Әw Тьшт Бьсперә Мәрьвед Амьн

1, 2. Иро мәрьв ча дьньһерʹьн сәр хәбата хwә?

ГӘЛӘК мәрьв иро дьфькьрьн, wәки хәбат wана йан бьльнд йан ньмьз дькә. Һьнә културада, чахе мәрьв һәврʹа дьбьнә нас, әʹдәт ә wәки һәв бьпьрсьн: «Тö чь хәбате дьки?»

² Щара Кʹьтеба Пироз мәрьва бь хәбата wан әʹйан дькә, мәсәлә әw дьбежә, «Мәттайе хәрщгьр», «Шьмһʹуне чʹәрмкәрда», у «Луqайе дохторе дәлал» (Мәт. 10:3; Кʹар. Шанд. 10:6; Колс. 4:14). Кʹьтеба Пироз дьбежә кö мәрьв пе шьхöл у щабдарийед хwә тенә кʹьфше, кö әw чь щурʹә мәрьв ьн. Мәсәлә әм дьхуньн дәрһәqа Даwьд Пʹадша, Елйас пʹехәмбәр, у Паwлосе шанди. Әw мәрьв гәләк qимәт дькьрьн әw шьхöл, кö Хwәде дабу wан. Әм жи гәрәке мина wан qимәт кьн һәр шьхöле кö Хwәде дайә мә.

3. Чьрʹа лазьм ә wәки бьред әʹмьрда мәзьн, бьред щаһьл һин кьн? (Бьньһерʹә шькле әʹwльн.)

³ Әм һʹьз дькьн Йаһоwарʹа хьзмәт кьн у qимәт дькьн әw шьхöле кö әм тʹәшкиләта wида дькьн. Гәләк жь мә һʹьз дькьн шьхöле хwәйи щьватеда у дьбәкә әм дьхwазьн тʹьме һәма әwи шьхöли бькьн. Ле йазьх, жь бо гöне Адәм әм гьшк кал-пир дьбьн, у ида һаqас qәwата мә тʹöнә, ча бәре (Wаиз 1:4). Wан пашwәхтийа‚ жь бо ве йәке һьнә чәтьнайи пешда һатьн. Иро шьхöле бәлакьрьна мьзгинийе гәләк зедә у мәзьн дьбә. Öса жи тʹәшкиләта Йаһоwа һащәт у техноложийед тʹәзә дьдә хәбате, сәва кö һе зедә мәрьв мьзгинийе пебьһʹәсьн. Ле бона мәрьвед әʹмьрда мәзьн, щара чәтьн ә һин бьн wан тьштед тʹәзә бьдьнә хәбате (Луqа 5:39). Һәрге жи әw йәк wанрʹа чәтьн нинә, йәкә әwана нькарьн һаqас шьхöл бькьн, чьqас щаһьлa дькарьн (Мәтʹлк. 20:29). Ләма wе бь һʹьзкьрьн у билани бә, һәрге йед әʹмьрда мәзьн, һазьр кьн бьред щаһьл, сәва әwана һе зедә щабдарийа һьлдьн сәр хwә. (Бьхунә Зәбур 71:18.)

4. Чьрʹа һьнәкарʹа чәтьн ә wәки шьхöле хwә бьдьн дәсте кәсәки дьн? (Бьньһерʹьн чаргошә «Чьрʹа Дькарә Мәрʹа Чәтьн бә wәки Шьхöле Хwә Бьдьнә Дәсте Кәсәки Дьн?».)

⁴ Һьнәкарʹа һеса нинә щабдарийа хwәйә щьватеда бьдьнә дәсте кәсәки дьн. Чьмки һьнәк нахwазьн öнда кьн әw шьхöле кö әwана һʹьз дькьн у qимәт дькьн. Һьнәк жи дьфькьрьн wәки йед щаһьл нькарьн мина wан шьхöл рʹьнд бькьн. Һьнәк жи дьбәкә дьфькьрьн, wәʹде wан тʹöнә бьред дьн һин кьн. Ле бьред щаһьлрʹа лазьм ә сәбьр кьн, чахе шьхöл һе надьн дәсте wан.

5. Ве тʹемайеда әме дәрһәqа кʹижан пьрса шеwьр кьн?

