Нәһельн Һʹьзкьрьна Wә Сар бә

1, 2. а) Гьлийед Иса жь Мәтта 24:12, бәре әʹwльн дәрһәqа кʹе бун? б) Кʹьтеба Кʹаред Шандийа ча дьдә кʹьфше, кö һʹәчʹи зәʹф Мәсиһийа һʹьзкьрьна хwә хwәй кьрьн? (Бьньһерʹә шькле әʹwльн.)

ЧАХЕ Иса сәр әʹрде бу, әwи гот кö нишана «ахьрийа ве дьнйайе» öса жи әw ә, кö «һʹьзкьрьна гәләка wе сар бә» (Мәт. 24:3, 12). У Щьһуйед qьрʹна йәкеда, йед кö хwә щьмәʹта Хwәде һʹәсаб дькьрьн, һиштьн кö һʹьзкьрьна wан һьндава Хwәде сар бә.

² Ле wи wәʹдәйи, һʹәчʹи зәʹф Мәсиһи бь хирәт «мьзгини дьдан у һин дькьрьн» дәрһәqа Мәсиһ. Wана һьндава хушк-бьра у нәбаwәра жи һʹьзкьрьн дьданә кʹьфше. Әwан Мәсиһийа qайим Хwәде һʹьз дькьрьн (Кʹар. Шанд. 2:44-47; 5:42). Ле йазьх, һʹьзкьрьна һьнә Мәсиһийед qьрʹна йәкеда сар бу.

3. Чь дькарә бьбә мәʹни кö һʹьзкьрьна Мәсиһи сар бә?

³ Дәрһәqа Мәсиһийед Әфәсида йед qьрʹна йәке, Иса гот: «Газьнәкә мьн ль тә һәйә, кö тö мина бәре мьн һʹьз наки» (Әʹйан. 2:4). Гәло чь дькарьбу бьбуйа мәʹнийа ве йәке? Дьqәwьмә әwана кʹәтьбун бәр байе wан мәрьва, йед кö тʹәне дәрһәqа хwәстьнед хwә дьфькьрин (Әфәс. 2:2, 3). Qьрʹна йәкеда шәһәре Әфәс хьрабийева тʹьжә бу. Әw шәһәре дәwләти бу. Мәрьвед wедәре тʹәне дьфькьрин, кö ча бь жийина рʹьһʹәт бьжин у пәй һәбуке дькʹәтьн. Хенщи wе йәке, мәрьв ль wедәре тьштед нәщайиз у бенамуси дькьрьн. Әwана хwәһʹьз бун у дьбәкә ләма жи һʹьзкьрьна wан һьндава Хwәде у мәрьва кем бу.

4. а) Иро чаwа һʹьзкьрьна гәләка сар бу? б) Кʹижан се дәрәщада һʹьзкьрьна мә дькарә бе щерʹьбандьне?

⁴ Иро әм дьвиньн кö пʹехәмбәртийа Иса ча те сери. Һʹьзкьрьна гәләк мәрьва сар буйә. Һʹьзкьрьна wан һьндава Хwәде һе кем у кем дьбә. Бь милйона мәрьв пьшта хwә дьдьнә Хwәде, у хwә дьсперьн тʹәшкиләтед мәрьва, чьмки һивийе нә wәки әwана wе чәтьнайед инсанәте сафи кьн. Бәле, мәрьвед кö Хwәде Йаһоwа наһʹәбиньн, һʹьзкьрьна wан чьqас дьчә сар дьбә. Ле чаwа кö сәрһатийа щьвата Әфәси дьдә кʹьфше, иро Мәсиһийед амьн жи дькарьн бьбьнә хwәрʹази у һʹьзкьрьна wан сар бә. Ве готареда әме шеwьр кьн кö кʹижан се дәрәщада һʹьзкьрьна мә дькарә бе щерʹьбандьне: 1) Һʹьзкьрьн һьндава Йаһоwа, 2) һʹьзкьрьн һьндава рʹастийа Кʹьтеба Пироз, 3) һʹьзкьрьн һьндава хушк-бьра.

ҺʹЬЗКЬРЬНА ҺЬНДАВА ЙАҺОWА

5. Чьрʹа әм гәрәке Хwәде һʹьз бькьн?

