Һәбука Рʹаст Qазанщ кьн

1, 2. Ве дьнйайеда чьрʹа wе тʹьме мәрьвед кʹәсиб һәбьн?

ИРО система економики нәрʹаст ә. Мәсәлә, гәләк щаһьларʹа чәтьн ә хәбате хwәрʹа бьвиньн. Һьнәк жи әʹмьре хwә дькьнә бьн qәзийе, сәва кö дәрбази wәлатед дәwләти бьн. Ле wан wәлатада жи кʹәсиббун һәйә. Ньһа нав тʹәмамийа дьнйайеда мәрьвед дәwләти дьһа дәwләти дьбьн, ле йед кʹәсиб һе бәләнгаз дьбьн. Ль гора һьнә һʹәсаба, нав тʹәмамийа дьнйайе жь һʹәму мәрьва сәләфәк, мәрьвед лапә дәwләти нә, у һәбука wан бь тʹәвай һаqас ә, чьqас йа 99 сәләф мәрьвед майин бь тʹәвай. Йазьх әw рʹасти öса нә, һьнә мәрьв öса дәwләти нә кö һәбука wан дькарә тʹера гәләк рʹькʹьнйатед wан бькә, ле бь милиарда мәрьв кʹәсибийеда дьжин у һʹьзрәта wан пәʹри нан ә. Иса дәрһәqа wи һʹали öса гот: «Фәqире һәр гав тʹәви wә бьн» (Марq. 14:7). Гәло чьрʹа әw нәрʹасти һәйә?

² Иса әw гьли гот чьмки заньбу, wәки әw һʹал wе нәйе гöһастьне, һʹәта Пʹадшатийа Хwәде нәйе. Ве дьнйайеда хенщи система политики у религи, һәйә система комерси, кʹижан кö пʹәрәһʹьз ә. Әв систем кʹьтеба Әʹйанти 18:3-да бь симболик те навкьрьне «базьрган», у әw жи пʹарәкә ве дьнйа Шәйтʹан ә. Рʹаст ә щьмәʹта Хwәде бь тʹәмами жь политике у динед qәлп qәтийа йә, ле бь тʹәмами жь ве система комерсйайе нькарә бьqәтә.

3. Әме кʹижан пьрса шеwьр кьн?

³ Wе керһати бә һәрге әм хwә бьщерʹьбиньн, һәла әм ча ньн һьндава ве система комерсида. Мәсәлә, пьрсед öса бьдьнә хwә: «Әз ча дькарьм бь һәбука хwә амьнийа хwә Хwәдерʹа нишан кьм? Ча әз дькарьм һе кем бькʹәвьмә нава комерсйайе? Чь избат дькә wәки ве дьнйа чәтьнда, щьмәʹта Хwәде бь тʹәмами итʹбарийа хwә Хwәде тинә?»

МӘТʹӘЛОК ДӘРҺӘQА WӘКʹИЛХӘРЩЕ НЕАМЬН

4, 5. а) Мәтʹәлока Исада базьрган кʹәтә чь һʹали? б) Иса чь ширәт да шагьртед хwә?

⁴ Бьхунә Луqа 16:1-9. Әм гәрәке кʹур бьфькьрьн сәр мәтʹәлока Иса дәрһәqа wәкʹилхәрще нәамьн. Wәкʹилхәрщ нәһәq кьрьн кö әw пʹәре ахайе хwә пʹучʹ дькә. Әwи фәʹм кьр, wәки әw хәбата хwә öнда дькә у «бь аqьли кьр» кö дәстпекьр хwәрʹа «һәвала» qазанщ кә сәва паше әwана кери wи бен.a Бь ве мәтʹәлоке Иса нәхwаст шагьртед хwә һин кә кö нәрʹастийе бькьн сәва ве дьнйайеда әʹбура хwә бькьн. Иса гот wәки «мәрьвед ве дьне» öса дькьн. Бь рʹастийе Иса дьхwаст кö шагьртед wи жь ве мәтʹәлоке дәрсе хwәрʹа һин бьн.

