Рʹасти Дәрһәqа Хwәде

1, 2. Чьрʹа баш ә пьрса бьдьн?

ТӘ ТʹӘХМИН кьрийә чаwа зарʹ һʹьз дькьн пьрса бьдьн? Әwана бе һʹәсаб пьрса дьдьнә мәзьна, мәсәлә әв чь йә, әв чьрʹа ӧса нә йан ӧса нинә? Щарна дьбәк жи сәва кӧ щаба рʹаст бьди wанарʹа, тӧ гәлә щәфе дькʹьшини, ле йәкә мина ве зарʹока кӧ ль сәр шькьл те кʹьфше, әwана диса жи дьпьрсьн: «Ле чьрʹа?»

² Бь рʹастийе пьрса нә тʹәне зарʹ дьдьн, ле йед мәзьн жи. Мәрьв чьqас жи мәзьн дьбә, һаqас һе гәлә тьшта дьхwазә пебьһʹәсә. Мәсәлә, ча гәрәке мәри бьжи, wәки дури кӧл-дәрда у бебәхтийе бә. Ле һәнә мәрьв йед кӧ ида пьрса надьнә хwә, у щабед ль сәр пьрсед фәрз нагәрʹьн.

3. Чьрʹа гәләк мәри щаба ль сәр пьрсед фәрз нагәрʹьн?

³ Һәла дьшьрмиш бә ль сәр наве ве кʹьтебе, ӧса жи ль сәр пьрсед сәрәщәме у ль сәр пьрсед дәстпека сәре пешийе. Әва пьрсед лапи фәрз ьн дь әʹмьре мәда. Ле гәләк, щабед пьрсед ӧса ида нагәрʹьн. Гәло чьрʹа? Гәло Кʹьтеба Пироз щаба ван пьрса дьдә? Гәләка тʹьре кӧ щабед Кʹьтеба Пироз чәтьн ьн сәва фәʹмкьрьне. Һьнәк жи шәрм дькьн пьрса бьдьн. Ле һәнә йед ӧса жи, йед кӧ дьшьрмиш дьбьн, wәки дәрһәqа щаба ван пьрса гәрәке тʹәне ӧлмдар у мәрийед зандар дьшьрмиш бьн. Ле тӧ ча дьшьрмиш дьби?

4, 5. Әв һьнә пьрсед фәрз кӧ пешда тен кʹижан ьн, у чьрʹа әм гәрәке щабед wан бьгәрʹьн?

⁴ Гәләк мәри, мина тә дьхwазьн ль сәр пьрсед ӧса фәрз щаба хwә бьстиньн. Дьбәк тә жи пьрсед ӧса дайә хwә: ‹Гәло нет-мәрәме әʹмьр чь йә? Әва жийина кӧ мәрьв дьжин, гәрәке ӧса буйа? Гәло Хwәде йәки ча нә?› Әва рʹьнд ә wәки тӧ пьрсед ӧса дьди хwә, у һʹәта тӧ щаба рʹаст ль сәр ван пьрса нәстини, нәсәкьнә. Чьмки мамостаки навдар, бь наве Иса Мәсиһa гьлийед ӧса готийә: «Бьхwазьн һуне бьстиньн, бьгәрʹьн һуне бьбиньн, дәри хьн wе бәр wә вәбә» (Мәтта 7:7).

⁵ Һәрге һун «бьгәрʹьн» щаба ван пьрсед фәрз, һуне тедәрхьн кӧ әв йәк гәләк кʹаре тинә (Мәтʹәлок 2:1-5). Кʹи жи тәрʹа чь бежә, тӧ сәд сәләфи бьзаньбә, wәки щаба пьрсед ӧса һәнә, әwана дь Кʹьтеба Пирозда ньвиси нә. Щабед Кʹьтеба Пироз бь рʹастийе сәва фәʹмкьрьне чәтьн ниньн. Ле сәрда жи әwана дькарьн гӧмане бьдьнә тә у әʹмьре тә һе баш кьн. Һинбуна Кʹьтеба Пироз wе али тә бькә әʹмьре хwә ида ирода бәхтәwар ки. Wәрә пешийе әм пебьһʹәсьн щаба пьрсед ӧса ль сәр кʹижани гәләк мәрьв дьфькьрьн.

