Тö Дьхԝази Пебьһʹәси Рʹастийе?

РʹАСТИ дәрһәԛа чь? Дәрһәԛа ԝан пьрса, йед кӧ мәри ль сәр ԝан дьфькьрьн. Дьбәк тә жи әв пьрс данә хԝә:

Гәло Хԝәде рʹасти мә һʹьз дькә?
Гәло ԝе бе әԝ ԝәʹдә чахе шәрʹ у щәфа кʹӧта бьн?
Чь дьԛәԝьмә паши мьрьне?
Гәло чь гӧман һәйә бона мьрийа?
Әз ча гәрәке дӧа бькьм, ԝәки Хԝәде дӧайед мьн бьбьһе?
Әз чь бькьм кӧ әʹмьре мьн бәхтәԝар бә?

Тӧ ча дьшьрмиш дьби, щаба ԝан пьрса кʹӧ дькари бьвини? Дь кʹьтебханәда у дькʹанед кʹьтебада тӧйе бь һʹәзара кʹьтеба бьвини, ньвискʹаред кʹижана избат дькьн, кӧ щаба ван пьрса заньн. Ле гәлә щар кʹьтебәк һьмбәри кʹьтеба дьн дьчә. Һьнә кʹьтеб, мәрийа тʹьре кӧ сәва рʹожа иройин гәлә керһати нә, ле ԝәʹдәки кьн дәрбаз дьбә у әв кʹьтеб кәвьн дьбьн у дәԝса ԝан йе тʹәзә тенә ньвисаре.

Ле кʹьтебәк һәйә, йа кӧ һежа йә тӧ итʹбарийа хԝә ле бини. Әв кʹьтеба рʹастийе йә, у дәрәԝи теда тʹӧнә. Иса Мәсиһ дь дӧайе хԝәда Хԝәдерʹа гот: «Хәбәра тә рʹасти йә» (Йуһʹәнна 17:17). Иро әв кʹьтеб әйан ә ча Кʹьтеба Пироз. Жь ве бәлавоке те бьвини, кӧ Кʹьтеба Пироз щаба ван пьрса чьԛа рʹаст у фәʹмдари дьдә.

Гәло Хԝәде Рʹасти Мә Һʹьз Дькә?

ЧЬРʹА ӘВ ПЬРС ПЕШДА ТЕ: Чьмки әм дьжин дьнйакә нәһәԛ у беисафда. Һьн жи, гәләк религийа һин дькьн, кӧ щәфед мә ԛьрара Хԝәде йә.

ЧЬ ҺИН ДЬКӘ КʹЬТЕБА ПИРОЗ: Хԝәде тʹӧ щар зӧлме накә. Дь кʹьтеба Ибода 34:10-да һатә ньвисаре, кӧ набә Хԝәдайе рʹаст у Һьмзор «хьрабийе бькә у . . . нәһәԛийе пек бинә!» Нетәкә Хԝәде гәлә баш сәва мәрийа һәйә. Ләма жи Иса мә һин дькьр, кӧ дӧа бькьн: «Баве мәйи әʹзмана! . . . Пʹадшатийа тә бә, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:9, 10). Хԝәде ӧса мә һʹьз дькә, кӧ сәва мә ԛӧрбанәкә гәлә бьһа бәрва да, кӧ ԛьрара хԝә бинә сери (Йуһʹәнна 3:16).

Бьньһерʹә ӧса жи Дәстпебун 1:26-28; Аԛуб 1:13 у 1 Пәтрус 5:6, 7.

Гәло ԝе Бе Әԝ ԝәʹдә Чахе Шәрʹ у Щәфа Кʹöта бьн?

Гәдәки бьчʹук нәхԝәшханеда йә у рʹуйе ԝи бьриндар ә

ЧЬРʹА ӘВ ПЬРС ПЕШДА ТЕ: Чьмки шәрʹ әʹмьре гәләк бәнда дьбә. Кәс жь мә дьлсар наминә сәва щәфед мәрийа.

ЧЬ ҺИН ДЬКӘ КʹЬТЕБА ПИРОЗ: Хԝәде дьвежә, кӧ ԝе бе ԝәʹдә, чахе ль сәр тʹәмамийа дьнйайе ԝе әʹдьлайи һәбә. ԝәʹде Пʹадшатийа ԝи, демәк сәрԝертийа әʹзмана, мәри ԝе һини шәрʹ нәбьн. Әԝана ԝе чʹәк у рʹьмед хԝә бьһʹәлиньн у бькьн кʹеред рʹәзвана (Ишайа 2:4). Хԝәде ԝе нәһәԛийе у кӧл-дәрда бьдә һьлдане. Дь Кʹьтеба Пирозда һатийә ньвисаре: «[Хԝәде] жь чʹәʹвед ԝан һʹәму һесьред ԝан паԛьж кә у иди мьрьне тʹӧнә бә, нә шин, нә гьри, нә еш-ешук, [нә жи нәһәԛи у зерандьна иройин], чьмки тьштед бәре дәрбаз бун» (Әʹйанти 21:3, 4).