⁵ Иса заньбу wәки шагьртед wи жи мина wи wәкʹилхәрщи wе рʹасти чәтьнайа бен, чьмки wе дьнйа комерсида бьжин. Ләма жи әwи wанрʹа ширәтәкә öса да: «Һун бь һәбука нәрʹаст һәвала хwәрʹа дәст хьн у гава һәбук кем бә, [Йаһоwа у Иса] wә бьн коне һʹәта-һʹәтайеда qәбул кьн». Гәло жь ве ширәте әм чь дькарьн һин бьн?

6. Әм жь кʹö заньн кö qьрара Хwәдеда тʹöнә бу, wәки система комерси һәбә?

⁶ Рʹаст ә Иса шьровәнакә кö чьрʹа әw сәр һәбуке дьбежә «нәрʹаст», ле Кʹьтеба Пироз зәлал нишан дькә wәки комерси, йане пʹәрәqазанщкьрьн qьрара Хwәдеда нибу. Мәсәлә, Йаһоwа Әдәнеда Адәм у Һеwайерʹа тʹер-тʹьжә тьшт да, нә кö чьqас wанрʹа лазьм бу (Дәстп. 2:15, 16). Һьн жи, чахе qьрʹна йәкеда рʹöһʹе пироз һатә сәр йед бьжарти, «жь wана тʹö кәси һәбука хwәрʹа нәдьгот кö: ‹йа мьн ә›, ле һәр тьштед wан йәк бу» (Кʹар. Шанд. 4:32). Ишайа пʹехәмбәр гот кö wе бе wәʹдә, wәки мәрьв беһәq жь дайина әʹрде ләзәте бьвиньн (Иша. 25:6-9; 65:21, 22). Ле һʹәта кö әw wәʹдә бе, шагьртед Исарʹа лазьм ә кö «бь аqьли» бьжин. Әwана гәрәке «һәбука нәрʹаст», демәк йа ве дьнйайе, öса бьдьнә хәбате кö Хwәде жи хwәш бен.

ҺӘБУКА НӘРʹАСТ БЬ АQЬЛАЙИ БЬДЬНӘ ХӘБАТЕ

7. Луqа 16:10-13-да чь ширәт те дайине?

⁷ Бьхунә Луqа 16:10-13. Мәтʹәлока Исада wәкʹилхәрщ һәвал хwәрʹа дәст хьстьн сәва кʹара хwә. Ле Иса шагьртед хwә ширәт кьр wәки ль әʹзмана хwәрʹа һәвала qазанщ кьн, нә бона кʹара хwә, ле пе нетед рʹаст. Әw рʹез нишан дькьн кö ча хәбьтандьна «һәбука нәрʹаст», гьредайи йә тʹәви амьнийа мә һьндава Хwәде. Иса гот кö әм дькарьн Хwәдерʹа амьн бьминьн, гава һәбука хwә рʹаст хәрщ кьн.

8, 9. Мәсәла wан мәрьва биньн, йед кö амьнийа хwә нишан дькьн ве йәкеда, кö ча һәбука нәрʹаст дьдьнә хәбате.

⁸ Әм амьнийа хwә Хwәдерʹа избат дькьн, чахе бона шьхöле бәлакьрьна мьзгинийе, дәрһәqа чь жи Иса пʹехәмбәрти кьр, qöрбана дькьн (Мәт. 24:14). Qизькәкә бьчʹук жь Һьндьстане qöтʹийа бьчʹукда хwәрʹа пʹәрә тʹоп дькьр, у әwе һәла һе листок жи хwәрʹа нәдькʹьрʹи. Гава әв qöтʹи тʹьжә бу, әwе әв пʹәрә qöрбан кьр сәва шьхöле бәлакьрьна мьзгинийе. Бьраки мә жь Һьндьстане, кʹархана wийә гузед һьнде (кокос) һәйә. У әwи гәләк кокос qöрбан кьр сәва офиса wәлгәрʹандьне йа Малайаламе. Әwи заньбу wәки йәкә филиал гәрәке кокоса бькʹьрʹә, у ләма фькьри һе баш ә кокоса бьдә, нә кö пʹәра. Бәле, әw аqьлайи йә. Бьрак жи жь Йунаньстане тʹьме бьзьре зәйтʹуне, пәнир, у хwарьнед дьн бона хушк-бьред Бәйтʹәледа qöрбан дькә.

