Итʹбарийа Хwә Рʹебәре Хwә Биньн, Демәк Мәсиһ
«Рʹебәре wә йәк ә, әw Мәсиһ ә» (МӘТ. 23:10).
1, 2. Паши мьрьна Муса, Йешу кʹижан щабдарийа мәзьн станд?
ЙАҺОWА готә Йешу: «Qуле [хьзмәткʹаре] мьн Муса мьр у ньһа рʹабә, тʹәви һʹәмуйа гәл [щьмәʹте] Чʹәме Урдöне дәрбаз бьбә. Бькʹәвьн wәлате кö әзе бьдьм wә» (Йешу 1:1, 2). Йешу wәкә 40 сала бәрдәстийе Муса бу, ле ньшкева әw гöһастьн бу, кö әw һивийе нибу.
2 Муса гәләк сала рʹебәре Исраелийа бу, у ләма фәʹмдари йә кö Йешу дьбәкә бәрхwә дькʹәт, кö гәло щьмәʹта Хwәде wе ча wи qәбул кә (Qан. Дщр. 34:8, 10-12). Кʹьтебәкеда дәрһәqа рʹеза жь Йешу 1:1, 2, те готьне: «Чаwа бәре, öса жи иро гава сәрwер йан һʹöкöмәти те гöһастьне, бона щьмәʹте әw wәʹдәки лапи чәтьн ә».
3, 4. Әм жь кʹö заньн wәки бадиһәwа нибу кö Йешу баwәрийа хwә Хwәде дьани, у кʹижан пьрс бал мә дькарә пешда бе?
3 Фәʹмдари йә, wәки Йешу бәрхwә дькʹәт, ле йәкә әwи итʹбарийа хwә Йаһоwа ани, у дәрберʹа пәй рʹебәрийа wи чу (Йешу 1:9-11). Бадиһәwа нибу кö әwи баwәрийа хwә Хwәде дьани. Кʹьтеба Пироз нишан дькә, wәки Йаһоwа пе мәләке хwә, рʹебәри Йешу у щьмәʹта хwә дькьр. Әм дькарьн бежьн wәки әw мәләк, Хәбәр бу, демәк Кöрʹе Хwәдейи тайе тʹәне (Дәркʹ. 23:20-23; Йуһʹн. 1:1).
4 Пе аликʹарийа Йаһоwа, Исраели һини ве гöһастьне бун, кö дәwса Муса ида Йешу рʹебәрийа wан дькьр. Иро әм жи дьжин wи wәʹдәйида, чахе гәләк гöһастьн тенә кьрьне. У дьбәкә бал мә пьрс пешда те: «Тʹәшкиләта Хwәде зу-зу пешда дьчә, ле гәло мәʹнийед мә һәнә итʹбарийа хwә Рʹебәре хwә, демәк Иса биньн?» (Бьхунә Мәтта 23:10.) Сәва щаба ве пьрсе пебьһʹәсьн, wәрә әм шеwьр кьн кö Йаһоwа ча wәʹде бәре рʹебәри щьмәʹта хwә дькьр.
КʹЕ ЩЬМӘʹТА ХWӘДЕ БЬРӘ ӘʹРДЕ СОЗДАЙИ?
5. Гава Йешу незики Әриһайе бу, әw рʹасти кʹе һат? (Бьньһерʹә шькле әʹwльн.)
5 Зутьрәке паши ве йәке, чахе Исраели чʹәме Урдöнерʹа дәрбаз бун, Йешу незики Әриһайе, рʹасти мерәки һат, дәсте кʹижанида шур һәбу. Йешу ньзаньбу әw мәрьве нәнас кʹе йә, ләма жь wи пьрси: «Тö жь мә йи йан жи жь алийе дьжмьне мә йи?». Йешу сәр щаба wи мерьки әʹщебмайи ма, чьмки әwи гот wәки әw сәроке ордийа Йаһоwа йә, кʹижани кö гәрәке щьмәʹта Хwәде хwәй кьра. (Бьхунә Йешу 5:13-15.) Рʹаст ә Кʹьтеба Пирозда рʹезед дьнда те готьне, wәки Йаһоwа рʹастә-рʹаст тʹәви Йешу хәбәр дьда, ле бешьк әwи бь сайа мәләке хwә тʹәви wи хәбәр дьда, чаwа бәре тʹәви хьзмәткʹаред дьн хәбәр дьда (Дәркʹ. 3:2-4; Йешу 4:1, 15; 5:2, 9; Кʹар. Шанд. 7:38; Галт. 3:19).
