Чьма Нәрʹаст Фәʹм Дькьн?

Кәчʹькәкә бьчʹук дит, кö чаwа жь кʹархане ду һьлдькʹьшә у дьбә мина әʹwьра. Әw дьфькьрә кö әw кʹарханә хут сәва ве йәке йә, кö әwьра чекә. Зарʹ гәләк тьшт фәʹм накә у ньзанә, ләма жи сәва мә әв дькарә пекʹәни бе кʹьфше. Ле чахе мәрьв тьштәки ньзанә йан фәʹм накә, әв йәк дькарә ль сәр жийина wи хьраб һʹöкöм кә. Бәʹса хәбәре, чахе тö дәрбера дәрман вәдьхwи у нахуни һәла чь рʹебәри сәва ве йәке те дайине, жь бо ве йәке тö дькари зийане бькʹәви.

Нәфәʹмкьрьн у нәзанийа тьштед рʹöһʹани дькарә һе хьраб бә сәва мә. Мәсәлә, һьнә мәрьв һинкьрьнед Иса фәʹм накьн (Йуһʹәнна 6:48-68). Дәwса кö һе зедә пебьһʹәсьн, әwана һʹәму тьштед кö Иса һин дькьр, инкʹар дькьн. Сәд һʹәйф!

Һәрге тö Кʹьтеба Пироз дьхуни сәва кö рʹебәрийе бьвини, әв гәләк баш ә. Ле дьбәкә чахе тö дьхуни, һьнә тьшт сәва тә нәфәʹмдари йә. Гәләк мәрьв ве йәкерʹа qайил ьн. Wәрен әм шеwьр кьн се фькьред нәрʹаст йед кö Кʹьтеба Пирозва гьредайи нә.

• Һьнә мәрьв нәрʹаст фәʹм дькьн әве тʹәмийа жь Кʹьтеба Пироз «Жь Хwәде . . . бьтьрсә». Әwана әве тʹәмийе рʹастә-рʹаст фәʹм дькьн (Wаиз 12:13). Ле Хwәде нахwазә кö хьзмәткʹаред wи бәр wи бьләрьзьн. Әw дьбежә: «Тö нәтьрсә, жь бәр кö әз бь тәрʹа мә; ль дора хwә нәньһерʹә, жь бәр кʹö Хwәдайе тә әз ьм; әзе тә зәхм бькьм [qәwи кьм]; бәле, әзе али тә бькьм; . . . әзе бь дәсте рʹасте дадийа хwә жь тәрʹа бьбьм аликʹар» (Ишайа 41:10). Жь Хwәде бьтьрсьн тʹәне те һʹәсабе, кö qәдьре wи бьзаньбьн у бьтьрсьн дьле wи бешиньн.

• 

  Йед дьн жи нәрʹаст фәʹм дькьн әван гьлийа: «Wәхта һәр кʹари һәйә; . . . wәхта рʹакьрьна йә . . . wәхта кöштьне һәйә». Әwана дьфькьрьн кö Хwәде хwәха сафи дькә, кö һәр мәрьв чь чах бьмьрә (Wаиз 3:1, 2). Бь рʹасти әв гьли-готьн дина мә дьдьн ль сәр wәʹде жийина мә у нә кö сәр бәхт йан йазийа мә. Хәбәра Хwәде öса жи мә һин дькә, wәки сафикьрьнед мә дькарьн ль сәр дьрежайа жийина мә һʹöкöм кьн. Әм дьхуньн: «Тьрса ХÖДАН тʹәмәне [жийине] дьреж дькә» (Мәтʹәлок 10:27; Зәбур 90:10; Ишайа 55:3). Гәло чь щурʹәйи? Мәсәлә чахе әм Хәбәра Хwәде һьлдьдьн һʹәсаб у qимәт дькьн, әв мә һелан кә жь кьред öса хwә дур бьгьрьн, ча гәләк ичʹкәwәхwарьн у бенамуси (1 Корьнтʹи 6:9, 10).

