Qьрара Йаһоwа wе Әʹсә Бе Сери!

1, 2. а) Йаһоwа чь мәрʹа әʹйан кьр? б) Дәрһәqа кʹижан сози ньвисар ә Ишайа 46:10, 11 у 55:11-да?

ГЬЛИЙЕД пешьн жь Кʹьтеба Пироз бь щöмләкә һеса ньвисар ә, ле теда фькьрәки гәләк кʹур ә: «Дәстпебунеда Хwәде әʹрд у әʹзман әʹфьрандьн» (Дәстп. 1:1). Чь кö Хwәде гәрдунеда чекьрийә әм тʹәне һьнә тьшт дьвиньн. У һе гәләк тьшт жи әм ньзаньн, мәсәлә дәрһәqа космосе, рʹонайе у гравитасйайе (Wаиз 3:11). Ле Йаһоwа дәрһәqа qьрара хwә һьндава әʹрде у инсанәте, мәрʹа зәлал әʹйан кьрийә. Qьрара wи әw бу, wәки мәрьвед кö бь дьлqе Хwәде һатьнә әʹфьрандьне, бәхтәwар бьжин сәр әʹрде (Дәстп. 1:26). Әwана гәрәке бьбуна зарʹед wи, у Йаһоwа гәрәке бьбуйа Баве wан.

² Чаwа кʹьтеба Дәстпебун сәре 3-да те гьликьрьне, тьштәк бу мәʹни кö Йаһоwа qьрара хwә да сәкьнандьне (Дәстп. 3:1-7). Ле әwе мәʹнийе нькарьбу рʹе Йаһоwа бьгьрта wәки qьрара хwә бинә сери (Иша. 46:10, 11; 55:11). Ләма жи әм гәрәке дöдьли нәбьн, кö qьрара Йаһоwайә пешийе wе әʹсә wәʹдәда бе сери!

3. а) Кʹижан рʹастийед сәрәкә жь Кʹьтеба Пироз әм пеһʹәсийанә? б) Чьрʹа әм ньһа шеwьр дькьн әwан рʹастийа? в) Ве готареда әме кʹижан пьрса шеwьр кьн?

³ Әм жь Кʹьтеба Пироз пеһʹәсийан кö qьрара Хwәде сәва әʹрде у инсанәте чь йә, у öса жи чаwа qöрбана Иса тʹәви qьрара Хwәде гьредайи йә. Әw йәк рʹастийед сәрәкә нә, у дьбәкә чахе мә дәстпекьр Хәбәра Хwәде һин бьн, бәре әʹwльн әм дәрһәqа wан рʹастийа пеһʹәсийан. Ле ньһа нета мә әw ә, wәки мәрьвед дьлсах пебьһʹәсьн дәрһәqа wан һинкьрьнед фәрз. Илаһи әм әве йәке ньһа wәʹде Евара Биранина мьрьна Иса дькьн, у әм чьqас дькарьн гәләк мәрьва тʹәглиф дькьн сәр ве Биранине (Луqа 22:19, 20). Әwед кö бенә сәр Биранине, wе һе зедә пебьһʹәсьн дәрһәqа qьрара Хwәде. Ләма жи сәва кö мәрьва һелан кьн бенә сәр ве евара мәхсус, wе гәләк керһати бә, wәки әм бьфькьрьн сәр һьнә пьрсед фәрз. Ве тʹемайеда әме се пьрса шеwьр кьн: Чь бу qьрара Хwәде йа пешьн сәва әʹрде у инсанәте? Чь qәwьми кö qьрара Хwәде һе нәһатийә сери? У ча бь сайа qöрбана Иса, рʹе вәбу wәки qьрара Хwәде бе сери?

ЧЬ БУ QЬРАРА ХWӘДЕ ЙА ПЕШЬН?

4. Шьхöлед дәсте Йаһоwа ча рʹумәта wи әʹйан дькьн?

⁴ Йаһоwа Әʹфьрандарәки һьмзор ә. Һәр тьшт чь әwи чекьрийә, гәләк баш у һʹәwас ьн (Дәстп. 1:31; Йерәм. 10:12). Гәло чахе әм дина хwә дьдьнә шьхöлед дәсте Йаһоwа, әм чь дькарьн пебьһʹәсьн? Әм әʹщебмайи дьминьн кö һʹәму тьшт ча бона кʹара мә һатьнә чекьрьне. Кʹе жь мә ша набә чахе дьньһерʹә әʹзмане бь гәләк стәйркед бәдәw, йан жи пʹелед бәʹрейә мәзьн, йан жи гöрә-гöра аве кö жь чʹийе те харе? Әw тьшт мә хwәш тен у әм wанрʹа ша дьбьн, чьмки Хwәде әм öса әʹфьрандьнә, wәки әм бькарьбьн әw тьштед бәдәw бьвиньн. (Бьхунә Зәбур 19:1; 104:24.)