6-8. а) Һьнә рʹебәрийед Йаһоwа чьрʹа бона мәрьва дьбәкә әʹщеб бьһатана хане? б) Ле чьрʹа әw рʹебәри һьн билани бун һьн жи wәʹдәда бун? (Бьньһерʹьн öса жи спартьн.)
6 Йешу жь wи мәләки рʹебәрийед зәлал станд, кö чаwа Әриһайе һьлдә бьн дәсте хwә. Жь wан рʹебәрийа һьнәк дьбәкә дьһатьнә кʹьфше кö нәлазьм у нәаqьлайи нә. Мәсәлә, Йаһоwа тʹәми да wан, wәки һʹәму мер бенә сьнәткьрьне. Әw дьһатә һʹәсабе, wәки чәнд рʹож әw мер wе беqәwат буна. Ле бь рʹасти qә wәʹде wе йәке бу, кö әwана бенә сьнәткьрьне? (Дәстп. 34:24, 25; Йешу 5:2, 8).
7 Дьqәwьмә әw мер дьфькьрин, кö әwана wе чаwа малбәтед хwә хwәй кьн, һәрге дьжмьн бькʹәвьнә зома wан. Ле ньшкева, әwана пеһʹәсийан, wәки жь тьрса Исраелийа дәред Әриһайе «зәхми [qайим] һатьбун гьртьн» (Йешу 6:1). Чахе Исраели әw йәк пеһʹәсийан, һьлбәт итʹбарийа wан һьндава рʹебәрийа Хwәде һе мәзьн бу.
8 Хенщи ве йәке, Исраелийарʹа тʹәми һатьбу дайине, wәки тʹәви Әриһайе шәрʹ нәкьн, дәwсе шәш рʹожа, рʹоже щарәке дора wи шәһәри бьзвьрьн, ле рʹожа һʹәфта һʹәфт щара. Дьqәwьмә әскәр хwәрʹа дьфькьрин: «Әw йәк wе бадиһәwа wәʹдә у qәwате жь мә бьстинә!». Ле Рʹебәре Исраелийа, демәк Йаһоwа, рʹьнд заньбу әw чь дькә. Исраелийа Әриһа зәфт кьрьн, чьмки пәй рʹебәрийед wи чун. У гава wана дит кö чьqас аqьлайи бу пәй wан рʹебәрийа һәрʹьн, баwәрийа wана гәләк qәwи бу (Йешу 6:2-5; Ибрн. 11:30).a
9. Чьрʹа әм гәрәке пәй рʹебәрийед тʹәшкиләта Хwәде һәрʹьн? Мәсәле биньн.
9 Жь ве сәрһатийе әм чь һин дьбьн? Щара әм бь тʹәмами фәʹм накьн кö чьрʹа тʹәшкиләта Йаһоwа фьлан гöһастьн кьрийә. Мәсәлә, пешийе дьбәкә әм дьфькьрин, wәки чьрʹа һащәтед әләктроники бьдьнә хәбате wәʹде һинбуна шәхси, хьзмәтийе, йан жи сәр щьвата. Ле wәʹдә дәрбаз бу у ньһа әм фәʹм дькьн кö чьqас кʹар ә, гава әм wан һащәта дьдьнә хәбате. Чахе әм дьвиньн кö гöһастьнед wи щурʹәйи чьqас бәред баш тиньн, баwәри у йәктийа мә дьшьдә.
QЬРʹНА ЙӘКЕДА МӘСИҺ ЧА РʹЕБӘРИЙА ЩЬВАТЕ ДЬКЬР?
10. Кʹе рʹебәри кьр wәки Оршәлимеда щьвина фәрз дәрбаз бә?
10 Wәкә 13 сал паши ве йәке чахе Корʹнелйойе нәсьнәткьри, бу Мәсиһи, һьнә Щьһуйед Мәсиһи диса жи дьготьн, wәки сьнәткьрьн лазьм ә бькьн (Кʹар. Шанд. 15:1, 2). Дәрһәqа ве пьрсе Әнтакйайеда дәʹw пешда һат, ләма бьра Паwлос шандьн Оршәлиме, сәва дәрһәqа ве пьрсе тʹәви кʹома рʹебәрийе шеwьр кә. Ле бь рʹасти кʹе рʹебәри кьр, wәки әw һәрʹә? Паwлос гот кö жерʹа һатийә әʹйанкьрьне, wәки әw һәрʹә. Әшкәрә йә, wәки Иса öса рʹебәри кьр, сәва кʹома рʹебәрийе әве пьрсе сафи кә (Галт. 2:1-3).
