Нәһелә Тʹö Тьшт Тә жь Хәлате Дур хә

1, 2. а) Хьзмәткʹаред Хwәде бь дьл у щан һивийа кʹижан хәлате нә? б) Чь али мә дькә чʹәʹве хwә сәр хәлате хwәй кьн? (Бьньһерʹә шькле әʹwльн.)

МӘСИҺИЙЕД бь рʹöһʹе пироз бьжарти һивийа жийина сәр әʹзмана нә. Паwлос әw пʹешкʹеш нав кьр ча «ләщхәлата жорчуйине, аwа готи газийа Хwәде» (Фили. 3:14). Әwана бь дьл у щан һивийе нә, wәки тʹәви Иса Мәсиһ Пʹадшатийа wида сәрwертийе бькьн у али wи бькьн мәрьва бькьнә беqьсур (Әʹйан. 20:6). Рʹасти жи әwана һивийа wәʹдәки гәләк хwәш ьн! Ле пәзед дьн һивийа хәлатәкә дьн ьн. Әwана жи һивийа жийина һʹәта-һʹәтайе нә, ле сәр әʹрде, у әшq ша һивийа wи wәʹдәйи нә (2 Пәт. 3:13).

² Паwлос дьхwәст, wәки хушк-бьред Мәсиһи һʹәта хьлазийе амьн бьминьн, сәва хәлате qазанч кьн. Әwи готә wан: «Сәр тьштед жорьн бьфькьрьн» (Колс. 3:2). Әwан Мәсиһийа гәрәке тʹьме дина хwә бьдана сәр wе хәлата гәләк qимәт (Колс. 1:4, 5). Бәле, чахе хьзмәткʹаред Йаһоwа дәрһәqа кʹәрәмед Хwәде дьфькьрьн, әw йәк али wан дькә кö чʹәʹве хwә сәр хәлате хwәй кьн, фьрqи тʹöнә әwана һивийе нә һʹәта-һʹәтайе бьжин сәр әʹрде, йан сәр әʹзмана (1 Корн. 9:24).

3. Паwлос дәрһәqа кʹижан хофа Мәсиһи ширәт кьрьн?

³ Паwлос öса жи Мәсиһи пешда ширәт кьрьн дәрһәqа wан хофа, кö дькарьн Мәсиһийа жь хәлате дур хьн. Мәсәлә, әwи щьвата Колосирʹа ньвиси дәрһәqа Мәсиһийед qәлп, йед кö дәwса баwәрийа хwә Иса бьанийана, пәй Qануна Муса дьчун у wана тʹьре Хwәде wе öса wана qәбул кә (Колс. 2:16-18). Паwлос öса жи әwана ширәт кьрьн дәрһәqа wан тʹәлька, кö иро жи һәнә у дькарьн дина мә жь хәлате бьрʹәвиньн. Бәʹса хәбәре, әwи шьровәкьр кö чаwа хwәстьнед бенамуси бьтәмьриньн, ча чәтьнайед ортʹа хушк-бьрада у чәтьнайед малбәтеда сафи кьн. Ширәтед Паwлос иро жи керһати нә. Ләма жи wәрә әм чәнд ширәтед wи шеwьр кьн, кʹижан кö әwи нәʹма хwәйә Колосийарʹа ньвиси.

ХWӘСТЬНЕД БЕНАМУСИ БЬКÖЖЬН

4. Чьрʹа хwәстьнед бенамуси дькарьн мә жь хәлате дур хьн?

⁴ Чахе Паwлос ани бира бьра дәрһәqа хәлата wанә qимәт, паше әwи ньвиси: «Хwәстьнед дьле хwәйә ве дьне бькöжьн: Бенамусийе, һʹәрамийе, тәме хьраб, дьлһавьжийа хьраб у тьмайе» (Колс. 3:5). Хwәстьнед бенамуси дькарьн öса qәwи бьн, кö әм һьн һәләqәтийа хwә тʹәви Йаһоwа, һьн жи хәлата хwә öнда кьн. Бьраки мә йе кö жь бо хwәстьнед бенамуси wәʹдәки жь рʹийа рʹаст дәркʹәт, ле паше вәгәрʹийа щьвате, гот: «Әз öса педа кʹәтьбумә нава wан хwәстьнед хwә, кö гәләк дәрәнг сәр һʹьше хwәда һатьм».

