Де-Бавно Али Зарʹед Хwә Бькьн кö «Сәрwахт» бьн бона «Хьлазбуне»

1, 2. Чьрʹа һьнә де-бав бәрхwә дькʹәвьн, чахе зарʹед wан дьхwазьн бенә ньхöмандьне?

ҺӘР сал бь һʹәзара мәрьв хwә тʹәсмили Йаһоwа дькьн у тенә ньхöмандьне. Гәләк жь wан щаһьл ьн, кʹижан кö нава рʹастийеда мәзьн бунә у рʹийа лапә баш бьжартьнә (Зәб. 1:1-3). Һәрге һун Мәсиһи нә у зарʹед wә һәнә, бешьк һун бь дьл у щан һивийа ве рʹоже нә, чахе qиз йан кöрʹе wә бе ньхöмандьне (Бәрамбәр кьн 3 Йуһʹәнна 4).

² Ле дьбәкә һун бәрхwә дькʹәвьн, чьмки дьqәwьмә һун һьнә щаһьла дьвиньн, йед кö һатьнә ньхöмандьне, ле паше дöдьли дьбьн кö принсипед Хwәде бона кʹара wан ьн. Гәләк жь wан щаһьла һәла һе жи жь рʹийа рʹаст дәрдькʹәвьн. Ләма жи дьбәкә һун бәрхwә дькʹәвьн кö чахе зарʹа wә дәстпекә Йаһоwарʹа хьзмәт кә, паше бе гöһастьне у һʹьзкьрьна хwәйә пешийе öнда кә. Зарʹ дькарә бьбә мина Мәсиһийед qьрʹна йәке жь щьвата Әфәси. Иса дәрһәqа wан гот: «Тö мина бәре мьн һʹьз наки» (Әʹйан. 2:4). Де-бавно ча һун дькарьн али зарʹед хwә бькьн, wәки һʹьзкьрьна хwә öнда нәкьн у «хьлазбунерʹа мәзьн бьн»? (1 Пәт. 2:2). Wәрә шеwьр кьн сәрһатийа Тимотʹейо у пебьһʹәсьн кö әм чь дькарьн жь wи һин бьн.

«НЬВИСАРЕД ПИРОЗ ЗАНИ»

3. а) Чаwа Тимотʹейо бу Мәсиһи, у ча әwи һинкьрьнед Мәсиһи qәбул кьр? б) Паwлос дәрһәqа кʹижан се тьшта Тимотʹейорʹа гот?

³ Паwлосе шанди сала 47 Д.М., щара пешийе тʹәсәлийа Листрайе кьр, у дьбәкә һьнге Тимотʹейо дәрһәqа һинкьрьнед Иса пеһʹәсийа у бу Мәсиһи. Wи чахи Тимотʹейо щаһьл бу, у әw чь жи педьһʹәсийа әʹмьре хwәда дьани сери. Чахе әw бу Мәсиһи, паши 2 сала әw бу һәвалрʹеwийе Паwлос. Wәкә 16 сал дәрбаз бун, у Паwлос Тимотʹейорʹа ньвиси: «Нава wан тьштада бьминә, чь кö һин буйи у чьда избат буйи. Тö зани жь кʹижана һин буйи, öса жи тö жь зарʹотийа хwәда ньвисаред пироз [Ньвисаред Ибрани] зани, йед кö дькарьн тә сәрwахт кьн, wәки бь баwәрийа сәр Мәсиһ Иса хьлаз би» (2 Тимтʹ. 3:14, 15, ДТʹ). Дина хwә бьдьне, Паwлос гот wәки Тимотʹейо 1) ньвисаред пироз заньбу, 2) чь кö һин буйә, wан тьштада избат буйә, у 3) дькарә сәрwахт бә wәки бь баwәрийа сәр Мәсиһ Иса хьлаз бә.

4. Кʹижан һащәта һун дьдьнә хәбате сәва зарʹед хwәйи бьчʹук һин кьн? (Бьньһерʹә шькле әʹwльн.)

⁴ Һун чаwа де-баве Мәсиһи, дьхwазьн кö зарʹа wә ньвисаред пироз бьзаньбә, у иро әw Ньвисаред Ибрани у Ньвисаред Йунани нә. Һәла һе зарʹа бьчʹук жи дькарә һин бә дәрһәqа мәрьв у qәwьмандьнед жь Кʹьтеба Пироз. Тʹәшкиләта Йаһоwада һәнә гәләк кʹьтеб, видео у диса һащәтед дьн, кö дькарьн али де-бава бькьн зарʹед хwә һин кьн. Ле сәр зьмане wә чь һащәт һәнә? Бир нәкьн кö зарʹа wә гәрәке бьзаньбә Кʹьтеба Пирозда чь те готьне, сәва кö һәләqәтийа хwә тʹәви Йаһоwа qәwи кә.