5. Йаһоwа чь кьр сәва кö әʹфрин тʹәрбәти бьн?

⁵ Йаһоwа жь һʹьзкьрьне һʹәму әʹфринарʹа синор дани. Әwи qанун данин бона тʹәбийәте у öса жи qанунед намусийе. Әwи öса кьр кö һʹәму тьшт дьнйайеда бь тʹәрбәти бьн (Зәб. 19:7-9). Чь кö гәрдунеда һәйә ль гора qьрара Хwәде щиwар ьн. Стандартед һәвкʹарийе нав һʹәму тьштед әʹфьранди, жь алийе Йаһоwава һатьнә данин. Мәсәлә, qануна гравитасйайе атмосфера незики әʹрде дьгьрә, öса жи әw хwәй дькә wәки океан жь щийе хwә дәрнәйен. Бей гравитасйайе жийин сәр әʹрде wе тʹöнә буйа. Һʹәму әʹфрин, демәк мәрьв жи, бьн wан синора у qанунада дьжин. Әʹйан ә, wәки әw тʹәрбәти нава әʹфринада дьдә кʹьфше qьрара Хwәде сәва әʹрде у мәрьва. Хьзмәтийеда әм дькарьн дина мәрьва бьдьн сәр wан шьхöлед дәсте Әʹфрандар у дәрһәqа wи гьли кьн (Әʹйан. 4:11).

6, 7. Кʹижан пʹешкʹеш Йаһоwа да Адәм у Һеwайе?

⁶ Qьрара Йаһоwа йа пешьн әw бу, wәки мәрьв һʹәта-һʹәтайе сәр әʹрде бьжин (Дәстп. 1:28; Зәб. 37:29). Әwи бь мәрʹдани щурʹә-щурʹә пʹешкʹеш да Адәм у Һеwайе сәва әwана әʹмьре хwәрʹа ша бьн. (Бьхунә Аqуб 1:17.) Йаһоwа азайа бьжартьне дайә wан, һʹьш-аqьл у фәрәсәте öса, кö әwана бькарьбьн һʹьз бькьн у һәвалтийерʹа ша бьн. Әʹфрандар тʹәви Адәм хәбәр да у жерʹа шьровәкьр кö чьда әw гәрәке гöрʹа wи бькә. Адәм öса жи һин бу ча хwә хwәй кә у ча мьqати һʹәйwана у әʹрде бә (Дәстп. 2:15-17, 19, 20). Хенщи ве йәке, Йаһоwа Адәм у Һеwайе öса әʹфрандьн, кö әwана бькарьбьн тәʹма хwарьна һьлдьн, дәсте хwә бьдьнә тьшта, бьвиньн, дәнг дәрхьн, бьбьһен у бине һьлдьн. Бь wи щурʹәйи wана дькарьбу шабуне бьстиньн жь һʹәму тьштед щьнәтеда кö пʹьрʹ бәдәw бун. Бона жьн у мере пешьн, беһʹәсаб шьхöлед һʹәwас һәбун. Wана дькарьбу һʹәта-һʹәтайе әw шьхöл бькьрана, шабун бьстандана у öса жи тьштед тʹәзә һинбуна у пебьһʹәсийана.

⁷ Диса чь дькʹәтә нав qьрара Хwәде? Йаһоwа Адәм у Һеwа öса әʹфьранд, wәки wанрʹа заред беqьсур бьбьн. Хwәде дьхwәст зарʹед wанрʹа жи зарʹ бьбуна, һʹәта кö әʹрд бь тʹәмами бь мәрьва тʹьжә буйа. Әwи дьхwәст wәки Адәм у Һеwа, öса жи һʹәму де-бавед паши wан, зарʹед хwә һʹьз бькьн ча Йаһоwа зарʹед хwәйи пешьн һʹьз кьр. Әʹрд гәрәке бона wан бьбуйа мала һʹәта-һʹәтайе у һʹәму тьштед сәр әʹрде жи бона кʹара wан бу (Зәб. 115:16).

ЧЬ QӘWЬМИ КÖ QЬРАРА ХWӘДЕ ҺЕ НӘҺАТӘ СЕРИ?

8. Чьрʹа Хwәде Адәм у Һеwарʹа qанун да кö Дәстпебун 2:16, 17-да ньвисар ә?

