Әwана бь Рʹәзәдьли Хьзмәт Дькьн: Ль Тʹьркйәйе

МӘСИҺИЙЕД QЬРʹНА йәкеда алийе хwәда һәр тьшт дькьрьн, сәва «мьзгинийа Пʹадшатийе» бьгьһижә гәләк мәрьва (Мәт. 24:14). Һьнәк жь wан сәва ве йәке һәла һе чубунә wәлатед хәрибда жи. Бәʹса хәбәре, Паwлосе шанди чу wи щийи, кʹидәре кö Тʹьркйәйа иройин ә. Ль wедәре wәʹде рʹеwитийа хwәйә мисйонерти, әwи бь хирәт мьзгини бәла дькьр.a Паши wәкә 2 000 сала, сала 2014-да, Тʹьркйәйеда бона бәлакьрьна мьзгинийе диса кампанйа мәзьн дәстпебу. Ле гәло чьрʹа әв кампанйа һатә сазкьрьне? У кʹе нава ве кампанйайеда бу?

«ӘВ ЧЬ ДЬQӘWЬМӘ?»

Тʹьркйәйеда 2 800 зедәтьр мьзгинван һәнә, ле һәжмара мәрьва wедәре 79 милйон ә. Әв те һʹәсабе wәки жь wәкә 28 000 мәрьва 1 мьзгинван ә. Бәле, ча те кʹьфше шьхöл гәләк ә, ле мьзгинван һьндьк ьн у перʹа нагьһиньн гәләк мәрьварʹа мьзгинийе бәла кьн. У нета ве кампанйе һәма әв бу кö wәʹдәки кьнда гәләк мәрьв мьзгинийе пебьһʹәсьн. Wәкә 550 мьзгинван кö сәр зьмане Тʹьрки хәбәр дьдьн, жь wәлатед майин һатьн Тʹьркйәйе у wәʹде кампанйе тʹәви мьзгинванед wедәре хьзмәт дькьрьн. Гәло әв кампанйа чь кʹар ани?

Шәʹдәтийа мәзьн һатә дайине. Щьватәкә Стәмболе ньвиси: «Чахе мәрьва әм дьдитьн, wана жь мә дьпьрсин: ‹Wьра щьвата wәйә мәзьнә мәхсус дәрбаз дьбә? Әм wә, Шәʹдед Йаһоwа, һʹәму щийа дьвиньн!›» Щьватәке жи, жь шәһәре Измире ньвиси: «Мерькәк кö щийе таксийада дьхәбьти, незики рʹуспийе щьвата wе мьһале бу у жь wи пьрси: ‹Әв чь дьqәwьмә? Ча әз дьвиньм, wә шьхöле хwә һе мәзьн кьрийә?›» Бәле, әв кампанйа кʹәтә чʹәʹва!

Хушк-бьред кö жь wәлатед хәриб һатьн, жь ве кампанйе шабунәкә мәзьн стандьн. Стефен, йе кö жь Дәнмарке йә, гот: «Һәр рʹож, мьн wан мәрьварʹа мьзгини гьли дькьр, йед кö qә дәрһәqа Йаһоwа нәбьһистьбун. Мьн бь рʹастийе мәрьварʹа наве Йаһоwа дьда наскьрьне». Жан-Девид кö жь Франсайе йә, ньвиси: «Мә сәр кʹучәке бь сьһʹәта хьзмәт дькьр. Әw öса баш бу! Һʹәчʹи зәʹф мәрьв дәрһәqа Шәʹдед Йаһоwа ньзаньбун. Дькарьм бежьм, wәки бәр һәр дәрики, мә тʹәви хwәйе мале хәбәр дьда, видео нишан дькьр, у әʹдәбйәт жи дьһишт».

Нава дö һʹәфтийада, 550 мьзгинван кö сәва кампанйе һатьбун Тʹьркйәйе, wәкә 60 000 әʹдәбйәт бәла кьрьн! Бәле, әве кампанйайе рʹасти жи шәʹдәтикә мәзьн да.

Мьзгинван һе хирәт бунә. Әв кампанйа мәхсус, гәләк баш һʹöкöм бу сәр хушк-бьред Тʹьркйәйе. Гәләк жь wана хwәрʹа нет данин хьзмәт кьн ча хьзмәткʹаред һәртʹьм. У бь рʹастийе, нава 12 мәһада паши ве кампанйе, һәжмара пешәнга ль Тʹьркйәйеда сәр 24 сәләфа зедә бу.

