Тәнгасийада Итʹбарийа Хԝә Йаһоԝа Биньн

1. Чьрʹа әм гәрәке гӧһ бьдьнә гьлийед Иса?

ИСА чахе дәрһәԛа рʹожед ахьрийе пʹехәмбәрти кьр, гот: «Мьԛати хԝә бьн, нәбә кӧ дьле ԝә . . . хәмед ве дьнйайева гьредайи бә» (Луԛа 21:34). Әм гәрәке ԝан гьлийа пьшт гӧһе хԝәва нәвежьн. Чьрʹа? Чьмки иро әм жи мина һʹәму мәрьва рʹасти чәтьнайа у стресе тен.

2. Хушк-бьред мә рʹасти чь тәнгасийа тен?

² Щара әм щарәкева рʹасти чәнд проблема тен. Дина хԝә бьдьнә ԝан мәсәла. Бьраки мә бь наве Щон,b йе кӧ пе нәхԝашийа скләроза әнифьрәһ (multiplе sclеrosis) нәхԝаш ә, кʹәтә стресәкә гьран, чахе жьна ԝи әԝ һишт, паши 19 салед зәԝаща ԝан. Паше дӧ ԛизед ԝи хьзмәтийа хԝә Йаһоԝарʹа данә сәкьнандьне. Жьн-мер, Боб у Линда рʹасти тәнгасийед дьн һатьн. Ԝан һәрда жи хәбата хԝә ӧнда кьрьн, у паше мала хԝә ӧнда кьрьн. Сәрда жи, һʹәким Линдайерʹа гот, ԝәки нәхԝәшийа ԝейә дьльк һәйә, кӧ гәләк хоф ә бона әʹмьре ԝе. Һьн жи нәхԝәшийа ԝейә артрит, дәстпекьр система имунитета ԝе һьлшинә.

3. Ль гора Филипи 4:6, 7, әм чьда дькарьн дӧдьли нәбьн?

³ Әм дькарьн дӧдьли нәбьн, ԝәки Әʹфьрандаре мә, Баве мәйи һʹьзкьри Йаһоԝа, дькʹәвә һʹале мә чахе әм дькʹәвьнә стресе. У әԝ дьхԝазә али мә бькә, ԝәки әм ԝан чәтьнайада тәйах кьн. (Бьхунә Филипи 4:6, 7.) Хәбәра Хԝәдеда һәнә сәрһатийед ԝан хьзмәткʹаред Хԝәде, йед кӧ рʹасти тәʹли-тәнгасийа һатьнә. Әм жь Кʹьтеба Пироз ӧса жи педьһʹәсьн, кӧ чаԝа Йаһоԝа али ԝан дькьр, гава әԝана дьлтәнг дьбун. Ԝәрә әм чәнд мәсәла шеԝьр кьн.

ЕЛЙАС «МӘРЬВӘКИ МИНА МӘ БУ»

4. Елйас рʹасти чь тәнгасийа һат, у һәләԛәтийа ԝи тʹәви Йаһоԝа ча бу?

⁴ Елйас Йаһоԝарʹа ԝәʹде гьранда хьзмәт дькьр у рʹасти чәтьнайед мәзьн һат. Һьнге Аһаб Пʹадша, кӧ нава тʹәрихийа Исраеледа йәк жь пʹадшед нәамьн бу, Изабела зӧлм сьтанд, йа кӧ Баәʹл дьһʹәбанд. Әԝан һәрда жи нава щьмәʹтеда һʹәбандьна Баәʹл бәла кьрьн у гәләк пʹехәмбәред Йаһоԝа кӧштьн. Ле Елйас рʹәви у хьлаз бу. Ӧса жи чахе бьрчибун бу, әԝ хьлаз бу, чьмки итʹбарийа хԝә Йаһоԝа дьани (1 Пʹадш. 17:2-4, 14-16). Хенщи ве йәке, Елйас итʹбарийа хԝә Йаһоԝа ани, гава мьԛабьли пʹехәмбәред ԛәлп дәркʹәт, йед кӧ Баәʹл дьһʹәбандьн. Әԝи ӧса жи щьмәʹта Исраел һелан кьр, ԝәки Йаһоԝарʹа хьзмәт кьн (1 Пʹадш. 18:21-24, 36-38). Елйас ԝәʹде тәнгасийа гәләк щар дәсте Йаһоԝа у аликʹарийа ԝи дьдит.

