«Тʹәви йед Дьгьрин Бьгьрин»

1, 2. Чьрʹа лазьм ә бәр дьле wанда бен, йед кö мәрьве хwәйи незик öнда кьрьнә? (Бьньһерʹә шькле әʹwльн.)

ХУШКӘКӘ мә бь наве Сузи гот: «Паши мьрьна кöрʹе мә, wәкә саләке мә ешәкә гәләк гьран дькʹьшанд». Бьраки мә жи гьли кьр, кö чахе жьна wи ньшкева мьр, әwи «еша физикийә әʹщеб гьран дькʹьшанд». Сәд һʹәйф, иро гәләк мәрьв рʹасти дәрде öса гьран тен. У иро гәләк Мәсиһи жи һивийе нибун кö мәрьве wани незик wе бьмьрә. Дьqәwьмә мәрьве wәйи незик мьрийә, йан жи мәрьве wи кʹе һун нас дькьн. Дьбәкә һун хwәрʹа дьфькьрьн: «Кәсе кö мәрьве хwә öнда кьрийә, ча дькарә бәр дәрдәки öса гьран тәйах кә у бәрдьлийе бьстинә?»

² Дьqәwьмә wә бьһистийә кö wәʹдә бьрина дьл qәнщ дькә. Ле гәло рʹасти öса нә, кö wәʹдә дәрбаз бә у еша дьл wе хwәха qәнщ бә? Жьнәбике гот: «Һе рʹаст ә бежьн wәки чахе кәсәк wәʹде хwә хәрщ дькә сәва али йед дьн бькә, әw wәʹдә бьрине дьл qәнщ дькә». Бәле, чаwа бьринәкә бәдәнерʹа wәʹдә у дәрманкьрьн лазьм ә сәва qәнщ бә, öса жи бьринед дьлрʹа wәʹдә у бәрдьли лазьм ә. Гәло әwед кö мәрьве хwә öнда кьрьнә, ча дькарьн еша дьле хwә qәнщ кьн?

ЙАҺОWА «ХWӘДЕЙЕ ҺʹӘМУ БӘРДЬЛИЙЕ» ЙӘ

3, 4. Әм жь кʹö заньн wәки Йаһоwа һʹале wан, кʹе шине дькә, фәʹм дькә?

³ Баве мә Йаһоwа гәләк дьлшәwат ә у бәре әʹwльн әw бәр дьле мәда те wәʹде лазьмда. (Бьхунә 2 Корьнтʹи 1:3, 4.) Йаһоwа һәри дьлован ә у щьмәʹта хwәрʹа әwи соз дайә: «Әз ьм, йе кö бәр дьле wәда те» (Иша. 51:12, ДТʹ; Зәб. 119:50, 52, 76).

⁴ Баве мәйи дьлшәwат жи мәрьвед хwәйи незик öнда кьрийә у дәрд кʹьшандийә, мәсәлә, чахе Бьраһим, Исһаq, Аqуб, Муса у пʹадша Даwьд мьрьн (Жьмар 12:6-8; Мәт. 22:31, 32; Кʹар. Шанд. 13:22). Кʹьтеба Пироз дьбежә кö Йаһоwа бь дьл у щан һивийе йә, гава әw wана жь мьрьне рʹакә (Иб. 14:14, 15). Әwана wе бәхтәwар бьн у сьһʹәт-qәwата wан бекемаси бә. Ле биньн бира хwә, кö Йаһоwа öса жи мьрьна Кöрʹе хwәйи дәлал дитийә, кʹижан кö «шабуна wи бу» (Мәтʹлк. 8:22, 30). Бь гьлийа әм нькарьн бежьн кö чьqас дьле Йаһоwа дешийа гава берʹәʹмти Кöрʹе wи кöштьн (Йуһʹн. 5:20; 10:17).

5, 6. Ча Йаһоwа бәрдьлийе дьдә мә?

