Һʹәму Хәмед Хwәда Бәрдьлийе Дьстиньм

ӘW КʹЬТЕБ бь тʹәвайи дьһатьнә навкьрьне кʹәскәсор. Чахе мьн әw кʹьтеб дьхwәндьн, wедәре шькьл һәбун кö гәләк сәр мьн һʹöкöм бун. Öса әз бьчʹуктайеда жь wан кʹьтеба дәрһәqа Кʹьтеба Пироз пеһʹәсийам, у мьн дьхwәст һе зедә пебьһʹәсьм.

Һьнге гава Шәрʹе Һʹәмдьнйайе йа II гьһиштә Һьндьстане, әʹмьре мьн жи алийе хьрабда дьһатә гöһастьне. Де-баве мьн жь һәв qәтийан. Мьн нькарьбу фәʹм кьра кö чьрʹа әw дö мәрьв, кʹижана мьн һʹьз дькьр һәвдö дьһельн. Әз гәләк бәрхwә дькʹәтьм у мьн хwә тʹәне тʹәхмин дькьр. Һьнге әз гәләк һʹәwще аликʹарийе бум. Ле әз зарʹа тайе тʹәне бум, у тʹö кәс тʹöнә бу бәр дьле мьнда бьһата у али мьн бькьра.

Әз у дийа хwә, мә шәһәре Кәрачийеда дьжит. Щарәке һʹәкимәки әʹмьрда мәзьн кö наве wи Фред Һардакер бу, һатә мала мә. Әw Шәʹде Йаһоwа бу. Баwәрийа wи жи мина йа wи мисйонери бу, кʹижан кö әw кʹьтеб дабунә малбәта мә. Әwи жь дийа мьн пьрси һәла әw нахwазә Кʹьтеба Пироз һин бә. Дийа мьн хwәха нәхwәст, ле дәрһәqа мьн жерʹа гот wәки дьбәкә мьнрʹа wе һʹәwас бә. У Һардакер бьра һʹәфтийа дьн дәстпекьр тʹәви мьн һинбуне дәрбаз кә.

Чәнд һʹәфти дәрбаз бун, әз ида дьчум сәр щьвине кʹижан кö ода медисина Һардакерда дәрбаз дьбу. Ве щьватеда wәкә 12 Шәʹдед Йаһоwа бун, кö әʹмьрда мәзьн бун. Әwана бәр дьле мьнда һатьн у мина кöрʹе хwә бона мьн хәм дькьрьн. Чахе дькʹәвә бира мьн кö ча әwана тʹәви мьн рʹудьньштьн, у чаwа һәвалед незик тʹәви мьн хәбәр дьдан, әз дьлгәрм дьбьм. Һьнге мьнрʹа һәма әw йәк лазьм бу.

Һьнә wәʹдә шунда Һардакер бьра, мьн тʹәви хwә бьрә хьзмәтийе. Әwи мьн һин кьр кö чаwа фонографа дәста бьдьмә хәбате, сәва wәʹде хьзмәтийе әм готаред кьн кö сәр һʹиме Кʹьтеба Пироз бун, вехьн. Чәнд готар һьнәки сәрт бун, ләма жи әw готар һьнә хwәйед мале хwәш нәһатьн. Ле мьн хьзмәти гәләк һʹьз дькьр у мьн шабун дьстанд. Әз һьндава рʹастийа Кʹьтеба Пироз гәләк хирәт бум у мьн һʹьз дькьр дәрһәqа рʹастийе мәрьварʹа гьли кьм.

Чахе Жапонйа һазьр дьбу wәки мьqабьли Һьндьстане дәре, сәрwеред Британйайе һе зедә пәй Шәʹдед Йаһоwа дькʹәтьн. Сала 1943 мәһа Тирмәһе, әw йәк сәр мьн жи һʹöкöм бу. Директоре мәкʹтәба мьн, кʹижан кö хьзмәткʹаре дере бу, шәрʹ авитә мьн йанчь әз нәлайиq ьм wәки мәкʹтәбеда һин бьм, чьмки сәр шагьртед дьн хьраб һʹöкöм дькьм. Әwи дийа мьнрʹа гот кö әз тʹәви Шәʹдед Йаһоwа һәвалтийе дькьм, ләма мәсәла хьраб ьм бона шагьрта. Дийа мьн гәләк һерс кʹәт у ида нәдьһишт, wәки әз тʹәви Шәʹдед Йаһоwа һәвалтийе бькьм. Ахьрийеда, әwе әз шандьмә бал баве мьн шәһәре Пешавареда, кʹижан кö wәкә 1 370 километр дур ә, у алийе бакʹуре йә. Әз һеди-һеди рʹöһʹанида кʹәтьм, чьмки бей хwарьна рʹöһʹани у бей һәвал мабум.

