwәде биньн у баре хwә бьдьнә wи. Әw йәк wе хәмед wә дьһа кем кә.
«ИДИ . . . ХӘМА НӘКЬН»
13. Чахе Иса гот кö «иди . . . хәма нәкьн», бь wан гьлийа әwи чь дьхwәст бьгота?
13 Мәтта 6:34-да (бьхунә), әм дьхуньн гьлийед Иса: «Иди . . . хәма нәкьн». Ле гәләк чәтьн ә wәки әм qә хәма нәкьн. Демәк бь wан гьлийа Иса тьштәки майин дьхwәст бьгота. Әwи нә гот wәки чәтьнайи у хәмед мә wе тʹöнә бьн. Мәсәла Даwьд у Паwлос дәрһәqа кʹижана мә жоре гот, әwе йәке рʹьнд дьдә кʹьфше. Бь wан гьлийа Иса дьхwәст шагьртед хwәрʹа бьгота wәки бефәйдә йә гәләк хәма бькьн у гәләк бәрхwә кʹәвьн, чьмки әw йәк чәтьнайа сафи накә. Хәмед мәйи рʹоже бәси мә нә, ләма әм гәрәке хwәрʹа дәрда зедә нәкьн, у дәрһәqа бәре йан ахьрийе гәләк нәфькьрьн. Ле һун ча дькарьн әw ширәте Иса бьдьнә хәбате у кем хәма бькьн?
14. Һун ча дькарьн дьһа кем хәма бькьн сәва шашийед хwәйә бәре?
14 Һьнәк дьбәкә дьлтәнг дьбьн сәва кьред хwә йан шашийед хwәйә бәре. Мәсәлә, дьбәкә әм хwә нәһәq дькьн сәва кьред хwә, кʹижан кö дьбәкә һәла һе гәләк сал пешда мә кьрийә. Пʹадша Даwьд жи щара дьлтәнг дьбу, жь бо ве йәке кö нәһәqийед wи сәр сәре wирʹа бьльндтьр бьбун. Әwи гот: «Дькьм зарʹин жь ахинийа дьле хwә» (Зәб. 38:3, 4, 8, 18). Ве дәрәщеда Даwьд чь гәрәке бькьра? Әwи ча хwә да кʹьфше һʹаләки öсада? Әwи баwәр дькьр, wәки Йаһоwа рʹәʹм ә у дьбахшинә wи. Ләма әwи гьлийе öса гот: «Хwәзи ль wи бәндәйи, кö нәһәqийед wи һатьнә афукьрьне». (Бьхунә Зәбур 32:1-3, 5.)
15. а) Чьрʹа әм гәрәке гәләк бәрхwә нәкʹәвьн сәва рʹожа иройин? б) Һун чь дькарьн бькьн, сәва хәмед хwә кем кьн?
15 Щара әм дькарьн дәстпекьн гәләк хәма бькьн сәва рʹожа иройин. Мәсәлә, чахе Даwьд ньвиси Зәбура 55, wи wәʹдәйи әw гәләк дьлшькәсти бу, чьмки әʹмьре wи бьн qәзийеда бу (Зәб. 55:2-5). Ле йәкә wи һʹале чәтьнда у дьлтәнгийеда, әwи диса жи баwәрийа хwә Йаһоwа дьани. Ве тәнгасийеда Даwьд тʹьме Хwәдерʹа дöа дькьр, ле йәкә хwәха жи тьштәк дькьр сәва хәмед хwә кем кә (2 Сам. 15:30-34). Wәрә әм жи чʹәʹв бьдьнә Даwьд. Wәʹде тәнгасийа гәләк дьлтәнг нәбьн, ле чь дәсте мә те бькьн, сәва чәтьнайа дәрбаз кьн. Чь жи әм нькарьн, wәрә әм бьдьнә дәсте Йаһоwа, wәки әw али мә бькә.
16. Әw йәк кö наве Хwәде чь те һʹәсабе, ча дькарә баwәрийа wә qәwи кә?
16 Щара әм дьбәкә гәләк хәма бькьн, дәрһәqа чәтьнайа, кö әм дьфькьрьн wәки ахьрийеда wе рʹасти мә бен. Ле нәлазьм ә wәки һун гәләк бәрхwә кʹәвьн сәва ве йәке, чь кö һун ньзаньн wе бьбә йан на. Ле чьрʹа? Чьмки әw тьшт дькарьн нә жи бьqәwьмьн у öса хьраб нибьн ча әм дьфькьрьн. Хенщи ве йәке, әм гәрәке бир нәкьн wәки һʹәму тьшт дәсте Хwәдеда йә, у кö әм дькарьн һʹәму хәмед хwә бавежьн сәр wи. Наве wи те һʹәсабе: «Әw Пек Тинә» (Дәркʹ. 3:14, ДТʹ). Әw йәк мәрʹа дьдә кʹьфше, wәки әw һʹәму тьшти дьвинә, у әw qьрара хwә һьндава хьзмәткʹаред хwә, wе әʹсә бинә сери. Һун гәрәке дöдьли нәбьн кö Хwәде дькарә кʹәрәма хwә бьдә йед амьн, у али wан бькә, wәки хәма нәкьн сәва тьштед бәре, рʹожа иройин у сәва ахьрийе.