Бьньһерʹә ӧса жи Зәбура 37:10, 11; 46:9 у Миха 4:1-4.

Чь Дьqәԝьмә Паши Мьрьне?

ЧЬРʹА ӘВ ПЬРС ПЕШДА ТЕ: Чьмки ниве зәʹф жь дине мәрийа, йане религийа, һин дькьн кӧ паши мьрьне рʹӧһʹе мәрийа бәрдәԝам дькә дьжи. Һьнәк баԝәр дькьн, кӧ мьри дькарә зийане бьдә мәрийа у кӧ Хԝәде мәрийед гӧнәкʹар сущ дькә, давежә щәʹньме, ԝәки әԝана һʹәта-һʹәтайе бьчәрчьрьн.

ЧЬ ҺИН ДЬКӘ КʹЬТЕБА ПИРОЗ: Чахе мәри дьмьрә, әԝ иди нажи. Дь ԝаизда 9:5 те готьне: «Мьри . . . тьштәки ньзаньн». Бәле, мьри һаш жь тьштәки тʹӧнәнә у тьштәк тʹәхмин накьн, ләма жи әԝана нькарьн нә зийане бьдьнә мәрийа, нә жи кʹаре (Зәбур 146:3, 4).

Бьньһерʹә ӧса жи Дәстпебун 3:19 у Ԝаиз 9:6, 10.

Гәло Чь Гöман Һәйә бона Мьрийа?

Кәчʹькәкә бьчʹук гӧл дәсте хԝәда гьртийә

ЧЬРʹА ӘВ ПЬРС ПЕШДА ТЕ: Әм гьшк жи дьхԝазьн тʹәви мәрийед хԝә, кʹижана әм һʹьз дькьн, бьжин у ша бьн. Һьн жи һʹьзрәта мә әԝ ә, кӧ әм диса бьра-пьзмаме хԝә бьвиньн, йед кӧ мьрьнә.

ЧЬ ҺИН ДЬКӘ КʹЬТЕБА ПИРОЗ: Һʹәчʹи зәʹф жь мьрийа, ԝе жь мьрьне рʹабьн. Иса соз да, ԝәки «һʹәмуйед тʹьрбада ԝе дәнге ԝи бьбьһен у рʹабьн» (Йуһʹәнна 5:28, 29). Бь нета Хԝәде, мәрьвед кӧ жь мьрьне рʹабьн ԝе мәщале бьстиньн дь щьнәтеда ль сәр әʹрде бьжин (Луԛа 23:43). Хенщи ве йәке, әԝе кӧ гӧрʹа Хԝәде бькә, ԝе сьһʹәт-ԛәԝата ԛәданди бьстинә у һʹәта-һʹәтайе бьжи. Кʹьтеба Пироз дьвежә, кӧ мәрийед ԛәнщ ԝе бьжин сәр әʹрде һʹәта-һʹәтайе (Зәбур 37:29).

Бьньһерʹә ӧса жи Ибо 14:14, 15; Луԛа 7:11-17 у Кʹаред Шандийа 24:15.

Әз Ча Гәрәке Дöа Бькьм, ԝәки Хԝәде Дöайед Мьн Бьбьһе?

ЧЬРʹА ӘВ ПЬРС ПЕШДА ТЕ: ԛӧльхчийед һʹәму религийа жи Хԝәдерʹа дӧа дькьн. Ле гәләк жь ԝан дьфькьрьн кӧ Хԝәде щаба дӧайед ԝан надә.

ЧЬ ҺИН ДЬКӘ КʹЬТЕБА ПИРОЗ: Иса мә һин дькьр ча гәрәке дӧа бькьн. Әм гәрәке дӧайед хԝә әзбәри һин нәбьн у нәԝәкʹьлиньн. Иса гьлийе ӧса гот: «Гава кӧ һун дӧа дькьн, мина пʹутпарьста пʹьрʹхәбәр нәбьн» (Мәтта 6:7). Һәрге әм дьхԝазьн, кӧ Хԝәде мә бьбьһе, әм гәрәке ӧса дӧа бькьн, ча Хԝәде дьхԝазә. Сәва ве йәке мәрʹа әʹсәйи лазьмә пебьһʹәсьн чь йә ԛьрара Хԝәде у паше бь ԛьрара ԝи дӧа бькьн. Дь 1 Йуһʹәнна 5:14-да ньвисар ә: «Һәгәр әм тьштәки ль гӧра хԝәстьна ԝи же [Хԝәде] бьхԝазьн, әԝ дәнге мә дьбьһе».

Бьньһерʹә ӧса жи Зәбура 65:2; Йуһʹәнна 14:6, 14 у 1 Йуһʹәнна 3:22.