⁹ Бьраки мә жь Шри Ланкайе кʹижан кö ньһа дьжи wәлате хәрибда, әʹрде хwә у мала хwә дайә сәва ль wедәре щьвин у щьватед мәзьн дәрбаз бьн, у öса жи сәва хьзмәткʹаред һәртʹьм ль wедәре бьминьн. Әв qöрбанкьрьн ә бона wи бьрайи, ле аликʹарийа мәзьн ә сәва хушк-бьред wе мьһале, дәсте кʹижанада тʹöнә. Wан wәлатада, кʹидәре кö шьхöле мә qәдәхәкьри йә, хушк-бьра мала хwәда щьвата дәрбаз дькьн. Бь сайа ве йәке, гәләк пешәнг у хушк-бьред дьн кö дәстәнг ьн, пʹәре хwә хәрщ накьн сәва кʹьрийа оде.

10. Әм чь кʹәрәма дьстиньн гава дәствәкьри нә?

¹⁰ Бәле, мәсәлед wан хушк-бьра нишан дькьн кö щьмәʹта Хwәде «һьндькида амьн» ә, демәк һәбука хwә рʹаст дьдьнә хәбате (Луqа 16:10). Ле гәло әw достед Йаһоwа чь тʹәхмин дькьн гава qöрбана дькьн? Дьле wан ша дьбә, чьмки әwана фәʹм дькьн кö чахе әwана мәрʹд ьн, öса әwана һәбука «рʹаст» qазанщ дькьн (Луqа 16:11). Хушкәкә кö тʹьме бона шьхöле бәлакьрьна мьзгинийе пʹәра qöрбан дькә, гьли дькә кö әw чь кʹәрәма дьстинә жь ве йәке: «Чахе әз пʹәра qöрбан дькьм, әз тʹәхмин дькьм кö нава салада әз һатьмә гöһастьне. Мьн тедәрхьст кö чьqас зәʹф әз ве йәкеда мәрʹд ьм, һаqас һе зәʹф әз һьндава мәрьвада жи дәствәкьри дьбьм. Мәсәлә, әз бумә мәрʹд бахшандьнеда у сәбьреда. Һьн жи әве йәке али мьн кьр, кö кем бәрхwә кʹәвьм у ширәта qәбул кьм». Гәләк хушк-бьра тʹәхмин кьрьнә кö чахе әwана дәствәкьри нә, кʹарәкә мәзьн дьстиньн (Зәб. 112:5; Мәтʹлк. 22:9).

11. а) Чаwа мәрʹданийа мә «аqьли» дьдә кʹьфше? б) Тʹәшкиләта Хwәдеда пʹәрә ча те хәрщкьрьне? (Бьньһерʹә шькле әʹwльн.)

