Биранина Мьрьна Иса Мәсиһ Чьрʹа бона Мә Фәрз ә?

1-2. (а) Әм мәрьвед хԝәйи һʹьзкьри кӧ мьрьнә, илаһи кʹәнге тиньн бира хԝә? (б) Шәва пешийа мьрьна хԝә, Иса Мәсиһ чь кьр?

ЧЬԚАС сал дәрбаз бьн жи, әм мәрьвед хԝәйә һʹьзкьри кӧ мьрьнә, тʹӧ щар бир накьн. Һәр сал рʹожа мьрьна ԝан, әԝана бь щурʹе мәхсус дькʹәвьнә бира мә.

² Һәр сал, сәр тʹәмамийа дьнйайе бь милйона мәрьв бона Биранина Иса тʹәвайи тʹоп дьбьн (1 Пәтрус 1:8). Әм Иса гәләк һʹьз дькьн, у әм тиньн бира хԝә кӧ әԝи әʹмьре хԝә бәрва да, ԝәки мә жь гӧнә у мьрьне хьлаз кә (Мәтта 20:28). Иса хԝәха дьхԝәст ԝәки шагьртед ԝи мьрьна ԝи биньн бира хԝә. Шәва пешийа мьрьна хԝә, әԝи тʹәми да шандийед хԝә, кӧ ве биранина мәхсус дәрбаз кьн. Әԝи ӧса гот: «Ве йәке бона биранина мьн бькьн» (Луԛа 22:19).

3. Ве готареда, әме чь шеԝьр кьн?

³ Һьнә кәсед кӧ Биранина Мьрьна Иса дәрбаз дькьн, һивийа жийина сәр әʹзмана нә. Ӧса жи бь милйона мәрьвед кӧ һивийа жийина сәр әʹрде нә, тенә сәр Биранине. Ве готареда, әме бьвиньн кӧ бона ван һәрдӧ кʹома чьрʹа фәрз ә, ԝәки һәр сал Биранине дәрбаз кьн, у әв йәк чь кʹаре тинә. Пешийе әме шеԝьр кьн, кӧ чьрʹа Мәсиһийед бь рʹӧһʹе пироз кʹьфшкьри тенә сәр Биранине.

МӘСИҺИЙЕД БЬ РʹӦҺʹЕ ПИРОЗ КʹЬФШКЬРИ ЧЬРʹА БИРАНИНЕ ДӘРБАЗ ДЬКЬН?

4. Чьрʹа Мәсиһийед бь рʹӧһʹ кʹьфшкьри сәр Биранине нан дьхԝьн у шәраве вәдьхԝьн?

⁴ Һәр сал Мәсиһийед бь рʹӧһʹе пироз кʹьфшкьри кӧ тенә сәр Биранине, нан дьхԝьн у шәраве вәдьхԝьн. Гәло чьрʹа? Бинә бира хԝә, кӧ шәва пешийа мьрьна Иса чь ԛәԝьми. Паши шива Щәжьна Дәрбазбуне, Иса нишани шандийед амьн кьр, ԝәки әԝана гәрәке биранина мьрьна ԝи, йа кӧ паше ча «Шива Хӧдан» һатә навкьрьне, ча дәрбаз кьн. Иса нан у шәрав да 11 шандийа, у әԝи ԝанрʹа бәʹса дӧ пәймана кьр, пәймана ну у пәймана Пʹадшатийеb (Луԛа 22:19, 20, 28-30). Ван пәймана рʹе вәкьр, ԝәки шандийед амьн у кәсед дьн, сәр әʹзмана бьбьн пʹадша у кʹаһин (Әʹйанти 5:10; 14:1). Тʹәне мәрьвед бь рʹӧһʹ кʹьфшкьри, йед кӧ һе сәр әʹрде нә у ван дӧ пәйманада ньн, гәрәке сәр Биранине нан бьхԝьн у шәраве вәхԝьн.

5. Мәсиһийед бьжарти дәрһәԛа һевийа хԝә чь фәʹм дькьн?

⁵ Ӧса жи, Биранин бона Мәсиһийед бь рʹӧһʹ кʹьфшкьри мәщаләкә баш ә, ԝәки дьһа кʹур дәрһәԛа һевийа хԝә бьфькьрьн. Һевийа ԝан әв ә кӧ сәр әʹзмана һʹәта-һʹәтайе бьжин, тʹәви Иса у бьжартийед дьн пʹадшатийе бькьн, у хенщи ве йәке, әԝана ԝе Йаһоԝа Хԝәде бьвиньн! (1 Корьнтʹи 15:51-53; 1 Йуһʹәнна 3:2) Мәсиһийед бьжарти фәʹм дькьн, ԝәки Йаһоԝа һазьр ә ван кʹәрәма бьдә ԝан. Ле сәва кӧ әԝана бькарьбьн һәрʹьн әʹзмана, әԝана гәрәке һʹәта мьрьне амьн бьминьн (2 Тимотʹейо 4:7, 8). Гава Мәсиһийед бьжарти дәрһәԛа һевийа хԝә дьфькьрьн, әԝана гәләк ша дьбьн (Тито 2:13). Ле пәзед дьн жи һәнә, йед кӧ һивийа жийина сәр әʹрде нә (Йуһʹәнна 10:16). Гәло чьма фәрз ә, ԝәки әԝана жи бенә сәр Биранине?