Әв хушк-бьред кö жь wәлатед хәриб һатьбун, гьли кьрьн кö чаwа әв кампанйа сәр хьзмәтийа wан һʹöкöм бу чахе әwана вәгәрʹийан wәлатед хwә. Ширин, хушкәкә жь Алманйайе, ньвиси: «Хушк-бьред жь Тʹьркйәйе нәформал гәләк һеса хьзмәт дькьрьн. Ле мьн шәрм дькьр у ләма мьнрʹа чәтьн бу нәформал мьзгинийе бәла кьм. Ле спас ве кампанйа мәхсусрʹа, öса жи мәсәла хушк-бьра у гәләк дöа али мьн кьрьн, кö мьн карьбу әве йәке бькьм. Мьн һәла һе метройеда жи дәрһәqа мьзгинийе тʹәв мәрьва хәбәр дьда у бәлавок жи бәла дькьрьм! Ньһа әз ида шәрм накьм ча бәре».

Йоһанес йе кö жь Алманйайе йә, гот: «Әз сәва хьзмәтийа хwә, хwәрʹа дәрса һин бумә. Хушкбьред Тʹьркйәйе чьqас дькарьбун гәләк мәрьварʹа дәрһәqа рʹастийе гьли дькьрьн. Wана тʹö мәщал бәрнәдьдан. Мьн жи хwәрʹа нет дани кö чʹәʹв бьдьмә wан, чахе вәгәрʹьм Алманйайе. У ньһа әз һе зедә мәрьварʹа мьзгинийе бәла дькьм, нә кö бәре».

Зәйнәп кö жь Франсайе йә, гьлийед öса гот: «Әв кампанйа гәләк сәр хьзмәтийа мьн һʹöкöм бу. Әв али мьн кьр кö һе мерхас бьм у һе зедә итʹбарийа хwә Йаһоwа биньм».

Мьзгинван дьһа незики һәв бунә. Һʹьзкьрьн у йәкти ортʹа хушк-бьред жь щурʹә-щурʹә wәлата, гәләк wана дьлгәрм кьр. Жан-Девид бәʹса кʹижани мә жоре кьр, гот: «Мә меванһʹьзийа хушк-бьра ‹тәʹм кьр›». Паши wан гьлийа әwи öса гот: «Wана әм ча һәвал у нәфәред хwә qәбул кьрьн. Дәрийед мала wан бона мә вәкьри бун. Мьн заньбу wәки әм бьратийа һʹәмдьнйайе нә, у әв йәк мьн гәләк щар әʹдәбйәтед мәда жи хwәндийә. Ле wәʹде ве кампанйе, мьн щара пешьн пе чʹәʹве хwә әв йәк дит. Әз һе фьрнаq бум кö әз жи нав щьмәʹта Йаһоwада мә, у мьн wирʹа спас дькьр бона ви qәдьре мәзьн».

Клер кö жь Франсайе йә, гот: «Фьрqи тʹöнә әм жь кʹижан wәлати бун, мәсәлә Дәнмарке, Франсайе, Алманйайе, йан жи Тʹьркйәйе, әм һʹәмушк жи малбәтәк бун. Те бежи Хwәде синоред ортʹа мьләт у wәлата тʹәмьз кьр».

Стефани жь Франсайе гот: «Әве кампанйайе әм һин кьрьн, wәки нә кö әʹдәт йан зьманәк мә дькә йәк, ле һʹьзкьрьна мә һьндава Йаһоwа».

КʹАР ПАШИ КАМПАНЙАЙЕ

Гәләк хушк-бьред жь wәлатед майин хwәстьн дәрбази Тʹьркйәйе бьн, сәва кö аликʹарийе бьдьнә wи шьхöле мәзьн, кʹижан кö гәрәке һе пешда һәрʹә. Гәләк ида дәрбаз бунә, у бь рʹастийе әwана гәләк qимәт ьн у һежайи пʹайа нә.

Бәʹса хәбәре, кʹомәкеда кö жь 25 мьзгинвана йә у жь шәһәр дур ә, гәләк сала wедәре тʹәне рʹуспик бу. Ле бьдьнә бәр чʹәʹве хwә кö хушк-бьра чьqас шабун чахе сала 2015-да, шәш мьзгинван жь Алманйайе у Нидерланде дәрбази ве кʹоме бунә сәва аликʹарийе бьдьн.

