Ширәткьрьн Һʹьзкьрьна Хwәде Әʹйан Дькә

1. Кʹьтеба Пирозда ширәткьрьн ча те шьровәкьрьне?

ЧАХЕ һун дьбьһен хәбәра «ширәткьрьн», һун чь дьдьнә бәр чʹәʹве хwә? Кʹьтеба Пироз дьбежә, wәки ширәткьрьн тʹьме бона кʹара мә йә, у гәләк щар Кʹьтеба Пирозда тʹәви хәбәра ширәткьрьн ньвисар ә хәбәред занәбун, билани, һʹьзкьрьн у әʹмьр (Мәтʹлк. 1:2-7; 4:11-13). Гәло чьрʹа? Чьмки ширәткьрьна Хwәде әʹйан дькә һʹьзкьрьна wи һьндава мә у хwәстьна wи, кö әм һʹәта-һʹәтайе бьжин (Ибрн. 12:6). Рʹаст ә щара щәза жи дькʹәвә нава ширәткьрьна wи, ле йәкә әw тʹö щар сәрт у берʹәʹм щәза накә. Бь рʹасти хәбәра ширәткьрьн һʹәчʹи зәʹф те һʹәсабе һинкьрьн, мәсәлә чахе де йан бав зарʹа хwәйә һʹьзкьри мәзьн дькә у һин дькә.

2, 3. Чаwа һьн һинкьрьн һьн жи щәза дькʹәвә нава ширәткьрьне? (Бьньһерʹә шькле әʹwльн.)

² Дина хwә бьдьнә ве мәсәле: Гәдәки бьчʹук бь наве Щони пе тʹопе дькʹәвә мале. Дийа wи жерʹа дьбежә: «Щони, нә мьн тәрʹа гот малда пе тʹопе нәлизә! Тöйе тьштәки бьшкени». Ле зарʹ гöһ надә дийа хwә, диса дьлизә у ньшкева тʹоп кодька гöла дькʹәвә у кодьк дьшке. Һьнге де wе чаwа кöрʹе хwә ширәт кә? Әwе һьн wи һин кә у һьн жи һьнәки щәза бькә. Әwе кöрʹе хwәрʹа шьровәкә, wәки әwи тьштәки нәрʹаст кьр. Öса жи әwе жерʹа шьровәкә кö чьрʹа аqьлайи йә гöрʹа де-бава бькә у гöһ бьдә ширәта, чьмки бона кʹара wи нә. Паше, сәва әве йәке зарʹе һе рʹьнд бьдә фәʹмкьрьне, де wе сафи кә кö wи щәза кә, бәʹса хәбәре, сәр һьнә wәхт изьне нәдә Щон, wәки пе тʹопе бьлизә. Бь ве йәке Щон wе фәʹм бькә, wәки чахе әw гöрʹа де-бавда нибә, әw wе бәред хьраб бьчьнә.

³ Әм Мәсиһи, нәфәред «мала Хwәде» нә (1 Тимтʹ. 3:15). Әм заньн кö изьна Йаһоwа һәйә принсипа дайнә. Ле чахе әм принсипед wи найньн сери, әw мә бь һʹьзкьрьн ширәт дькә у рʹаст дькә. Öса жи, чахе әм жь кьред хwә ахьрийа хьраб дьстиньн, ширәткьрьна Йаһоwа дькарә бинә бира мә, wәки чьqас фәрз ә гöрʹа Баве хwәйи әʹзманада бьн (Галт. 6:7). Хwәде мә һʹьз дькә у дьхwазә әм кöл-дәрда нәкʹьшиньн (1 Пәт. 5:6, 7).

4. а) Йаһоwа кʹижан һинкьрьне кʹәрәм дькә? б) Ве готареда әме чь шеwьр кьн?