Qьрʹна йәкеда рʹебәрийа Мәсиһ әшкәрә дьһатә кʹьфше (Бьньһерʹә абзаса 10, 11)
11. а) Һьнә Мәсиһийед Щьһу дәрһәqа пьрса сьнәткьрьне чь дьфькьрин? б) Чаwа Паwлос бь мьлукти нишан кьр, wәки пьштгьрийа рʹуспийед Оршәлиме дькә? (Бьньһерʹьн öса жи спартьн.)
11 Пе рʹебәрийа Мәсиһ, кʹома рʹебәрийе әʹйан кьр, wәки нәлазьм ә Мәсиһийед нә жь мьләте Щьһу, бенә сьнәткьрьне (Кʹар. Шанд. 15:19, 20). Ле йәкә паши ве сафикьрьне жи, гәләк Мәсиһийед Щьһу бәрдәwам дькьрьн зарʹед хwә сьнәт кьн. Рʹуспийед Оршәлимеда бьһистьн, wәки дәрһәqа Паwлос гьли бәла дьбә, кö әw Qануна Муса найнә сери. Ләма wана рʹебәрийед öса данә wи, кʹижан кö һьнәки әʹщеб дьһатьнә ханеb (Кʹар. Шанд. 21:20-26). Wана жерʹа гот, wәки тʹәви чар мера һәрʹә пʹарьстгәһе, сәва щьмәʹт бьвинә кö әw «пәй Qануна Муса» дьчә. Паwлос дькарьбу әw сафикьрьна wан бькьра бьн шьке, у бьфькьрийа кö әw йәк нәлазьм ә. Әwи дькарьбу бьгота кö проблем нава wан Мәсиһийед Щьһуда йә, чьмки әwана рʹьнд фәʹм накьн пьрса дәрһәqа сьнәткьрьне. Ле йәкә Паwлос пьштгьрийа wан сафикьрьнед рʹуспийа кьр, сәва нава хушк-бьрада йәкти öнда нәбә, у ча wана жерʹа гот, әwи бь мьлукти һәма öса жи кьр. Ньһа дьбәкә бал мә пьрс пешда те: «Чьрʹа Иса һаqас wәхт әw пьрс нәсафикьри һишт? Нә паши мьрьна wи Qануна Муса һатә һьлдане?» (Колс. 2:13, 14).
12. Чьрʹа дьбәкә Мәсиһ һишт, wәки һьнә wәʹдә дәрбаз бә, сәва пьрса сьнәткьрьне бь тʹәмами сафи бә?
12 Һьнәкарʹа wәʹдә лазьм ә сәва һини фәʹмкьрьна тʹәзә бьн. Һьнә Щьһуйед Мәсиһирʹа лазьм бу wәʹдә, wәки фәʹм кьн кö әwана ида бьн Qанунеда ниньн (Йуһʹн. 16:12). Wанрʹа чәтьн бу qәбул кьн ве йәке, кö һәләqәтийа wанә мәхсус тʹәви Хwәде, ида сьнәткьрьнева гьредайи нинә (Дәстп. 17:9-12). Һьнәк жи дьтьрсийан, wәки wе бенә зерʹандьне алийе Щьһуйед дьнда, чьмки бь ве йәке wе жь wана щöдә бьн (Галт. 6:12). Ле һьнә wәʹдә дәрбаз бу, у Мәсиһ бь сайа нәʹмед Паwлос һе зедә рʹебәри да (Рʹом. 2:28, 29; Галт. 3:23-25).
МӘСИҺ ҺʹӘТА ИРО РʹЕБӘРИЙА ЩЬВАТЕ ДЬКӘ
13. Иро чь wе али мә бькә пьштгьрийа рʹебәрийа Мәсиһ бькьн?
13 Щара әм бь тʹәмами фәʹм накьн wан гöһастьна, кö тʹәшкиләта Хwәдеда тенә кьрьне. Һәрге öса нә, wе баш бә әм бьфькьрьн, кö чаwа бәре Мәсиһ рʹебәри дькьр. Чаwа wәʹде Йешу у qьрʹна йәкеда жи, Мәсиһ тʹьме рʹебәрийед билан дьдә, сәва щьмәʹта Хwәде хwәй кә, баwәрийа wан qәwи кә, у йәкти нав wанда öнда нәбә (Ибрн. 13:8).