5. Чаwа әм дькарьн хwә жь дәрәщед хоф хwәй кьн?

⁵ Әм гәрәке һаш жь хwә һәбьн у гәләк фәсал бьн гава дькʹәвьнә дәрәщед öса, кʹижанада әм дькарьн принсипед Йаһоwа дәрһәqа намусийе бьтʹәрьбиньн. Мәсәлә, wе аqьлайи бә һәрге Мәсиһийед кö һәврʹа дьбьнә нас сәва һәв бьстиньн, жь дәстпека һәвнаскьрьне ида синора дайньн дәрһәqа әʹйанкьрьна назькайе, пачкьрьне, у чахе тʹәне нә (Мәтʹлк. 22:3). Алийе намусийеда Мәсиһи öса жи дькарә бе щерʹьбандьне кʹәнге бона хәбате дьчә щийе дур, йан жи чахе гәдә у qиз гәрәке тʹәвайи бьхәбьтьн (Мәтʹлк. 2:10-12, 16). Һәрге һун дәрәща öсада ньн, дәрберʹа бежьн кö һун Шәʹде Йаһоwа нә у рʹабун-рʹуньштьна хwә щайиз хwәй кьн. Тʹö щар бир нәкьн, wәки флирт дькарә ахьрийа хьраб бинә. Öса жи гәләк хоф ә чахе әм депресийеда ньн у дьлшкәсти нә. Һьнге дьбәкә әм бьхwазьн кö кʹеләка мә кәсәк һәбә сәва бона мә хәм бькә. Хоф әw ә кö жь дьлтәнгийе әм дькарьн бькʹәвьнә һʹаләки öса, кö кʹе жи мәрʹа дьлгәрмийе у назькайе нишан кә, әм wи һʹьз кьн. Һәрге тö бькʹәви дәрәща öса, дәрберʹа аликʹарийе жь Йаһоwа у щьмәʹта wи бьхwазә, сәва хәлата хwә öнда нәки. (Бьхунә Зәбур 34:18; Мәтʹәлок 13:20.)

6. Әм ча гәрәке wәʹдәдәрбазкьрьна бьжберьн?

⁶ Сәва хwәстьнед бенамуси бькöжьн, әм гәрәке хwә дур бьгьрьн жь тьштед бенамусийева гьредайи. Әw йәк кö иро гәләк мәрьв тьштед чава мьжул дьбьн у wәʹде хwә ча дәрбаз дькьн, Содом у Гоморайе тинә бира мә (Щьһуд. 7). Бәʹса хәбәре филм, музик, у wәʹдәдәрбазкьрьнед дьн, бенамусийе öса әʹйан дькьн йанчь әw тьштәки нормал ә у зийане найнә. Ле әм гәрәке тʹьме һаш жь хwә һәбьн, у нә һʹәму wәʹдәдәрбазкьрьна qәбул кьн. Әм гәрәке wәʹдәдәрбазкьрьнед öса бьжберьн, кʹижан кö wе рʹе мә нәгьрьн хәлата хwә бьстиньн (Мәтʹлк. 4:23).

ҺʹЬЗКЬРЬНЕ У QӘНЩИЙЕ «ЛЬ ХWӘ WӘРГЬРЬН»

7. Щьватеда Мәсиһи дькарә рʹасти кʹижан чәтьнайа бе?

⁷ Әм бәхтәwар ьн кö щьвата Мәсиһтида ньн. Щьватеда әм Хәбәра Хwәде леколин дькьн, у бь һʹьзкьрьн али һәвдö дькьн. У әв йәк жи али мә дькә кö чʹәʹве хwә сәр хәлате хwәй кьн. Ле щара дькарә öса бьqәwьмә, кö һәвнәфәʹмкьрьн пешда бе, у сәва ве йәке дькарә ортʹа хушк-бьрада чәтьнайи пешда бен. Һәрге әм wан чәтьнайа зу сафи нәкьн, әв дькарә һерскʹәтьне у бинтәнгийе бал мә пешда бинә. (Бьхунә 1 Пәтрус 3:8, 9.)