⁸ Ле чаwа кö Хwәде qьрар кьрьбу, дәрберʹа һәв нәһат. Гәло чьрʹа? Йаһоwа qанунәкә һеса да Адәм у Һеwайе, сәва кö әwана бьзаньбьн синоре азайа хwә. Әwи готә wан: «Жь һәр даред бахчәда, дьле тә дькʹьшинә кʹижане бьхwә, ле жь дара qәнщи у хьраби наскьрьне нәхwә, чьмки wе рʹожа гава тö жь wе бьхwи, те әʹсә бьмьри» (Дәстп. 2:16, 17). Әw qанун зәлал бу бона Адәм у Һеwайе, у нә жи гьран бу сәва гöрʹа Хwәде бькьн, чьмки хwарьн тʹер-тʹьжә һәбу.

9, 10. а) Шәйтʹан чь шәрʹ авитә Йаһоwа? б) Адәм у Һеwайе чь бьжартьн? (Бьньһерʹә шькле әʹwльн.)

⁹ Шәйтʹан Мире-щьна мәʹр да хәбате у Һеwа хальфанд, wәки әw гöрʹа Баве хwә Йаһоwа нәкә. (Бьхунә Дәстпебун 3:1-5; Әʹйан. 12:9). Һьн жи, Шәйтʹан шәрʹ авитә Хwәде, wәки йанчь нә кö тʹәне жь дарәке гәрәке нәхwьн, ле «жь һʹәму даред бахчә». Готьна Шәйтʹан кʹижан әwи готә Һеwайе, öса дәрдькʹәт: «Тö нькари әwе йәке бьки чь кö дьле тә дьхwазә?» Паше, әwи дәрәwәкә һе мәзьн кьр: «Һун тʹö щар намьрьн». Паше жи, әwи Һеwа да баwәркьрьне кö нәлазьм ә гöһ бьдьнә Хwәде, у жерʹа гот: «Хwәде занә, wе рʹожа гава һун жь wе бьхwьн, чʹәʹвед wәйе вәбьн». Бь ве йәке Шәйтʹан дьхwәст бьгота, wәки Йаһоwа нәдьхwәст кö әwана бәре ве даре бьхwьн, чьмки йанчь wана wе занәбуна мәхсус бьстандана. Хенщи ве йәке, Шәйтʹан созе qәлп да wан: «Һун . . . бьбьнә мина Хwәде, qәнщи у хьрабийе жь һәв дәрхьн».

¹⁰ Һьнге Адәм у Һеwа бәр бьжартьне бун, wана гәрәке йан гöрʹа Йаһоwа бькьрана йан жи мәʹр баwәр кьрана. Ле йазьх, wана гöрʹа Хwәде нәкьр, тʹәви Шәйтʹан бунә йәк у һьмбәри Хwәде дәркʹәтьн. Wана нәхwәст кö Йаһоwа бьбә баве wан, ләма wана дәсте Хwәде сәр хwә öнда кьрьн (Дәстп. 3:6-13).

11. Чьрʹа Йаһоwа чʹәʹве хwә нәгьрт сәр гöне Адәм у Һеwайе?

¹¹ Чахе Адәм у Һеwа һьмбәри Йаһоwа рʹабун, әwана бунә гöнәкʹар. Хенщи ве йәке, wана һәләqәтийа хwә тʹәви Йаһоwа öнда кьр, чьмки әw Хwәдейе пироз ә у хьраби бәр чʹәʹве wи рʹәш ә (Һәбq. 1:13). Һәрге Йаһоwа сәр гöне Адәм у Һеwайе чʹәʹве хwә бьгьрта, ахьрийа һʹәму әʹфрина wе хьраб буйа. Хенщи ве йәке, һәрге Йаһоwа öса бькьра, wи чахи әw wе бьһата һʹәсабе wәки әw хwәйе гьлийед хwә нинә. Ле Йаһоwа qанунед хwә хwәй дькә у тʹьме гьлийед хwә тинә сери (Зәб. 119:142). Рʹаст ә азайа Адәм у Һеwайе һәбу бона бьжартьне, ле әw нәдьһатә һʹәсабе wәки изьна wан һәбу qануна Хwәде бьтʹәрʹьбиньн. У чьмки әwана һьмбәри Йаһоwа рʹабун, ләма ахьрийа wан мьрьн бу, әwана вәгәрʹийанә ахе жь чь жи һатьбун чекьрьне (Дәстп. 3:19).

12. Ахьрийа зарʹед Адәм чь бу?