ПӘЗЕД ДЬН ЧЬРʹА БИРАНИНЕ ДӘРБАЗ ДЬКЬН?

6. Пәзед дьн чьрʹа һәр сал тенә сәр Биранине?

⁶ Пәзед дьн, демәк кәсед кӧ һивийа жийина сәр әʹрде нә, сәр Биранине нан нахԝьн у шәраве вәнахԝьн, ле диса жи әԝана ша нә Биранине дәрбаз кьн. Сала 1938-да, щара пешьн ԝанрʹа һатә готьне, ԝәки әԝана жи бенә сәр Биранине. «Бьрща Ԛәрәԝьлийеда» йа 1 Адаре, сала 1938, ӧса һатьбу готьне: «Әв йәк рʹаст ә, ԝәки [пәзед дьн] ча тʹәмашәван бен сәр ве щьвине. . . . Биранин гәрәке ԝанарʹа жи шабуне бинә, у әв йәк бь рʹасти жи ӧса йә». Ча меванед кӧ тенә сәр дәʹԝате, пәзед дьн жи ча тʹәмашәван тенә сәр Биранине.

7. Пәзед дьн чьрʹа гәләк һивийа готара Биранине нә?

⁷ Пәзед дьн жи кʹур дьфькьрьн дәрһәԛа һевийа хԝә. Әԝана гәләк һивийа ве готаре нә, кӧ сәр Биранине ԝе бе хԝәндьне. Әв готар зәлал дькә, ԝәки Иса у 144 000 һәмпʹадшед ԝи, ԝе ԝәʹде Сәрԝертийа Һʹәзарсали бона мәрьвед амьн чь бькьн. Бьн рʹебәрийа Исада, сәрԝеред әʹзмани ԝе тʹәмамийа дьнйайе бькьн щьнәт у али мәрьвед гӧһдар бькьн бьгьһижьн беԛьсуртийе. Бь милйона кәсед кӧ тенә сәр Биранине, тиньн бәр чʹәʹве хԝә, ԝәки созед Хԝәде, мәсәлә созед жь Ишайа 35:5, 6; 65:21-23 у Әʹйанти 21:3, 4, ԝе ча бенә сери. Гава әԝана дьдьнә бәр чʹәʹве хԝә, ԝәки жийина дьнйа тʹәзәда ԝе чьԛас хԝәш бә, һеви у хԝәстьна ԝан кӧ тʹӧ щар тʹәрка хьзмәта Йаһоԝа нәдьн, дьһа ԛәԝи дьбә (Мәтта 24:13; Галати 6:9).

8. Диса мәʹник кӧ чьрʹа пәзед дьн тенә сәр Биранине, кʹижан ә?

⁸ Пәзед дьн ӧса жи тенә сәр Биранине, чьмки дьхԝазьн нишан кьн, ԝәки әԝана Мәсиһийед бь рʹӧһʹ кʹьфшкьри һʹьз дькьн у пьштгьрийа ԝан дькьн. Хәбәра Хԝәдеда пешда һатьбу готьне, ԝәки йед бь рʹӧһʹ кʹьфшкьри у кәсед кӧ һивийа жийина сәр әʹрде нә, ԝе тʹәви һәв шьхӧлкʹарийе бькьн. Гәло ча? Ԝәрә әм чәнд мәсәла шеԝьр кьн.

9. Ль гора Зәкәрйа 8:23, пәзед дьн ча сәр кәсед бьжарти дьньһерʹьн?

⁹ Зәкәрйа 8:23, бьхунә, (ИМ). Әв рʹез нишан дькә, ԝәки пәзед дьн ԝе һьндава хушк-бьред бь рʹӧһʹ кʹьфшкьри, ча бьн. Ве рʹезеда мерәки «Щьһу», бь симболик те һʹәсабе кʹома Мәсиһийед бь рʹӧһʹ кʹьфшкьри (Рʹомайи 2:28, 29). Дәһ кәсед жь мьләтед дьн тенә һʹәсабе пәзед дьн, йед кӧ бь амьни тʹәви Мәсиһийед бьжарти Йаһоԝарʹа хьзмәт дькьн. Ләма, пәзед дьн жи тенә сәр Евара Биранине у ӧса нишан дькьн, ԝәки һәләԛәтийа ԝан тʹәви кәсед бьжарти гәләк незик ә.