ТÖ БАWӘРИЙЕДА «ИЗБАТ БУЙИ»

5. а) Чь те һʹәсабе хәбәра «избат»? б) Әм жь кʹö заньн кö Тимотʹейо избат бу wәки Мәсиһ әw һәйә Иса?

⁵ Гәләк фәрз ә кö зарʹ бьзаньбьн Кʹьтеба Пирозда чь ньвисар ә. Ле бәс нинә тʹәне сәрһати у qәwьмандьнед Кʹьтеба Пироз зарʹа һин кьн. Биньн бира хwә кö Тимотʹейо öса жи «избат» бу, демәк баwәрийа хwә wан тьшта ани чь кö һин бу. Зьмане орижиналеда хәбәра «избат», те һʹәсабе «нәдöдьли», йан жи баwәрбун кö фьлан тьшт рʹаст ә. Тимотʹейо жь бьчʹуктайе Ньвисаред Ибрани заньбу. Ле паше әwи сәр һʹиме избаткьрьна, баwәр кьр, wәки Иса Мәсиһ бу. Занәбуна wи, баwәрийа wи qәwи кьр. Баwәрийа wи öса qәwи бу кö әw һатә ньхöмандьне у тʹәви Паwлос чаwа мисйонер дәстпекьр хьзмәт кә.

6. Чаwа һун дькарьн али зарʹед хwә бькьн, wәки баwәрийа хwә Хәбәра Хwәде биньн?

⁶ Де-бавно, һун чаwа дькарьн али зарʹед хwә бькьн, wәки мина Тимотʹейо «избат» бьн wан тьштада чь кö һин дьбьн? Йа пешьн бь сәбьр бьн, чьмки баwәри рʹожәкеда найе. Öса жи һәрге баwәрийа wә qәwи йә, әв найе һʹәсабе кö баwәрийа wә wе дәрбази зарʹед wә бә. Һәр зарʹ гәрәке хwәха һʹьш-аqьле хwә бьдә хәбате, сәва баwәрийа хwә рʹастийа Кʹьтеба Пироз бинә. (Бьхунә Рʹомайи 12:1.) Ве йәкеда һун чаwа де-бав роләкә фәрз дьлизьн, илаһи чахе зарʹ пьрса дьдә wә. Wәрә дәрһәqа ве йәке мәсәләке шеwьр кьн.

7, 8. а) Чаwа Мәсиһик кö бав ә сәбьре дьдә кʹьфше чахе qиза хwә һин дькә? б) Кʹәнге wәрʹа лазьм ә сәбьр һьндава зарʹа хwә?

⁷ Бьраки мә бь наве Томас qиза кʹижани 11 сали йә, гьли дькә: «Qиза мьн щара жь мьн дьпьрсә: ‹Дьqәwьмә кö Йаһоwа бь сайа еволусйайе әʹмьр сәр әʹрде чекьрийә?› йан жи, ‹Чьрʹа әм накʹәвьнә нав шьхöлед дәwләте сәва әʹмьре хwә һе баш кьн, мәсәлә дәнге хwә надьн бона бьжартьна сәрwера?›». Томас гот кö әw щара хwә дьгьрә, сәва жь хәбәрдана wи нәйе кʹьфше кö әw qиза хwәрʹа дьбежә әw чь гәрәке баwәр кә у чь на. Әw занә, кö баwәри һьндава рʹастийа Кʹьтеба Пироз нә кö тʹәне жь избаткьрьнәкә мәзьн те, ле жь гәләк избаткьрьнед һур.