ДЬЛЕ ХWӘ ВӘКЬН WИ КӘСИРʹА, ИТʹБАРИЙА ХWӘ КʹЕ ЖИ ҺУН ТИНЬН
17, 18. Ча хәбәрдан тʹәви мәрьве незик, дькарә али wә бькә кö дьһа кем хәма бькьн?
17 Гава чара, кö дькарә али wә бькә кем хәма бькьн, әw һәйә хәбәрдан тʹәви wан, итʹбарийа хwә кʹе жи һун тиньн. Чахе һун дьле хwә щоте хwәрʹа вәкьн, һәвале незикрʹа, йан рʹуспийе щьватерʹа, дьле wә wе рʹьһʹәт бә у һуне ида һаqас дьлтәнг нәбьн у гәләк хәма нәкьн. «Кöл-дәрд дьле мерьв дьһʹәлинә, ле готьнәкә qәнщ wи ша дькә» (Мәтʹлк. 12:25). Чахе һун дәрде хwә кәсәкирʹа һʹәлал гьли кьн, һуне һе рʹьнд дәрәща хwә фәʹм кьн у ида wе дәрд дьле wәда нәминә. Кʹьтеба Пироз мәрʹа дьбежә: «Бе ширәт мәрәм у тʹьвдир бәтал дьбьн, ле бь сайа гәләк ширәткʹара әw тенә сери» (Мәтʹлк. 15:22).
18 Йаһоwа öса жи бь сайа щьвате али мә дькә, wәки гәләк хәма нәкьн. Сәр щьвате әм хәбәрдьдьн тʹәви хушк-бьра, кʹижан кö мә һʹьз дькьн у дьл дьдьнә мә (Ибрн. 10:24, 25). Бь сайа ве йәке кö әм дьл дьдьнә һәв, әме һе qәwи бьн у әме кем хәма бькьн (Рʹом. 1:12).
ҺӘЛӘQӘТИЙА ТӘ ТʹӘВИ ХWӘДЕ, QӘWАТА МӘЗЬН Ә БОНА ТӘ
19. Чьрʹа һун дькарьн дöдьли нәбьн, wәки һәләqәтийа wә тʹәви Хwәде wе wә qәwи кә?
19 Wәрә шеwьр кьн мәсәла бьраки мә рʹуспи, кö Канадайеда дьжи. Әw һин бу wәки чьqас фәрз ә хәмед хwә бавежә сәр Йаһоwа. Әw мәкʹтәбеда дәрсдар ә, у әw хәбатәкә гәләк чәтьн ә, алийе емосийалида, һьн жи нәхwәшийа wи һәйә кö әw гәләк щар емосийалида тʹәвһәв дьбә. Ле ча әw бьра wан чәтьнайада qәwи дьминә? Әw шьровәдькә: «Йа пешийе, әз һʹәму тьшти дькьм, сәва һәләqәтийа хwә тʹәви Хwәде хwәй кьм. Әw йәк qәwате дьдә мьн, wәки емосйалида хwә бьгьрьм у тʹәвһәв нибьм. Чахе мьнрʹа гәләк чәтьн ә, һәвалед мьн у бьред рʹöһʹани гәләк али мьн дькьн. Хенщи ве йәке, әз дьле хwә жьна хwәрʹа вәдькьм. Öса жи рʹуспийе щьвате у бәрпьрсийаре мьһале али мьн кьрьн, wәки әз сәр дәрәща хwә рʹаст бьньһерʹьм. Әз öса жи чум щәм һʹәким, у әwе йәке жи гәләк али мьн кьр, у мьн ида wәʹде хwә щурʹәки майин хәрщ дькьр. Мьн хwәрʹа wәʹдә башqә дькьр сәва һеса бьм у спортева мьжул бьм. Һеди-һеди әз ида дьлрʹьһʹәт бум, у тʹәвһәв нәдьбум. Чахе чәтьнайи һәйә кʹижан кö әз нькарьм контрол кьм, әз дьдьмә дәсте Йаһоwа wәки әw али мьн бькә».
20. а) Әм ча дькарьн хәмед хwә бавежьнә сәр Йаһоwа? б) Тʹема дьнда әме дәрһәqа чь шеwьр кьн?
20 Ве тʹемайеда әм пеһʹәсийан, wәки чьqас фәрз ә кö хәмед хwә бавежьн сәр Хwәде, демәк жерʹа дöа бькьн, у Хәбәра wи бьхуньн. Әм öса жи пеһʹәсийан wәки мәрʹа чьqас лазьм ә, кö һʹöнöред бәре рʹöһʹе пироз нав хwәда пешда биньн, öса жи дьле хwә мәрьве незикрʹа вәкьн, у бенә сәр щьвате. Тʹема дьнда әме шеwьр кьн кö Йаһоwа ча али мә дькә бь ве йәке, кö мәрʹа соз дьдә wәки мә кʹәрәм кә (Ибрн. 11:6).