ГӘЛО ХWӘДЕ БОНА МӘ ХӘМ ДЬКӘ, ГӘЛО ӘW ДЬЛРʹӘʹМ Ә?

6. Чьрʹа гәләк жь мәрийа дьшьрмиш дьбьн, wәки Хwәде бона мә хәм накә?

⁶ Гәләк жь мәрийа дьбежьн wәки на. ‹Һәрге Хwәде дьлрʹәʹм буйа, әʹмьр дь дьнйайеда wе баш буйа›. Гава әм ль дьне дьньһерʹьн әм тʹәне шәрʹ, нәһәqийе у зӧлмийе дьбиньн. У әм хwәха жи тʹьме нәхwәш дькʹәвьн дьчәрчьрьн у мәрииед хwәйә незик ӧнда дькьн. Ләма жи гәләк дьбежьн: ‹Һәрге Хwәде бона мә хәм бькьра, әwи wе нәһишта wәки һаqас нәһәqи у зӧлми бенә сәре мә›.

7. (а) Ча ӧлмдар у кʹаһин мәрийа дьдьнә баwәркьрьне, кӧ сәбәбе һʹәму кӧл-дәрда Хwәде йә? (б) Чь һин дькә Кʹьтеба Пироз дәрһәqа кӧл-дәрдед мә?

⁷ Һе әʹщеб әw ә, wәки щарна хwәха ӧлмдар у кʹаһин мәрийа дьдьнә баwәр кьрьне кӧ сәбәбе һʹәму кӧл-дәрда Хwәде йә. Мәсәлә чахе тьштәки хьраб ль сәре кәсәки дьqәwьмә, әwана дьбежьн, wәки qьрара Хwәде бу. Бь wе йәке әwана Хwәде нәһәq дәрдьхьн. Ле әва рʹаст ә? Гәло чь һин дькә Кʹьтеба Пироз? Дь кʹьтеба Аqуб 1:13-да ньвисар ә: «Бьра тʹӧ кәс, йе кӧ нава щерʹьбандьнеда йә, нәбежә: ‹Хwәде мьн бь хьрабийе дьщерʹьбинә›, чьмки Хwәде хьрабийада найе щерʹьбандьне у нә жи йәки дьщерʹьбинә». Демәк әв нәһәqийед кӧ ль дьне дьqәwьмьн, кьред Хwәде ниньн. (Бьхунә Ибо 34:10-12.) Рʹаст ә әw дьһелә кӧ тьштед хьраб бьqәwьмьн. Ле кʹӧ тӧ тьштәки бьһели бьqәwьмә у кʹӧ хwәха әве йәке бьки. Ортʹа wан фьрqийа мәзьн һәйә.

8, 9. (а) Бь кʹижан мәсәле тӧ дькари нишан ки, wәки фьрqи һәйә, ортʹа нәһәqийе бьһели, йан жи хwәха бьки? (б) Рʹаст ә Хwәде һишт wәки мәрьв дь рʹийа хьрабда һәрʹьн, ле чьрʹа нәрʹаст ә, wәки әм сәва ве йәке Хwәде нәһәq дәрхьн?

⁸ Wәрә әм ль сәр мәсәләке дьшьрмиш бьн, дәрһәqа бавәки qәнщ у билан, у кӧрʹе wийи мәзьн, йе кӧ һе мала де-баве хwәда дьжи. Дәрбәке әw сафи дькә жь де-баве хwә башqә бә у рʹийа хwәда һәрә. Бьдә һʹәсабе хwә, әwи рʹекә хьраб жьбарт у бу хwәйе кӧл-дәрда. Тʹәхмина wә әw кӧл-дәрдед wи, баве wи ани ль сәре wи? Фәʹмдари йә, wәки на (Луqа 15:11-13). Дәрһәqа Хwәде жи әм дькарьн ӧса бежьн. Рʹаст ә Хwәде һишт, wәки инсанәт жь wи башqә бә у рʹекә хьрабда һәрʹә. Ле әв найе һʹәсабе, wәки Хwәде хwәха кӧл-дәрд ани ль сәре wан. Ләма жи әв гӧнәки мәзьн ә, кӧ мәрьв бона һʹәму кӧл-дәрдед хwә, Хwәде нәһәq дькьн.

