Чахе Мәрьве Тәйи Незик Дьмьрә
ҺӘРГЕ ТӘ жи кәсәк жь мәрьвед хԝәйә незик ӧнда кьрийә, ԝәки ӧса нә тәрʹа нас ьн: һьсрәт, тʹәнебун у бечʹарәбун. Дьԛәԝьмә тә ӧса жи һерсбун, хԝәнәһәԛкьрьн у тьрс тʹәхмин дькьр. Ԝе дәме тӧ дьфькьри: «Гәло һежа йә бьжим?»
Һәрге тӧ гәләк ԝәхт шине дьки, бьзаньбә, әв нишана сьстбуне нинә. Әв йәк дьдә кʹьфше, ԝәки тә чьԛас мәрьве хԝәйә незик һʹьз дькьр. Гәло ԛә дьбә ԝәки еша дьл, һәвәки сьвьк бә?
ЧАԜА ҺЬНӘКА ТӘЙАХ КЬРЬНӘ
Дькарә ӧса бе кʹьфше, ԝәки бьрина дьле тә ԝе тʹӧ щар ԛәнщ нәбә, ле чь жи һәбә тӧ дькари һʹәвәки рʹьһʹәтийе тʹәхмин ки, һәрге дина хԝә бьди рʹебәрийед кӧ жере тенә дайине:
ЕМОСИЙЕД ХԜӘ, ХԜӘДА НӘГЬРӘ
Һәр кәс бь щурʹе хԝә шине дькә у әв щурʹә-щурʹә ԝәхт дькʹьшинә. Чахе мәрьв һесьра дьбариньн, әв йәк еша дьле ԝан сьвьк дькә. Ванеса, дәрһәԛа кʹижани кӧ жоре һатьбу готьне дьбежә: «Һәбу ԝәʹдә әз тʹәмамийа рʹоже дьгьрийам; Мьнрʹа лазьм бу еша дьле хԝә бьрʹежьм». Софиа, хушка кʹижани кӧ ньшкева жийина хԝә ӧнда кьр, дьбежә: «Мьрьна мәрьве незик дәрдәки гәләк гьран ә, әв ча бежи мина бьрине йә, йа кӧ тʹьме вәдькьн у тʹәмьз дькьн. Щарна тә тʹьре кӧ тӧйе нькарьби әве еше тәйах ки, ле әԝ ԝе һеди-һеди ԛәнщ бә».
ДӘРҺӘԚА ФЬКЬР У ҺӘСТЕД ХԜӘ ХӘБӘР ДӘ
Фәʹмдари йә кӧ щарна те бьхԝази тʹәне бьмини. Тәйахкьрьна дәрдәки ӧса, мина барәки гьран ә, кʹижан кӧ тәрʹа гәләк зәʹмәт ә бькʹьшини. Жаред йе кӧ 17 сали йә, у баве хԝә ӧнда кьрийә, гьли дькә: «Мьн дәрде дьле хԝә, мәрьварʹа вәдькьр. Һәмьки ве дәме мьн нькарьбу һʹәму тьшт зәлал шьровәкьра, ле бь ве йәке дьле мьн рʹьһʹәт дьбу». Щени, дәрһәԛа кʹижани кӧ готара пешьнда һатьбу готьне, дьбежә:«Чахе фькьр у һәстед хԝә кәсәкирʹа вәдьки, тӧ бәрдьлийа мәзьн дьстини. Мәрьва һʹале мьн фәʹм дькьрьн, ләма жи мьн хԝә тʹәне тʹәхмин нәдькьр».
АЛИКʹАРИЙЕ ԚӘБУЛ КӘ
Дохдьрәки гьлийе ӧса гот: «Чахе тӧ дьһели, ԝәки һәвал у пьсмамед тә али тә бькьн, һьнге дәрде тә сьвьк дьбә». Бьһелә ԝәки һәвалед тә бьзаньбьн, кӧ чь щурʹәйи али тә бькьн; һәвал дьхԝазьн али тә бькьн, ле гәләк щар ньзаньн ча әве йәке бькьн (Мәтʹәлок 17:17).
ХԜӘ ЛЬ НЕЗИКИ ХԜӘДЕ БЬГЬРӘ
Тʹина дьбежә: «Чахе мере мьн жь бо нәхԝәшийа кʹансәре мьр, мьн ида ньзаньбу кʹера дәрде дьле хԝә бьрʹежьм, ләма мьн дәстпекьр Хԝәдерʹа һʹәму тьшти бежьм! Һәр рʹож мьн лавайа ԝи дькьр, ԝәки али мьн бькә әве рʹоже жи тәйах кьм. Хԝәде гәләк али мьн кьр». Тарша, 22 сали бу чахе дийа ԝе мьр. Әԝ дьбежә: «Хԝәндьна Кʹьтеба Пирозә һәр рʹожи, бона мьн канийа бәрдьлийе бу. Әве йәке али мьн дькьр дина хԝә дәрбази сәр тьштәки баш кьм».
БЬДӘ БӘР ЧʹӘʹВЕ ХԜӘ САХКЬРЬНА МЬРИЙЕД ХԜӘ
Тʹина бәрдәԝам дькә: «Пешийе созе дәрһәԛа сахкьрьна мьрийа, ԛә бәрдьли нәдьда мьн, чьмки ве дәме әз һʹәԝще мере хԝә бум, у кӧрʹед мьн жи һʹәԝще баве хԝә бун. Ньһа чар сал дәрбаз буйә, у һевийа сахкьрьне, мьн гәләк ԛәԝи дькә. Әв һәма әв ә, чь кӧ али мьн дькә бәрдәԝам кьм бьжим. Әз дьдьмә бәр чʹәʹве хԝә ԝи ԝәʹдейи, чахе ԝи бьвиньм. Әв йәк әʹдьлайе у шабуне дькә дьле мьн!»
Һәмьки дәрберʹа те нькарьби дьлрʹьһʹәтийа ӧса ль сәр хԝә тʹәхмин ки. Мәсәла Ванесайе, гәләк мә дьшьдинә. Әԝ дьбежә: «Тӧ дьфькьри ԝәки дәрде тә ԝе ԛә сьвьк нәбә, ле ԝәʹдә шунда тӧ тәхмин дьки, ԝәки еша дьле тә һәвәки сьвьк дьбә».
Рʹаст ә дәхма бьрина дьле мә дьминә, ле бир нәкьн ԝәки диса жи һежа йә бәрдәԝам кьн бьжин. Бь аликʹари у һʹьзкьрьна Хԝәде, тӧ диса дькари ләзәте бьстини жь һәвалтийа баш у нета жийина тә ԝе бәтавәнәбә. Зутьрәке Хԝәде ԝе мьрийед мәйи һʹьзкьри жь мьрьне рʹакә. Хԝәде һʹьзрәт ә, ԝәки әм мәрьвед хԝә диса бькарьбьн һәмез кьн. Һьнге еша дьле тә, ԝе бь тʹәмами у һʹәта-һʹәтайе ԛәнщ бә!