⁸ Томас öса жи занә wәки сәва qиза хwә һин кә жерʹа сәбьр лазьм ә. Бь рʹастийе һʹәму Мәсиһи гәрәке бь сәбьр бьн (Колс. 3:12). Томас фәʹм дькә, кö лазьм ә wәʹдә у гәләк шеwьркьрьн, сәва али qиза хwә бькә wәки әw баwәрийа хwә Кʹьтеба Пироз бинә. Томас гәрәке избаткьрьна бь Кʹьтеба Пироз жерʹа шьровәкә. Әw дьбежә: «Чахе әм пьрсед фәрз тʹәви qиза хwә шеwьр дькьн, әз жьна хwәва дьхwазьн пебьһʹәсьн һәла qиза мә бь рʹастийе баwәр дькә ве йәке чь кö әм ле һин дькьн, у гәло әw бона wе фәʹмдари йә йан на. Һәрге әw пьрса дьдә, әw йәк гәләк баш ә. Рʹаст бежьм, әзе һе бәрхwә кʹәтама һәрге әwе qә пьрс нәдана у перʹа-перʹа тьшт баwәр кьра».

9. Ча һун дькарьн али зарʹа хwә бькьн кö баwәрийа хwә Хәбәра Хwәде бинә?

⁹ Һәрге де-бав бь сәбьр зарʹед хwә һин кьн, wәʹдә дәрбаз бә зарʹ wе бькарьбьн фәʹм бькьн «бәрайи, дьрежайи, бьльндайи у кʹурайийа» баwәрийе (Әфәс. 3:18). Әм гәрәке һьлдьнә һʹәсаб кö әwана чәнд сали нә у чьqас фәʹм дькьн. Һәрге баwәрийа зарʹа qәwи бә wан тьштада чь кö әwана һин дьбьн, wанрʹа wе һеса бә мәрьвед дьнрʹа, мәсәлә һәвалдәрсханед хwәрʹа, баwәрийа хwә шьровәкьн (1 Пәт. 3:15). Бәʹса хәбәре, бьфькьрьн, гәло зарʹед wә дькарьн бь сайа Кʹьтеба Пироз шьровәкьн кö чь дьqәwьмә паши мьрьне? Гәло шьровәкьрьна Кʹьтеба Пироз дәрһәqа ве пьрсе бона wан логики у фәʹмдари йә?a. Бәле, сәва кö зарʹа wә баwәрийа хwә Хәбәра Хwәде бинә, лазьм ә һун сәбьр кьн. Бь рʹастийе һежа йә кö һун сәбьр кьн, чьмки öса һун дькарьн бәред баш бьстиньн (Qан. Дщр. 6:6, 7).

10. Һинкьрьна зарʹада чь гәләк фәрз ә?

¹⁰ Сәва баwәрийа зарʹед wә qәwи бә, öса жи гәләк фәрз ә кö һун wанрʹа бьбьнә мәсәла баш. Хушкәкә мә бь наве Стефани кö се qизед wе һәнә, гьли дькә: «Жь бьчʹуктайа зарʹед хwәда, әз пьрсед öса дьдьмә хwә: ‹Әз зарʹед хwәрʹа шьровәдькьм кö чьрʹа әз дöдьли ниньм wәки Йаһоwа һәйә, әw мә һʹьз дькә у рʹийед wи рʹаст ьн? Гәло зарʹед мьн дьвиньн кö әз бь рʹастийе Йаһоwа һʹьз дькьм?› Әз нькарьм һивийе бьм кö зарʹед мьн баwәрийеда qәwи бьн, һʹәта кö әз хwәха qәwи нибьм».

«СӘРWАХТ» БЬН БОНА ХЬЛАЗБУНЕ

11, 12. Сәрwахти чь йә, у чьрʹа әм дькарьн бежьн кö сәрwахти салийед әʹмьрва гьредайи нинә?

¹¹ Чаwа мә дит, Тимотʹейо 1) Ньвисаред Пироз заньбу, у 2) баwәрийеда qәwи бу. Ле гәло гьлийед Паwлос чь тенә һʹәсабе чахе әwи Тимотʹейорʹа гот, кö ньвисаред пироз дькарьн wи «сәрwахт» кьн wәки «хьлаз» бә?

¹² Кʹьтеба «Фәʹмкьрьна Ньвисарада» Пʹара 2-да, һатә готьне кö Кʹьтеба Пирозда сәрwахти, әw һәйә «фәрәсәт, кʹижан кö дькарә али мәрьв бькә, кö занәбун у фәʹмкʹарийе бьдә хәбате сәва чәтьнайа сафи кә, нәкʹәвә qәзийе, бьгьһижә нета, у öса жи ве йәкеда аликʹари бьдә мәрьвед дьн. Сәрwахти мьqабьли бефәʹмийе йә». Кʹьтеба Пироз дьбежә кö «ахмахти дьле зарʹева гьредайи йә» (Мәтʹлк. 22:15). Бь ве йәке те кʹьфше wәки чахе мәрьв сәрwахт ә, әw йәк дьдә кʹьфше кö әw гьһишти йә. Рʹöһʹанида гьһиштибун салед әʹмьрва гьредайи нинә. Мәрьве гьһишти әw ә, дьле кʹеда хофа Хwәде һәйә, у дьхwазә бь дьл у щан гöрʹа тʹәмийед wи бькә. (Бьхунә Зәбур 111:10.)

