Чьрʹа Әм Гәрәке Пәсьне Йаһоwа Бьдьн?

1-3. а) Кʹәнге дьбәкә Зәбур 147 һатийә ньвисаре? б) Әм жь ве Зәбуре чь дькарьн һин бьн?

ЧАХЕ кәсәк шьхöләки рʹьнд дькә йан жи һʹöнöрәки баш дьдә кʹьфше, әм дьхwазьн пʹайе wи бьдьн. Һәрге әм һелан дьбьн пʹайе мәрьва бьдьн, ле илаһи чьqас гәләк мәʹнийед мә һәнә, wәки пәсьне Йаһоwа Хwәде бьдьн! Бәʹса хәбәре, әм пәсьне wи дьдьн чьмки qәwата wи пʹьрʹ зор ә у әв йәк жь әʹфьринед wи те кʹьфше. Һьн жи, әw мә qайим һʹьз дькә, у әм ве йәкеда дöдьли ниньн, чьмки әwи сәва мә Кöрʹе хwә кьрә qöрбан.

² Ньвискʹаре Зәбур 147, жь кʹәла дьле хwә пәсьне Йаһоwа да. Һьн жи әwи һелан да йед дьн, сәва әwана жи тʹәви wи пәсьне Хwәде бьдьн. (Бьхунә Зәбур 147:1, 7, 12.)

³ Әм ньзаньн ньвискʹаре ве зәбуре кʹе йә, ле дьqәwьмә әwи wи wәʹдәйида дьжит, чахе Йаһоwа Исраели жь дилтийа Бабилоне аза кьр у әwана вәгәрʹийанә Оршәлиме (Зәб. 147:2). Бәле, әw йәк рʹасти жи мәʹнийа мәзьн бу, кö әw зәбурбеж һелан бу пәсьне Йаһоwа бьдә. Ле әwи сәва ве йәке диса һьнә мәʹни ньвисин. Гәло әв чь мәʹни нә? Ле чь мәʹнийед wә һәнә кö бь дьл у щан пәсьне Йаһоwа бьдьн? (Зәб. 147:1)

ЙАҺОWА ДЬЛШКӘСТИЙА QӘНЩ ДЬКӘ

4. Кʹәнге Корәш Пʹадша, щьмәʹта Исраели жь дилтийе аза кьр? У Исраелийа wе хwә ча тʹәхмин кьрана у чьрʹа?

⁴ Бьдьнә бәр чʹәʹве хwә кö дилтийа Бабилонеда Исраели чь һʹалида бун. Бабилони сәр wан дькʹәнийан у дьготьн: «Мәрʹа кʹöламед Сийоне бьстьрен». Wи чахи Оршәлим, щийе шабуна Исраелийа, wеранкьри бу у wана нькарьбу Йаһоwарʹа хьзмәт кьрана (Зәб. 137:1-3, 6). Сәре wана странарʹа тʹöнә бу, чьмки дьле wан шкәсти бу. Һьнге wанрʹа бәрдьли у дьлгәрми лазьм бу. Ле хьлазийа тәнгасийа wан һат, чьмки ль гора пʹехәмбәртийа Хwәде, пʹадше Фарьсе Корәш wана аза кьр. У чахе Корәш Бабилон алт кьр, әwи әʹлам кьр: «Хöдан . . . Оршәлима кö ль Щьһудайе йә, жь бо әз ханийәки жерʹа ава бькьм, әʹмьр да мьн. Жь һʹәмуйа нәтәwа wи һәр кʹи нав wеда һәбә, бьра Хwәдайе wи Хöдан бь wирʹа бә у бьра дәркʹәвә» (2 Дир. 36:23). Бәле, wи чахи Исраели wе чьqас дьлгәрм буна!

5. Зәбурбеж дәрһәqа qәwата Хwәде кö дькарә qәнщ кә, чь гот?