¹¹ Әм öса жи «бь аqьли» дькьн чахе qöрбана дькьн сәва бәлакьрьна мьзгинийе. Дьбәкә әм хwәха нькарьн хьзмәт кьн ча хьзмәткʹаред һәртʹьм, йан жи дәрбази wи щийи бьн кʹидәре һʹәwщәти һәйә, ле әм пʹәра qöрбан дькьн сәва али хушк-бьред дьн бькьн хьзмәтийеда (Мәтʹлк. 19:17). Мәсәлә, пʹәре кö те qöрбанкьрьне, аликʹарийе дьдә сәва әʹдәбйәт һәбьн у шьхöле бәлакьрьна мьзгинийе пешда һәрʹә wәлатед кʹәсибда, кʹидәре кö гәләк мәрьв тенә нава рʹастийе. Бәʹса хәбәре, Конгода, Мадагәскареда, у Рwандайеда, Кʹьтеба Пироз гәләк бьһа йә. Мәрьв гәрәке wәкә һʹәфтеке йан мәһәке бьхәбьтә, сәва Кʹьтеба Пироз бькʹьрʹә. У бь сала хушк-бьред wедәре дьжбартьн, йан хwарьне бькʹьрʹьн сәва нәфәред хwә, йан жи Кʹьтеба Пироз. Ле ньһа бь аликʹарийа пʹәрәqöрбанкьрьна хушк-бьра, «зедәйа» кö һәйә «кемасийа» тʹьжи дькә, у тʹәшкиләта Йаһоwа Кʹьтеба Пироз wәлдьгәрʹинә у нәшьр дькә бона һʹәму нәфәред малбәтед wан у öса жи бона wан йед кö Кʹьтеба Пироз һин дьбьн. (Бьхунә 2 Корьнтʹи 8:13-15.) Бәле, һәрдö жи, әwед кö дьдьн у йед кö дьстиньн дьбьнә достед Йаһоwа.

ҺЕ КЕМ БЬКʹӘВЬНӘ НАВ КОМЕРСЙА ВЕ ДЬНЙАЙЕ

12. Бьраһим ча избат кьр кö әw итʹбарийа хwә Хwәде тинә?

¹² Әм öса жи дькарьн бьбьнә достед Йаһоwа, һәрге әм кем бькʹәвьнә нава комерсйа ве дьнйайе у һәбука «рʹаст» бьгәрʹьн. Ве йәкеда Бьраһим мәсәләкә баш мәрʹа һиштийә. Әwи гöрʹа Йаһоwа кьр, у wәлате дәwләти Ур һишт чу сәва чадьрада бьжи. Бәле, әwи öса кьр чьмки дьхwәст бьбә досте Йаһоwа (Ибрн. 11:8-10). Бьраһим тʹö щар нәдькʹәтә пәй һәбуке, чьмки бь тʹәмами итʹбарийа хwә Хwәде дьани (Дәстп. 14:22, 23). Иса шагьртед хwә һелан дькьр, wәки баwәрийа wан жи öса qайим бә. Щарәке, әwи мәрьве дәwләтирʹа гот: «Һәгәр тö дьхwази кʹамьл би, һәрʹә һәбука хwә бьфьрошә бьдә фәqира, һьнге хьзна тә wе ль әʹзмана һәбә. У пәй мьн wәрә» (Мәт. 19:21). Йазьх, баwәрийа wи мерьки кем бу, ле һәбун мәрьв кö итʹбарийа хwә бь тʹәмами Хwәде дьанин.

13. а) Паwлос чь ширәт да Тимотʹейо? б) Иро әм ча дькарьн әве ширәте бона хwә бьдьнә хәбате?

¹³ Тимотʹейо мәрьвәки бь баwәрийа qәwи бу. Паwлос wи нав кьр «әскәре Мәсиһ Исайи qәнщ» у паше сәр wан гьлийед хwәда зедә кьр: «Тʹö әскәр шьхöле бьнәлитийева мьжул набә, wәки ль сәрәскәр хwәш бе» (2 Тимтʹ. 2:3, 4). Иро жи шагьртед Иса, жь wан милйонәки зедәтьр хьзмәткʹаред һәртʹьм ьн, әве ширәта Паwлос дьдьнә хәбате. Әwана чʹәʹв надьнә ве дьнйайе, кʹижан кö пʹәрәһʹьз ә у тьма йә у бир накьн әве принсипе: «Дәйндар дьбә хöламе дәйндайи» (Мәтʹлк. 22:7). Шәйтʹан һәма әве йәке дьхwазә wәки әм һʹәму wәʹде хwә у qәwата хwә хәрщ кьн у бьбьнә хöламед ве дьнйайе. Бәле, әм гәрәке мьqати хwә бьн, wәки сафикьрьнед öса нәкьн кö мә бькьнә хöлам. Мәсәлә, һәрге әм пʹәре qальм дәйни һьлдьдьн сәва там бькʹьрʹьн, йан хwәндьна бьльнд бьстиньн, йан жи авта бьһа бькʹьрʹьн, әм дькарьн сәр гәләк сала бькʹәвьнә бьн дәйна. Ләма жи аqьлайи йә, кö пәй пʹәра нәкʹәвьн, дәйна нәкьнә стуйе хwә у пʹәре хwә рʹаст хәрщ кьн. Öса wе тʹö тьшт рʹе мә нәгьрә кö Хwәдерʹа хöламтийе бькьн у нәбьнә хöламед комерсйа ве дьнйайе (1 Тимтʹ. 6:10).