¹² Чахе Адәм у Һеwайе бәре бахчә хwарьн, Йаһоwа ида нькарьбу wана qәбул кә ча нәфәре малбәта хwә. Хwәде жь Әдәне бәри wан да, у ида изьна wан тʹöнә бу wәки пашда вәгәрʹьн (Дәстп. 3:23, 24). Йаһоwа бь һәqийе әwана щәза кьрьн, чьмки wана чь чанд әв йәк жи стандьн. (Бьхунә Qануна Дöщари 32:4, 5.) Wана ида нькарьбу бь тʹәмами чʹәʹв бьдана һʹöнöред Хwәде, чьмки бунә гöнәкʹар. Адәм нә кö тʹәне ахьрийа хwә хьраб кьр, ле öса жи ахьрийа зарʹед хwә, әwана бь гöнә у мьрьне һатьнә дьне (Рʹом. 5:12). Бона гöне Адәм, рʹькʹьнйата wи жи жийина һʹәта-һʹәтайе öнда кьр. Шәйтʹан Адәм у Һеwа жь Хwәде qәтанд, у һьнгеда һʹәта рʹожа иройин әw мәрьва дьхальфинә сәва wана жь Хwәде дур хә (Йуһʹн. 8:44).

КʹЬРʹИН МӘРЬВА НЕЗИКИ ХWӘДЕ ДЬКӘ

13. Нета Йаһоwа чь йә бона инсанәте?

¹³ Һʹьзкьрьна Хwәде һьндава мәрьва йәкә кʹöта нәбу. Рʹаст ә Адәм у Һеwайе хwә жь Хwәде дур хьстьн, йәкә Йаһоwа дьхwазә wәки мәрьв незики wи бьн у бьбьнә достед wи. Әw нахwазә wәки кәсәк бьмьрә (2 Пәт. 3:9). Ләма паши гöне Адәм у Һеwайе, Хwәде дәрберʹа сафи кьр тьштәки бькә, wәки диса мәрьв бькарьбьн бьбьнә достед wи. Ле гәло Хwәде бь ве йәке qанунед хwәйи рʹаст тʹәрʹьбанд?

14. а) Ль гора Йуһʹәнна 3:16, Хwәде чь кьр сәва кö инсанәт хьлаз бә? б) Кʹижан пьрсе әм дькарьн шеwьр кьн тʹәви мәрьва?

¹⁴ Бьхунә Йуһʹәнна 3:16. Гәләк мәрьв кʹижана әм тʹәглиф дькьн сәр Евара Биранине, әв рʹез wанрʹа рʹьнд нас ә. Ле пьрс ве йәкеда нә, Гәло qöрбана Иса ча мәрьварʹа рʹе вәдькә бона жийина һʹәта-һʹәтайе? Әм дькарьн щаба ве пьрсе мәрьвед дьлсахрʹа шьровәкьн, чахе wана тʹәглиф дькьн сәр Евара Биранине. Öса жи чахе әм сәр Биранине нә, йан чахе паши Биранине тʹәсәлийа wан дькьн. Чахе әw мәрьв фәʹм кьн wәки Йаһоwа чьqас билан ә у чьqас мәрьва һʹьз дькә кö кʹьрʹин да, әw йәк wе дьле wан бьгьрә. Гәло диса кʹижан фькьред дәрһәqа кʹьрʹине әм дькарьн мәрьварʹа зәлал кьн?

15. Чьда Иса мина Адәм нибу?

¹⁵ Йаһоwа мәрьвәки беqьсур кьрә qöрбан, йе кö дькарьбу мә жь гöнә хьлаз кә. Әw мәрьв Иса бу. Иса амьн бу Йаһоwарʹа у һазьр бу әʹмьре хwә бьдә бона инсанәте (Рʹом. 5:17-19). Әw әʹфрине Хwәдейи пешьн бу у Йаһоwа әw жь әʹзмана дәрбази әʹрде кьр (Йуһʹн. 1:14). Иса жи мина Адәм мәрьвәки бекемаси бу, ле әwи мина Адәм нәкьр. Иса пе qануна Хwәде дьжит, чаwа кö Хwәде жь мәрьве беqьсур дәʹwа дькьр. Әwи һәла һе wәʹде щерʹьбандьнед qайим жи тʹö щар гöнә нәкьр у нә жи qануна Хwәде тʹәрʹьбанд.

16. Чьрʹа кʹьрʹин пʹешкʹешәкә гәләк qимәт ә?