⁵ Wәрә әм шеwьр кьн дö пьрса: Йа пешийе, ча бьред әʹмьрда мәзьн дькарьн али бьред щаһьл бькьн, сәва әwана һе зедә щабдарийа һьлдьн сәр хwә, у чьрʹа әw йәк фәрз ә? (2 Тимтʹ. 2:2). Йа дöда, чьрʹа фәрз ә wәки йед щаһьл әʹщьз нәбьн чахе бьред әʹмьрда мәзьн у щерьбанди wана һин дькьн? Ле wәрә пешийе әм биньн бира хwә сәрһатийа Даwьд Пʹадша, кö әwи чаwа кöрʹе хwә һазьр кьр сәва шьхöләки мәзьн.

ДАWЬД СЬЛЕМАН ҺАЗЬР КЬР У АЛИ WИ КЬР

6. Даwьд Пʹадша чь дьхwәст бькьра, у дәрһәqа ве йәке Йаһоwа чь жерʹа гот?

⁶ Дьжмьна бь сала пәй Даwьд дькʹәтьн у әw жь щики дьрʹәвийа щийе дьн. Паше, чахе әw бу пʹадша, ида мала wийә баш һәбу, ле әw бәрхwә дькʹәт wәки «мала», демәк пʹарьстгәһа Йаһоwа тʹöнә бу. Ләма әwи хwәрʹа нет дани, wәки бона Йаһоwа пʹарьстгәһе ава кә. Әwи дәрһәqа ве йәке Натʹанрʹа гот: «Ва әз дьжим мала кö жь даре әрзе йә, ле сьндоqа пәймана Йаһоwа бьн чадьрада йә». Натʹан жи щаба wи да: «Тә чь нет кьрийә дьле хwә бинә сери, чьмки Хwәдейе рʹаст тʹәви тә йә». Ле Йаһоwа щурʹәки майин щаба wи да, әwи готә Натʹан wәки Даwьдрʹа бежә: «Тö нини йе кö мьнрʹа мале ава кә сәва әз теда бьминьм». Рʹаст ә Йаһоwа бь һʹьзкьрьн Даwьд да баwәркьрьне, wәки әwе диса жи тʹьме тʹәви wи бә у wи кʹәрәм кә, ле йәкә әwи гот, wәки кöрʹе wи Сьлеман wе пʹарьстгәһе ава кә. Ле гәло Даwьд ча хwә да кʹьфше чахе дәрһәqа wе йәке пеһʹәсийа? (1 Дир. 17:1-4, 8, 11, 12; 29:1, ДТʹ).

7. Даwьд ча хwә да кʹьфше чахе Йаһоwа гот кö әw пʹарьстгәһе ава нәкә?

⁷ Даwьд дьлтәнг нәбу, wәки wе пʹарьстгәһе ава нәкә у наве wи wе әʹйан нәбә кö әwи пʹарьстгәһа Хwәде ава кьр. Чахе пʹарьстгәһ ава бу, әw нас бу ча пʹарьстгәһа Сьлеман, нә кö йа Даwьд. Даwьд дьбәкә бәрхwә дькʹәт, wәки нькарьбу нета дьле хwә бинә сери, ле әwи аликʹарийа мәзьн да бона авакьрьне. Әwи сәва авакьрьне хәбатчи һазьр кьрьн, öса жи һәсьн, сьфьр, зив у зерʹ, у öса жи даред әрзе тʹоп кьр. Хенщи ве йәке әwи дьл да бәр кöрʹе хwә Сьлеман: «Ньһа кöрʹе мьн, бьра Йаһоwа тʹәви тә бә, у тö пешда һәрʹи у мала Хwәдейе хwә Йаһоwа ава ки, чаwа кö әwи дәрһәqа тә готийә» (1 Дир. 22:11, 14-16, ДТʹ)

8. Чьрʹа Даwьд фькьри wәки Сьлеман нәщерʹьбанди йә wи шьхöлида, ле йәкә әwи чь кьр?

⁸ Бьхунә 1 Дирок 22:5. Даwьд фькьри wәки кöрʹе wи Сьлеман wе нькарьбә рʹебәрийа авакьрьна пʹарьстгәһе бькә, чьмки Пʹарьстгәһ гәрәке гәләк мәзьн буйа, ле Сьлеман щаһьл у нәщерʹьбанди бу. Ле йәкә Даwьд баwәр бу, wәки Йаһоwа wе али кöрʹе wи бькә, сәва әwи шьхöли бинә сери. Ләма чь дәсте Даwьд дьһат әwи кьр, әwи гәләк матерйал һазьр кьр бона авакьрьне.