⁵ Иса да кʹьфше кö дьһа зәʹф әм гәрәке Хwәде һʹьз бькьн. Әwи гот: «‹Хöдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә›. Әв ә тʹәмийа пешьн у һәрә мәзьн» (Мәт. 22:37, 38). Чахе әм qайим Хwәде һʹьз дькьн, әw йәк али мә дькә гöрʹа тʹәмийед wи бькьн, qәwи бьминьн у хьрабийе нәфрʹәт кьн. (Бьхунә Зәбур 97:10.) Ле Шәйтʹан у дьнйа wи һәр тьшти дькьн сәва һʹьзкьрьна мә һьндава Хwәде кʹöта кьн.

6. Кемасийа һʹьзкьрьна һьндава Хwәде чь ахьри ани?

⁶ Әw дьнйа, һʹьзкьрьне нәрʹаст дьдә кʹьфше. Мәрьв нә кö Әʹфьрандар һʹьз дькьн, ле хwә һʹьз дькьн (2 Тимтʹ. 3:2). Әwана «дьлһавьжи, чʹәʹвһавьжи у кʹöбар-бабахи» дьдьнә кʹьфше (1 Йуһʹн. 2:16). Паwлосе шанди Мәсиһи пешда ширәт кьрьн, wәки нәкʹәвьнә бьн байе хwәстьна бәдәне. Әwи готә wан: «Ахьрийа фькьра бьнйатʹа мәрьвайе мьрьн ә . . . Чьмки фькьра бьнйатʹа мәрьвайе дьжмьне Хwәде йә» (Рʹом. 8:6, 7). Мәрьвед кö әʹмьре хwәда тʹәне пәй һәбуке йан жи хwәстьнед сексуали дькʹәвьн, ахьрийеда рʹасти гәләк кöл-дәрда тен у бәхтәwар ниньн (1 Корн. 6:18; 1 Тимтʹ. 6:9, 10).

7. Мәсиһийед иройин жь чь гәрәке хwә дур бьгьрьн?

⁷ Гәләк атеист, агностик у йед кö еволусйайе баwәр дькьн, нә кö тʹәне һʹьзкьрьна һьндава Хwәде кʹöта дькьн, ле һәла һе баwәрийа һьндава wи жи. Әwана дьбежьн кö тʹәне мәрьвед сәрһʹьшк у дьлсах Әʹфьрандар баwәр дькьн. Хенщи ве йәке, гәләк мәрьв зандара öса рʹумәт дькьн, кö ида дина хwә надьн сәр Әʹфьрандар (Рʹом. 1:25). Әм гәрәке мьqати хwә бьн wәки гöһе хwә нәдьнә wан фькьред мәрьва, чьмки әм дькарьн жь Йаһоwа дур кʹәвьн у һʹьзкьрьна мә һьндава wи сар бә (Ибрн. 3:12).

8. а) Чьрʹа щара әм дьлтәнг дьбьн? б) Зәбур 136 чь бәрдьлийе дьдә мә?

⁸ Ве дьнйа Шәйтʹанда, гәләк тьшт һәнә жь бо чь жи әм дькарьн дьлтәнг бьн. Ле һәрге әм гәләк дьлтәнг бьн у бәрхwә кʹәвьн, баwәрийа мә дькарә сьст бә у һʹьзкьрьна мә һьндава Хwәдеда сар бә (1 Йуһʹн. 5:19). Дьqәwьмә әм сәва калбун-пирбуне, сьһʹәт-qәwата хьраб, йан жи сәва чәтьнайед пʹәрава гьредайи бина хwә тәнг дькьн. Йан жи дьqәwьмә әм бәрхwә дькʹәвьн чьмки әм һивийа тьштәки бун, ле әw йәк нәһатә сери. Дьбәкә дьле мә дьшке, чьмки чь кö әм дьхwазьн бькьн нькарьн бькьн. Фьрqи тʹöнә әм рʹасти чь чәтьнайа тен, әм гәрәке тʹö щар нәфькьрьн wәки Йаһоwа әм һиштьнә, ләма әм wан кöл-дәрда дькʹьшиньн. Йаһоwа дьбежә wәки һʹьзкьрьна wи һьндава мә кʹöта набә. Әw гьлийед ширьн әм дьхуньн Зәбур 136:23-да, кʹидәре те готьне: «Йе бәләнгазийа мәда мә бир тинә, чьмки һʹöба wи һʹәта-һʹәтайе йә». Бәле, Йаһоwа мә һәртʹьм һʹьз дькә. Ләма жи дöдьли нәбьн wәки әw гöһе хwә дьдә сәр «заринийа» мә у щаба дöайед мә жи дьдә (Зәб. 116:1; 136:24-26).