⁹ Ле гәло чьрʹа Хwәде һишт, wәки инсанәт рʹекә хьрабда һәрʹә? Хwәде һәйә Әʹфьрандаре мәйи һьмзор у билан, әw борщдар нинә һʹәму кьред хwә мәрʹа шьровәкә. Ле чьмки әw мә һʹьз дькә, ләма жи әwи хwәха хwәст мәрʹа һʹәму тьшти шьровәкә. Дәрһәqа ве йәке һе зедә әме дь сәре 11-да пебьһʹәсьн. Ча жи һәбә тʹӧ щар дьшьрмиш нәбә, wәки сәва проблемед мә Хwәде йә нәһәq. Дәwса ве йәке бьзаньбә кӧ Хwәде гӧмане дьдә мә, wәки проблемед мә wе сафи бьн! (Ишайа 33:2).

10. Чьрʹа әм дькарьн баwәр бькьн кӧ Хwәде һʹәму зӧлми wе бьдә һьлдане?

¹⁰ Хенщи wе йәке, Хwәде пироз ә (Ишайа 6:3). Әв те һʹәсабе, wәки Хwәде рʹаст у тʹәмьз ә. Әw бе qӧсур ә. Ләма жи әм дькарьн бь тʹәмамийе, итʹбарийа хwә Хwәде биньн. Ле әм дькарьн ӧса итʹбарийа хwә мәрийа биньн? Һьлбәт на, чьмки мәри дькарә нәһәqийе у нәрʹастийе бькә. Һәрге һәнә мәрийед һәq у рʹаст, дь дәсте кʹижанада сәрwерти һәйә, әwана йәкә нькарьн дәwса wан зийана дадьн, йед кӧ мәрийед зӧлм дьдьнә мә. Ле Хwәдайе мә һьмзор ә, у әw һьн дькарә у һьн жи дьхwазә зӧлмийе бьдә һьлдане. Хwәде wе ӧса бькә, wәки зӧлми ида тʹӧщар тʹӧнә бә. (Бьхунә Зәбур 37:9-11.)

ХWӘДЕ ЧА ДЬНЬҺЕРʹӘ ЛЬ СӘР НӘҺӘQИЙЕД ДОР-БӘРЕ МӘ?

11. (а) Ча Хwәде дьньһерʹә ль сәр нәһәqийед ве дьнйайе? (б) Хwәде чь ль сәр хwә тʹәхмин дькә, чахе дьбинә кӧ тӧ дьчәрчьри?

¹¹ Чахе Хwәде нәһәqийед ве дьнйайе у нәһәqийед кӧ һьмбәри тә тенә кьрьне дьбинә, гәло әw чь ль сәр хwә тʹәхмин дькә? Кʹьтеба Пироз мә һин дькә, wәки Хwәде «кʹамьл ә у һәq ә» (Qануна Дӧщари 32:4, ПКʹМ). Ләма жи Хwәде дьхwазә wәки мәрьв һәqийе бькьн, нә кӧ нәһәqийе. Әва гәләк фәрз ә сәва Хwәде, чьмки һʹәму нәһәqийед кӧ мәрьв дькьн бәр чʹәʹве Хwәде рʹәш ә. Кʹьтеба Пироз дьбежә, кӧ бәре, чахе дьнйа бь зӧлмийе тʹьжә бу Хwәде «гәләки дьлтәнг бу» (Дәстпебун 6:5, 6, ПКʹМ). Хwәде нәһатийә гӧһастьне (Малахи 3:6). Бәр чʹәʹве wи диса жи һʹәму зӧлмийa ве дьнйайе рʹәш ә. У әw бәрхwә дькʹәвә чахе дьбинә кӧ мәрьв чаwа дьчәрчьрьн. Кʹьтеба Пироз дьбежә кӧ: «Әw бона wә хәм дькә». (Бьхунә 1 Пәтрус 5:7.)

