Рʹува Мәрьва Нәньһерʹьн

ДОН жь Канадайе, йе кö Шәʹде Йаһоwа йә нет хwәрʹа дани, wәки хәбәр дә тʹәви мәрьвед кö кʹуче дьминьн. У щарәке әw незики мерәки бу кö дәрва дьжит. Дон гьли дькә: «Наве wи мерьки Питер бу. Әw бемал-һʹал бу, у мьн qә әʹмьре хwәда мәрьве öса qьреж кʹучеда нәдитийә. Әwи тʹәви мәрьва һерс хәбәр дьда у öса дькьр, wәки мәрьв хwә дури wи бьгьрьн. Гәләк щар әwи нәдьһишт мәрьв жерʹа qәнщийе бькьн». Ле Дон 14 сала зедәтьр, һьндава wи мерьки сәбьр у һʹәйф бу.

Щарәке Питер готә Дон: «Тö чьрʹа öса һʹәйра мьнда ни? Гьшк жь мьн дьрʹәвьн, ле тö чьрʹа тʹәрка мьн наки?» Дон бь нәрми се рʹезед жь Кʹьтеба Пироз да хәбате, сәва бьгьһижә дьле Питер. Пешийе, Дон жь Питер пьрси һәла әw занә наве Хwәде һәйә, у жерʹа гот wәки әwи нави хwәха Кʹьтеба Пирозда бьхунә, дь Зәбур 83:18-да. Паше, сәва кö Питеррʹа шьровәкә кö чьрʹа тʹәрка wи надә, әwи жерʹа Рʹомайи 10:13, 14 хwәнд, кʹидәре те готьне кö «кʹи гази наве Хöдан кә, wе хьлаз бә». Хьлазийеда, Дон жерʹа Мәтта 9:36 хwәнд у паше гот, wәки Питер хwәха әве рʹезе бьхунә. Ве рʹезеда те готьне: «Гава [Иса] әʹлаләт дит, гöне wи ль wан һат, чьмки әwана мина пәзе бе шьван, бәрʹәдайи у бәлабуйи бун». Чʹәʹве Питер тʹьжә һесьр бун, у әwи пьрси: «Әз жи йәк жь wан пәза мә?»

Питер дәстпекьр хwә бьгöһезә. Әwи сәре хwә шушт, сәр рʹуйе хwә кöрʹ кьр, у кʹьнще баш хwә кьр, кʹижан кö Дон жерʹа пʹешкʹеш да. Паши ве йәке, Питер тʹьме тʹәмьз хwә дькьр.

Щәм Питер дәфтʹәрәк һәбу. Дәстпека ве дәфтʹәреда, Питер дәрһәqа рʹожед хwәйә нәбаш гьли дькә, ле хьлазийа дәфтʹәреда ида тьштед баш гьли дькә. Пʹарәкә ве дәфтʹәреда öса ньвисар ә: «Иро әз наве Хwәде пеһʹәсийам. Ньһа гава әз дöа дькьм, әз тʹәне Йаһоwарʹа дöа дькьм. Чьqас баш ә кö әз наве wи заньм. Дон дьбежә кö Йаһоwа дькарә бьбә Досте мьн, кʹижан кö һәр гав дькарә мьн бьбьһе».

Гьлийед пашьн жь ве дәфтʹәре Питер хушка хwә у бьре хwәрʹа ньвиси. Әwи ньвиси:

«Иро әз гәләк бекʹеф ьм. Әз дьфькьрьм кö калбуне әз зәфт кьрьмә. Ле һәрге жи әв рʹожа мьнә пашьн ә, әз заньм wәки әзе һәвале хwә [Дон] диса Щьнәтеда бьвиньм. Һәрге һун ньһа әwе йәке дьхуньн, әз ида сах ниньм. У һәрге рʹожа чʹәʹлкьрьна мьн һун мәрьвәки нәнас бьвиньн, незики wи бьн у тʹәви wи хәбәр дьн, у жь кʹәрәма хwә әw кʹьтеба шин бьхуньн [әw кʹьтеб бу бь наве «Рʹастийа кö Дьбә бәрбь Жийина Һʹәта-Һʹәтайе», кʹижан кö әwи бь сала пешда стандьбу].a Ве кʹьтебеда те готьне кö Щьнәтеда әзе диса һәвале хwә бьвиньм. Әз бь тʹәмамийа дьле хwә әве йәке баwәр дькьм. Бьре wә Питер, кö wә һʹьз дькә».

Паши чʹәʹлкьрьне, Уми хушка Питер гьли кьр: «Wәкә 2 сал пешда, Питер мьнрʹа хәбәр да. Нава һаqас салада, әw тʹәзә бәхтәwар бьбу. Һәла һе бәшәра wи жи хwәш бу». Әwе готьбу Дон: «Әзе әве кʹьтебе бьхуньм, чьмки чь кö дьле бьре мьн гьртийә, әw wе тьштәки мәхсус бә». Уми öса жи qайил бу wәки тʹәви Шәʹде Йаһоwа һин бә пе кʹьтеба «Чь Һин Дькә Кʹьтеба Пироз?», кʹижан кö wан пашwәхтийада һатә дәрхьстьне.

Әм жи дькарьн рʹува мәрьва нәньһерʹьн, у бь һʹьзкьрьн у сәбьр бьн һьндава һʹәму мәрьва (1 Тимтʹ. 2:3, 4). Öса әме бькарьбьн һелан кьн wан мәрьва, йед кö дьбәкә бәр чʹәʹве мәрьва ньмьз ьн, ле мина Питер дьлтʹәмьз ьн. Әм гәрәке дöдьли нәбьн кö Хwәде, йе кö «дьл дьнерʹә», wе дьле wан мәрьвед дьлсахда рʹастийе мәзьн кә (1 Сам. 16:7; Йуһʹн. 6:44).