14-16. Чаwа рʹебәрийед кö әм жь «хöламе амьн у сәрwахт» дьстиньн, дьдьнә кʹьфше wәки Иса бона рʹöһʹанийа мә хәм дькә?
14 Рʹебәрийед кö «хöламе амьн у сәрwахт» мәрʹа дьдьн, әʹйан дькьн, кö Иса ча бона рʹöһʹанийа мә хәм дькә (Мәт. 24:45). Марк, баве чар зарʹа, дьбежә: «Шәйтʹан дьхwазә щьвата сьст кә бь ве йәке, кö пәй малбәта дькʹәвә. Ләма жи әw ширәт кö әм гәрәке qöльхкьрьна тʹәви малбәте дәрбаз кьн, әшкәрә малхед малерʹа әʹйан дькә, wәки малбәта хwә рʹöһʹанида хwәй кьн!».
15 Бәле, чахе әм дьвиньн, Иса ча рʹебәрийе мә дькә, әм фәʹм дькьн wәки әw али мә дькә, сәва әм баwәрийеда qәwи бьн. Рʹуспики бь наве Патрик дьбежә: «Пешийе һьнә хушк-бьрарʹа чәтьн бу бьһатана сәр щьвинед бьчʹук бона хьзмәтийе, кö Шәми у Ләʹде дәрбаз дьбьн. Ле әм заньн wәки һʹöнöрәки Иса әw ә, кö әw хәм дькә бона һʹәму мьлука, у ве щьвинеда әw йәк рʹьнд те кʹьфше. Хушк-бьред шәрмокә йан жи йед кö һьндьк хьзмәт дькьн, ньһа тʹәхмин дькьн кö qимәт ьн у дькарьн кʹаре биньн. Wи щурʹәйи әwана рʹöһʹанида гәш дьбьн у хьзмәтийеда жи хирәт дьбьн».
16 Мәсиһ öса жи али мә дькә, wәки һʹьш-аqьле мә сәр бәлакьрьна мьзгинийе бә, демәк сәр wи шьхöле һәри мәзьн у фәрз, кö нав дьнйайеда те кьрьне. (Бьхунә Марqос 13:10.) Андре кö тʹәзә ча рʹуспи һатә кʹьфшкьрьне, тʹьме кʹур дьфькьрә сәр гöһастьнед кö тʹәшкиләта Хwәдеда тенә кьрьне. Әw дьбежә: «Wан пашwәхтийада, гәләк хушк-бьред кö филиалада хьзмәт дькьрьн, дәштеда һатьнә кʹьфшкьрьне. Әw гöһастьн диса жи тинә бира мә, wәки әм wәʹдәки чада дьжин у чьqас фәрз ә qәwата хwә сәр бәлакьрьна мьзгинийе хәрщ кьн».
БЬ АМЬНИ ПЬШТГЬРИЙА МӘСИҺ БЬКЬН
17, 18. Чьрʹа wе керһати бә, һәрге әм бьфькьрьн кö әм чь кʹаре дьстиньн, гава һини гöһастьнед тʹәшкиләте дьбьн?
17 Рʹебәрийед кö Иса Мәсиһ, демәк Пʹадше мә, мәрʹа дьдә, ньһа али мә дькьн у ахьрийеда жи wе али мә бькьн. Ләма жи wәрә әм тʹьме дина хwә бьдьнә сәр ве шабуне кö әм дьстиньн, гава гöһастьна qәбул дькьн у кʹаре дьвиньн. Wе керһати бә кö һун wәʹде qöльхкьрьна тʹәви малбәте, шеwьр кьн, кö һун чь кʹаре дьстиньн жь гöһастьнед щьватада у хьзмәтийеда.