12, 13. (а) Жь кʹӧ щәм мә һәйә һʹӧнӧред лапи баш, демәк һʹьзкьрьн? (б) Чьма тӧ дькари баwәр ки, wәки Хwәде әʹсәйи һʹәму нәһәqийа у чәтьнайа бьдә һьлдане?

¹² Әм жь кʹӧ заньн wәки нәһәqийед ве дьнйайе Хwәде хwәш найен? Бона ве йәке гәлә избаткьрьн һәнә. Мәсәлә Кʹьтеба Пироз дьбежә, wәки Хwәде мәри мина хwә әʹфьрандийә (Дәстпебун 1:26). Әв һʹӧнӧред баш чь кӧ щәм мә һәнә, жь Хwәде нә. Мәсәлә, тӧ чь ль сәр хwә тʹәхмин дьки чахе дьбини кӧ мәрики qәнщ у һәq дьчәрчьрә? Һәрге нәһәqийед ӧса тә хwәш найен, бьзаньбә wәки һе зедә Хwәде хwәш найен.

¹³ Һʹӧнӧрәки лапи баш йе кӧ щәм мә һәйә, әв һʹьзкьрьн ә. Әва жи жь Хwәде йә. Кʹьтеба Пироз дьбежә, wәки «Хwәде һʹьзкьрьн ә» (1 Йуһʹәнна 4:8). Демәк щәм мә һʹьзкьрьн ләма һәйә, чьмки Хwәде әв һʹӧнӧре хwә дәрбази мә кьрийә. Рʹожа иройин әм дьбиньн кӧ дьнйайеда гәлә нәһәqи тенә кьрьне. Wәки дәсте тә бьһата, тәйе һʹәму нәһәqи бьда һьлдане? Һьлбәт тәйе бьхwәста әв йәк бькьра, чьмки һʹьзкьрьна тә һәйә. Һәрге әм дьхwазьн хьрабийе бьдьнә һьлдане, демәк Хwәде жь мә зәʹфтьр дьхwазә. Ләма жи Хwәде әʹсәйи һʹәму нәһәqи у зӧлми wе бьдә һьлдане. Әв созед кӧ ль сәр рʹупʹела 4 һатийә ньвисаре, нә тʹәне хwәстьна дьла йә, у нә жи чʹирʹок ьн. Әв созед Хwәде нә у әʹсәйи wе бенә сери! Ләма жи тӧ чьqаси зәʹф дәрһәqа Хwәде пебьһʹәси, һаqаси баwәрийа тә һьндава созед wи wе һе зедә бә.

ХWӘДЕ ДЬХWАЗӘ WӘКИ ӘМ WИ НАС БЬКЬН

14. Наве Хwәде чь йә, у чьрʹа әм гәрәке әви нави бьдьнә хәбате?