5-6. Ль гора 1 Пʹадшати 19:1-4, Елйас хԝә ча тʹәхмин дькьр, у Йаһоԝа ԝирʹа ча да кʹьфше, кӧ ԝи һʹьз дькә?

⁵ Бьхунә 1 Пʹадшати 19:1-4. Елйас тьрсийа, чахе Жьн-пʹадша Изабел, гот кӧ ԝе ԝи бькӧжә. Ләма әԝ рʹәвийа Бәәр-шәбайе. Әԝ ӧса дьлтәнг бу, ԝәки «бона щане хԝә мьрьне дьхԝәст». Ле чьрʹа әԝи хԝә ӧса тʹәхмин дькьр? Елйас мәрьвәки гӧнәкʹар бу, «хут мәрьвәки мина мә бу» (Аԛуб 5:17). Әԝ стресәкә мәзьнда бу у ԛьдум кʹәтьбу, дьԛәԝьмә әԝи тʹьре чʹарә тʹӧнә. Ча те кʹьфше Елйас дьфькьри, ԝәки һʹәму щәфе ԝи, кӧ әԝи бона һʹәбандьна рʹаст дькьр, пʹучʹ бу, у кӧ Исраеледа ԝе һʹал баш нәбә, у әԝи тʹьре тʹәне әԝ майә жь ԝан, йед кӧ Йаһоԝарʹа хьзмәт дькьрьн (1 Пʹадш. 18:3, 4, 13; 19:10, 14). Дьбәкә әм әʹщебмайи дьминьн, кӧ әԝ пʹехәмбәре амьн хԝә ӧса тʹәхмин дькьр. Ле Йаһоԝа һʹале ԝи рʹьнд фәʹм дькьр.

⁶ Йаһоԝа бона ве йәке Елйас сущдар нәкьр, дәԝсе али ԝи кьр, ԝәки диса ԛәԝате бьстинә (1 Пʹадш. 19:5-7). Һьнә ԝәʹдә шунда, Йаһоԝа бь нәрми ньһерʹандьна Елйас рʹаст кьр, гава ԛәԝата Хԝәйә зор нишани ԝи кьр. Йаһоԝа ӧса жи дина ԝи да сәр ве йәке, кӧ Исраеледа диса 7 000 мәрьв һәбун, йед кӧ сәре хԝә бәр Баәʹл нәдатанин (1 Пʹадш. 19:11-18). Ԝи щурʹәйи, Йаһоԝа Елйасрʹа да кʹьфше, ԝәки Ԝи һʹьз дькә.

ЙАҺОԜА ԜЕ ЧА АЛИ МӘ БЬКӘ

7. Жь сәрһатийа Елйас әм чь дьлбинийе дьстиньн?

⁷ Һун бона тьштәки бәрхԝә дькʹәвьн? Әм жь сәрһатийа Елйас дьлбинийе дьстиньн, чьмки заньн кӧ Йаһоԝа һʹале мә жи фәʹм дькә! Сәрһатийа Елйас мә дьдә баԝәркьрьне, ԝәки Йаһоԝа дьлтәнгийа мә дьвинә. Әԝ занә әм чь дькарьн у чь нькарьн, у һәла һе жи занә әм чь дьфькьрьн у ча хԝә тʹәхмин дькьн (Зәб. 103:14; 139:3, 4). Һәрге әм чʹәʹв дьдьнә Елйас, бь ве йәке кӧ итʹбарийа хԝә Йаһоԝа тиньн, әԝ ԝе али мә бькә, әм нава ԝан проблемада сәбьр кьн, кʹижан кӧ мә дькьнә стресе (Зәб. 55:22).

8. Ԝәʹде стресе Йаһоԝа ча ԝе али ԝә бькә?