9. Паwлос бь сайа чь һʹьзкьрьна хwә һьндава Хwәде хwәй кьр?

⁹ Мина зәбурбеж, Паwлос жи кʹур дьфькьри кö Йаһоwа ча аликʹарийе дьдә wи, у ләма жи әwи тәнгасийада сәбьр кьр у qәwи ма. Паwлос ньвиси: «Хöдан пьштоване мьн ә у әз натьрсьм. Инсане чь ль мьн бькә?» (Ибрн. 13:6) Паwлос тʹö щар дöдьли нәдьбу wәки Йаһоwа wи һʹьз дькә у бона wи хәм дькә, ләма жи гава әw рʹасти тәнгасийа дьһат, баwәрийа хwә һьндава Хwәде öнда нәдькьр. Әwи нәдьһишт wәки әw чәтьнайи wи бьшкеньн. Мәсәлә, чахе әw кәледа бу, әwи чәнд нәʹмә ньвиси сәва дьл бьдә хушк-бьред щьватеда (Әфәс. 4:1; Фили. 1:7; Фьльмн. 1). Бәле, һәла һе һʹале хьрабда жи әwи qайим Хwәде һʹьз дькьр. Ле гәло әwи әw qәwат жь кʹö дьстанд? Әwи хwә дьспартә «Хwәдейе һʹәму бәрдьлийе», йе кö «нава һʹәму тәʹли-тәнгийада дьл дьдә бәр мә» (2 Корн. 1:3, 4). Ле ча әм дькарьн чʹәʹв бьдьнә Паwлос у һʹьзкьрьна хwә һьндава Йаһоwа qәwи хwәй кьн?

10. Әм ча дькарьн һʹьзкьрьна хwә һьндава Йаһоwа qәwи хwәй кьн?

¹⁰ Паwлос гот кö чь дькарә али мә бькә, wәки һьндава Йаһоwа һʹьзкьрьна qәwи хwәй кьн. Әwи хушк-бьред Тʹесалоникирʹа ньвиси: «Һәр гав дöа бькьн». Паше әwи диса әw гьли Рʹомайарʹа wәкʹьланд (1 Тʹеслн. 5:17; Рʹом. 12:12). Чахе әм дöада тʹәви Йаһоwа хәбәр дьдьн, достийа мә тʹәви wи qәwи дьбә (Зәб. 86:3). Йаһоwа «дöа дьбьһе». У гава әм Баве хwәйи әʹзманарʹа дьле хwә вәдькьн, әм һе незики wи дьбьн (Зәб. 65:2). Хенщи ве йәке, чахе әм дьвиньн кö Йаһоwа ча щаба дöайед мә дьдә, әм һе qайим wи һʹьз дькьн. У әм баwәр дькьн wәки Йаһоwа «незики wан һʹәмуйа йә кʹижан гази wи дькьн» (Зәб. 145:18). Һәрге әм дöдьли нибьн кö Йаһоwа мә һʹьз дькә у али мә дькә, әме бькарьбьн бәр тәнгасийед гьран жи тәйах кьн.

ҺʹЬЗКЬРЬН ҺЬНДАВА РʹАСТИЙА КʹЬТЕБА ПИРОЗ

11, 12. Әм ча дькарьн рʹастийа Кʹьтеба Пироз qайим һʹьз бькьн?

¹¹ Әм чаwа Мәсиһи рʹастийе qимәт дькьн у һʹьз дькьн. Хәбәра Хwәде әw һәйә канийа рʹастийе. Дöада Иса баве хwәрʹа гьлийед öса гот: «Хәбәра тә рʹасти йә» (Йуһʹн. 17:17). Сәва кö рʹастийе һʹьз бькьн, әм гәрәке Хәбәра Хwәде рʹьнд бьзаньбьн (Колс. 1:10). Ле тʹәне занәбун бәс нинә. Зәбура 119 али мә дькә фәʹм бькьн, кö чь те һʹәсабе рʹастийе һʹьз бькьн. (Бьхунә Зәбур 119:97-100.) Әме кʹаре бьстиньн һәрге чь кö әм Кʹьтеба Пирозда дьхуньн, тʹәмамийа рʹоже кʹур сәр бьфькьрьн. У гава әм бьвиньн кö әм кʹарәкә чьqас мәзьн дьстиньн чахе принсипед ве дьдьнә хәбате, әме Кʹьтеба Пироз дьһа һʹьз бькьн.