¹⁴ Чахе тӧ дьхwази тʹәви йәке бьби нас, тӧ чь дьки? Пешийе наве хwә жерʹа дьбежи, ӧса нинә? Ле гәло наве Хwәде чь йә? Иро ниве зәʹф жь мәрийа баwәр дькьн wәки гәлә хӧдан һәнә, у наве wан һәр кәса һәйә. Ле Кʹьтеба Пироз һин дькә, wәки Хwәдайе рʹаст йәк ә. Һьнә ӧлмдар жи дьбежьн wәки Хwәде йәк ә у наве wи «Хӧдан ә», йан жи «Хwәде» йә. Ле бь рʹастийе әв наве Хwәде нин ьн. Әв сәрнав ьн, мәсәлә ча «пʹадша» йан «сәрок». Кʹьтеба Пироз һин дькә, wәки сәрнавед Хwәде гәләк һәнә, «Хӧдан» «Хwәде» әв тʹәне һьнә жь ван сәрнава нә. Һьн жи Кʹьтеба Пироз һин дькә, wәки тʹәне навәки Хwәде һәйә, Йаһоwа. Дь Кʹьтеба Пирозда йа сәр зьмане Кӧрманщи, кʹьтеба Дәркʹәтьне 3:15-да, дина хwә бьдә насийа бь стәйрке нишанкьри, кʹидәре ӧса ньвисар ә: «Бь зьмане ибрани хәбәра «Хӧдан» ЙҺWҺ ньвисар ә у те хwәндьне чаwа «Йаһwәһ», йан жи «Йаһоwа (ПКʹМ)». Һәрге дь wәлгәрʹандьна Кʹьтеба Пирозда йе кӧ бал тә һәйә, наве Йаһоwа тʹӧнә, тӧ дькари дь ве кʹьтебеда бьньһерʹи рʹупʹела 195-197 у пебьһʹәси чьрʹа әw жь һьнә wәлгәрʹандьна һатийә дәрхьстьне. Ле бь рʹастийе дь Кʹьтеба Пирозә орижиналеда наве Хwәде wәкә бь һʹәзара щар һәйә. Бь ве йәке те кʹьфше, wәки Йаһоwа хwәха дьхwазә кӧ әм наве wи бьзаньбьн у һьлдьн. Демәк Йаһоwа Хwәде дьхwазә пе Кʹьтеба Пироз хwә тәрʹа әʹйан бькә.

15. Наве Йаһоwа чь дьдә кʹьфше?

¹⁵ Хwәде наве ӧса хwәрʹа жьбартийә, кӧ гәлә тьштед фәрз те һʹәсабе. Наве wи Йаһоwа, те һʹәсабе кӧ әw һәр созәки хwә дькарә бинә сери у һәр нетәкә хwә, кӧ данийә пешийа хwә, wе бинә сери.b Навәки ӧса ида тʹӧнә йә, әв нав тʹәк ә. Тʹәне Хwәде һежайи ви нави йә у тʹәне wирʹа әв нав дькʹәвә. Демәк жь һʹәму алийава йәки мина Йаһоwа тʹӧнә, у тʹӧ кәс нькарә бәрамбәри wи бә. Гәло әв чь те һʹәсабе?

16, 17. Әм чь педьһʹәсьн жь Кʹьтеба Пироз дәрһәqа Йаһоwа жь wан гьлийа: (а) Хwәдайе «Һʹәму Зорайийе»? (б) Хwәдайе «жь бәрʹийа һʹәму һәбуне, һʹәта-һʹәтайе»? (в) «Әʹфьрандар»?

¹⁶ Зәбура 83:18 бона Йаһоwа дьбежә, кӧ әw Хwәдайе «һәри мәзьн ә». Тʹәне бона Хwәде Йаһоwа те готьне wәки әw ә «Хwәдейе һʹәму Зорайийе». Әʹйанти 15:3 дьбежә: «Кьред тә мәзьн у әʹщеб ьн Хӧдан Хwәдейе Һʹәму Зорайийе!» Әв гьли кӧ Йаһоwа Хwәдайе «Һʹәму Зорайийе йә», те һʹәсабе, кӧ Йаһоwа жь һʹәмуйа зортьр у qәwаттьр ә. Йәки мина wи тʹӧнә йә, у әw ль сәр һʹәмуйарʹа йә. Чьмки дәстпебуна һәр тьшти һәбуйә, ле дәстпебуна Йаһоwа тʹӧнә, әw тʹьме һәбу у wе һәбә. Кʹьтеба Зәбура 90:2 дьбежә: «Жь бәрʹийа тʹәвайә һәбуне һʹәта-һʹәтайе, тʹәне тӧ Хwәда йи (АБ)». Әв фькьр мәрийа дьдә ләрьзандьне, ӧса нинә?