¹⁶ Иса мәрьвәки беqьсур бу, ләма дькарьбу инсанәт жь гöнә у мьрьне хьлаз кьра бь ве йәке кö әʹмьре хwә бьда бона wан. Иса мәрьвәки бекемаси, амьн у гöрʹа Хwәдеда бу, чаwа кö Адәм гәрәке бьбуйа (1 Тимтʹ. 2:6). Иса хwә qöрбан кьр, у әwе йәке рʹе вәкьр һʹәму мәрьварʹа, сәва жийина һʹәта-һʹәтайе бьстиньн (Мәт. 20:28). Бәле, кʹьрʹин кö Иса да, рʹе вәкьр сәва кö qьрара Хwәде йа пешьн бе сери (2 Корн. 1:19, 20). Әw кʹьрʹин мәщале дьдә һʹәму мәрьвед амьн, wәки жийина һʹәта-һʹәтайе бьстиньн.

ЙАҺОWА РʹЕ ВӘКЬР WӘКИ ӘМ НЕЗИКИ WИ БЬН

17. Кʹьрʹин чь мәщале дьдә?

¹⁷ Кʹьрʹин кö Йаһоwа бона мәрьва да, гәләк гьран сәр wи рʹуньшт (1 Пәт. 1:19). Әwи Кöрʹе хwәйи тайе тʹәне бәр инсанәтева да, чьмки әw qайим мәрьва qимәт дькә (1 Йуһʹн. 4:9, 10). Дькарьн бежьн, wәки дәwса Адәм Иса бу баве мә (1 Корн. 15:45). Иса нә кö тʹәне жийине дьдә мә, ле әw öса жи мәщале дьдә wәки әм диса бьбьнә нәфәред малбәта Хwәде. Бәле, бь сайа qöрбана wи, Йаһоwа бь qануни дькарә мәрьва диса qәбул кә кö вәгәрʹьнә малбәта wи. Әм чьqас дьлгәрм дьбьн чахе дьфькьрьн, wәки wе бе wәʹдә чахе һʹәму мәрьвед амьн бьбьнә бекемаси! Wи чахи ида һәр кәс сәр әʹзмана öса жи сәр әʹрде, wе бь тʹәмами бьбьнә йәк ча малбәтәк. Әме гьшк жи бь тʹәмами бьбьнә зарʹед Хwәде (Рʹом. 8:21).

18. Кʹәнге Йаһоwа wе бьбә «һәр тьшт» бона һәр кәси?

¹⁸ Шәйтʹан, Адәм у Һеwа һьмбәри Йаһоwа рʹабун, ле Йаһоwа диса жи мәрьва һʹьз дькә. Рʹаст ә әм гьшк гöнәкʹар ьн, ле Шәйтʹан нькарә амьнийа мә һьндава Йаһоwа кʹöта кә. Йаһоwа wе бь сайа кʹьрʹине али мә бькә, wәки әм бь тʹәмами бьбьнә мәрьвед рʹаст. Бьдьнә һʹәсабе хwә кö жийин wе чьqас хwәш бә, чахе һәр кәсед кö Кöрʹ qәбул дькьн у баwәр дькьн, wе һʹәта-һʹәтайе бьжин (Йуһʹн. 6:40). Йаһоwа wе жь һʹьзкьрьн у биланийа хwә али мәрьва бькә, wәки әwана бьбьнә бекемаси, чаwа кö әwи дәстпекеда qьрар кьрийә. Паше, Баве мә Йаһоwа wе бьбә «һәр тьшт» бона һәр кәси (1 Корн. 15:28).

19. а) Һәрге әм гәләк рʹази нә сәва кʹьрʹине, әме һелан бьн кö чь бькьн? (Бьньһерʹә чаргошә «Wәрә Бәрдәwам кьн Мәрьвед Һежа Бьгәрʹьн».) б) Готара дьнда әме дәрһәqа чь шеwьр кьн?

¹⁹ Һәрге әм гәләк рʹази нә сәва кʹьрʹине, әме әʹсә мәрьвед дьнрʹа жи гьли кьн, wәки әwана жи дькарьн кʹаре бьстиньн жь ве пʹешкʹеша гәләк qимәт. Мәрьв гәрәке пебьһʹәсьн wәки бь сайа кʹьрʹине, кʹижан кö Йаһоwа жь һʹьзкьрьне да, һʹәму мәрьв дькарьн жийина һʹәта-һʹәтайе бьстиньн. Ле кʹьрʹин нә кö тʹәне жийина һʹәта-һʹәтайе дьдә, ле һе зедә. Готара дьнда әме шеwьр кьн кö чаwа qöрбана Иса, дьдә һьлдане бöхдане кö Шәйтʹанz Әдәнеда авит.