⁴ Чахе әм сәр һʹиме Кʹьтеба Пироз зарʹа хwә ширәт кьн йан жи wи мәрьви, тʹәви кʹижани әм һинбуна Кʹьтеба Пироз дәрбаз дькьн, öса әм али wан дькьн кö бьбьнә шагьртед Иса. Бәле, Хәбәра Хwәде әw һәйә һащәтәкә сәрәкә бона һинкьрьне, у әw али мә дькә, кö әм «рʹастийеда» ширәт кьн. Öса зарʹ йан жи йе кö Кʹьтеба Пироз һин дьбә, wе бькарьбә «һʹәму тʹәмийед» кö Иса дайә мә фәʹм кә у бинә сери (2 Тимтʹ. 3:16; Мәт. 28:19, 20). Йаһоwа дьхwазә wәки әм мәрьва öса һин кьн, wәки әwана жи бькарьбьн али йед дьн бькьн, сәва бьбьнә шагьртед Мәсиһ. (Бьхунә Тито 2:11-14.) Wәрә әм ньһа шеwьр кьн щаба wан се пьрсед фәрз: 1) Чаwа ширәткьрьна Йаһоwа әʹйан дькә кö әw мә һʹьз дькә? 2) Әм чь дәрсе дькарьн һин бьн жь мәрьвед бәре, йед кö алийе Йаһоwада һатьнә ширәткьрьне? 3) Чахе әм кәсәки ширәт у рʹаст дькьн, чаwа әм дькарьн чʹәʹв бьдьнә Йаһоwа у Кöрʹе wи?

ХWӘДЕ БЬ ҺʹЬЗКЬРЬНЕ ШИРӘТ ДЬКӘ

5. Чаwа ширәткьрьнеда һʹьзкьрьна Йаһоwа һьндава мә те кʹьфше?

⁵ Йаһоwа мә рʹаст дькә, һин дькә у ширәт дькә, чьмки әw мә һʹьз дькә у дьхwазә әм һʹьзкьрьна wида у сәр рʹийа жийине бьминьн (1 Йуһʹн. 4:16). Әw тʹö щар мә беһöрмәт йан жи ньмьз накә (Мәтʹлк. 12:18). Дәwсе, Йаһоwа мә qимәт дькә, у дина хwә дьдә хәйсәт-һʹöнöред мәйи баш, у азайе дьдә мә. Ле чахе әм ширәта дьстиньн жь Хәбәра wи, жь әʹдәбйәтед сәр һʹиме Кʹьтеба Пироз, жь де-бава кö Мәсиһи нә, йан жи жь рʹуспийед щьвате, гәло әм һʹәсаб дькьн, wәки әw һʹьзкьрьна Хwәде йә һьндава мә? Чахе әм гавәкә нәрʹаст давежьн у дьбәкә һаш пе жи тʹöнә нә, ле рʹуспи бь нәрми у бь дьл дьхwазьн мә рʹаст кьн, бь рʹасти әw йәк әʹйанкьрьна һʹьзкьрьна Йаһоwа йә һьндава мә (Галт. 6:1).

6. Чаwа ширәткьрьна Йаһоwада һʹьзкьрьн те кʹьфше, һәрге жи кәсәк щабдарийед хwә öнда дькә?

⁶ Щара ширәткьрьнеда тʹәне ширәт у рʹасткьрьн нинә. Һәрге кәсәк гöне гьран кьрийә, әw wе щьватеда щабдарийа öнда кә. Ле ве йәкеда жи һʹьзкьрьна Йаһоwа те кʹьфше. Бәʹса хәбәре, чахе кәсәк щабдарийед хwә öнда дькә, әw йәк дькарә али wи бькә кö бьфькьрә чьqас фәрз ә тʹьме һинбуна шәхси дәрбаз кә, сәр бьфькьрә, у дöа бькә. Wи щурʹәйи әw дькарә рʹöһʹанида пешда һәрʹә у qәwи бә (Зәб. 19:7). Wәʹдә дәрбаз дьбә, у әw мәрьв дькарә пашда щабдарийа бьстинә. Ле һәрге жи мәрьв жь щьвате те дәрхьстьне, әв йәк жи һʹьзкьрьна Йаһоwа әʹйан дькә, чьмки öса щьват жь һʹöкöме хьраб тʹәмьз дьминә (1 Корн. 5:6, 7, 11). Хwәде тʹьме бь һәqийе ширәт дькә у щәза дькә, ләма жи мәрьве кö жь щьвате һатийә дәрхьстьне, фәʹм дькә кö гöне гьран кьрийә. Әw йәк дькарә wи һелан кә, кö гöне хwә бинә рʹуйе хwә (Кʹар. Шанд. 3:19).