ДОСТИЙА ХWӘ ТʹӘВИ ЙАҺОWА ДИСА QӘWИ ДЬКЬМ

Сала 1947 әз вәгәрʹийамә шәһәре Кәрачийе, сәва бьхәбьтьм. Чахе әз wедәре бум, әз чум тʹәсәлийа Һардакер бьра бькьм щийе хәбата wи. Әw бь дьл у щан рʹасти мьн һат у мьн qәбул кьр.

Әwи мьн пьрси: «Һәла бежә кʹидәра тә дешә?». Әw дьфькьри кö әз һатьм, чьмки дәрәкә мьн дешә.

Мьн жи щаба wи да: «Һʹәкимо, әз сьһʹәт-qәwатеда нәхwәш ниньм. Әз рʹöһʹанида нәхwәш ьм. Мьнрʹа һинбуна Кʹьтеба Пироз лазьм ә».

Әwи жи жь мьн пьрси: «Тö кʹәнге дьхwази дәстпеки?».

Мьн жерʹа гот: «Чьqас зу һаqас баш».

Мә һәма ве еваре дәстпекьр һинбуна Кʹьтеба Пироз. Мьн хwә öса тʹәхмин дькьр те бежи һатьмә мала хwә. Дийа мьн дьхwәст рʹе мьн бьгьрә, wәки әз тʹәви Шәʹдед Йаһоwа нәчьм-нәйем. Ле мьн ида дьле хwәда сафи кьрьбу, wәки рʹастийе qәбул кьм у Йаһоwарʹа хьзмәт кьм. Ләма жи 31 Тʹәбахе, сала 1947-да мьн хwә тʹәсмили Йаһоwа кьр у һатьмә ньхöмандьне. Wәʹдә шунда, мьн 17 салийа хwәда хьзмәтийа пешәнгти дәстпекьр.

ХЬЗМӘТИЙА ПЕШӘНГТИ ШАБУН МЬНРʹА АНИ

Кʹьфшкьрьна мьнә пешьн шәһәре Кветайеда бу. Сала 1947, Һьндьстан у Пакьстан жь һәв башqә бун.a Пәй ве йәкерʹа, нава щьмәʹтеда бона религийайе шәрʹ пешда һат, жь бо кʹижани гәләк мәрьв жь wәлат рʹәвин. Нава тʹәрихийеда әw миграсийа, йәк жь миграсийед лапә мәзьн бу. Wәкә 14 милйон мәрьв кʹәтьнә хәрибийе. Мьсьлманед Һьндьстане рʹәвинә Пакьстане, ле Һьнду у Сикхи жь Пакьстане дәрбази Һьндьстане бун. Һьнге, әз пе трена Кәрачийе кö бь мәрьва тʹьжә бу, дьчумә Кветайе. Трен öса тʹьжә бу, wәки ниве рʹе зедәтьр мьн хwә бәр дәре трене гьртьбу.

Кветеда, әз рʹасти Щорщ Сингх һатьм, кʹижан кö wәкә 25 сали бу у пешәнге мәхсус бу. Әwи бисиклетәкә кәвьн да мьн, wәки мьнрʹа һеса бә сәр територийед чʹәʹл-кʹортрʹа һәрʹьм. Мьн дьһа зәʹф тʹәне хьзмәт дькьр. Нава шәш мәһада, бал мьн 17 һинбунед Кʹьтеба Пироз һәбун, у һьнәк жь wан һатьнә сәр рʹийа рʹаст. Йәк жь wан офисере әскәра бу, наве wи Садик Маси бу. Әwи али мә кьр wәки һьнә әʹдәбйәта сәр зьмане Урду wәлгәрʹиньн. Әв зьмане мьләте Пакьстане йә. Ахьрийеда Садик бу мьзгинванәки хирәт.