13. Щаһьл ча дькарә нишан кә кö әw сәрwахт ә бона хьлазбуне?

¹³ Щаһьлед кö рʹöһʹанида гьһишти нә, пе хwәстьнед хwә йан жи пе фькьред щаһьлед дьн «жь пʹела вьрда-wеда» накʹәвьн (Әфәс. 4:14). Дәwсе әwана пешда дьчьн у һʹьш-аqьле хwә һин дькьн, wәки «qәнщи у хьрабийе» жь һәв дәрхьн (Ибрн. 5:14). Чахе әwана сафикьрьнед аqьлайи дькьн һьнге жи чахе кʹеләка wан кәсәк тʹöнә, әw жи дьдә кʹьфше кö әwана гьһишти дьбьн (Фили. 2:12). Әw щурʹе сәрwахтийе бона хьлазбуне гәләк фәрз ә. (Бьхунә Мәтʹәлок 24:14.) Де-бавно һун ча дькарьн али зарʹед хwә бькьн кö сәрwахтийа wи щурʹәйи qазанч кьн? Йа пешийе, зарʹед хwәрʹа нишан кьн кö һун чьрʹа Кʹьтеба Пироз qимәт дькьн. Пе гьли у кьред хwә нишан кьн, wәки һун ль гора принсипед Хәбәра Хwәде дьжин (Рʹом. 2:21-23).

14, 15. а) Щаһьл кö дьхwазә бе ньхöмандьне гәрәке дәрһәqа чь бьфькьрә? б) Де-бавно һун ча дькарьн али зарʹед хwә бькьн, wәки әwана бьфькьрьн кö wе чь кʹәрәма бьстиньн чахе гöрʹа Хwәде бькьн?

¹⁴ Бәс нинә һун зарʹед хwәрʹа тʹәне бежьн чь рʹаст ә у чь хьраб ә. Һун öса жи гәрәке али wан бькьн, wәки әwана сәр пьрсед wи щурʹәйи бьфькьрьн: «Гәло чьрʹа Кʹьтеба Пироз qәдәхә дькә wан тьшта, чь кö мәрьва хwәш те? Чь мьн дьдә баwәркьрьне кö принсипед Кʹьтеба Пироз бона мьн тʹьме керһати нә?» (Иша. 48:17, 18).

¹⁵ Һәрге зарʹа wә дьхwазә бе ньхöмандьне, һун гәрәке али wи бькьн, wәки әw фәʹм кә кö әв гавәкә гәләк фәрз ә. Жерʹа шьровәкьн кö паши ньхöмандьне wе чь борщдарийед wи һәбьн. Әw wе чь кʹаре бьстинә һәрге бе ньхöмандьне? Әw дькарә рʹасти чь чәтьнайа бе? Чьрʹа әw кʹар жь чәтьнайа зедәтьр ьн? (Марq. 10:29, 30). Гәләк фәрз ә кö пешийа ньхöмандьне әw сәр wан пьрса бьфькьрә. Де-бав гәрәке али зарʹа бькьн, wәки әwана бьфькьрьн, wе чь кʹәрәма бьстиньн һәрге гöрʹа Хwәде дькьн у һәрге гöрʹа wи нәкьн әw wе чь ахьрийе бинә. Öса әwана wе qәwи баwәр кьн, кö принсипед Кʹьтеба Пироз тʹьме бона кʹара wан ьн (Qан. Дщр. 30:19, 20).

ЧАХЕ ЩАҺЬЛЕ НЬХÖМАНДИ БАWӘРИЙЕДА СЬСТ ДЬБӘ

16. Де-бав гәрәке чь бькә, һәрге зарʹа ньхöманди баwәрийеда дöдьли дьбә?