ӘWИ ШИРӘТКЬРЬНА ЙАҺОWА QӘБУЛ КЬР У КʹАР СТАНД

7. Шәбна кʹе бу, у әwи кʹижан һʹöнöре хьраб нав хwәда пешда ани?

⁷ Сәва кö фәʹм кьн ширәткьрьн чьqас фәрз ә, әме дәрһәqа дö мәрьва шеwьр кьн, кʹижан кö жь Йаһоwа һатьнә ширәткьрьне. Әw һәнә Шәбна, йе кö wәʹде Һьзqийа Пʹадшада дьжит у бьраки мә бь наве Граһам. Шәбна щийе бьльнд дьгьрт чьмки «ль сәр мала qьрал бу», дьqәwьмә сәр мала Һьзqийа (Иша. 22:15). Ле йазьх әw бу йәки бабах у qöрʹә у дьхwәст гьшк wи һöрмәт кьн. Әwи бона хwә һәла һе жи тʹьрба бьһа кʹола у пе әʹрәбед бьһа рʹумәта хwә дьгәрʹийа (Иша. 22:16-18).

8. Йаһоwа ча Шәбна ширәт кьр, у ча әwи ширәткьрьна Хwәде qәбул кьр?

⁸ Бәле, Шәбна рʹумәта хwә дьгәрʹийа, ләма Хwәде әw жь щийе wи авит у Елйаким да дәwса wи (Иша. 22:19-21). Әw йәк qәwьми чахе Пʹадше Асуре Санһәриб мьqабьли Оршәлиме дәркʹәт. Һьнәк wәʹдә шунда, әwи пʹадшайи мәрьвед хwә тʹәви ордийа мәзьн шанд, сәва кö Щьһуйа бьтьрсинә у Һьзqийа бьхальфинә (2 Пʹадш. 18:17-25). Елйаким һатә шандьне wәки тʹәви мәрьва хәбәр дә. Әw тʹәви дö мәрьва чу, у йәк жь wан Шәбна бу, кö ида ча аликʹарчи хьзмәт дькьр. Жь ве йәке те кʹьфше, wәки Шәбна чахе щийе хwәйи бьльнд öнда кьр, һерс нәкʹәт у нәбу йәки зöлм. Әʹйан ә кö әwи бь мьлукти щабдарийа нәбьльнд qәбул кьр. Wәки öса нә, әм чь дькарьн һин бьн жь ве сәрһатийе? Wәрә әм се дәрса шеwьр кьн.

9-11. а) Әм кʹижан дәрсәкә фәрз һин дьбьн жь сәрһатийа Шәбна? б) Чь wә хwәш те ве йәкеда кö Йаһоwа ча бу һьндава Шәбна?

⁹ Йа пешийе, Шәбна щийе хwә öнда кьр. Жь сәрһатийа wи әм һин дьбьн, wәки «бәри wеранбуне кʹöбари те» (Мәтʹлк. 16:18). Һәрге щьватеда щабдарийед тә һәнә, дьбәкә щабдарийед мәзьн жи, тöйе мьлук бьмини? Тöйе сәва һәр пʹешкʹешәке, йан жи сәва тьштед кö тә пе аликʹарийа Йаһоwа кьрийә, шькьрийе бьди Хwәде? (1 Корн. 4:7). Паwлосе шанди ньвиси: «Wә һәр кәсирʹа дьбежьм: Чьqас жь wә дькʹәвә, жь wе зедәтьр нәфькьрьн, ле сәр хwә бьн» (Рʹом. 12:3).