Әз Чь Бькьм кö Әʹмьре Мьн Бәхтәԝар бә?

Жьнькәк бь бәшәра хԝәш Кʹьтеба гьртийә дәсте хwә

ЧЬРʹА ӘВ ПЬРС ПЕШДА ТЕ: Гәләка тʹьре, кӧ пʹәрә, навдари, йане жи бәжьн-бала бәдәԝ, кʹьлита бәхтәԝарийе йә. Әԝана бь һʹәму ԛәԝата хԝә дьхԝазьн ван тьшта бьстиньн, ле йәкә бәхтәԝарийе навиньн.

ЧЬ ҺИН ДЬКӘ КʹЬТЕБА ПИРОЗ: Иса нишан кьр, ԝәки кʹьлита бәхтәԝарбуне чь йә. Әԝи гот: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани» (Мәтта 5:3, ДТʹ). Әԝед кӧ дьхԝазьн рʹастийе дәрһәԛа Хԝәде пебьһʹәсьн, рʹасти жи бәхтәԝар ьн. Рʹастийа дәрһәԛа Хԝәде дь Кʹьтеба Пирозда ньвисийә. Һәрге әм ве кʹьтебе бьхуньн у рʹастийе бьзаньбьн, әме фәʹм бькьн, чь дь әʹмьре мәда дьһа фәрз ә у чь жи на. Һәрге әм һʹәму пьрс у шьхӧлед хԝәда ширәтед Кʹьтеба Пироз һьлдьн һʹәсаб, әме дьһа бәхтәԝар бьн (Луԛа 11:28).

Бьньһерʹә ӧса жи Мәтʹәлок 3:5, 6, 13-18 у 1 Тимотʹейо 6:9, 10.

Шәʹдәкә Йаһоԝа жьнькәкерʹа рʹеза жь Кʹьтеба Пироз дьхунә

Мә жь Кʹьтеба Пироз кьн щаба ԝан шәш пьрса да. Ле тӧйе бьхԝази һе зедә пебьһʹәси? Һәрге тӧ мәрики ӧса ни кӧ фәʹм дьки һʹәԝщәтийа хԝәйә рʹӧһʹани, шьк тʹӧнә, те әʹсәйи бьхԝази. Дьбәк тӧ дьхԝази пебьһʹәси: «Һәрге Хԝәде мә һʹьз дькә, чьрʹа әԝ дьһелә кӧ һаԛас зӧлми у нәһәԛи һәбә? Әз малбәта хԝәва ча дькарьм бәхтәԝар бьм?» Кʹьтеба Пироз ль сәр ван пьрса у пьрсед дьнена жи щабед рʹаст дьдә.

Ле иро гәләк мәри ԛә гӧһ надьнә Кʹьтеба Пироз. Әԝана дьфькьрьн кӧ әв кʹьтебәкә мәзьн ә у чәтьн те фәʹмкьрьне. Тәйе бьхԝәста, кӧ кәсәк али тә бькә, щаба пьрсед хԝә дь Кʹьтеба Пирозда бьвини? Шәʹдед Йаһоԝа дькарьн бь дӧ тьшти али тә бькьн.

Йа пешьн, әв һәйә кʹьтеба «Чь Һин Дькә Кʹьтеба Пироз?». Әв кʹьтеб сәва ԝе йәке һатийә дәрхьстьне, кӧ али ԝан мәрьва бькә щаба пьрсед хԝәйә фәрз жь Кʹьтеба Пироз бьстиньн, ԝәʹде кʹижана һьндьнк ә. Йа дӧда жи әԝана дькарьн бепʹәрә һинбуна Кʹьтеба Пироз тʹәви тә дәрбаз кьн. Шәʹдед Йаһоԝа, йед кӧ незики тә дьжин, дькарьн һʹәфте щарәки бенә мала тә, йан жи ԝе дәре кʹидәре һун дьхԝазьн у тʹәви тә дәрһәԛа Кʹьтеба Пироз шеԝьр кьн. Һинкьрьна ӧса ида дь тʹәмамийа дьнйайеда али бь һʹәзара мәрийа кьрийә. Гәләк жь ван мәрийа ньһа дькарьн мьԛим бежьн: «Әз рʹастийе заньм!»

Шәʹдәки Йаһоԝа тʹәви мерькәки дәрһәԛа Кʹьтеба Пироз шеԝьр дькә

Рʹастийа Кʹьтеба Пироз, әв хьзна беһʹәсаб ԛимәт ә. Әԝ мә жь һинкьрьнед ԛәлп, жь дьлтәнги у тьрсе аза дькә. Әԝ шабуне, мәрәме у гӧмане дьдә мәрийа. Иса гот: «Һуне рʹастийе нас кьн у рʹастийе ԝә аза кә» (Йуһʹәнна 8:32).