⁵ Йаһоwа нә кö тʹәне бәрдьли дайә щьмәʹта хwә бь тʹәмами, ле дайә һәр кәси башqә. Иро жи Йаһоwа бона мә һәр кәси башqә хәм дькә. Зәбурбеж гот кö Хwәде «дьлшкәстийа qәнщ дькә у бьринед wан дьпʹечʹә» (Зәб. 147:3). Бәле, чахе әм нәхwәш ьн, дьлтәнг ьн, йан депресийеда ньн, Йаһоwа тʹьме кʹеләка мә йә. Әw бәр дьле мәда те у бьринед дьле мә qәнщ дькә (Зәб. 34:18; Иша. 57:15). Һьн жи, әw билани у qәwате дьдә мә, сәва әм бькарьбьн бәр һәр чәтьнайике тәйах кьн (Аqуб 1:5).

6. Чьрʹа зәбурбеж Зәбур 147:4-да, дина хwә дьдә сәр әʹфьринед ль әʹзман, у әм жь ве йәке чь кʹаре дьстиньн? (Бьньһерʹә шькле әʹwльн.)

⁶ Паши ве йәке, зәбурбеж дина хwә дьдә сәр әʹзмана у дьбежә, кö Йаһоwа «һʹәсабе стәйрка кʹьфш дькә, бь һәр навәки wан гази дькә» (Зәб. 147:4). Гәло чьрʹа зәбурбеж дина хwә да сәр стәйрка? Әwи стәйрк дьдит, ле һәжмара wан ньзаньбу. Иро әм заньн wәки зандар һе зедә у зедә стәйрка дьвиньн. Һьнәк жь wан дьбежьн, wәки тʹәне галактика мәда бь милиарда стәйрк һәнә. Бьдьнә һʹәсабе хwә, wәки тʹәмамийа гәрдунеда wәкә трилион галактик һәнә! Бона мәрьва әw öса гәләк ә, wәки нә жи дькарьн һʹәсаб кьн! Ле Хwәде wан һәр йәкерʹа нав у щи дайә. Әw те һʹәсабе кö бона Йаһоwа һәр стәйркәк башqә йә (1 Корн. 15:41). Ле һьндава мәрьва Йаһоwа ча нә? Һәрге Хwәде занә һәр стәйркәк кʹидәре йә, демәк әw мә һәр кәса жи башqә нас дькә, занә әм кʹидәре нә, әм чь тʹәхмин дькьн, у ве дәме чь мәрʹа лазьм ә.

7, 8. а) Йаһоwа ча нә һьндава щьмәʹта хwә? б) Мәсәле биньн кö Йаһоwа ча дьлшәwат ә һьндава мәрьвед гöнәкʹар.

⁷ Йаһоwа дәрһәqа мә һәр тьшти занә, әw дьлшәwат ә у qәwата wи һәйә wәʹде чәтьнайа али мә бькә. (Бьхунә Зәбур 147:5.) Щара чахе һун дькʹәвьнә чәтьнайе, дьбәкә һун дьфькьрьн кö әв чәтьнайи жь qәwата wә дәр ә у бона wә гәләк гьран ә. Ле Хwәде занә qәwата мә чьqас ә у занә әм «хали нә» (Зәб. 103:14). Әм гöнәкʹар ьн, ләма жи әм шашикә хwә диса у диса дькьн. Паше, әм пʹошман дьбьн кö мә чьрʹа öса гот, йан чьрʹа әм диса кʹәтьнә пәй хwәстьнед нәрʹаст, йан жи чьрʹа мә чʹәʹвнәбари кьр! Йаһоwа бекемаси йә у шашийед wи тʹöнә нә, ле йәкә әw бь тʹәмами мә фәʹм дькә у дькʹәвә һʹәйра мә (Иша. 40:28).