Һун али малбәта хwә у хушк-бьред щьватеда дькьн, сәва пәй тʹәшкиләта Йаһоwа һәрʹьн? (Бьньһерʹә абзаса 17, 18)
18 Һәрге әм бир нәкьн, wәки гöһастьнед тʹәшкиләта Йаһоwада тʹьме мәрʹа кʹаре тиньн, wе мәрʹа дьһа һеса бә, кö бь шабуне пәй wан рʹебәрийа һәрʹьн. Мәсәлә, әм qимәт дькьн ве йәке кö тʹәшкиләтеда пʹәрә кем хәрщ дьбә, чьмки ида әʹдәбйәтед мә кем тенә нәшьркьрьне, у һе зедә йед әләктроник тенә хәбьтандьне. Әw йәк али тʹәшкиләте дькә, сәва нав тʹәмамийа дьнйайеда мьзгинийе бьгьһиньнә һе зедә мәрьва. Ләма жи әм һелан дьбьн чьqас дькарьн дьһа зәʹф бьдьнә хәбате әʹдәбйәтед әләктроник у видео. Бь wи щурʹәйи, әме пьштгьрийа ньһерʹандьна Мәсиһ бькьн, кö пʹәре тʹәшкиләте бь билани хәрщ бә.
19. Чьрʹа әм гәрәке пьштгьрийа рʹебәрийа Мәсиһ бькьн?
19 Чахе әм бь дьл у щан пәй рʹебәрийа Иса дьчьн, әм бь ве йәке баwәрийа хушк-бьра qәwи дькьн у йәктийе дькьнә щьвате. Андре бәʹса кʹижани мә жоре кьр, дьфькьри сәр ве гöһастьне, кö нав тʹәмамийа дьнйайеда гәләк хушк-бьред Бәйтʹәле, дәштеда һатьнә кʹьфшкьрьне, у әw дьбежә: «Әw хушк-бьред кö ида Бәйтʹәледа хьзмәт накьн, бь дьл у щан әв гöһастьн qәбул кьрьнә. Мәсәла wан, итʹбарийа мьн һьндава рʹебәрийед Мәсиһ, һе зедә дькә у әз гәләк qәдьре wан хушк-бьра дьгьрьм. Әwана пәй әʹрәба Йаһоwа дьчьн, гава һәр щурʹә кʹьфшкьрьнада шабуне öнда накьн».
БАWӘРИ У ИТʹБАРИЙА ХWӘ РʹЕБӘРЕ ХWӘ БИНЬН
20, 21. а) Чьрʹа әм дькарьн итʹбарийа хwә Рʹебәре хwә Мәсиһ биньн? б) Готара дьнда әме кʹижан пьрсе шеwьр кьн?
20 Рʹебәре мә Иса Мәсиһ, wе зутьрәке «сәркʹәвә», у «кьред һʹöжмәкʹар бькә» (Әʹйан. 6:2; Зәб. 45:4). Һʹәта әw wәʹдә бе, әw щьмәʹта Хwәде һазьр дькә бона жийина дьнйа тʹәзәда у бона шьхöлед кö әм гәрәке wедәре бькьн, демәк мәрьвед кö жь мьрьне рʹабьн, һин кьн у әʹрде бькьнә щьнәт.
21 Һәрге әм итʹбарийа хwә Пʹадше хwә биньн, чь гöһастьн жи һәбьн, әw wе мә бьвә бәрбь дьнйа тʹәзә. (Бьхунә Зәбур 46:1-3.) Бәле, щара чәтьн ә гöһастьна qәбул кьн, илаһи гава ньшкева дьqәwьмьн у әʹмьре мәва гьредайи нә. Ле һьнге ча әм дькарьн дьлрʹьһʹәтийе хwәй кьн у бь тʹәмами баwәрийа хwә Йаһоwа биньн? Щаба ве пьрсе әме готара дьнда шеwьр кьн.
a Археолога нава кәвьр-кочʹькед Әриһайеда, гәләк гәньм дитьн, кʹижан кö щьмәʹте тʹоп кьрьбу, ле хәрщ нәкьрьн. Әw йәк анәгори сәрһатийа Кʹьтеба Пироз ә, кʹижан кö мәрʹа дьбежә wәки доргьртьна шәһәр wәʹдәки кьн бу. Исраелийарʹа тʹәми һатьбу дайине, wәки жь шәһәр тьштәки һьлнәдьн, ләма wана wәʹдәки башда шәһәр зәфт кьрьн, чьмки сезона нандьруне бу, у чолада епʹещә хwарьн һәбу (Йешу 5:10-12).
b «Бьрща Qәрәwьлийеда» йа 15 Адаре, сала 2003, рʹупʹ. 24, бьньһерʹьн чаргошә бь наве «Паwлос Щерʹьбандьнеда Мьлукти да Kʹьфше».