Гәло Щәжьна Буйина Иса бона Мәсиһийа йә?

Бь милйона мәрьв нав тʹәмамийа дьнйайе баwәр дькьн кö әв Щәжьн бь әʹдәти гәрәке бе кьрьне, чьмки әв рʹожа буйина Иса Мәсиһ ә. Ле тö qә щарәке фькьрийи, һәла Мәсиһийед qьрʹна йәке, демәк әwед кö дәр-доре Иса бун, Щәжьна буйина Wи дәрбаз дькьрьн йан на? У тö зани wәки Кʹьтеба Пироз дәрһәqа рʹожа буйине чь дьбежә? Щаба wан пьрса дькарә аликʹарийе бьдә кö тедәрхьн, wәки Щәжьна буйина Иса бона Мәсиһийа йә, йан на.

Йа пешьн, Кʹьтеба Пироз дәрһәqа рʹожа буйина Иса у рʹожа буйина хьзмәткʹаред Хwәдейи амьн тʹö тьшти набежә. Ньвисаред Пироз дина мә дьдьн тʹәне ль сәр дö кәса, йед кö рʹожа буйина хwә дәрбаз дькьрьн. Әw һәр дö жи хьзмәткʹаред Йаһоwа Хwәде нибун, у wәʹде рʹожа буйина wан, тьштәки хьраб qәwьми (Дәстпебун 40:20; Марqос 6:21). Ль гора Әнсиклопедийа Британи, Мәсиһийед qьрʹна йәке у дöда, мьqабьли «әʹрф-әʹдәтед пʹутпʹарьста бун, йед кö рʹожа буйинева гьредайи бун».

Кʹьтеба Пироз рʹастә-рʹаст набежә кö чь чах Иса һатә буйине. Әнсиклопедийа «McClintock and Strong’s Cyclopedia» öса дьбежә: «Рʹожа буйина Мәсиһ нькарьн тедәрхьн жь Пәймана Ну, у нә жи жь канийед дьн». Хенщи wе йәке һәрге Иса бьхwәста, кö шагьртед wи рʹожа буйина wи дәрбаз кьрана, әwи wе wанарʹа әʹйан кьра.

Йа дöда, Кʹьтеба Пироз набежә кö Иса йан кәсәк жь шагьртед wи, рʹожа буйина хwә дәрбаз дькьрьн. Ль гора Әнсиклопедийа «New Catholic», дәрһәqа дәрбазкьрьна рʹожа буйина Иса бәри пешьн әʹйан дьбә алманаха Рʹомайида демәк кʹьтеба wанда, ньвисандьна кʹижани кö гьредайи йә сала 336-ва [Д.М.]». Зәлал ә, wәки әв әʹламәти һатьбу ньвисаре паши тʹәмамкьрьна Кʹьтеба Пироз у гәләк qьрʹнә паши wе йәке чахе Иса сәр әʹрде бу. Ләма жи Әнсиклопедийа «McClintock and Strong’s Cyclopedia» дина мә дьдьн, кö «дәрбазкьрьна рʹожа буйина Иса, дәʹwакьрьна Хwәде нинә, у нә жи сәре-серида дәрһәqа ве йәке Пәймана Нуда һатийә ньвисаре».a

Мамостәйе Мәзьн демәк Иса, рʹебәрийа зәлал дабу дәрһәqа wе йәке, кö пәйчуйед wи чь гәрәке бькьн у әв һʹәму тьшт дь Кʹьтеба Пирозда ньвисар ә. Ле дәрһәqа рʹожа буйина Иса дь Кʹьтеба Пирозда нәһатийә ньвисаре у әв дәʹwакьрьн нинә. Анәгори дәрсдаре кö нахwазә wәки шагьртед wи тьштәки зедә бькьн хенщи wе рʹебәрийе, кö wанарʹа һатийә дайине, öса жи Иса нахwазә кö пәйчуйед wи «жь ньвисаре» тьштед зедә бькьн (1 Корьнтʹи 4:6).

Хенщи wе йәке, һәйә Щәжьнәкә гәләк фәрз, йе кö Мәсиһийед qьрʹна йәкерʹа гәләк нас бу, демәк дәрбазкьрьна Биранина мьрьна Иса. Иса хwәха шагьртед хwәрʹа готьбу, кö чь чах гәрәке әве щәжьне дәрбаз кьн у öса жи рʹебәри да wан, кö чаwа әве йәке бькьн. Дәрһәqа ве рʹебәрийе у рʹожа мьрьна Wи, дь Кʹьтеба Пирозда һатийә ньвисаре (Луqа 22:7, 19; 1 Корьнтʹи 11:25).

Чаwа мә дит, рʹожа буйина Иса әв һәйә Щәжьн, у Мәсиһийед qьрʹна йәке хwә ль ви әʹдәте пʹутпʹарьстийе нәдьгьртьн. Һәйнәсәр, Кʹьтеба Пироз набежә дәрһәqа wе йәке, кö хwәха Иса йан кәсәки дьн рʹожа буйина wи дәрбаз дькьрьн. Бь wан избатийа, бь милйона Мәсиһийа нав тʹәмамийа дьнйайе фәʹм кьрьн, кö Щәжьна рʹожа буйина Иса нә бона wан ә.