⁸ Дьбәкә wә сәр хwә тʹәхмин кьрийә, кö чаwа Йаһоwа бь дәсте хwәйи зор али wә кьр, wә тәнгасийада дьлрʹьһʹәти станд (Иша. 41:10, 13). Дина хwә бьдьнә сәрһатийа хушкәкә пешәнг, наве кʹижане Кйоко йә. Әwе хушке кʹьфшкьрьна тʹәзә станд у дәрбази щики дьн бу. Әw йәк жерʹа чәтьн бу у әw дьлтәнг дьбу. Ле гәло Йаһоwа ча жерʹа да кʹьфше кö ле фәʹм дькә? Щьвата хwәйә тʹәзәда әw нава wан хушк-бьрада бу, йед кö бәр дьле wеда һатьн у кʹәтьнә һʹәйра wе. Әwе хушке сәр хwә öса тʹәхмин кьр, кö Йаһоwа жерʹа öса дьбежә: «Әз тә һʹьз дькьм, нә кö чьмки тö пешәнг и, ле чьмки тö qиза мьн и у тö тʹәсмили мьн буйи. Әз дьхwазьм wәки тö чаwа Шәʹде мьн әʹмьре хwәрʹа ша би!» Ле дәрәща wәда Йаһоwа ча нишан кьрийә, кö фәʹме «wи бе синор ә»?

ЙАҺОWА ҺʹӘWЩЕД МӘ РʹАЗИ ДЬКӘ

9, 10. Бәре әʹwльн Йаһоwа чьда али мә дькә? Мәсәле биньн.

⁹ Мә гьшкарʹа жи лазьм ә кʹьнщ, хwарьн у щи-стʹар. Бәʹса хәбәре, дьбәкә щара һун бәрхwә дькʹәвьн кö хwарьн wе тʹера wә нәкә. Ле Йаһоwа әʹрд öса чекьр кö һаqас бәред хwә дьдә, wәки тʹера һʹәмушка дькә. Йаһоwа һәла һе щущукед qарʹqарʹе жи тʹер дькә. (Бьхунә Зәбур 147:8, 9.) Һәрге Хwәде хöрәк дьдә щущукед qарʹqарʹе, илаһи wе бьдә мә жи чьда әм һʹәwщә нә (Зәб. 37:25).

¹⁰ Бәре әʹwльн, Йаһоwа аликʹарийа рʹöһʹани дьдә, у öса жи «әʹдьлайийа Хwәде кö жь һәр һʹьш-аqьли дәрбазтьр ә» (Фили. 4:6, 7). Дина хwә бьдьнә сәрһатийа бьре мә Матсуо у жьна wи, йед кö тәнгасийеда дәсте Йаһоwа дитьн. Сала 2011–да Жапонйайеда тсунами рʹабу, у әwана сәва кö хwә хьлаз кьн рʹабунә сәр банийе мала хwә. Ле йазьх, wана һʹәму мал-һʹале хwә öнда кьр. Wана тʹәмамийа шәве сöрʹеда дәрбаз кьр сәр qәте дöда, йа мала хwәйә һьлшийайи. Шәбәqе, wана хwәст хwәрʹа тьштәки бьхуньн сәва рʹöһʹанида дьлгәрм бьн. Wана тʹәне кʹьтеба «Һәрсали» йа сала 2006 дитьн. Чахе Матсуо әw кʹьтеб вәкьр, дәрберʹа бьнсәрик бь наве «Тʹәрихийеда Тсунамийа Лапә Мәзьн» кʹәтә бәр чʹәʹве wи. Ль wедәре дьһатә гьликьрьне дәрһәqа әʹрдһәже кö сала 2004-да Суматрайеда qәwьми. Нава тʹәрихийеда әw әʹрдһәжәкә лапә зийанкʹар бу. Матсуо у жьна wи чахе әw qәwьмандьн дьхwәндьн, дьгьрийан. Wана һʹьзкьрьна Хwәде тʹәхмин кьр, чьмки һәма чахе wанрʹа лазьм һат, әwи wана дьлгәрм кьр у рʹöһʹанида гәш кьр. Ле Йаһоwа нә тʹәне рʹöһʹанида али wан кьр, ле öса жи һʹәwщед дьнда. Хушк-бьра хwарьн у кʹьнщ анин. Ле Матсуо у жьна wи һьнге дьһа зәʹф qәwи бун, чахе әндәмед Комитейа Филиале тʹәсәлийа щьвате кьрьн. Матсуо гьли дькә: «Мә тʹәхмин дькьр wәки Йаһоwа кʹеләка мә һәр кәси дьсәкьнә у мьqати мә дьбә. Әw йәк гәләк дьле мә гәрм кьр!» Бәле, Хwәде пешийе алийе рʹöһʹанида аликʹарийе дьдә, у паше ида һʹәwщед мәйи физикида.