Wәʹдә шунда, әз вәгәрʹийамә Кәрачийе, у мьн тʹәви Һенри Финч у Һари Форест хьзмәт дькьр. Әwана мисйонер бун у Мәкʹтәба Гиләд тʹәзә хьлаз кьрьбун. Әз жь wана гәләк тьшт һин бум! Щарәке әз тʹәви Финч бьра чумә хьзмәтийе алийе Пакьстана бакʹуре. Мә нав чʹийада гәләк мәрьвед гöнди дитьн, кö мьлук бун у рʹöһʹанида бьрчи бун. Паши дö сала, әз чумә Мәкʹтәба Гиләд; жь wедәре әз вәгәрʹийамә Пакьстане у мьн wәʹдәлу ча бәрпьрсийаре мьһале хьзмәт дькьр. Мьн шәһәре Лахорда дьжит мала мисйонерада, тʹәви 3 бьра кö мисйонер бун.

ЖЬ ДЬЛТӘНГБУНЕ АЗА БУМ

Йазьх, сала 1954-да, мисйонеред Лахореда һәврʹа шәрʹ кьрьн, у филиал мәщбур бу гöһастьна бькә. Мьн тьштәки бефәʹмти кьр кö кʹәтьмә нава wи шәрʹ-дәʹwи, ләма жи мьн ширәтәкә сәрт станд. Әз гәләк дьлтәнг бум, чьмки әз дьфькьрим, wәки мьн кʹьфшкьрьна хwә нәани сери. Әз вәгәрʹийамә Кәрачийе у паше чумә Лондоне (Инглистан), сәва wедәре диса рʹöһʹанида пешда һәрʹьм.

Лондонеда щьвата мьнда гәләк әндәмед жь Бәйтʹәле һәбун. Прис Һйус, бьраки qәнщ кö филиаледа хьзмәт дькьр, әз кьрьмә бьн пʹәре хwә. Щарәке, әwи дәрһәqа хwә мьнрʹа гьли кьр, wәки чаwа Щозеф Рутерфорд wи сәрт ширәт кьр. Һьнге Рутерфорд щабдар бу бона шьхöле һʹәмдьнйайе йа бәлакьрьна мьзгинийе. Чахе Һйус бәр Рутерфорд хwәстьбу хwә һәq дәрхә, әw гәләк сәрт wи һьлатьбу. Әз öса әʹщебмайи мам кö Һйус öса һʹәwас әw йәк гьли дькьр. Әwи гот кö һьнге дьле wи дешийа кö әwи ширәткьрьна öса станд. Ле паше әwи фәʹм кьр, wәки әw ширәт жерʹа лазьм бу у әw йәк әʹйанкьрьна һʹьзкьрьна Йаһоwа бу (Ибрн. 12:6). Гьлийед wи гәләк дьле мьн гьртьн у али мьн кьрьн рʹöһʹанида диса qәwи бьм.

Wи wәʹдәйи, дийа мьн дәрбази Лондоне бу у әwе жь Щон Бар һинбуна Кʹьтеба Пироз qәбул кьр, кʹижан кö паше Кʹома Рʹебәрийеда хьзмәт дькьр. Әw гәләк зу рʹöһʹанида пешда чу у сала 1957-да һатә ньхöмандьне. Wәʹдә шунда, әз пеһʹәсийам wәки баве мьн пешийа мьрьна хwә тʹәви Шәʹдед Йаһоwа һинбун дәрбаз буйә.

Сала 1958-да, мьн Лене станд, кö жь Дәнмарке бу, ле дәрбази Лондоне бьбу. Саләк шунда, qиз мәрʹа бу у әм гәләк ша бун. Мә наве wе дани Щейн. Öса жи qәдьрәки мәзьн мьнрʹа һатә дайин, мьн щьвата Фулемеда щабдари стандьн. Ле wәʹдә дәрбаз бу, у жь бо сьһʹәт-qәwата жьна мьн, әм гәрәке дәрбази щики дьн буна, кʹидәре кö климата гәрм бу. Ләма жи сала 1967, әм дәрбази Аделаидайе бун, (Австралйа).

КÖЛ-ДӘРДӘКИ МӘЗЬН

Аделаидайеда щьвата мәда 12 Мәсиһийед бьжарти һәбун кö әʹмьрда мәзьн бун. Әwана хьзмәтийеда гәләк хирәт бун. Әм жи зу пәй графика хwәйә тʹәзә йа хьзмәтийе чун.