⁵ Әм гәрәке сәд сәләфи баwәр бьн кö Йаһоwа wе әʹсә али мә бькә. Ләма жи лазьм ә әм дöада дьле хwә жерʹа вәкьн у дәрд-кöлед хwә гьли кьн. Әм чьqас дьлгәрм дьбьн кö Йаһоwа һʹале мә фәʹм дькә у дьле мә дәрман дькә у рʹьһʹәт дькә! Ле чь щурʹәйи әw әве йәке дькә?

⁶ Бәре әʹwльн Йаһоwа «бь дьлдайина рʹöһʹе Пироз» али мә дькә (Кʹар. Шанд. 9:31). Бәле, qәwата Хwәде канийа бәрдьлийа мәзьн ә. Иса соз да кö Баве мәйи әʹзмана wе әʹсә «рʹöһʹе пироз бьдә әwед кö жь wи дьхwазьн» (Луqа 11:13). Сузи, бәʹса кʹижани мә жоре кьр, дьбежә: «Гәләк щар әм һʹаләки öсада бун, кö мә сәр чока жь Йаһоwа лавайи дькьр сәва бәрдьлийе бьдә мә. У һәр гав әʹдьлайа Хwәде дьле мә у һʹьше мә рʹьһʹәт дькьр». (Бьхунә Филипи 4:6, 7.)

ИСА СӘРӘККʹАҺИНЕ ДЬЛШӘWАТ Ә

7, 8. Чьрʹа әм дькарьн дöдьли нәбьн кö Иса wе бәр дьле мәда бе?

⁷ Гава Иса сәр әʹрде бу, әwи дьлшәwатийеда бь тʹәмами чʹәʹв дьда Баве хwә Йаһоwа. Иса һьн бь гьлийед хwә, һьн жи бь кьред хwә чʹәʹв дьда ви һʹöнöре Баве хwә (Йуһʹн. 5:19). Йаһоwа хwәха Иса шандә сәр әʹрде, сәва бәрдьлийе бьдә йед «дьлшькәсти» у «һʹәму кәсед бь шин» (Иша. 61:1, 2; Луqа 4:17-21). Мәрьва, Иса ча кәсе дьлшәwат нас дькьрьн, чьмки әwи дәрде wан фәʹм дькьр у бь дьл у щан дьхwәст али wан бькә (Ибрн. 2:17).

⁸ Чахе Иса зарʹ бу, дьqәwьмә әwи мәрьве хwәйи незик öнда кьрьбу. Мәсәлә, ча те кʹьфше Иса һе зарʹ бу чахе баве wи Усьв мьр.a Бьдьнә бәр чʹәʹве хwә, кö ча Исарʹа чәтьн бу бәр wи дәрде хwә тәйах кә у бьвинә ча дьле де, хушк у бьред wи дьшәwьтә.

9. Чахе Лазар мьр, Иса ча дьлшәwати да кʹьфше?

⁹ Иса wәʹде хьзмәтийа хwә әʹйан дькьр, wәки әw һʹал у дәрде мәрьва фәʹм дькә. Мәсәлә, биньн бира хwә ве дәрәще, чахе һәвале wийи дәлал Лазар мьр. Рʹаст ә Иса заньбу, wәки әw wе Лазар жь мьрьне рʹакә, ле йәкә кʹәсәра кʹур һатә wи гава әw чʹәʹв гьрийе Мәрйәме у Мәртʹайе кʹәт. Дьле Иса öса шәwьти, кö һесьр чʹәʹве wи һат (Йуһʹн. 11:33-36).

10. Чьрʹа әм дькарьн дьлрʹьһʹәт бьн кö Иса һʹале мә фәʹм дькә?