АЛИКʹАРИЙА ХWӘДЕ МӘ QӘWИ У ГӘШ ДЬКӘ

11. Әм ча дькарьн аликʹарийа Хwәде бьстиньн?

¹¹ Йаһоwа тʹьме һазьр ә дәсте хwә дьрежи мьлука бькә у тәнгасийада дәст бавежә wан (Зәб. 147:6а). Ле гәло әм ча дькарьн аликʹарийа wи бьстиньн? Һәләqәтийа мә гәрәке тʹәви wи qәwи бә. Бона ве йәке әм гәрәке мьлук у шкәсти бьн (Сефн. 2:3). Мәрьвед мьлук итʹбарийа хwә Йаһоwа тиньн, кö әw wе һәр нәһәqийе рʹаст кә у wе хьлазийа тәнгасийа wан бинә. Мәрьвед öса Йаһоwа хwәш тен у әw wана qәбул дькә.

12, 13. а) Сәва Хwәде али мә бькә, әм гәрәке хwә жь чь дур бьгьрьн? б) Кʹижан мәрьв Йаһоwа хwәш тен?

¹² Хwәде «нәпʹака дәвәрʹуйа тинә дькә хали» (Зәб. 147:6б). Бәле, әм нәхwазьн әw йәк бе сәре мә. Ләма һәрге әм дьхwазьн Йаһоwа аликʹарийе бьдә мә, әм гәрәке нәфрʹәт кьн чь кö әw нәфрʹәт дькә (Зәб. 97:10). Мәсәлә, бенамуси гәрәке бәр чʹәʹве мә рʹәш бә. Әw те һʹәсабе кö әм хwә жь һәр тьшти дур бьгьрьн, чь кö дькарә мә бьвә бәрбь бенамусийе, бәʹса хәбәре порнографйа (Зәб. 119:37; Мәт. 5:28). Нәһеса йә мьqабьли wан тьшта шәрʹ бькьн, ле әw йәк һежа йә, чьмки әме кʹәрәмед Йаһоwа бьстиньн.

¹³ Ле wи шәрʹида әм гәрәке аликʹарийа Хwәде бьгәрʹьн, нә кö сәр хwә баwәр бьн. Йаһоwа бәгәм накә һәрге әм һәwара хwә «qәwата һәспе» йан жи «рʹәва чокед инсен» тиньн, демәк чахе дьфькьрьн йанчь мәрьв дькарьн мә хьлаз кьн, нә кö Йаһоwа (Зәб. 147:10). Әм гәрәке жь Йаһоwа һиви бькьн сәва әв али мә бькә. Йаһоwа тʹьме һазьр ә мә бьбьһе. Әw мәрьв нинә wәки бьвәстә, әw тʹьме гöһ дьдә мә. Йаһоwа «хофкʹешед Хwә бәгәм дькә, wанед һʹöба Wида» кö баwәр ьн (Зәб. 147:11). Хwәде амьн ә у мә һʹьз дькә, ләма жи әм гәрәке дöдьли нәбьн кö әw wе али мә бькә, wәки әм тʹәви хwәстьнед хwәйә нәрʹаст шәрʹ бькьн.

14. Чь зәбурбеж дьлрʹьһʹәт дькьр?

¹⁴ Йаһоwа мәрʹа дьбежә, wәки wәʹде чәтьнайа әw wе кʹеләка мә бә у али мә бькә. Чахе зәбурбеж дьфькьри кö чаwа Исраели пе qәwата Хwәде вәгәрʹийанә Оршәлиме, әwи дәрһәqа Йаһоwа кʹьламеда гот: «Әw зәрʹзед дәргәһед тә дьшьдинә у нава тәда дöа зарʹед тә дькә. Әw әʹдьлайе дьдә синоред тә» (Зәб. 147:13, 14). Бәле, зәбурбеж гәләк дьлрʹьһʹәт бу, чьмки заньбу кö Хwәде wе дәргәһед шәһәре wан qәwи кә у хьзмәткʹаред хwә хwәй кә!