ҺИНКРЬНА ЙЕД ДЬН, ШАБУНЕ ТИНӘ

9. Ча бьред әʹмьрда мәзьн дькарьн шабуне бьстиньн, чахе щабдарийа хwә дьдьнә дәсте йед дьн? Мәсәле биньн.

⁹ Бьред әʹмьрда мәзьн гәрәке бәрхwә нәкʹәвьн, чахе лазьм ә щабдарийед хwә бьдьнә дәсте бьред щаһьл. Чахе йед щаһьл һинкьри нә сәва щабдарийа һьлдьнә сәр хwә, әw йәк шьхöле Хwәде һе пешда дьбә. Бьред мәзьн гәрәке ша бьн, wәки йед щаһьл кʹижан кö wана хwәха һин кьрийә, бунә щерʹьбанди у wе шьхöле wан бькьн. Wәрә мәсәләке шеwьр кьн. Бьдьнә бәр чʹәʹве хwә, бав кöрʹе хwә һин дькә wәки әʹрәбе бажо. Чахе зарʹ бьчʹук ә, әw дина хwә дьдә ажотьна баве хwә. Әw мәзьн дьбә, паше бав жерʹа шьровәдькә кö әw ча бажо. Ле гава кöрʹ дьбә гьһишти, ида хwәха әʹрәбе дажо, у бав жи һе зедә wи ширәт дькә кö һе рʹьнд ажотьне бьзаньбә. Щара бав дажо щара жи кöрʹ. Бав ша дьбә wәки кöрʹ бей аликʹарийа wи, дәwса wи әʹрәбе дажо. Öса жи бьред әʹмьрда мәзьн фьрнаq дьбьн чахе бьред щаһьл дьвиньн, йед кö wана хwәха һин кьрийә сәва щьватеда һе зедә шьхöл бькьн.

10. Муса ча хwә да кʹьфше чахе пеһʹәсийа кö Исраеледа һьнәк хwә ча пʹехәмбәр дьдьнә кʹьфше?

¹⁰ Әм гәрәке хwә хwәй кьн, wәки һʹәвсудийе кәсәки нәкьн. Дина хwә бьдьнә сәрһатийа Муса, wәки әwи ча хwә да кʹьфше чахе пеһʹәсийа кö зома Исраеледа һьнәк хwә ча пʹехәмбәр дьдьнә кʹьфше. (Бьхунә Жьмар 11:24-29.) Йешу, бәрдәстийе Муса, дьхwәст wана бьдә сәкьнандьне. Дьбәкә әw фькьри кö әwана наве Муса хьраб дькьн у һʹöкöмәтийа wи ньмьз дькьн. Ле Муса готә wи: «Әw тö дәwса мьн һʹәвсудийе дьки? Хwәзи тʹәмамийа мьләте Хöдан пʹехәмбәр буна, кö Хöдан рʹöһʹе хwә данийа ль сәр wан». Муса дит wәки Йаһоwа рʹебәрийа wе йәке дькә у әwи дьхwәст кö һʹәму хьзмәткʹар жи, бькарьбьн шьхöле Хwәде бькьн. Wәрә әм жи мина Муса ша бьн, чахе йед дьн щабдарийа дьстиньн.

11. Бьраки чь гот дәрһәqа ве йәке чахе щабдарийе дьдьнә дәсте кәсәки дьн?

¹¹ Иро гәләк бьра һәнә йед кö бь дәһа сала, чьqас дькарьбун дьхәбьтин кö йед майин һин кьн сәва әwана жи һе зедә шьхöл һьлдьнә сәр хwә. Мәсәлә, бьраки бь наве Питер 74 сала хьзмәт дькьр ча хьзмәткʹаре һәртʹьм. Жь wи wәʹдәйи 35 сала әwи хьзмәт дькьр филиаләкә Әwропайеда. Гәләк сала әw хьзмәт дькьр ча сәркʹаре Идара Хьзмәтийе. Ньһа дәwса Питер, бьраки щаһьл бь наве Пол, бу сәркʹар, әw чәнд сала тʹәви Питер дьхәбьти. Ле гәло Питер бәрхwә дькʹәт, wәки дәwса wи ида кәсәки дьн шьхöл дькә? На, әwи гот: «Әз öса ша мә, wәки һәнә бьред öса, йед кö тенә һинкьрьне сәва һе зедә шьхöл һьлдьнә сәр хwә у әwи шьхöли гәләк рʹьнд дькьн».