⁸ Чахе һун стреседа ньн, дьбәкә дьфькьрьн, ԝәки дәрәща ԝә ԝе тʹӧ щар нәйе гӧһастьне, у һун бинтәнг дьбьн. Һәрге һун һʹаләки ӧсада ньн, бир нәкьн, ԝәки Йаһоԝа ԝе али ԝә бькә һун бәр стресе тәйах кьн. Ле әԝ ԝе ча али ԝә бькә? Йаһоԝа дьхԝазә, ԝәки һун дьле хԝә жерʹа вәкьн у хәмед хԝә жерʹа гьли кьн. Әԝ ԝе әʹсә щаба һәԝар-газийа ԝә бьдә (Зәб. 5:3; 1 Пәт. 5:7). Ләма жи һәр гав дәрһәԛа проблемед хԝә Йаһоԝарʹа дӧа бькьн. Бәле, әԝ ԝе рʹастә-рʹаст тʹәви ԝә хәбәр нәдә, чаԝа тʹәви Елйас хәбәр дьда, ле ԝе пе Хәбәра хԝә, демәк пе Кʹьтеба Пироз, у пе тʹәшкиләта хԝә ԝәрʹа хәбәр дә. Мәсәлә, сәрһатийед кӧ һун Кʹьтеба Пирозда дьхуньн, дькарьн дьлбинийе у һевийе бьдьнә ԝә, ле хушк-бьред щьвате дькарьн бәр дьле ԝәда бен у ԝә бьшьдиньн (Рʹом. 15:4; Ибрн. 10:24, 25).

9. Һәвале баш ча дькарә али мә бькә?

⁹ Йаһоԝа готә Елйас, ԝәки һьнә щабдарийед хԝә бьдә Елиша. Бь ве йәке, Йаһоԝа һәваләки баш да Елйас, кʹижани баре ԝи сьвьк кьр у бәр дьле ԝида һат. Һәрге һәвале мәйи ӧса һәйә, кӧ әм итʹбарийа хԝә ԝи тиньн, әԝ дькарә дәрде мә сьвьк кә у дьле мә рʹьһʹәт кә (2 Пʹадш. 2:2; Мәтʹлк. 17:17). Һәрге кәсәки ӧса тʹӧнә, кӧ һун бькарьбьн дьле хԝә жерʹа вәкьн, Йаһоԝарʹа дӧа бькьн, ԝәки һун Мәсиһийед рʹӧһʹанида гьһишти хԝәрʹа бьвиньн, кʹижан кӧ ԝе дьл бьдә бәр ԝә.

10. Чаԝа сәрһатийа Елйас мәрʹа һевийе дьдә, у чаԝа созе жь Ишайа 40:28, 29 али мә дькә?

¹⁰ Йаһоԝа али Елйас кьр, ԝәки бәр стресе тәйах кә у гәләк сала бь амьни хьзмәт кә. Сәрһатийа Елйас һевийе дьдә мә. Дьԛәԝьмә ԝәʹдәкида стрес у чәтьнайед гьран пәй һәв рʹасти мә бен, кʹижан кӧ мә сьһʹәт-ԛәԝатеда у емосийалида сьст кьн. Ле һәрге чʹәʹве мә сәр Йаһоԝа йә, әԝ ԝе ԛәԝате бьдә мә, сәва бәрдәԝам кьн жерʹа хьзмәт кьн. (Бьхунә Ишайа 40:28, 29.)

ҺАННА, ДАԜЬД, У ЗӘБУРБЕЖ ИТʹБАРИЙА ХԜӘ ЙАҺОԜА ДЬАНИН

11-13. Чаԝа стрес сәр се хьзмәткʹаред бәре һʹӧкӧм дьбу?

¹¹ Кʹьтеба Пирозда сәрһатийед мәрьвед дьн жи һәнә, йед кӧ рʹасти стреса мәзьн дьһатьн. Мәсәлә, Һанна шәрми дьбу, чьмки безӧрʹәт бу, у һьн жи һәвийа ԝе сәр дькʹәнийа у ле ньмьз дькьр (1 Сам. 1:2, 6). Һанна ӧса зәʹф бәрхԝә дькʹәт, кӧ дьгьрийа у мәʹде ԝе нәдьчу хԝарьне (1 Сам. 1:7, 10).