¹⁰ Йа дöда, Йаһоwа чахе Шәбна щәза кьр, бь ве йәке да кʹьфше кö баwәр дькә, wәки Шәбна дькарә алийе башда бе гöһастьне (Мәтʹлк. 3:11, 12). Әw мәсәләкә гәләк баш ә бона wан, йед кö щьватеда щабдари öнда кьрьнә. Әwана дәwса кö һерс кʹәвьн у бьхәйидьн, дькарьн бәрдәwам кьн бь дьл у щан Йаһоwарʹа хьзмәт бькьн. Әw мәрьв гәрәке ширәткьрьн у рʹасткьрьна Йаһоwа һʹәсаб кьн ча һʹьзкьрьна һьндава wан. Бир нәкьн кö һәрге әм мьлук бьминьн, Баве мә wе әʹсәйи мә кʹәрәм кә. (Бьхунә 1 Пәтрус 5:6, 7.) Һәрге әм дәсте Йаһоwада нәрм бьн, һьнге ширәткьрьна wийә бь һʹьзкьрьн wе алийе башда мә бьгöһезә.

¹¹ Йа сьсийа, әм дәрсәкә фәрз һин дьбьн жь ве йәке, кö Йаһоwа ча бу һьндава Шәбна. Бәʹса хәбәре, де-бав йан жи рʹуспийед щьвате, дькарьн дәрсе хwәрʹа һин бьн. Дәрс әw ә: Чахе Йаһоwа мә рʹаст дькә, әw дьдә кʹьфше wәки гöнә бәр чʹәʹве wи рʹәш ә, ле йәкә әw öса жи нишан дькә кö әw бона wи мәрьви хәм дькә у нав wида тьштед баш дьвинә. Һәрге һун де-бав ьн йан жи рʹуспи нә, чахе һун кәсәки ширәт кьн, чʹәʹв бьдьнә Йаһоwа у тьштед баш бьвиньн нав wи мәрьвида (Щьһуд. 22, 23).

12-14. а) Һьнәк чаwа хwә кʹьфш дькьн чахе Йаһоwа wана ширәт у рʹаст дькә? б) Хәбәра Хwәде ча али бьраки кьр кö ньһерʹандьна хwә бьгöһезә, у ахьрийа wе йәке чь бу?

¹² Сәд һʹәйф, ле щара һьнә мәрьва чахе рʹаст дькьн, у ширәт дькьн, öса дьле wан дьшке, кö һәла һе жи жь Хwәде у щьмәʹта wи дур дькʹәвьн (Ибрн. 3:12, 13). Ле гәло әв те һʹәсабе wәки йед öса нькарьн диса вәгәрʹьн? Дина хwә бьдьнә сәрһатийа Граһам. Әw жь щьвате һатьбу дәрхьстьне, wәʹдә дәрбаз бу әw диса бу Шәʹде Йаһоwа, ле паше рʹöһʹанида сьст бу. Һьнә сал дәрбаз бун, әwи жь рʹуспийе кö тʹәви wи һәвалти дькьр, хwәст кö тʹәви wи һинбуна Кʹьтеба Пироз дәрбаз кә.

¹³ Әв рʹуспи дькә бира хwә: «Граһам һьнәки qöрʹә бу. Әw тʹәви рʹуспийа qайил нибу, йе кö сафи кьрьн wәки әw жь щьвате бе дәрхьстьне. Паше чахе мә чәнд щара тʹәви wи һинбун дәрбаз кьр, мә дәрһәqа qöрʹәбуне чәнд рʹез шеwьр кьр. Граһам пе Хәбәра Хwәде ча бежи хwә нәйникерʹа ньһерʹи, у чь кö әwи дит wи хwәш нәһат! Әwе йәке wи лаптә гöһаст! Чахе әwи фәʹм кьр кö qöрʹәбуне wи кор кьрийә у ньһерʹандьна wийә нәрʹаст проблема wи бу, әwи дәрберʹа дәстпекьр алийе башда бе гöһастьне. Әw тʹьме дьһатә щьвате, Хәбәра Хwәде леколин дькьр, у хwәрʹа кьрә хәйсәт һәр рʹож дöа бькә. Әwи öса жи ча малхе мале алийе рʹöһʹанида аликʹари дьда нәфәред хwә, у әве йәке дьле жьн-зарʹед wи гәләк ша кьр» (Луqа 6:41, 42; Аqуб 1:23-25).