QИМӘТ КЬН БЬРЕД ӘʹМЬРДА МӘЗЬН

12. Әм чь дәрсе хwәрʹа һин дьбьн жь сәрһатийа Рʹәһобоwам?

¹² Паши мьрьна Сьлеман, кöрʹе wи Рʹәһобоwам бу пʹадша. Чахе Рʹәһобоwамрʹа ширәт лазьм бу кö чаwа сәрwертийе бькә, әwи пешийе жь меред әʹмьрда мәзьн пьрси. Ле йәкә әwи ширәте wана qәбул нәкьр у чу ширәт жь wан щаһьла һьлда, тʹәви кʹе әw мәзьн бьбу. Ахьрийа ве йәке гәләк хьраб бу (2 Дир. 10:6-11, 19). Гәло әм жь ве йәке чь дәрсе хwәрʹа һьлдьдьн? Wе билани бә һәрге әм ширәта жь мәрьвед әʹмьрда мәзьн һьлдьн, чьмки әwана щерʹьбанди нә. Ләма йед щаһьл гәрәке әʹщьз нәбьн һәрге жь wан те хwәстьне кö тьштәки бь щурʹәки майин бькьн нә кö ча wана бәре дькьр. Wе баш бә wәки бьред щаһьл ләз нәкʹәвьн у ширәтед бьред әʹмьрда мәзьн дәсте хwә нәкьн.

13. Бьред щаһьл ча гәрәке һәвкʹарийе бькьн тʹәви бьред мәзьн?

¹³ Һьнә бьред щаһьл рʹебәрийе шьхöлед öса дькьн, кʹижан кö бьред әʹмьрда мәзьн дькьн. Wе керһати бә сәва щаһьла, wәки жь wан бьред щерʹьбанди һин бьн. Пол, дәрһәqа кʹижани мә жоре гот wәки әw дәwса Питер идарәкә Бәйтʹәледа сәркʹар ә, гот: «Әз гәләк щар незики Питер дьбум wәки жь wи ширәта һьлдьм, у әз идара хwәда бьред дьн жи һелан дькьм wәки öса бькьн».

14. Әм чь һин дьбьн жь ве йәке кö чаwа Тимотʹейо тʹәви Паwлосе шанди һәвкʹари дькьр?

¹⁴ Тимотʹейо кö щаһьл бу, гәләк сала тʹәви Паwлосе шанди һәвкʹари дькьр. (Бьхунә Филипи 2:20-22.) Паwлос Корьнтʹийарʹа ньвиси: «Мьн Тимотʹейо сәр wәда шанд, лаwе хwәйи дәлал у һьндава Хöданда амьн. Әwе wан рʹе-дьрбед мьнә Мәсиһ Исада гьрти бькә бира wә, кö әз чаwа ль һәр дәра, һʹәму щьвина һин дькьм» (1 Корн. 4:17). Әw гьли гәләк рʹьнд дьдьнә кʹьфше кö Паwлос у Тимотʹейо ча тʹәвайи һәвкʹари дькьрьн. Паwлос тʹьме wәʹдә дьдит сәва методед хwә Тимотʹейо һин кә. Тимотʹейо рʹьнд һин бу у Паwлос гәләк ша дьбу. Әwи итʹбарийа хwә Тимотʹейо дьани, wәки әw wе бькарьбә рʹöһʹанида мьqати хушк-бьред Корьнтʹеда бә. Рʹасти жи мәсәләкә чьqас баш ә бона рʹуспийа, чахе әwана бьред дьн һин дькьн сәва щьватеда рʹебәрийе һьлдьнә сәр хwә.

ҺӘР КӘС ЖЬ МӘ ШЬХÖЛӘКИ ДЬКӘ

15. Ширәта Паwлос Мәсиһийед Рʹомерʹа, ча дькарә али мә бькә чахе дәрәщед мә тенә гöһастьне?