¹⁰ Гәло иро Иса ча дькарә бәрдьли у аликʹарийе бьдә мә? Кʹьтеба Пироз зәлал дьбежә, кö «Иса Мәсиһ дöһö, иро у һʹәта-һʹәтайе йәк ә» (Ибрн. 13:8). Öса жи Кʹьтеба Пироз дьбежә кö әw «Чʹәʹвканийе жийине» йә, демәк дькарә рʹе вәкә сәва әм һʹәта-һʹәтайе бьжин. Иса занә дәрд чь йә у ләма «дькарә аликʹарийа wан бькә, йед кö дькʹәвьнә нава щерʹьбандьне» (Кʹар. Шанд. 3:15; Ибрн. 2:10, 18). Ләма жи әм дькарьн qә дöдьли нәбьн, wәки Мәсиһ дькʹәвә һʹале мәрьва, дәрде wан фәʹм дькә у wәʹде лазьмда wе бәрдьлийе бьдә wан. (Бьхунә Ибрани 4:15, 16.)

НЬВИСАРЕД ПИРОЗ «БИНЕ ДЬДЬНӘ БӘР МӘ»

11. Кʹижан рʹезед жь Кʹьтеба Пироз гәләк дьл дьдьнә wә?

¹¹ Хенщи ве сәрһатийа дәрһәqа Иса кö әwи Лазар сах кьр, Хәбәра Хwәдеда диса гәләк рʹез һәнә кö бәрдьлийе дьдьнә мә. Бешьк, «чь кö пешда кʹьтебада һатә ньвисаре, бона һинбуна мә һатә ньвисаре, wәки әм бь сәбьре у wан готьнед ньвисарада кö бине дьдьнә бәр мә», хwәйиһеви бьн (Рʹом. 15:4). Һәрге wә мәрьве хwәйи незик öнда кьрийә, әw рʹез кö жере тенә дайине, дькарьн дьле wә гәрм кьн:

• «Хöдан незики дьлшкәстийа йә у мәʹрьм-бәләнгаза дьдәбьрине» (Зәб. 34:18, 19).

• «Дәма дәрд-кöл дьле мьнда зедә дьбьн, барьстанийед тә . . . [Йаһоwа] нәфса мьн ша дькьн» (Зәб. 94:19).

• «Бьра Хöдане мә Иса Мәсиһ бь хwә у Баве мә Хwәде йе кö жь мә һʹьз кьрийә у бь кʹәрәме һана һәрһәйи у һевийа qәнщ дайә мә, бәр дьле wәда бе у wә . . . qайим бькә» (2 Тʹеслн. 2:16, 17, ИМ).b

ЩЬВАТ КАНИЙА БӘРДЬЛИЙА МӘЗЬН Ә

12. Әм ча дькарьн бәр дьле мәрьвада бен?

¹² Щьват дькарә бәрдьлийа мәзьн бьдә wан, йед кö мәрьвед хwәйи незик öнда кьрьнә. (Бьхунә 1 Тʹесалоники 5:11.) Ле һун ча дькарьн йед бь «дьле хәм» дьлгәрм кьн у qәwи кьн? (Мәтʹлк. 17:22) Фәрз ә әм бир нәкьн кö «wәхта һʹьшбуне һәйә у wәхта готьне һәйә» (Wаиз 3:7). Жьнәбикә бь наве Дален дьбежә: «Әwе кö мәрьве хwә öнда кьрийә, гәрәке кʹәла дьле хwә бьрʹежә. Ләма жи йа лапә фәрз әw ә, кö гöһ бьдьнә wи мәрьви у хәбәрдана wи нәбьрьн». Щунйа, бьре кʹижани хwә кöшт, зедә дькә: «Һәрге жи һун бь тʹәмами нькарьн дәрде wи кәси фәʹм бькьн, ле сәри әw ә кö һун дьхwазьн һʹале wи фәʹм кьн».

13. Әм чь гәрәке бьзаньбьн дәрһәqа дәрд?

¹³ Әм гәрәке бир нәкьн, кö һʹәму мәрьв нә мина һәв бәр дәрде хwә тәйах дькә у дәрде хwә әʹйан дькә. Щарна мәрьврʹа чәтьн ә дьле хwә бьрʹежә у тʹәне әw хwәха кöла дьле хwә занә. Хәбәра Хwәде дьбежә: «Һәр дьл дәрд у кöлед хwә занә у кәсәк тʹәви шабуна wи набә» (Мәтʹлк. 14:10). Ле һәрге жи кәсәк кʹәла дьле хwә дьрʹежә, йәкә йед дьн һәр гав нькарьн бь тʹәмами фәʹм кьн әw чь сәр хwә тʹәхмин дькә.