• Һәнә йед öса жи, йед кö әван гьлийед жь Кʹьтеба Пироз нәрʹаст фәʹм дькьн, кʹидәре кö те готьне wәки әʹзман у әʹрд «тенә хwәйкьрьне, кö бь агьр öнда бьн» (2 Пәтрус 3:7). Хwәде соз дьдә, кö әw wе тʹö щар әʹрде кʹöта нәкә. Хwәде «әʹрд дани ль сәр бьнгәһ, кö тʹö щар жь щи нәһʹәжә» (Зәбур 104:5; Ишайа 45:18). Вьра те готьне дәрһәqа шьхöлед дьнйа дöру, нә кö дәрһәqа әʹрде, йе кö wе кʹöта бә у агьрда öнда бә. Ле чь әм дькарьн бежьн дәрһәqа әʹзман? Әw гьли рʹастә-рʹаст дькаре бе һʹәсабе ча әʹзман, щийе стәйрка, йан жи щийе Хwәде. Әw щи wе тʹö щар найне кʹöтакьрьне.

ЧЬМА КʹЬТЕБА ПИРОЗ ЩАРНА НӘРʹАСТ ТЕ ФӘʹМКЬРЬНЕ?

Чаwа кʹьфш ә, гәләк щар мәрьв фәʹм накьн гьли-готьнед кö жь Кʹьтеба Пироз дьхуньн. Ле чьма Хwәде дьһелә wәки тьште öса бьqәwьмә? Һьнәк дьбә кö öса дьфькьрьн: «Һәрге Хwәде пʹьрʹ билан ә у һʹәму тьшти занә, әwи wе бькарьбуйа кʹьтебәкә öса мәрʹа бьда, йе кö бь гьлийе һеса бьһата ньвисандьне, у һәр кәсирʹа wе фәʹмдари буйа. Чьма Әwи әв йәк нәкьр?» Дина хwә бьдьнә се мәʹнийа кö чьма гәләк щара мәрьв нәрʹаст Кʹьтеба Пироз фәʹм дькьн.

1. Кʹьтеба Пироз дькарьн тʹәне мәрьвед мьлук фәʹм бькьн у йед кö һазьр ьн һин бьн. Иса готә Баве хwә: «Шькьр наве тә бә Баво, Хöдане әʹрд у әʹзман, кö тә әв тьшт жь зана у билана вәшартьн у ль бәр зарʹа вәкьр» (Луqа 10:21). Кʹьтеба Пироз бь щурʹе öса һатә ньвисандьне, кö тʹәне мәрьвед бь ньһерʹандьна рʹаст дькарьн әве фәʹм бькьн. Мәрьвед бабах, йед кö чʹәʹвед хwәда занә у билан ьн, нәрʹаст Кʹьтеба Пироз фәʹм дькьн. Ле мәрьвед кö Кʹьтеба Пироз дьхуньн, у ньһерʹандьна «зарʹа» хwәй дькьн, әwана мьлук ьн у һьзрәт ьн һин бьн. Ләма жи Хwәде wана кʹәрәм дькә у әwана әʹламәтийа Хwәде гәләк баш фәʹм дькьн. Бь рʹасти жи Хwәде чьqас бь аqьлайи Кʹьтеба Пироз да ньвисаре!

2. Кʹьтеба Пироз сәва wан мәрьва йә, йед кö бь дьл у щан аликʹарийе жь Хwәде дьхwазьн сәва кö фәʹм бькьн. Иса да кʹьфше кö мәрьварʹа wе аликʹари лазьм бә, сәва кö бь тʹәмами бькарьбьн фәʹм бькьн тьштед кö әw һин дькьр. Чаwа wана гәрәке әв аликʹари бьстанда? Иса шьровәкьр: «Пьштован, аwа готи Рʹöһʹе Пироз, кö Бав wе бь наве мьн бьшинә, әwе wә һини һʹәму тьшти кә» (Йуһʹәнна 14:26). Демәк Хwәде рʹöһʹе хwәйи пироз дьдә мә, йане qәwата хwә, сәва кö али мәрийа бькә тьштед хwәнди фәʹм бькьн. Рöһе пироз öса жи ча бежи гәләк Мәсиһийед щерʹьбанди һелан дькә, сәва кö әwана аликʹарийе бьдьнә йед дьнена кö тьштед хwәнди фәʹм бькьн (Кʹаред Шандийа 8:26-35).