¹⁵ Әм wәʹде мәхсусда дьжин. Пʹара тʹәшкиләта Йаһоwа йа әʹрде, гәләк алийава пешда дьчә у ләма һе зедә гöһастьн жи лазьм ә бенә кьрьне. Һьнә гöһастьн дькарьн сәр мә жи һʹöкöм бьн, у дьqәwьмә мәрʹа нәһеса бә һини wан гöһастьна бьн. Ле wәрә әм wи чахи жи мьлук бьминьн у дина хwә бьдьнә сәр шьхöле Хwәде, нә кö сәр хwә. Чахе әм öса бькьн, әме йәктийе хwәй кьн. Паwлос Мәсиһийед Рʹомерʹа ньвиси: «Wә һәр кәсирʹа дьбежьм: Чьqас жь wә дькʹәвә, жь wе зедәтьр нәфькьрьн, ле сәр хwә бьн, бьра һәр кәс wәкә wе баwәрийа кö Хwәде пʹарәвәкьр, бьфькьрә. Чаwа qальбе мәда гәләк әндәм һәнә у һʹәму әндәм кьрәки накьн, öса жи әм гәләк ьн, ле йәктийа Мәсиһда әм бәдәнәк ьн» (Рʹом. 12:3-5).

16. Чь дькарә аликʹарийе бьдә бьред әʹмьрда мәзьн у щаһьл, у öса жи жьнед wан, wәки тʹәшкиләта Хwәдеда әʹдьлайе у йәктийе хwәй кьн?

¹⁶ Һәр кәс жь мә дьхwазә шьхöле Пʹадшатийе пешда бьвә. Гәли бьред әʹмьрда мәзьн, бьред щаһьл һин кьн, wәки әwана һе зедә щабдарийа һьлдьнә сәр хwә. Ле һун, гәли бьред щаһьл, qәбул кьн әwан щабдарийа у шьхöла кö дьдьнә дәстед wә. Мьлук бьн у qәдьре мәзьна бьгьрьн. Гәли кʹöлфәта ле һун чʹәʹв бьдьнә Прьскилайе, жьна Әкила, у бь амьни пьштгьрийа мере хwә бькьн, чахе дәрәщә тенә гöһастьне (Кʹар. Шанд. 18:2).

17. Иса шагьртед хwә чь һин дькьр, у чьрʹа?

¹⁷ Иса мәсәләкә баш һишт, кö чаwа һин кьн йед майин сәва әwана һе зедә щабдарийа һьлдьнә сәр хwә. Иса заньбу, wәки әw wе тʹьме сәр әрде нибә у йед дьн гәрәке шьхöле wи бәрдәwам кьн. Әwи заньбу, wәки шагьртед wи гöнәкʹар ьн, ле йәкә әwи итʹбарийа хwә wана дьани у wанрʹа гот кö әwана wе wи зедәтьр бькьн (Йуһʹн. 14:12). Әwи әwана бь тʹәмами һазьр кьрьн у һин кьрьн бона wи шьхöли. У wана мьзгини бәла дькьр һʹәму щийа кʹидәре дькарьбун (Колс. 1:23).

18. Әм һивийа чь нә ахьрийеда, у әм чь дькарьн иро бькьн?

¹⁸ Паше чахе Иса әʹмьре хwә qöрбан кьр, әw һатә сахкьрьне у чу ль әʹзмен. Wедәре әwи һе зедә шьхöл станд. Хwәде «әw дани сәр һʹәму сәрwертийа, һʹöкöмәтийа, qәwата, хöдантийа» (Әфәс. 1:19-21). Һәрге жи öса бьqәwьмә кö пешийа Һармәгәдоне әм әʹмьре хwә öнда кьн, әме бенә сахкьрьне дьнйа тʹәзәда. Әме wедәре гәләк шьхöлед һʹәwас бькьн у шабуне бьстиньн. Ле ньһа, һәр кәс жь мә дькарә шьхöләки гәләк фәрз бькә, демәк мьзгинийе бәла кә у шагьрта һазьр кә. Wәрә әм гьшк ча щаһьл öса жи әʹмьрда мәзьн, «һәр гав шьхöле Хöданда пешда һәрʹьн» (1 Корн. 15:58).