¹⁷ Йәки мина Йаһоwа Хwәде тʹӧнә, чьмки тʹәне әw ә Әʹфьрандар. Кʹьтеба Әʹйанти 4:11 дьбежә: «Йа Хӧдан Хwәдейе мә, тӧ һежа йи кӧ рʹумәт, һӧрмәте у qәwате бьстини. Чьмки тә һәр тьшт әʹфьрандьн у бь хwәстьна тә әw әʹфьрин у һәнә». Һʹәму тьштед кӧ тӧ дькари бьбини, дәстпебуйи жь стәйрка кӧ дьчʹурьсьн, һʹәта даред щурʹә-щурʹә у мәʹсийед дь бәʹреда у чʹемда, әʹфьрандьна Йаһоwа нә!

ГӘЛО ӘМ ДЬКАРЬН НЕЗИКИ ЙАҺОWА БЬН?

18. Чьрʹа һьнә мәрийа тʹьре, кӧ әwана тʹӧ щар нькарьн незики Йаһоwа Хwәде бьн, ле чь һин дькә Кʹьтеба Пироз?

¹⁸ Гава мәрьв дьхуньн дәрһәqа һьмзорйа Йаһоwа, тьрс дькʹәвә дьле wан. Wана тʹьре кӧ Йаһоwа Хwәде жь wан гәләк дур ә, у әwана тʹӧ щар нькарьн незики wи бьн, у дьбәк жи бәр чʹәʹве Хwәде qә тʹӧ тьшт жи найенә һʹәсабе. Ле әва рʹаст ә? Кʹьтеба Пироз щурʹәки майин һин дькә. Дәрһәqа Йаһоwа әw дьбежә: «Ле әw Хwәде жь мә һәр кәси нә дур ә» (Кʹаред Шандийа 17: 27). Ӧса жи Кʹьтеба Пироз мә ширәт дькә: «Хwә ль Хwәде бьгьрьн, Хwәде жи wе хwә ль wә бьгьрә» (Аqуб 4:8).

19. (а) Ча әм дькарьн хwә ль Хwәде бьгьрьн, у әв йәк чь кʹаре wе мәрʹа бинә? (б) Кʹижан һʹӧнӧред Хwәде жь һʹәмушка зедәтьр тә хwәш тен?

¹⁹ Ле ча тӧ дькари незики Йаһоwа Хwәде би? Йа пешьн, һәрге тӧ диса һе зедә пебьһʹәси у һин би дәрһәqа Хwәде. Дь Кʹьтеба Пирозда ӧса ньвисар ә: «Әв ә жийина һʹәта-һʹәтайе, wәки әw тә нас кьн, чаwа Хwәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3). Демәк Кʹьтеба Пироз һин дькә, кӧ һәрге әм һин бьн дәрһәqа Йаһоwа әме «жийина һʹәтаһʹәтайе» бьстиньн! Ча ида һатьбу готьне Хwәде рʹасти жи «һʹьзкьрьн ә» (1 Йуһʹәнна 4:16). Ле хенщи һʹьзкьрьне, диса гәләк һʹӧнӧред баш бал Йаһоwа Хwәде һәнә. Мәсәлә Кʹьтеба Пироз сәва Йаһоwа һа дьбежә, wәки әw һәйә «Хwәдейе рʹәʹм у кʹәрәме, сәбьр-ськʹане, бь һӧб у амьнийеда хьнейо» (Дәркʹәтьн 34:6, ПКʹМ). Әw qәнщ ә у бахшандьнерʹа һазьр ә (Зәбур 86:5). Хwәде сәбьр дькә (2 Пәтрус 3:9). Әw амьн ә (Ибрани 11:11). Wәʹде хwәндьна Кʹьтеба Пироз тӧйе һе зедә пебьһʹәси, wәки Йаһоwа Хwәде чаwа ван һʹӧнӧред баш дьдә хәбате у әʹйан дькә.