8, 9. а) Кʹижан һʹöнöр wе али мә бькьн хәлате qазанч кьн? б) Чь wе али мә бькә әʹдьлайе хwәй кьн чахе жь хушк-бьра кәсәк мә дьдә хәйдандьне?

⁸ Чаwа әм дькарьн һерса хwә бьтәмьриньн сәва хәлата хwә öнда нәкьн? Паwлос Колоси ширәт кьрьн: «Чаwа щьмәʹта Хwәдейә бьжартийә пироз у һʹьзкьри, дьлшәwатийе, qәнщийе, мьлуктийе, бәрбьһерийе у сәбьре ль хwә wәргьрьн. Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаwа Хöдан бахшандә wә, һун жи öса бьбахшиньнә һәв. У сәр ван һʹәмуйада һʹьзкьрьне ль хwә кьн, йа кö ван һʹәмуйа бь йәктийа тʹам һәвва гьредьдә» (Колс. 3:12-14).

⁹ Һʹьзкьрьн у qәнщи дькарә али мә бькә кö бьбахшиньнә һәв. Мәсәлә, һәрге хушк йан бьрак пе гьли йан кьред хwә дьле мә ешандийә, һьнге әм дькарьн бьфькьрьн кö мә жи гәләк щар пе гьли у кьред хwә мәрьв данә хәйдандьне у wана бахшандийә мә. Әм чьqас рʹази нә бона һʹьзкьрьн у qәнщийа wан, кö wана чʹәʹвед хwә даданә сәр шашийед мә! (Бьхунә Wаиз 7:21, 22.) Илаһи әм чьqас рʹази нә бона qәнщийа Иса, кö әw мә дькә йәктийе (Колс. 3:15). Әм гьшк Хwәдеки һʹьз дькьн, мьзгиники бәла дькьн, у гәләк чәтьнайед мә мина һәв ьн. Чахе әм пе һʹьзкьрьне бь дьл у щан дьбахшиньнә һәв, нав щьватеда тʹьфаqи дьминә у әм чʹәʹве хwә сәр хәлате һьлнадьн.

10, 11. а) Чьрʹа һʹәвсуди хәйсәтәкә хоф ә? б) Чаwа хwә жь һʹәвсудийе хwәй кьн сәва кö хәлата хwә öнда нәкьн?

¹⁰ Һʹәвсуди дькарә рʹе мә бьгьрә кö хәлате бьстиньн. Сәрһатийед Кʹьтеба Пироз нишан дькьн кö әв хәйсәтәкә хоф ә. Мәсәлә, Qайин жь һʹәвсудийе бьре хwә Һабил кöшт. Qорах, Датʹан, у Абирам һʹәвсуди Муса кьрьн у мьqабьли wи рʹабун. Шаwул Пʹадша жи һʹәвсуди Даwьд дькьр, чьмки әв пешда дьчу, у дьхwәст wи бькöжә. Хәбәра Хwәдеда бадиһәwа нәһатийә готьне: «Кʹидәре һʹәвсуди у чʹәʹвнәбари һәнә, ль wьр бетʹәрбәти у һәр кьрьнед хьраб жи һәнә» (Аqуб 3:16).

¹¹ Һәрге әм бь рʹастийе бь һʹьзкьрьн ьн у qәнщ ьн, wе мәрʹа һеса бә хwә жь һʹәвсудийе хwәй кьн. Хәбәра Хwәде дьбежә: «Һʹьзкьрьн думькдьреж у ширьн ә, һʹьзкьрьн һʹәвсудийе накә» (1 Корн. 13:4). Сәва кö һʹәвсуди дьле мәда шин нәбә, әм гәрәке сәр тьшта пе чʹәʹве Хwәде бьньһерʹьн, у хушк-бьра һʹәсаб кьн ча әндәмед бәдәнәке, демәк щьвате. Кʹьтеба Пироз дьбежә: «Гава әндәмәк те пәсьндайине, һʹәму әндәм тʹәви wе ша дьбьн» (1 Корн. 12:16-18, 26). Бәле, чахе хушк-бьра пешда дьчьн у кʹәрәма дьстиньн, әме нә кö һʹәвсудийе wана бькьн, ле тʹәви wан ша бьн. Дина хwә бьдьнә мәсәла кöрʹе Шаwул Пʹадша, Йонатʹан. Чахе Даwьд дәwса wи һатә кʹьфшкьрьне ча пʹадша, Йонатʹан һʹәвсуди wи нәкьр, ле дәwсе пьштгьрийа wи кьр у дьл да wи (1 Сам. 23:16-18). Ле гәло әм жи чʹәʹв дьдьнә Йонатʹан?