¹² Зәбурбеж öса жи гот: «Хәбәра тә чьqас ширьн ә гәwрийа мьнда, әw жь һьнгьв зедәтьр ә дәве мьнда» (Зәб. 119:103). Мина зәбурбеж, әм жи дькарьн тәʹм кьн хwарьна рʹöһʹани кö әм жь тʹәшкиләта Хwәде дьстиньн. Гава әм хwарьна рʹöһʹани леколин дькьн, әw «готьнед хwәш» жь Кʹьтеба Пироз бира мәда дьминьн. Паше әм әwан готьна дькарьн бьдьнә хәбате wәки али мәрьва бькьн (Wаиз 12:10).

13. Чь али Йерәмйа кьр кö әwи рʹастийа Хәбәра Хwәде һʹьз кьр, у әw йәк ча сәр wи һʹöкöм бу?

¹³ Йерәмйа пʹехәмбәр рʹастийа Хәбәра Хwәде һʹьз дькьр. Дина хwә бьдьне ча гьлийед Хwәде сәр дьле wи һʹöкöм бун. Әwи гот: «Готьнед тә һатьн дитьн у wан хwарьм у готьнед тә мьнрʹа бун кʹефхwәши у дьле мьнрʹа бун шабун; жь бәр кö әз бь наве тәва темә банг кьрьн, йа Хwәдайе артешан Хöдан» (Йерәм. 15:16). Йерәмйа бь симболик гот кö әwи готьнед Хwәде хwар, демәк кʹур дьфькьри сәр. Әwи гьлийед Хwәде qимәт дькьр у жь Йаһоwа рʹази бу кö наве Хwәде сәр wи йә. Һәрге әм жи рʹастийа Кʹьтеба Пироз һʹьз дькьн, әме qимәт кьн әwи qәдьри кö наве Хwәде сәр мә йә у һелан бьн wан рʹожед ахьрийеда мьзгинийа Пʹадшатийе бәла кьн.

14. Ча әм дькарьн рʹастийа Кʹьтеба Пироз дьһа зәʹф һʹьз бькьн?

¹⁴ Хенщи хwәндьна Кʹьтеба Пироз у әʹдәбйәтед мә, диса һәнә тьшт кö дькарьн али мә бькьн wәки рʹастийе һʹьз бькьн. Мәсәлә, чахе әм тʹьме тенә сәр щьвате, һʹьзкьрьна мә һьндава Кʹьтеба Пироз һе зедә дьбә, чьмки wедәре Йаһоwа мә һин дькә. Һәр һʹәфти бь сайа журнала «Бьрща Qәрәwьлийе» әм Кʹьтеба Пироз леколин дькьн у әw һәйә йәк жь методед сәрәкә бь кʹижани әм тенә һинкьрьне. Сәва кö әм жь wан готара бь тʹәмами кʹаре бьстиньн, әм гәрәке бона һинбуна «Бьрща Qәрәwьлийе» хwә пешда һазьр кьн. Мәсәлә, әм дькарьн һʹәму рʹезед кö «Бьрща Qәрәwьлийеда» тенә дайине, бьхуньн. Әм дькарьн «Бьрща Qәрәwьлийе» жь малпәра jw.org йан жи кʹьтебхана мә «JW Library app» бькʹьшиньн, кʹижан кö сәр гәләк зьмана һәйә. Бь һьнә форматед әләктроник дьһа һеса йә һәр готарәкеда рʹеза вәкьн. Фьрqи тʹöнә әм кʹижан методе жи бьдьнә хәбате, һʹьзкьрьна мә һьндава рʹастийа Кʹьтеба Пироз wе qәwи бә, һәрге әм wан рʹеза бьхуньн у кʹур сәр бьфькьрьн. (Бьхунә Зәбур 1:2.)