¹² Щара дәрдед Даԝьд Пʹадша пʹьрʹ гьран бун. Бьфькьрьн әԝ рʹасти чь кӧл-дәрда һат. Әԝ дьнәʹлийа, чьмки гәләк шаши бәрʹдабу (Зәб. 40:12). Кӧрʹе ԝи Абшалом мьԛабьли ԝи рʹабу, жь бо чь жи ахьрийеда мьр (2 Сам. 15:13, 14; 18:33). У һәваләки ԝийи лапи незик жи, нәмамийа ԝи кьр (2 Сам. 16:23–17:2; Зәб. 55:12-14). Гәләк зәбуред кӧ Даԝьд ньвиси, дьдьнә кʹьфше кӧ әԝ чьԛас дьлшкәсти бу, ле йәкә бь тʹәмами итʹбарийа хԝә Йаһоԝа дьани (Зәб. 38:5-10; 94:17-19).

¹³ Ԝәʹдә шунда, зәбурбежәки дәстпекьр һʹәвсудийе мәрьвед хьраб бькә. Дьԛәԝьмә әԝ жь зӧрʹәте Асафе Леԝи бу, у «пирозгәһа Хԝәдеда» хьзмәт дькьр. Әԝ емосийалида кʹәтә стресе, чь кӧ бу мәʹни кӧ әԝи һеди-һеди шабуна хԝә ӧнда кьр у әʹмьре хԝәрʹа ша нәдьбу. Әԝ һәла һе жи ида дӧдьли дьбу, кӧ хьзмәти кʹәрәма тинә (Зәб. 73:2-5, 7, 12-14, 16, 17, 21).

14-15. Әм жь сәрһатийед се хьзмәткʹаред бәре, чь һин дьбьн?

¹⁴ Әԝ се хьзмәткʹаред Йаһоԝа, дәрһәԛа кʹижана мә шеԝьр кьр, һәԝара хԝә Йаһоԝа дьанин у аликʹари жь ԝи дьхԝәстьн. Әԝана хәмед хԝә у кӧла дьле хԝә, пе дӧа-дьрозга Йаһоԝарʹа гьли дькьрьн. Ԝана аза тʹәви ԝи хәбәр дьдан, кӧ чьрʹа әԝана һʹаләки ӧса гьранда ньн. У ԝана щийе һʹәбандьна Йаһоԝа нәдьһишт (1 Сам. 1:9, 10; Зәб. 55:22; 73:17; 122:1).

¹⁵ Йаһоԝа бь дьлшәԝати щаба дӧайед һәрсека да. Һаннайе дьлрʹьһʹәти станд (1 Сам. 1:18). Даԝьд ньвиси: «Тәнгасийед йе рʹаст гәләк ьн, ле Хӧдан жь һʹәмуйа хьлаз дькә» (Зәб. 34:19). У зәбурбеж жи паше тʹәхмин кьр, ԝәки Йаһоԝа «дәсте» ԝийи рʹасте дьгьрә, у бь һʹьзкьрьн ԝи ширәт дькә. Әԝи дьстьра: «Незикбуна Хԝәде жь бо мьн ԛәнщ ә; . . . мьн Рʹәб Хӧдан жь хԝәрʹа кьрә стʹар» (Зәб. 73:23, 24, 28, ИМ). Әм чь һин дьбьн жь ԝан мәсәла? Щара әм пе проблемед мәзьн баргьран дьбьн, у дькʹәвьнә стресе. Ле һәрге әм бьфькьрьн кӧ Йаһоԝа ча али хьзмәткʹаред хԝә кьрийә у иро жи дькә, у бь баԝәрийе жерʹа дӧа бькьн, у ԝан тьшта бькьн чь кӧ әԝ жь мә дәʹԝа дькә, һьнге әм дькарьн дӧдьли нәбьн, кӧ Йаһоԝа ԝе әʹсә али мә бькә, әм сәбьр кьн (Зәб. 143:1, 4-8).