МАЛБӘТА ХWӘВА ХӘЛАТЕ QАЗАНЧ КЬН

12. Кʹижан ширәтед жь Кʹьтеба Пироз али мә бькьн кö малбәта хwәва хәлате бьстиньн?

¹² Һәрге малбәтеда әм принсипед Кʹьтеба Пироз биньн сери, малбәта мә wе әʹдьлайеда бә у бәхтәwар бә, у али мә бькә кö хәлате qазанч кьн. Паwлос бона малбәта ширәт да. Әwи гот: «Кʹöлфәтно, гöрʹа меред хwәда бьн, чаwа кö ль йәктийа Хöдан дькʹәвә. Мерно, кʹöлфәтед хwә һʹьз бькьн, дьле wан нәешиньн. Зарʹно, һәр тьштида гöрʹа де у баве хwәда бьн, чьмки әw йәк ль Хöдан хwәш те. Бавно, һерса зарʹед хwә рʹанәкьн, wәки әw бәр хwә нәкʹәвьн» (Колс. 3:18-21). Бешьк, һәрге иро жи малбәтеда әwан ширәта биньн сери, малбәт wе кʹаре бьстинә.

13. Ча хушк кö Мәсиһи йә дькарә дьле мере хwәйи нәбаwәр бькʹьрʹә?

¹³ Дьбәкә тö хушк и у мере тә нәбаwәр ә. Тöйе чь бьки һәрге мере тә һьндава тә нәбаш ә? Гәло тöйе һерс кʹәви у тʹәви wи бькʹәви дәʹwе, сәва әв чәтьнайи сафи бә? Һәрге тö зоре wи бьки кö öса бькә ча тö дьхwази, гәло тöйе öса бькарьби дьле wи бькʹьрʹи кö бе бал Йаһоwа? Ле һәрге тö qәдьре wи бьгьри ча малхе мале, wе малбәтеда әʹдьлайи һәбә, тöйе наве Йаһоwа һöрмәт ки, у дьбәкә мере тә бе сәр рʹийа рʹаст. Öса һун һәрдö жи дькарьн хәлате бьстиньн. (Бьхунә 1 Пәтрус 3:1, 2.)

14. Мере кö Мәсиһи йә ча дькарә дьле жьна хwә бькʹьрʹә, һәрге әw qәдьре wи нагьрә?

¹⁴ Дьбәкә тö бьра йи у жьна тә нәбаwәр ә, тöйе чь бьки һәрге жьна тә qәдьре тә нагьрә? Гәло әw wе һе qәдьре тә бьгьрә һәрге тö сәр wе бьки qарʹини у бьди кʹьфше малда кʹе йә сәрwер? На. Хwәде дьхwазә wәки тö чʹәʹв бьди Иса кö бь һʹьзкьрьн малхетийе бьки (Әфәс. 5:23). Иса бь һʹьзкьрьне у сәбьре сәрwертийе щьвате дькә (Луqа 9:46-48). Һәрге мер чʹәʹв бьдә Иса ве йәкеда, әw дькарә дьле жьна хwә бькʹьрʹә сәва әw бе сәр рʹийа Хwәде.

15. Малхе мале кö Мәсиһи йә ча дьдә кʹьфше кö жьна хwә һʹьз дькә?