14. Нета мә гәрәке чь бә? Мәсәле биньн.

¹⁴ Сәва кö нәкʹәвьнә бьн байе пʹәра у һәбуке, әм гәрәке шьхöле Хwәде дайньн щийе пешьн. Мер у жьнәк йед кö бәре хьзмәткʹаред һәртʹьм бун, бизнесәкә мәзьн вәкьрьн у пʹәре qальм чедькьрьн. Ле wана дьхwәст диса бьбьнә хьзмәткʹаред һәртʹьм, у ләма бизнеса хwә, qәйьк, у һур-муред хwәйә дьн фьротьн. Паше, wана бь рʹәзәдьли аликʹари дьданә авакьрьна филиала сәрәкә Wорwикеда, (Нийу Йорк). Әw йәк бона wан кʹәрәмәкә мәзьн бу, чьмки Бәйтʹәледа wана тʹәви qиза хwә у зәʹве хwә хьзмәт дькьрьн. У öса жи чәнд һʹәфтийа де-баве wи бьрайи жи wедәре бун, чьмки әwана жи аликʹари дьданә проекта Wорwике. Хушкәкә пешәнг жь Колорадойе (Дәwләтед Йәкбуйи), банкеда хәбата ниврʹожи хwәрʹа дит. Мәзьнед хәбате öса хәбата wе бәгәм кьрьн, кö жерʹа готьн wәки әw тʹәмамийа рʹоже бьхәбьтә, у се щара зедәтьр пʹәра бьстинә. Ле әw хушк qайил нәбу, чьмки wе нькарьбуйа Йаһоwарʹа гәләк хьзмәт кьра. Әw тʹәне чәнд мәсәлә нә, ле һәнә диса гәләк хушк-бьра, йед кö гәләк тьшт жь хwә кем кьрьн, сәва һе зедә Хwәдерʹа хьзмәт кьн. Бәле, чахе нета мә әw ә кö шьхöле Хwәде дайньн щийе пешьн, әм избат дькьн кö әм достийа хwә тʹәви Хwәде у һәбука рʹöһʹани дьһа зәʹф qимәт дькьн, нә кö тьштед ве дьнйайе.

ГАВА ҺӘБУК КЕМ БӘ

15. Кʹижан һәбук бәхтәwарийа мәзьн тинә?

¹⁵ Һәрге мәрьв дәwләти йә, әw найе һʹәсабе кö Хwәде wи qәбул дькә у кʹәрәм кьрийә. Йаһоwа wана кʹәрәм дькә йед кö «бь кьрьнед qәнщ дәwләти» нә. (Бьхунә 1 Тимотʹейо 6:17-19.) Мәсәлә, хушкәкә мә бь наве Лучиаb пеһʹәсийа кö Албанйайеда һʹәwщәтийа мьзгинвана һәйә. Әwе йәке ле һелан кьр кö сала 1993-да жь Италйайе дәрбази Албанйайе бә. Әw нәһеса бу чьмки хәбата wе тʹöнә бу, ле әwе бь тʹәмами итʹбарийа хwә Йаһоwа ани. Әw зьмане Албани һин бу у 60 мәрьви зедәтьр ани сәр рʹийа рʹастийе. Дьбәкә мьһала мәда гәләк мәрьв найен сәр рʹийа рʹастийе, ле һәр тьшт чь кö әм дькьн сәва мәрьв рʹийа жийине бьвиньн у сәр бьминьн, нә әм, нә жи әwана тʹö щар wе бир нәкьн (Мәт. 6:20).