¹⁴ Әw рʹуспи гьлийед хwә бәрдәwам дькә: «Рʹожәке, Граһам мьнрʹа гьлийед öса гот, кö гәләк дьле мьн гьрт. Әwи гот: ‹Гәләк сал ә кö әз рʹастийе заньм, у мьн һәла һе ча пешәнг жи хьзмәт кьрийә. Ле тʹәне ньһа әз дькарьм һʹәлал бежьм, wәки әз Йаһоwа һʹьз дькьм›. Wәʹдә шунда әwи щьватеда шьхöл станд кö бона микрофоне щабдар бә, у әwи бь дьл у щан әв шьхöл qәбул кьр. Мәсәла wи әз һин кьрьм, wәки чахе мәрьв хwә бәр Хwәде мьлук дькә у ширәтед wи qәбул дькә, Хwәде wи гәләк кʹәрәм дькә!»

ЧʹӘʹВ БЬДЬНӘ ХWӘДЕ У ИСА ЧАХЕ КӘСӘКИ ШИРӘТ ДЬКЬН

15. Һәрге әм дьхwазьн кö ширәткьрьна мә qәбул кьн, әм гәрәке чь бькьн?

¹⁵ Сәва бьбьнә дәрсдаред баш, пешийе әм гәрәке бьбьнә шагьртед баш (1 Тимтʹ. 4:15, 16). Бь wи щурʹәйи, һәрге щабдарийа wә һәйә кö кәсәки ширәт у рʹаст кьн, һун гәрәке мьлук бьн у рʹебәрийа Йаһоwа qәбул кьн. Чахе мәрьв бьвиньн кö һун öса дькьн, әwана wе qәдьре wә бьгьрьн у һе бь дьл ширәтед wә qәбул кьн. Жь мәсәла Иса әм дькарьн гәләк тьшт һин бьн, wәрә әм дәрһәqа ве йәке шеwьр кьн.

16. Дәрһәqа ширәткьрьне әм чь дәрсе жь Иса һин дьбьн?

¹⁶ Иса тʹьме гöрʹа Баве хwә дькьр, һьнге жи гава жерʹа чәтьн бу (Мәт. 26:39). Әwи бона һинкьрьн у биланийе, шькьри дьда Баве хwә (Йуһʹн. 5:19, 30). Иса мьлук у гöрʹа Хwәдеда бу, ләма мәрьвед дьлсах бәрбь wи дьһатьн. Әw дәрсдарәки дьлшәwат бу у мәрьва хwәш дьһат бал wи һин бьн. (Бьхунә Луqа 4:22.) Гьлийед wийи һʹәйф дьле wан мәрьва рʹьһʹәт дькьрьн, йед кö мина qамише пʹәрчʹьqи у пʹьлта кö ведьсийа бун (Мәт. 12:20). Һәла һе жи чахе сәбьра Иса дьһатә щерʹьбандьне, әw бь һʹьзкьрьн у нәрм бу. Әw йәк әшкәрә те кʹьфше чахе шандийед wи qöрʹәбун у хwәһʹьзи данә кʹьфше (Марq. 9:33-37; Луqа 22:24-27).

17. Кʹижан һʹöнöред баш wе али рʹуспийа бькьн, сәва бьбьн шьванед баш нава щьмәʹта Хwәдеда?

