ТӦ ХԜӘДЕ РʹЬНД НАС ДЬКИ?
Гәләк мәрьв дьбежьн, ԝәки Хԝәде баԝәр дькьн. Ле чахе ԝан дьпьрси, кʹи йә Хԝәде, щаба ԝан щурʹә-щурʹә йә. Бона һьнәка, Хԝәде һʹакьме сәрт ә, кʹижан кӧ мәрийа бона кьред ԝанә нәрʹаст щәза дькә. Бона һьнәка жи әԝ тʹьме Хԝәдайе бь һʹьзкьрьне тʹьжә йә у һазьр ә һәр кьред мәрийа бьбахшинә. Һәнә йед ӧса жи, кӧ дьбежьн ԝәки Хԝәде жь мә дур ә у бона мә хәм накә. Жь бо ньһерʹандьна ӧса, гәләк мәрьв дьфькьрьн, ԝәки әм нькарьн бь рʹасти Хԝәде нас кьн.
Чьма әм гәрәке Хԝәде нас кьн? Һәрге әм рʹьнд Хԝәде нас кьн, һьнге нета жийина мә ԝе һәбә (Кʹаред Шандийа 17:26-28). Чьԛас тӧ хԝә незики Хԝәде дьки, һаԛас һе зедә әԝ дәстпедькә тә һʹьз бькә у али тә бькә (Аԛуб 4:8). Һәмьки, чахе тӧ дәрһәԛа Хԝәде занәбуна рʹаст дьстини, тӧ бь ԝе йәке мәщале чедьки кӧ жийина һʹәта-һʹәтайе ԛазанщ бьки (Йуһʹәнна 17:3).
Чаԝа тӧ дькари Хԝәде нас бьки? Һәла бьфькьрә дәрһәԛа ԝи кәси, кʹижани тӧ рʹьнд нас дьки, мәсәлә һәвале тәйи незик. Чь щурʹәйи һун бунә һәвалед незик? Һәмьки пешийе тӧ наве ԝи (ԝе) пеһʹәсийайи, ӧса жи чь ԝи хԝәш те, чь на, әԝи чь кьрийә у чь дьхԝазә бькә. Әв һʹәму тьшт тә һе незики ԝи мәрьви дькьн, чьмки тӧ гәләк тьшт дәрһәԛа ԝи йан ԝе пеһʹәсийайи.
Анәгори ве йәке, әм жи дькарьн һе рʹьнд Хԝәде нас бькьн, һәрге пебьһʹәсьн дәрһәԛа тьштед жере готи:
НАВЕ ХԜӘДЕ ЧЬ ЙӘ?
ХԜӘДЕ ЙӘКИ ЧАԜА НӘ?
ХԜӘДЕ ЧЬ КЬРИЙӘ?
ӘԜЕ ЧЬ БЬКӘ ЛЬ АХЬРИЙЕ?
ЗАНӘБУН ДӘРҺӘԚА ХԜӘДЕ ЧАԜА ДЬКАРӘ ЛЬ СӘР ЖИЙИНА МЬН ҺʹӦКӦМ КӘ?
Нета ве журнале әв ә, кӧ али тә бькә бь Кʹьтеба Пироз щаба ԝан пьрса бьстини. Бь сайа готаред кӧ тенә дайине, тӧйе нә тʹәне пебьһʹәси ԝәки Хԝәде бь рʹасти кʹи йә, ле ӧса жи кӧ тӧйе чь кʹаре бьстини һәрге незики Хԝәде би.