¹⁵ Хwәде мерарʹа дьбежә: «Мерно, кʹöлфәтед хwә һʹьз бькьн, дьле wан нәешиньн» (Колс. 3:19). Мере кö бь һʹьзкьрьн ә qәдьре жьна хwә дьгьрә, у чахе әw фькьред хwә дьбежә гöһ дьдә wе. Öса әw жерʹа дьдә кʹьфше кö гьлийед wе бона wи фәрз ьн (1 Пәт. 3:7). Рʹаст ә һәр гав мер нькарә öса бькә чь кö жьна wи дьхwазә, ле чахе әw тʹәви wе шеwьр кә, һьнге wе сафикьрьна баш бькә (Мәтʹлк. 15:22). Мере кö жьна хwә һʹьз дькә wе нә кö жь wе дәʹwа бькә кö qәдьре wи бьгьрә, ле öса бькә кö qәдьргьртьна wе qазанч кә. Мер һәрге жьн-зарʹед хwә һʹьз бькә, малбәта wи wе бәхтәwар бә, чьмки әwана wе бь шабуне Йаһоwарʹа хьзмәт кьн у хәлата жийина һʹәта-һʹәтайе qазанч кьн.

ЩАҺЬЛНО, БЬРА ТʹÖ ТЬШТ РʹЕ WӘ НӘГЬРӘ КÖ ХӘЛАТЕ БЬСТИНЬН

16, 17. Щаһьлно, һун ча дькарьн бина хwә тәнг нәкьн?

¹⁶ Һәрге тö щаһьл и, дьбәкә дьфькьри кö де-баве тә, тә фәʹм накьн йан жи тʹәви тә гәләк сәрт ьн. Әв йәк дькарә тә öса дьлтәнг кә, wәки һәла һе жи дöдьли би кö хьзмәти Йаһоwарʹа рʹийа лапә баш ә. Ле һәрге тö Йаһоwа бьһели, ахьрийеда тöйе пʹошман би, чьмки тöйе фәʹм ки кö тʹö кәс öса qайим тә һʹьз накә у бона тә хәм накә, чаwа де-баве тә у щьвата тә.

¹⁷ Һәрге де-баве тә qә тә ширәт нәкьн, тöйе бьфькьри кö әwана тә һʹьз дькьн у хәм дькьн бона тә? (Ибрн. 12:8). Дьqәwьмә тә хwәш найе кö әwана ча тә ширәт дькьн, у ләма тö бина хwә тәнг дьки. Ле wе баш бә һәрге тö дина хwә бьди сәр мәʹнийа ширәткьрьна wан, нә кö сәр щурʹе ширәткьрьне. Дьле хwә фьрә кә у чьqас дькари һерс нәкʹәвә гава әwана тә ширәт дькьн. Хәбәра Хwәде дьбежә: «Йе зьмане хwә дькарә занә йә у йе бәрбьһер билан ә» (Мәтʹлк. 17:27). Нете дайнә пешийа хwә кö гьһишти би сәва ширәта һеса qәбул ки, кʹаре жь wан бьстини у бәрхwә нәкʹәви кö чаwа ширәт тенә дайине (Мәтʹлк. 1:8). Әw кʹәрәм ә кö де-баве тә Йаһоwа һʹьз дькьн у дьхwазьн али тә бькьн хәлата жийине qазанч ки.

18. Чьрʹа һун дьхwазьн чʹәʹве wә сәр хәлате бә?

¹⁸ Фьрqи тʹöнә әм һивийа жийина һʹәта-һʹәтайе сәр әʹрде нә йан сәр әʹзмана, әв хәлата мәзьн пешийа мә йә. Әв хәлат хwәха Әʹфьрандаре мә мәрʹа соз дайә. Хwәде дәрһәqа Щьнәта сәр әʹрде дьбежә: «Wе дьнйа . . . бь занина Хöданва тʹьжи бьбә» (Иша. 11:9). Һәр кәс кö wе сәр әʹрде бьжи wе алийе Хwәдеда бе һинкьрьне. Һежа йә кö әм әве хәлате qазанч кьн. Бьра чʹәʹве wә сәр созед Йаһоwа бә, у бьра тʹö тьшт рʹе wә нәгьрә кö әве хәлате бьстиньн!