Пьрсед Хwәндәвана

Чьрʹа Мәтта у Луqа сәрһатийа дәрһәqа буйина Иса у бьчʹуктайа wи, мина һәв нә ньвисинә?

Ньвисара Мәтта дәрһәqа буйина Иса у бьчʹуктайа wи һьнәки щöдә дьбә жь ньвисара Луqа, чьмки Мәтта һе зедә гьли дькә qәwьмандьнед кö тʹәви Усьв qәwьминә, ле Луqа һе зедә дәрһәqа Мәрйәме гьли дькә.

Мәтта ньвисийә кö Усьв ча хwә да кʹьфше гава пеһʹәсийа кö Мәрйәм һʹәмлә йә, öса жи ньвисийә кö хәwнеда мьлйакʹәт жерʹа ча шьровәдькә дәрһәqа буйина Иса, у чаwа Усьв пәй рʹебәрийа мьлйакʹәт чу (Мәт. 1:19-25). Мәтта öса жи гьли дькә дәрһәqа хәwна Усьв чахе мьлйакʹәт тʹәми да wи кö бьрʹәвә Мьсьре у әwи öса жи кьр, малбәта хwәва рʹәви Мьсьре. Һьн жи Мәтта ньвисийә дәрһәqа хәwна Усьв кö чахе мьлйакʹәт жерʹа гот, wәки әw вәгәрʹә Исраеле у ча әw вәгәрʹийа. У öса жи әwи гьли кьр дәрһәqа сафикьрьна Усьв кö малбәта хwәва дәрбази Ньсрәте бә (Мәт. 2:13, 14, 19-23). Кʹьтеба Мәттада сәре 1 у 2-да, наве Усьв 10 щара те хәбьтандьне, ле наве Мәрйәме тʹәне 5 щара.

Ле Луqа һе зәʹф гьли дькә дәрһәqа Мәрйәме. Мәсәлә, әw гьли дькә чахе мьлйакʹәт Щьбрайил wева хöйа бу, чахе Мәрйәм чу щәм мәрьва хwә Елизабете, у чаwа Мәрйәме пәсьне Йаһоwа да (Луqа 1:26-56). Луqа öса жи ньвисийә гьлийед Шьмһʹун, кö әwи дәрһәqа щәфед Исайә ахьрийе Мәрйәмерʹа гот. Паше, Луqа гьли дькә чахе малбәта Усьв чу пʹарьстгәһе гава Иса 12 сали бу у әw гьлийед Мәрйәме дьбежә нә кö гьлийед Усьв. Луqа öса жи зедә дькә кö чаwа һʹәму qәwьмандьн сәр wе һʹöкöм бун (Луqа 2:19, 34, 35, 48, 51). Дö сәред пешьнә кʹьтеба Луqада наве Мәрйәме 9 щара те хәбьтандьне, ле наве Усьв 4 щара. Демәк, Мәтта һе зедә дина хwә дьдә сәр кьред Усьв у дәрәщед wи, ле Луqа һур бь һур дьбежә дәрһәqа Мәрйәме у qәwьмандьнед кö тʹәви wе дьqәwьмин.

Диса һьнә фьрqи һәйә ортʹа ньвисара Луqа у Мәттада. Рʹезкьрьна рʹькʹьнйата кö Иса же һатийә, wана мина һәв нә ньвисинә. Мәтта кал-бавед Усьв рʹез дькә у дьдә кʹьфше, wәки рʹаст ә Иса кöрʹе Усьви һʹәлал нинә, ле кöрʹе wи те һʹәсабе, у ләма Иса бь qануни wаре пʹадшатийа Даwьд ә. Чьрʹа? Чьмки Усьв жь рʹькʹьнйата Пʹадша Даwьд бу алийе кöрʹе wи Сьлеманда (Мәт. 1:6, 16). Ле Луqа кал-бавед Мәрйәме рʹез дькә у дьдә кʹьфше wәки Иса жь буйина хwәйә бь бәдәни, wаре пʹадшатийа Даwьд ә (Рʹом. 1:3). Чьрʹа? Чьмки Мәрйәм жи жь рʹькʹьнйата Пʹадша Даwьд бу, ле алийе кöрʹе wи Натʹанда (Луqа 3:31). Ле гәло чьрʹа Луqа рʹеза рʹькʹьнйатеда кö Мәрйәм же һатийә, наве Мәрйәме набежә кö әw qиза Әʹли йә? Чьмки рʹезкьрьна рʹькʹьнйатада тʹәне наве мера дьһатә готьне. Ләма жи чахе Луqа рʹькʹьнйата Усьв рʹез дькә у сәр wи дьбежә кöрʹе Әʹли, әw дьһатә фәʹмкьрьне wәки Усьв зәʹве Әʹли бу (Луqа 3:23).

Рʹезкьрьна Мәтта у Луqа йа рʹькʹьнйата кö Иса же һат, әшкәрә дькә, wәки Иса бу Мәсиһ, дәрһәqа кʹижани жи һатьбу пʹехәмбәртикьрьне. Әw избаткьрьн кö Иса жь рʹькʹьнйата Даwьд бу, öса әшкәрә бу, wәки Ферьси у qанунзана жи нькарьбун бежьн wәки әw йәк дәрәw ә. Рʹезкьрьна рʹькʹьнйата кö Иса же һат, баwәрийа мә qәwи дькә у избат дькә, wәки һʹәму созед Хwәде wе әʹсә бенә сери.