16. а) Чь wе бьqәwьмә тʹәви система комерсйайе? б) Әв йәк ча гәрәке һʹöкöм бә сәр ньһерʹандьна мә һьндава һәбуке?

¹⁶ Иса гот: «Гава . . . [һәбука нәрʹаст] кем бә», нә кö «һәрге кем бә» (Луqа 16:9). Әw те һʹәсабе wәки әw система комерси wе әʹсә кʹöта бә. Wан рʹожед ахьрийеда, гәләк банка пʹәре хwә öнда кьрьнә у гәләк wәлатада жи кризис ә. Ле ахьрийеда һʹале дьнйайе wе һе хьраб бә. Системед Шәйтʹан, демәк йе политики, религи, у комерси wе әʹсә кʹöта бьн. Пʹехәмбәр Һәзәqел у Сефанйа пʹехәмбәрти кьрьбун, wәки зерʹ у зив, демәк чь кö гәләк qимәт ә бона ве дьнйайе, wе пʹучʹ бьн у кери тьштәки нәйен (Һәзqл. 7:19; Сефн. 1:18). Бьдьнә бәр чʹәʹве хwә, һәрге мә хьлазийа әʹмьре хwә фәʹм кьр, кö мә бадиһәwа «һәбука нәрʹаст» тʹоп дькьр, ле һәбука рʹаст хwәрʹа qазанщ нәкьр, гәло әме чь тʹәхмин кьн? Әме хwә мина wи мәрьви тʹәхмин кьн, кʹижан кö тʹәмамийа әʹмьре хwә дьхәбьти сәва гәләк пʹәрә тʹоп кә, ле әw пʹәрә qәлп дәркʹәтьн (Мәтʹлк. 18:11). Бәле, һәбука ве дьнйайе wе әʹсә кʹöта бә, ләма жи изьне нәдьн тʹö тьшти рʹе wә бьгьрә сәва «һәвала» ль әʹзман qазанщ кьн. Һәр тьшт чь жи әм бона Йаһоwа у Пʹадшатийа wи бькьн, әв йәк wе бь рʹастийе мә дәwләти у бәхтәwар кә.

17, 18. Достед Хwәде һивийа чь wәʹдәйи нә?

¹⁷ Чахе Пʹадшатийа Хwәде бе, тʹö кәс wе кʹьреда нибә, нә жи дәйн һьлдә сәва там бькʹьрʹә. Хwарьн wе тʹер-тʹьжә у бе пʹәрә бә. Һʹәким у нәхwашханә wе тʹöнә бьн. Достед Йаһоwа wе жь бәред әʹрде бь тʹәмами ләзәте бьвиньн. Зер, зив у хьшьр, wе бона хәмьландьне бьн, нә кö сәва дәwләти бьн. Дар, кәвьр, у һәсьн, wе бона авакьрьна малед бәдәw бенә хәбьтандьне. Һәвал wе али мә бькьн нә кö бона кʹара хwә, ле бь рʹәзәдьли у бь дьл у щан. Дьнйа тʹәзәда әме һәр тьштирʹа кö әʹрд wе бьдә ша бьн.

¹⁸ Әw тʹәне һьнә тьшт ьн, кö достед Йаһоwа у Иса, wе бьстиньн. Хьзмәткʹаред Йаһоwа wе ль сәр әʹрде ша бьн гава гьлийед Иса бьбьһен: «Wәрьн бьмбарәкбуйийед алийе Баве мьнда! Әw Пʹадшатийа кö бона wә жь wәхте әʹфьрандьна дьнйайеда һазьр буйә wар бьн» (Мәт. 25:34).