ХЬЗМӘТКЬРЬН КʹИДӘРЕ КÖ ҺʹӘWЩӘТИ ҺӘЙӘ

Ле гәло мьзгинван кö сәр һьнә wәʹдә дәрбази Тʹьркйәйе бунә, чь дьбежьн дәрһәqа жийина wедәре? Бәле, һеса нинә wәлате хәрибда бьжин, ле чахе бона аликʹарийе дәрбаз дьбьн, әwана гәләк кʹәрәма дьстиньн. Дина хwә бьдьнә һьнәка чь готьн:

Федерико бьраки кö зәwьщи йә, 41 сали йә, жь Испанйайе дәрбази Тʹьркйәйе буйә, дьбежә: «Әз дәwләти нажим, у әв йәк али мьн дькә wәки дьһа зәʹф wәʹде хwә хәрщ кьм бона тьштед лапи фәрз». Әв бьра йед дьн жи һелан дькә кö гавәкә öса бавежьн. Әw дьбежә: «Әʹсә, әве гаве бавежьн. Чахе тö дәрбази wәлате хәриб дьби сәва кö али мәрьва бьки Йаһоwа нас кьн, бь рʹастийе тö хwә дьди дәстед wи. У тö пе чʹәʹве хwә дьвини кö Йаһоwа чьqас бона тә хәм дькә».

Руди бьраки жь Нидерланде, кö зәwьщи йә, 57 сали йә, дьбежә: «Әм әшq-ша нә wәки wи щийи хьзмәт дькьн, кʹидәре кö щара пешьн әм мәрьварʹа рʹастийе гьли дькьн. Чахе әм дьвиньн кö дьле мәрьва чьqас ша дьбә гава әwана рʹастийе qәбул дькьн, әм шабунәкә мәзьн дьстиньн».

Саша, кö 42 сали йә у зәwьщи йә, жь Алманйайе дәрбаз буйә, дьбежә: «Һәр гав чахе әз хьзмәт дькьм, әз рʹасти wан мәрьва тем, йед кö щара пешьн рʹастийе дьбьһен. Әз гәләк бәхтәwар ьм кö дькарьм wан мәрьварʹа дәрһәqа Йаһоwа бежьм».

Атсуко, бьре мә зәwьщи йә кö 36-сали йә жь Жапонйайе, гьли дькә: «Бәре мьн гәләк дьхwәст кö Һармәгәдон зу бе. Ле чахе әз дәрбази Тʹьркйәйе бум, мьн фәʹм кьр кö чьрʹа Йаһоwа һе сәбьр дькә у һивийе йә, у әз жь wи гәләк рʹази мә. Гава әз дәсте Йаһоwа wи шьхöли һʹәмдьнйайеда дьвиньм, әз һе зедә дьхwазьм незики wи бьм».

Алиса, хушк жь Урьсете, дьбежә: «Хьзмәткьрьн Йаһоwарʹа ви щурʹе хьзмәтийеда, али мьн кьр кö бь тʹәмами тәʹм кьм qәнщийа wи» (Зәб. 34:8). Әw зедә дькә: «Йаһоwа нә кö тʹәне Бав ә бона мьн, ле öса жи Досте мьни незик ә, у щурʹә-щурʹә дәрәщада әз wи һе рʹьнд нас дькьм. Әʹмьре мьн бь шабуне, бь qәwьмандьнед һʹәwас у бь кʹәрәма тʹьжә йә!»

«ДИНА ХWӘ БЬДЬНӘ ЗӘВИЙА»

Бь сайа ве кампанйа мәхсусә Тʹьркйәйеда, мьзгини гьһиштә гәләк мәрьва. Ле йәкә диса һәнә щийед öса, кʹидәре кö мьзгини һе нәһатийә бәлакьрьне. Мьзгинванед кö дәрбази Тʹьркйәйе бунә сәва аликʹарийе бьдьн, һәр рʹож рʹасти мәрьвед öса тен, йед кö тʹö щар дәрһәqа Йаһоwа нәбьһистьнә. Ле һун дьхwазьн щики öсада хьзмәт кьн? Һәрге әре, әм wә һелан дькьн: «Чʹәʹвед хwә вәкьн у дина хwә бьдьнә зәвийа әw чаwа зәр бунә» (Йуһʹн. 4:35). Һун дькарьн аликʹарийе бьдьн wан дәштада, кʹижан кö «зәр бунә»? Һәрге әре, хwәрʹа нет дайньн у нета хwә биньн сери. У әве йәке бир нәкьн: Чахе һун аликʹарийе бьдьн сәва мьзгини бьгьһижә «һʹәта сәре дьне», һуне гәләк у гәләк кʹәрәма бьстиньн! (Кʹар. Шанд. 1:8)