3. Һьнә пʹаред Кʹьтеба Пироз, мәрьв дькарьн тʹәне wәʹде кʹьфшкьрида фәʹм бькьн. Мәсәлә, Данийел пʹехәмбәррʹа һатьбу готьне wәки әʹламәтийа дәрһәqа ахьрийе бьньвисә. Мьлйакʹәтәки wирʹа гот: «Ле бәле тö, йа Даниел, һәта wәхта даwине ван готьна вәшерә у пьртуке мор бькә». Qьрнә дәрбаз бун, у гәләк мәрьва дәстпекьрьн кʹьтеба Данийел бьхуньн, ле нькарьбун мәʹна ве фәʹм бькьн. Бь рʹасти хwәха Данийел жи фәʹм нәдькьр һʹәму тьштед кö әwи дьньвиси. Әwи бь мьлукти гот: «У мьн әв бьһист, ле бәле феһм нәкьрьм». Wәʹдә шунда мәрьв гәрәке рʹаст фәʹм кьрана пʹехәмбәртийа Хwәде йа кö Данийел ньвиси. Ле һәмьки әw йәк wе бьqәwьмийа wәʹдәки кʹьфшкьрида, кʹижан кö Хwәде бьжартьбу. Мьлйакʹәт дьбежә: «Һәрә, Даниел, жь бәр кö һәта wәхта даwине ван готьнан вәшарти нә у мор кьри нә». Гәло кʹи wе әʹламәтийа Хwәде фәм бькә? «Тö кәси жь йед хәрабан ә, wе фәм нәкьн. Ле бәле, йед бь фәмкʹари нә wе фәʹм бькьн» (Данийел 12:4, 8-10). Ләма жи Хwәде, мәʹна әʹламәтийа Кʹьтеба Пироз вәнакә, һʹәта wәде кʹьфшкьри нәйе.

Шәʹдед Йаһоwа жи гәләк тьшт жь Кʹьтеба Пироз нәрʹаст фәʹм дькьрьн. Ле чахе wәʹде Хwәде гьһишт сәва кö һьнә тьшт зәлал бьн, Шәʹдед Йаһоwа бь һазьрбун ньһерʹандьна хwә у фәʹмкьрьна хwә гöһастьн. Бь ве йәке әwана чʹәʹв дьдьнә шандийед Иса, йед кö бь мьлукти ньһерʹандьна хwә гöһастьн чахе Иса wана рʹаст кьр (Кʹаред Шандийа 1:6, 7).

Кәчʹька бьчʹук дәрһәqа кʹижани кö мә жоре гьли кьр, дьфькьри кö әwьр жь кʹархане чедьбьн. Әwе әв йәк нәрʹаст фәʹм дькьр. Ле гәләк фәрз ә кö әм һинкьрьнед Кʹьтеба Пироз рʹаст фәʹм бькьн. Мәрьве кö хwәха дьхунә Кʹьтеба Пироз у дьхәбьтә сәва кö фәм бькә, дькарә тьштед фәрз жь дина хwә бәрдә. Ләма жи аликʹарийе бьгәрʹә сәва кö тьштед хwәнди фәʹм бьки. Аликʹарийе бьхwазә жь wан мәрийа, йед кö бь ньһерʹандьна рʹаст у бь мьлукти Кʹьтеба Пироз һин дьбьн. Әв әw мәрьв ьн йед кö баwәр ьн, wәки рʹöһʹе Хwәдейи пироз wе али wан бькә Кʹьтеба Пироз фәʹм бькьн. Әw мәрьв öса жи баwәр дькьн кö әм дьжин һәма ви wәʹде кʹьфшкьрида, чь чах кö Хwәде дьхwазә wәки әм һе рʹьнд Кʹьтеба Пироз фәʹм бькьн. Шәрʹм нәкә незики Шәʹдед Йаһоwа би у тʹәви wана хәбәр ди, йан жи бьхунә әʹламәти ль сәр малпәра jw.org. Кʹьтеба Пироз соз дьдә: «Гәр тö банги аqьле бьки . . .  Тöйе тьрса ХÖДАН фем бьки» (Мәтʹәлок 2:3-5).