15-17. а) Әм щерʹьбандьнада щара ча хwә тʹәхмин дькьн, ле Йаһоwа ча бь сайа Хәбәра хwә али мә дькә? б) Мәсәле биньн, кö чаwа хәбәра Хwәде «зу бәла дьбә».

¹⁵ Wәʹде чәтьнайа чахе һун бәрхwә дькʹәвьн у ньзаньн чь бькьн, Йаһоwа дькарә сәрwахтийе бьдә wә сәва әве чәтьнайе сафи кьн. Зәбурбеж гот кö Хwәде «әʹмьре Хwә дьшинә сәр дьне у хәбәра Wи зу бәла дьбә». Әw зәбура хwәда гьли дькә кö Хwәде бәрфе дьшинә, qьше дьрәшинә, у бузе дькә тәйрок. Паши ван гьлийа әw пьрсе дьдә: «Кʹи дькарә ль бәр сәрма Wи тәйах кә?» Зәбурбеж щаба ве пьрсе дьдә кö Йаһоwа «хәбәра хwә дьшинә wан дьһʹәлинә» (Зәб. 147:15-18). Бәле, Хwәдейе һәри билан у һәри зор, кʹижан кö һʹöкöм дькә сәр тәйрок у бәрфе, дькарә али wә бькә һәр тәнгасийада тәйах кьн.

¹⁶ Иро Йаһоwа бь Хәбәра хwә, демәк Кʹьтеба Пироз рʹебәрийе мә дькә. «Хәбәра wи зу бәла дьбә», демәк гава мәрʹа аликʹари лазьм ә, әw дәрберʹа дьдә мә. Бәʹса хәбәре, бьфькьрьн кö һун кʹарәкә чьqас мәзьн дьстиньн чахе Кʹьтеба Пироз дьхуньн, әʹдәбйәтед «хöламе амьн у сәрwахт» леколин дькьн, JW Бродкастинге дьньһерʹьн, дькʹәвьнә малпәра мә jw.org, тʹәви рʹуспийа хәбәр дьдьн у тʹәви хушк-бьра һәвалтийе дькьн (Мәт. 24:45). Дьбәкә wә хwәха әʹмьре хwәда дитийә кö Йаһоwа чаwа зу у wәʹдәда рʹебәри дайә wә.

¹⁷ Хушка мә Симона, qәwата Хәбәра Хwәде сәр хwә тʹәхмин кьрийә. Әw дәрһәqа хwә нәбаш дьфькьри. Әw дöдьли дьбу кö әw мәрьвәкә баш ә кʹижан кö Хwәде хwәш те. Гава әв фькьред нәрʹаст дькʹәтьнә һʹьше wе, әwе дәрберʹа Йаһоwарʹа дöа дькьр, wәки али wе бькә. Хенщи ве йәке, әwе тʹьме Кʹьтеба Пироз дьхwәнд у леколин дькьр. Әw гьли дькә: «Һʹәму дәрәщада мьн сәр хwә qәwата Йаһоwа тʹәхмин дькьр у мьн рʹебәрийа wи дьдит». Әwе йәке али Симонайе кьр, wәки дьлтәнг нәбә у шабуна хwә öнда нәкә.

18. Чьрʹа һун баwәр ьн кö Хwәде wә qәбул дькә, у чь мәʹнийед wә һәнә кö пәсьне Йаһоwа бьдьн?

¹⁸ Зәбурбеж заньбу кö Исраел щьмәʹта Хwәдейә бьжарти йә. Һьнге тʹәне wана «хәбәра» Хwәде у «qанун у qьраред» wи дьстандьн. (Бьхунә Зәбур 147:19, 20.) Ле иро әм кʹәрәмкьри нә, чьмки сәр тʹәмамийа әʹрде наве Хwәде тʹәне сәр мә йә. Әм Йаһоwа нас дькьн у Хәбәра wи рʹебәрийе мә дькә. Һьн жи әм дькарьн һәләqәтийа незик тʹәви wи хwәй кьн. Бәле, мина ньвискʹаре Зәбур 147, мәʹнийед wә жи гәләк һәнә кö пәсьне Йаһоwа бьдьн у ве йәкеда мәрьвед дьн жи һелан кьн.