Сала 1979-да, мәрʹа зарʹа 5 һатә буйине, мә наве wи дани Данийел. Әw бь нәхwәшийа Даунb һатә буйине, у мә заньбу wәки әwе дьреж нәжи. Һʹәта иро мьнрʹа чәтьн ә чахе әве еше тиньм бира хwә. Мә алийе хwәда һәр тьшт дькьр бона wи, у öса жи мә дина хwә дьда 4 зарʹед хwәйә дьне жи. Данийел щара шин дьбу, чьмки бина wи дьма жь бо дö qöлед кö дьле wида һәбун, у мә дәрберʹа wи дьбьрә нәхwәшхане. Рʹаст ә сьһʹәт-qәwата wи хьраб бу, ле әw йәки аqьл у һʹәйф бу. Әwи Йаһоwа гәләк һʹьз дькьр. Чахе мә тʹәвайи малбәтеда дöа дькьр wәʹде нанхwарьне, әwи дәстед хwәйи бьчʹук дькьрә һәв, сәре хwә бәржер дькьр, у бь дьл дьгот: «Амин!» Тʹәне паши ве йәке мә хwарьна хwә дьхwар.

Чахе Данийел 4 сали бу, леикемийа wи дәстпебу. Әз у Лене һьн физикида һьн емосийалида шкәсти бун. Мьн тʹәхмин дькьр, wәки әзе ида тәйах нәкьм. Ле чахе әм гәләк дьлтәнг бун, бәрпьрсийаре мьһале Невил Брамич һатә мала мә. Ве шәве, әwи бь һесьра мә һʹәмез дькьр, у әм гьшк дьгьрийан. Әw һʹьзкьрьн у гьлийед wийи дьлшәwати öса дьле мә рʹьһʹәт кьрьн, кö әм нә жи дькарьн пе гьлийа бежьн. Әw нивро wәкә сьһʹәта йәке жь мала мә чу. Һьнә wәʹдә шунда Данийел мьр. Әw йәк әʹмьре мәда дәрдәки лапи мәзьн бу. Ле мә сәбьр кьр wи дәрде хwәда, чьмки әм баwәр бун wәки тʹö тьшт, нә жи мьрьн, нькарә Данийел жь һʹьзкьрьна Йаһоwа дур хә (Рʹом. 8:38, 39). Әм гәләк һивийа wи wәʹдәйи нә, кʹәнге әw дьнйа тʹәзәда жь мьрьне рʹабә у әм wи бьвиньн (Йуһʹн. 5:28, 29).

ШАБУНЕ ДЬСТИНЬМ КÖ АЛИКʹАРИЙЕ ДЬДЬМӘ МӘРЬВЕ ДЬН

Дö щара инсулте мьн хьст, ле әз йәкә диса жи ча рʹуспи хьзмәт дькьм. Qәwьмандьнед кö әʹмьре мьнда qәwьмин, мьн һелан кьрьн кö һе дьлшәwат бьн у бәрдьлийе бьдьмә мәрьва, илаһи wан йед кö чәтьнайада ньн. Әз тʹö щар мәрьва нәһәq накьм чахе әwана дькʹәвьнә проблема, ле дәwсе әз пьрса дьдьмә хwә: «Гәло qәwьмандьнед әʹмьре wанда ча һʹöкöм бунә сәр ньһерʹандьн у фькьред wан? Ча әз дькарьм wанрʹа бьдьмә кʹьфше, wәки әз wана һʹьз дькьм у бона wан хәм дькьм? Ча әз дькарьм дьл бьдьмә wан кö сәр рʹийа Йаһоwа бьминьн?». Әз һʹьз дькьм щьватеда сәрледана шьвантийе бькьм! Бь рʹасти чахе әз хушк-бьра дьлгәрм дькьм у алийе рʹöһʹанида wана дьшьдиньм, әз тʹәхмин дькьм wәки әз хwәха дьлгәрм дьбьм у qәwи дьбьм.

Әз хwә тʹәхмин дькьм мина зәбурбеж, йе кö гот: «Дәма дәрд-кöл дьле мьнда зедә дьбьн, барьстанийед Тә нәфса мьн ша дькьн» (Зәб. 94:19). Wәʹде чәтьнайед малбәтеда, пәйкʹәтьна, дьлшкәстибуне у депресийе, Йаһоwа тʹьме кʹеләка мьн бу у али мьн дькьр. Йаһоwа бона мьн бь рʹасти жи Бав ә!