14. Әм чь дькарьн бежьн wанрʹа йед кö шине дькьн?

¹⁴ Щара ньзани чь бежи wан йед кö шине дькьн. Ле Кʹьтеба Пироз дьбежә: «Зьмане сәрwахта дәрмане дьла йә» (Мәтʹлк. 12:18). Гәләк хушк-бьра жь брошура «Чахе Мәрьве Тәйи Незик Дьмьрә», фькьред баш дитьнә сәва хwә.c Ле гәләк щар әм дькарьн бәрдьлийа мәзьн бьдьнә wан, һәрге «тʹәви йед дьгьрин бьгьрин» (Рʹом. 12:15). Габи, кʹижан кö би майә, дьбежә: «Әз ида бь һесьра кöла дьле хwә дьрʹежьм у чахе һәвалед мьн тʹәви мьн дьгьрин, әw һьнәки дәрде мьн сьвьк дькә. У wи чахи дьле мьн рʹьһʹәт дьбә кö әз тʹәне нә мамә».

15. Һәрге бь хәбәрдан мәрʹа чәтьн ә бәр дьле мәрьвада бен, әм чь дькарьн бькьн? (Бьньһерʹьн чаргошә «Гьлийед Ширьн кö Дькарьн Бәрдьлийе Бьдьн»)

¹⁵ Һәрге wәрʹа чәтьн ә бь хәбәрдан бәр дьле wанда бен, wе баш бә кö бь нәʹмәке, йан емаиле, йан жи пе тʹеле wанрʹа бьньвисьн. Бәʹса хәбәре, нәʹмәкеда дькарьн wан рʹезед жь Кʹьтеба Пироз бьньвисьн, йед кö бәрдьлийе дьдьн, йан жи бьньвисьн дәрһәqа хәйсәт-һʹöнöред баш йед мьри, йан жи дәрһәqа wи qәwьмандьнәкә һʹәwас гьли кьн кʹижан кö бира wәда майә. Щунйа дьбежә: «Чахе әз нәʹмәке дьстиньм кö гьлийед ширьн ньвисар ьн, йан жи кʹәнге хушк-бьра мьн тʹәглиф дькьн сәва тʹәвайи wәʹдә дәрбаз кьн, бона мьн әw аликʹарийа гәләк мәзьн ә. У әз гәләк дьлгәрм дьбьм чахе дьвиньм кö мьн һʹьз дькьн у бона мьн хәм дькьн».

16. Ча әм дькарьн дьле wан гәрм кьн, йед кö мәрьве хwә öнда кьрьнә?

¹⁶ Дöайед мә жи дькарьн аликʹарийа мәзьн бьдьнә хушк йан бьре кö шине дькә. Wе гәләк баш бә һәрге әм бона wи дöа бькьн у öса жи тʹәви wи. Һәрге жи wәрʹа чәтьн ә бәр wи дöа бькьн, чьмки дьле wә дьшәwьтә у гьрийе wә те, хwә нәгьрьн дöа бькьн. Әв дöа бь рʹастийе дькарә qәwатәкә мәзьн бьдә wи у дәрде wи дәрман кә. Дален тинә бира хwә: «Чахе хушк тенә щәм мьн сәва мьн дьлгәрм кьн, щара әз wанрʹа дьбежьм кö дöа бькьн. Чахе әwана дöа дькьн, пешийе хwә дьгьрьн, ле паши чәнд гьлийа дәнге wан qайим дьбә у әwана жь кʹәла дьле хwә дöа дькьн. Баwәрийа wанә qәwи, һʹьзкьрьна wан, у бәрдьлийа wан гәләк баwәрийа мьн qәwи дькьн».