ҺʹЬЗКЬРЬН ҺЬНДАВА ХУШК-БЬРА

15, 16. а) Ль гора Йуһʹәнна 13:34, 35, чь борщдарийа мә һәйә? б) Чь щурʹәйи һʹьзкьрьна мә һьндава хушк-бьра гьредайи йә тʹәви һʹьзкьрьна мә һьндава Хwәде у Кʹьтеба Пироз?

¹⁵ Иса рʹожа хwәйә пашьн сәр әʹрде, готә шагьртед хwә: «Әз тʹәмикә ну дьдьмә wә: Һәвдö һʹьз бькьн. Чаwа кö мьн һун һʹьз кьрьн, һун жи öса һәвдö һʹьз бькьн. Бь ве йәке һʹәмуйе заньбьн һун шагьртед мьн ьн, һәгәр һун һәвдö һʹьз бькьн» (Йуһʹн. 13:34, 35).

¹⁶ Һʹьзкьрьна мә һьндава хушк-бьра гьредайи йә тʹәви һʹьзкьрьна мә һьндава Йаһоwа. Набә кö әм тʹәне хушк-бьра йан жи тʹәне Хwәде һʹьз бькьн. Йуһʹәннайе шанди гот: «Әwе бьре хwә кö дьбинә һʹьз накә, wе чаwа бькарьбә Хwәде һʹьз бькә кö набинә?» (1 Йуһʹн. 4:20). Хенщи ве йәке, һʹьзкьрьна мә һьндава Йаһоwа у хушк-бьра, гьредайи йә тʹәви һʹьзкьрьна мә һьндава Кʹьтеба Пироз. Гәло чь щурʹәйи? Һʹьзкьрьн һьндава Кʹьтеба Пироз мә һелан дькә wәки тʹәмийед кö теда һәнә биньн сери, демәк Хwәде у хушк-бьра һʹьз бькьн (1 Пәт. 1:22; 1 Йуһʹн. 4:21).

17. Ча әм дькарьн хушк-бьрарʹа нишан кьн кö әм wана һʹьз дькьн?

¹⁷ Бьхунә 1 Тʹесалоники 4:9, 10. Ча әм дькарьн хушк-бьрарʹа нишан кьн кö әм wана һʹьз дькьн? Мәсәлә, әм дькарьн хушк йан бьред әʹмьрда мәзьн бьвьнә щьвате. Йан аликʹарийе бьдьнә хушкед би, мәсәлә мала wанда тьштәки чекьн у тʹәзә кьн (Аqуб 1:27). Öса жи щаһьл у йед әʹмьрда мәзьн дькарьн аликʹарийе бьдьнә wан хушк-бьра, йед кö тәнгасийеда ньн, йан кʹәтьнә депресийе. Әм гәрәке кʹеләка wан хушк-бьра бьн, wана qәwи кьн у бәр дьле wанда бен (Мәтʹлк. 12:25; Колс. 4:11). Бәле, гава әм бь гьлийа у бь кьред хwә хушк-бьрарʹа һʹьзкьрьне нишан дькьн, әм избат дькьн wәки әм хәм дькьн бона «нәфәред мала Хwәде» (Галт. 6:10).

18. Чь wе али мә бькә wәки әм тʹәви хушк-бьра ль һәв бен?

¹⁸ Кʹьтеба Пирозда те готьне кö «рʹожед ахьрийеда» мәрьв wе бьбьнә хwәһʹьз у тьма (2 Тимтʹ. 3:1, 2). Ләма жи әм гәрәке мьqати хwә бьн, сәва һʹьзкьрьна хwә һьндава Хwәде, рʹастийа Кʹьтеба Пироз у һьндава һәвдö öнда нәкьн. Щара дьбәкә әм у хушк-бьра һәв фәʹм нәкьн. Ле чьмки әм wана һʹьз дькьн, әм тʹәви wан ль һәв тен у әw йәк щьватерʹа кʹәрәма тинә (Әфәс. 4:32; Колс. 3:14). Дә wәрә әм тʹö щар нәһельн wәки һʹьзкьрьна мә сар бә! Бьра һʹьзкьрьна мә һьндава Йаһоwа, Хәбәра wи, у хушк-бьрада тʹö щар кʹöта нәбә.