Пешготьна Ахьрийе

Тö qә фькьрийи һәла ахьрийа тә у малбәта тә, wе чь щурʹәйи бә? Дьqәwьмә тö дәwләти би, йан бәләнгаз би, йан wе тә гәләк һʹьз бькьн, йан жи тöйе тʹәне бьмини? Гәло жийина тә wе дьреж бькʹьшинә, йан жь бо qәзийе тöйе жийина хwә зу öнда ки? Нава һʹәзара салада мәрьв дәрһәqа пьрсед ви щурʹәйи дьфькьрин.

Иро тʹәмамийа дьнйайеда зандар гәләк леколина дькьн у тьшта саз дькьн, сәва кö пебьһʹәсьн һәла ль ахьрийе wе чь бьqәwьмә. Гәләк пешдаготьнед wан һатьнә сери, ле гәләк жи на. Мәсәлә, Гулйелмо Марконе сазкʹаре радиойе, дь сала 1912-да öса гот: «Чахе зәманәки öса бе, гава енержийа бе тʹел пешда бе, һьнге wе шәрʹ ида тʹöнә бьн». У дь сала 1962-да, мәзьне Компанийа дәнгньвисандьне бь наве «Dеcca Rеcord», нәхwәст тʹәви кʹома стьранбежа йа «Биталс» шьхöлкʹарийе бькә, чьмки баwәр дькьр wәки wе бе wәʹдә, кö кʹомед сазбәнда йе гитаре, навдарийа хwә öнда кьн.

Гәләк мәрьв щурʹә-щурʹә метода дьдьнә хәбате, кö дәрһәqа ахьрийе пебьһʹәсьн. Һьнәк рʹебәрийе дьгәрʹьн щәм стернаса; һороскоп жи бунә тʹемәкә сәрәкә дь журналада у рʹожнәмада. Һьнәк жи аликʹарийе жь кʹочʹәка дьгәрʹьн, кʹижан кö дьбежьн wәки дькарьн ахьрийа мәрийа «бьхуньн» бь сайа һьнә карта, рʹәqама, йан сәр дәста дьньһерʹьн.

Мәсәлә wәʹде бәре гәләк мәрьва аликʹари жь оракула дьхwәстьн. Демәк әwана мина кʹәшиша бун, кʹижана кö йан чь ахьрийа мәрьва әʹйан дькьрьн. Бәʹса хәбәре, Кроузес Пʹадше Лидйайе, пʹешкʹешед гәләк qимәт Делфи оракулрʹа шандьбу, сәва кö пебьһʹәсә һәла әwе бькарьбә сәркʹәвә дь шәрʹе тʹәви Корәш, Пʹадше Фарьсе. Һьнге оракул готе, wәки Кроузес wе кʹöта кә «импәраторийа мәзьн», һәрге пешбәри Корәш пʹадша дәркʹәвә. Кроузес пʹадша öса ве йәкеда баwәр бу, wәки чу шәрʹ сәр Корәш. Ле бь рʹасти öса qәwьми, wәки дәwса кö императорийа Фарьса кʹöта бә, императорийа Кроузес пʹадша һатә кʹöтакьрьне!

Пешдаготьна оракул, кʹижан кö нәконкрет бу, дькарә рʹаст бе һʹәсабе, чьмки чь жи һәбу жь wан дö императорийед мәзьн, йәк wе әʹсәйи кʹöта буйа. Крозес һʹәму тьшт öнда кьр, чьмки гöһ да оракул. Ле гәло рʹожа иройин чахе мәрьв дина хwә дьдьнә щурʹә-щурʹә метода кö ахьрийе пебьһʹәсьн, һьнге хwәстьна wан те сери?