¹⁷ Чахе бьред щабдар сәр һʹиме Кʹьтеба Пироз кәсәки ширәт дькьн, әwана гәрәке чʹәʹв бьдьнә Мәсиһ. Wи щурʹәйи әwана wе нишан кьн кö дьхwазьн Хwәде у Кöрʹе wи рʹебәрийе wан бькьн. Паwлосе шанди ньвиси: «Шьвантийе wи кәрийе пәзе Хwәдейи ль бәр хwә бькьн, нә кö бе дьл, ле бь дьл у щан öса хwәй кьн, чаwа Хwәде дьхwазә, нә кö бона кʹара хwә, ле бь рʹәзәдьли, нә кö ль сәр йед кö пʹара wә кʹәтьнә һʹöкöм кьн, ле нәхше qәнщ нишани кери кьн» (1 Пәт. 5:2-4). Ләма жи бьред щабдар йед кö бь дьл гöрʹа Хwәде у Мәсиһ дькьн, һьн хwәха кʹаре дьстиньн, һьн жи али кʹе дькьн әwана жи дьстиньн (Иша. 32:1, 2, 17, 18).

18. а) Йаһоwа жь де-бава чь дәʹwа дькә? б) Хwәде ча али де-бава дькә wәки щабдарийа хwә биньн сери?

¹⁸ Әв принсип бона малбәте нә жи. Хәбәра Хwәде малхед малерʹа дьбежә: «Зарʹед хwә һерс нәехьн, ле wан бь ширәт у һинкьрьна Хöдан мәзьн кьн» (Әфәс. 6:4). Гәло чьрʹа әw йәк гәләк фәрз ә? Мәтʹәлок 19:18-да те готьне wәки әʹмьре зарʹа ширәткьрьнева гьредайийә. Бәле, де-бав кö Мәсиһи нә, бәр Йаһоwа щабдар ьн һәрге әwана зарʹед хwә рʹаст ширәт накьн (1 Сам. 3:12-14). Ле Йаһоwа биланийе у qәwате дьдә де-бава, чахе әwана бь мьлукти жерʹа дöа дькьн, у Хәбәра wида рʹебәри у аликʹарийа рʹöһʹе пироз дьгәрʹьн. (Бьхунә Аqуб 1:5.)

ҺИН ДЬБЬН КÖ ЧАWА ҺʹӘТА-ҺʹӘТАЙЕ ӘʹДЬЛАЙЕДА БЬЖИН

19, 20. а) Кʹижан кʹәрәма әм дьстиньн чахе ширәткьрьна Хwәде qәбул дькьн? б) Готара дьнда әме дәрһәqа чь шеwьр кьн?

¹⁹ Чахе әм ширәткьрьна Йаһоwа qәбул дькьн, у öса жи чʹәʹв дьдьнә wи у Иса, гава йед дьн ширәт дькьн, әм беһʹәсаб кʹәрәма дьстиньн. Мәсәлә, кʹәрәмәк әw ә кö малбәта мәда у щьватеда wе әʹдьлайи һәбә. Һәр кәс wе тʹәхмин кә кö wи һʹьз дькьн, qимәт дькьн у кö әw хwәйкьри йә (Зәб. 72:7). Ширәткьрьна Йаһоwа мә һин дькә у һазьр дькә бона жийина һʹәта-һʹәтайе әʹдьлайеда, йәктийеда, у бьн пʹәре Хwәдеда. (Бьхунә Ишайа 11:9.) Һәрге әм сәр ширәткьрьна Йаһоwа öса бьньһерʹьн, әме фәʹм кьн wәки ширәткьрьна wи, һʹьзкьрьна wи һьндава мә избат дькә.

²⁰ Готара дьнда, әме дәрһәqа ширәткьрьна малбәтеда у щьватеда һе зедә шеwьр кьн. Әме öса жи бьвиньн кö чаwа хwәрʹасткьрьн али мә дькә wәки нәкʹәвьнә чәтьнайа, чь кö жь еша ширәткьрьне хьрабтьр ә.