¹⁶ Һун чь дькарьн бькьн, һәрге зарʹа wә паши ньхöмандьне баwәрийеда дöдьли дьбә? Мәсәлә, щаһьле ньхöманди дькарә пәй тьштед ве дьнйайе кʹәвә, йан жи дьбәкә дöдьли бә кö аqьлайи йә пе принсипед Кʹьтеба Пироз бьжи (Зәб. 73:1-3, 12, 13). Ве дәме һун ча хwә бьдьнә кʹьфше, дькарә һʹöкöм бә сәр ве йәке кö зарʹ wе баwәрийеда qәwи бә йан жи баwәрийе бьһелә. Тʹö щар бона ве йәке тʹәви зарʹе шәрʹ-дәʹwа нәкьн, фьрqи тʹöнә әw бьчʹук ә йан мәзьн ә. Нета wә гәрәке әw бә, кö зарʹа wә бьвинә wәки һун wи һʹьз дькьн у дьхwазьн али wи бькьн.

17, 18. Һәрге зарʹ баwәрийеда дöдьли йә, де-бав ча дькарьн аликʹарийе бьдьнә wи?

¹⁷ Щаһьле ньхöманди кʹижан кö хwә тʹәсмили Йаһоwа кьрийә, әwи соз дайә кö wе wи һʹьз бькә у qьрарʹа wи сәр һәр тьштирʹа бьгьрә. (Бьхунә Марqос 12:30.) Йаһоwа сәр әwи сози сьвьк наньһерʹә, у йе кö соз дьдә, әw жи гәрәке сьвьк нәньһерʹә сәр wи сози (Wаиз 5:4, 5). Чахе мәщал вәдьбә, бь нәрми әве йәке биньн бира зарʹа хwә. Ле пешийа ве йәке, wе баш бә һун бьдьнә хәбате wан һащәта, кʹижан кö тʹәшкиләта Хwәде дьдә бона де-бава. Öса һуне зарʹа хwә бьдьнә фәʹмкьрьне, кö рʹаст ә тʹәсмилбуйин борщдарийа мәзьн ә, ле йәкә гәләк кʹәрәма жи тинә.

¹⁸ Мәсәлә, һун дькарьн ширәтед баш бьвиньн кʹьтеба «Пьрсед Щаһьла у Ширәтед Керһати», Пʹара 1-да. Бьхуньн әʹламәтийа зедә бь наве «Пьрсед Де-Бава». Ль wедәре те готьне: «Ләз нәкʹәвьн кö бьфькьрьн wәки зарʹа wә баwәрийа wә qәбул накә, чьмки дьqәwьмә чәтьнайи тьштәки дьнда нә». Мәсәлә, мәʹни дькарә әв бә кö һәвал сәр wан һʹöкöм дькьн. Мәʹнийед дьн жи дькарьн әw бьн, һәрге әwана хwә тʹәне тʹәхмин дькьн йан жи чахе дьфькьрьн кö щаһьлед дьн щьватеда алийе рʹöһʹанида жь wана баштьр пешда дьчьн. Ве әʹламәтийа зедәда öса жи те готьне: «Әв мәʹни баwәрийева гьредайи ниньн. Ле дькарьн бежьн wәки әв мәʹни дәрәщава гьредайи нә, кʹижан кö рʹийа зарʹа дьгьрьн кö ль гора рʹастийе бьжин». Ве әʹламәтийа зедәда öса жи һәнә чәнд ширәт кö дькарьн али wан де-бава бькьн, зарʹед кʹижана баwәрийеда дöдьли дьбьн.

19. Де-бав ча дькарьн али зарʹед хwә бькьн кö «сәрwахт» бьн бона «хьлазбуне»?

¹⁹ Ча де у бав, борщдарийа wәйә мәзьн һәйә у qәдьрәки мәзьн, кö зарʹед хwә «бь ширәт у һинкьрьна Хöдан мәзьн кьн» (Әфәс. 6:4). Чаwа мә жь ве готаре дит, де-бав гәрәке нә кö тʹәне зарʹед хwә һин кьн кö Кʹьтеба Пирозда чь те готьне, ле öса жи али wан бькьн, кö баwәрийа хwә wан тьшта биньн, чь кö әwана һин дьбьн. Бәле, wанрʹа баwәрийа qәwи лазьм ә, кʹижан кö wе wана һелан кә әʹмьре хwә тʹәсмили Йаһоwа кьн, у бь дьл у щан жерʹа хьзмәт кьн. Бьра Хәбәра Йаһоwа, рʹöһʹе wийи пироз, у щәфе wә де-бавно, али зарʹед wә бькьн кö «сәрwахт» бьн бона «хьлазбуне».