ИТʹБАРИЙА ХԜӘ ЙАҺОԜА БИНЬН У ԚӘԜИ БЬН

16-17. а) Чьрʹа әм гәрәке хԝә башԛә нәкьн? б) Әм ча дькарьн диса ԛәԝате бьстиньн у гәш бьн?

¹⁶ Әԝ се мәсәлед ԝан мәрьва, диса дәрсәкә фәрз мә һин дькьн: Әм гәрәке тʹӧ щар хԝә жь Йаһоԝа у щьмәʹта ԝи башԛә нәкьн (Мәтʹлк. 18:1). Ненси, йа кӧ гәләк дьлшкәсти бу чахе мере ԝе ле һишт, дьбежә: «Гәләк щар мьн нәдьхԝәст кәсәки бьвиньм, йан кәсәкирʹа хәбәр дьм. Ле чьԛас мьн хԝә башԛә дькьр, әз һе зедә дьлтәнг дьбум». Һʹале Ненси пʹак бу, гава әԝе нет дани, ԝәки али ԝан мәрьва бькә, йед кӧ тәнгасийеда ньн. Әԝ гьли дькә: «Мьн гӧһ дьда ԝан мәрьва, чахе ԝана чәтьнайед хԝә мьнрʹа гьли дькьрьн. Мьн тедәрдьхьст, кӧ чахе һе зедә дьле мьн бона ԝан дьшәԝьти, һаԛас һе зедә мьн дәрд у проблемед хԝә бир дькьр».

¹⁷ Гава әм дьчьнә щьвате, әм һьнге жи ԛәԝате дьстиньн у гәш дьбьн. Әм сәр щьвата, диса мәщале дьдьн Йаһоԝа, ԝәки бе «һәԝара» мә у дьлбинийе бьдә мә (Зәб. 86:17). Сәр щьвате әԝ пе рʹӧһʹе хԝәйи пироз, пе Хәбәра хԝә у щьмәʹта хԝә мә дьшьдинә. Щьват мәрʹа мәщала дьдьн, ԝәки әм «дьл бьдьн бәр һәв» (Рʹом. 1:11, 12). Хушкәк наве кʹижане Софйа йә, гот: «Йаһоԝа у хушк-бьра али мьн кьрьн кӧ сәбьр кьм. Бона мьн лапә фәрз щьватед мә бун. Мьн дит, ԝәки чьԛас зедә әз дьчьмә хьзмәтийе у щьвате, һаԛас стреса мьн сьвьк дьбә у әз кем бәрхԝә дькʹәвьм».

18. Чахе әм дьлтәнг ьн, Йаһоԝа чь дькарә бьдә мә?

¹⁸ Чахе әм дьлтәнг ьн, ԝәрә бир нәкьн ԝәки Йаһоԝа соз дьдә, кӧ ԝе нә тʹәне ахьрийеда стресе бьдә һьлдане, ле әԝ ньһа жи али мә дькә, ԝәки әм бәр стреса тәйах кьн. Әԝ һьн хԝәстьне һьн жи ԛәԝате дьдә мә, ԝәки әм тәйах кьн чахе дьлтәнг ьн у дьфькьрьн кӧ бечʹарә нә (Фили. 2:13).

19. Рʹомайи 8:37-39 чьда мә ԛәԝи дькә?

¹⁹ Бьхунә Рʹомайи 8:37-39. Паԝлосе шанди дьл дьдә мә, ԝәки тʹӧ тьшт нькарә мә жь һʹьзкьрьна Хԝәде бьԛәтинә. Ле ча әм дькарьн али хушк-бьра бькьн, йед кӧ стреседа ньн у дьлтәнг ьн? Готара дьнда әме пебьһʹәсьн, кӧ ча әм дькарьн дьлшәԝатийеда чʹәʹв бьдьнә Йаһоԝа у али ԝан хушк-бьра бькьн, ԝәки әԝана бәр стресе тәйах кьн.