20-22. (а) Рʹаст ә әм нькарьн Хwәде бьбиньн, ле әв те һʹәсабе wәки әм нькарьн незики wи бьн? Шьровәкә. (б) Һьнә мәри ча хер-хwазе тә, чь дькарьн бькьн, ле тӧ чь гәрәке бьки?

²⁰ Рʹаст ә тӧ нькари Йаһоwа бьбини, чьмки әw Рʹӧһʹ ә у найе дитьне (Йуһʹәнна 1:18; 4:24; 1 Тимотʹейо 1:17). Ле бь сайа хwәндьна Кʹьтеба Пироз тӧйе бькарьби wи нас ки, ча Кәсе кӧ рʹасти жи һәйә. Ча зәбурбеж гот әм рʹасти жи дькарьн рʹәʹма Йаһоwа бьбиньн (Зәбур 27:4; Рʹомайи 1:20). Тӧ чьqас зәʹф Кʹьтеба Пироз бьхуни, һаqас зәʹф Йаһоwа сәва тә wе бьбә кәсе рʹасти у зенди, у һе зедә мәʹни wе тәрʹа һәбьн, wәки Йаһоwа һʹьз бьки у һе незики wи бьби.

²¹ Паше тӧйе пебьһʹәси, wәки чьрʹа дь Кʹьтеба Пирозда сәр Йаһоwа те готьне Бав (Мәтта 6:9). Әwи нә тʹәне әʹмьр дайә мә, ле ча Бавәки зарʹед хwә һʹьз дькә, әw мәрʹа qәнщийе дьхwазә у һьн жи дьхwазә wәки әм бәхтәwар бьн (Зәбур 36:9). Хенщи ве йәке Кʹьтеба Пироз һин дькә, wәки мәри дькарьн бьбьнә достед Йаһоwа Хwәде (Аԛуб 2:23). Дә тӧ тʹәне бьдә һʹәсабе хwә, wәки Әʹфьрандаре дьнйайе дькарә бьбә досте тә!

²² Һәрге тӧ һинбуна Кʹьтеба Пироз бәрдәwан ки, дьqәwьмә һьнә мәри ча хер-хwазе тә, тә бьдьнә зоре wәки тӧ Кʹьтеба Пироз һин нәби. Әwана дькарьн бәрхwә кʹәвьн дәрһәqа wе йәке, кӧ тӧ жь дине хwә дәрдькʹәви. Ле изьне нәдә тʹӧ кәси жь wана рʹийа тә бьгьрьн, wәки достийе һәвале лапи башрʹа бьки.

23, 24. (а) Чьрʹа гәрәке шәрм нәки тʹьме пьрса бьди? (б) Дәрһәqа чь әме дь сәре дьнда пебьһʹәсьн?

²³ Дьбәк кӧ тьштәк тәрʹа wе фәʹмдари нибә. Ле шәрм нәкә аликʹарийе бьхwази. Сәва ве йәке һьлбәт тәрʹа мьлукти лазьм ә. Һәла һе дь Кʹьтеба Пирозда жи те готьне, wәки әм гәрәке мина зарʹа мьлук бьн (Мәтта 18:2-4). Ле зарʹ шәрм накьн гәлә пьрса бьдьн. Ләма жи Хwәде дьхwазә wәки тӧ пьрса бьди у щабед wан бьстини. Кʹьтеба Пироз пәсьне wан мәрийа дьдә, йед кӧ дьхwәстьн пебьһʹәсьн дәрһәqа Хwәде. Әwана кʹур Кʹьтеба Пироз леколин дькьрьн, wәки рʹаст бьзаньбьн һәла тьштед кӧ әwана дьхуньн рʹаст ьн, йан на. (Бьхунә Кʹаред Шандийа 17:11.)

²⁴ Бь сайа һинбуна Кʹьтеба Пироз тӧйе һе баш пебьһʹәси дәрһәqа Йаһоwа Хwәде. Кʹьтеба Пироз нә мина һʹәму кʹьтеба нә. Ле гәло чьрʹа? Дәрһәqа ве йәке әме дь сәре дьнда пебьһʹәсьн.