ТʹЬМЕ БӘР ДЬЛЕ ҺӘВДА WӘРЕН

17-19. Чьрʹа гәрәке әм тʹьме бәр дьле wанда бен, йед кö мәрьвед хwә öнда кьрьнә?

¹⁷ Һьнәк мәрьв гәләк wәʹдә дьнәʹльн кʹәрбе мьрийед хwә. Чахе кәсәк тʹәзә мьрийә, wи чахи гәләк һәвал у мәрьвед незик тенә сәр шине. Ле паши чʹәлкьрьне, ида гьшк дьчьнә мал-һʹалед хwә у хwәйе мьри тʹәне дьминә. Ләма һьнге жи wанрʹа бәрдьли лазьм ә. «Һәвал һәр гав һʹьз дькә, бьра буйә бона рʹожа охьрме гьран» (Мәтʹлк. 17:17). Бәле, әм гәрәке тʹьме wан хушк-бьра дьлгәрм кьн, һʹәта кö еша дьле wан дайнә. (Бьхунә 1 Тʹесалоники 3:7.)

¹⁸ Бир нәкьн кö дәрд-кöле хwәйе мьри дькарә ньшкева диса тʹәзә бә. Мәсәлә, әw йәк дькарә бьqәwьмә wәʹде рʹожа зәwаща wан, йан жь бо бьһистьна кʹьламәке, дитьна шькла, йан жи wәʹде сезонәкә сале. Әwе кö малхе хwә йан кʹöлфәта хwә öнда кьрийә, гәләк тьшт щара пешьн тʹәне дькә, бәʹса хәбәре, те сәр щьвата мәзьн йан сәр Евара Биранине, у әw йәк дькарә ешәкә гьран бинә. Бьраки мә гьли дькә: «Мьн заньбу кö рʹожа сәрсала зәwаща мә, wе мьнрʹа гәләк чәтьн бә бей жьна мьн. Ле ве рʹоже чәнд хушк-бьра у һәвалед мьнә незик тʹәви мьн тʹоп бун, сәва кö әз тʹәне нибьм».

¹⁹ Әм гәрәке нә кö тʹәне рʹожед мәхсус бәр дьле wанда бен, ле рʹожед дьн жи. Щунйа дьбежә: «Чахе мәрьв һивийе нинә у аликʹари у бәрдьлийе дьстинә, әw кʹарәкә гәләк мәзьн тинә. Әw йәк гәләк qимәт ә у бәрдьлийа мәзьн дьдә». Рʹаст ә әм нькарьн öса бькьн, wәки әwана бь тʹәмами тʹәнебуне тʹәхмин нәкьн, ле әм дькарьн аликʹарийе у дьлбинийе бьдьнә wан (1 Йуһʹн. 3:18). Габи гьли дькә: «Әз жь Йаһоwа гәләк рʹази мә бона рʹуспийед дәлал, йед кö wәʹде дәрд-кöле мьн кʹеләка мьн бун. Бь сайа wан мьн тʹәхмин дькьр кö Йаһоwа ча мьн һʹьз дькә у бәр дьле мьнда те».

20. Чьрʹа созед Йаһоwа бәрдьлийа мәзьн дьдьнә мә?

²⁰ Чьqас дьле мә гәрм дьбә кö әм заньн, wәки Йаһоwа Хwәдейе һʹәму бәрдьлийе wе һʹәму кöл-дәрда кʹöта кә у «һʹәмуйед тʹьрбада wе дәнге . . . [Мәсиһ] бьбьһен . . . рʹабьн» (Йуһʹн. 5:28, 29). Хwәде соз дьдә кö wе мьрьне кʹöта кә у жь һʹәму мәрьва «һесьред чʹәʹва паqьж бькә» (Иша. 25:8). У паше әме нә кö «тʹәви йед дьгьрин бьгьрин», ле «тʹәви йед ша дьбьн ша бьн» (Рʹом. 12:15).