10. Йаһоԝа пʹехәмбәртийа жь Һәзәԛел 37:15-19, 24, 25 ча ани сери?

¹⁰ Һәзәԛел 37:15-19, 24, 25 бьхунә. Гәло әԝ пʹехәмбәрти ча һатә сери? Йаһоԝа Мәсиһийед бь рʹӧһʹ кʹьфшкьри у пәзед дьн кьрьнә йәк. Пʹехәмбәрти бәʹса дӧ «чойа» дькә, демәк дӧ дара. Кәсед бь рʹӧһʹ кʹьфшкьри ча даре «Щьһуда» нә (бәрәка кӧ пʹадшед Исраеле же дьһатьн), пәзед дьн жи ча даре «Әфрайим» ьн.c Йаһоԝа готьбу кӧ әԝе ван дӧ кʹома бькә йәк, ԝәки әԝ бьбьн дарәк. Ләма, әв дӧ кʹом, бьн сәрԝертийа Исада тʹәвайи йәктийеда хьзмәт дькьн. Ләма жи, кәсед бь рʹӧһʹ кʹьфшкьри у пәзед дьн һәр сал тенә сәр Биранине, нә ча дӧ кʹомед щӧдә, ле ча «кәрик» бьн рʹебәрийа «шьванәки» (Йуһʹәнна 10:16).

11. «Пез», дәрһәԛа кʹижана кӧ Мәтта 25:31-36, 40-да те готьне, ча нишан дькьн ԝәки пьштгьрийа бьред Иса дькьн?

¹¹ Мәтта 25:31-36, 40 бьхунә. Ван рʹезада «пез» бь симболик тенә һʹәсабе кәсед рʹаст, йед кӧ рʹожед ахьрийеда дьжин у һивийа жийина сәр әʹрде нә. Әԝ бь амьни аликʹарийе дьдьн бьред Иса йед бь рʹӧһʹ кʹьфшкьри, кӧ һе сәр әʹрде нә, ԝәки әԝана шьхӧле бәлакьрьна мьзгине сәр тʹәмамийа дьнйайе биньн сәри (Мәтта 24:14; 28:19, 20).

12-13. Пәзед дьн чаԝа пьштгьрийа бьред Иса дькьн?

¹² Һәр сал, һʹәфтийед пешийа Биранине, пәзед дьн тʹәви бьред Мәсиһ сәр тʹәмамийа дьнйайе, гази мәрьва дькьн, ԝәки әԝана бенә сәр Биранине (Чаргошә бь наве «Тӧ бона Биранине Хԝә Пешда Һазьр Дьки?» бьньһерʹә). Һʹәчʹи зәʹф щьватада, кәсед бь рʹӧһʹ кʹьфшкьри тʹӧнә нә. Ле диса жи, пәзед дьн һәр тьшти дькьн, ԝәки Биранин һʹәму щьватада сәр тʹәмамийа дьнйайе бе дәрбазкьрьне. Бь ви щурʹәйи, әԝана пьштгьрийа бьред Иса Мәсиһ дькьн. Әԝана заньн кӧ гава бона бьред бь рʹӧһʹ кʹьфшкьри ԛәнщийе дькьн, Иса һʹәсаб дькә, ԝәки әԝана рʹастә-рʹаст бона ԝи ԛәнщийе дькьн (Мәтта 25:37-40).

¹³ Гәло диса чь мәʹни һәнә, кӧ әм һәрʹьн сәр Биранине, фьрԛи тʹӧнә һевийа мә жийина сәр әʹрде йә, йан сәр әʹзмана?

ЧЬРʹА ӘМ ГЬШК ЖИ ДЬЧЬН СӘР БИРАНИНЕ?

14. Йаһоԝа у Иса чаԝа нишан кьрьнә, ԝәки гәләк мә һʹьз дькьн?

¹⁴ Әм бона һʹьзкьрьна Йаһоԝа у Иса рʹази нә. Һʹьзкьрьна Йаһоԝа гәләк тьштада те кʹьфше, ле һʹьзкьрьна ԝийә лапи мәзьн ве йәкеда һатә кʹьфше, кӧ әԝи Кӧрʹе хԝәйи дәлал шандә сәр әʹрде, ԝәки әԝ еше бькʹьшинә у әʹмьре хԝә бона мә бәрва бьдә (Йуһʹәнна 3:16). Иса бь дьл һазьр бу ԝәки әʹмьре хԝә бона мә ԛӧрбан кә, у бь ве йәке әԝи жи һʹьзкьрьнәкә мәзьн нишан кьр (Йуһʹәнна 15:13). Һәмьки әме тʹӧ щар нькарьбьн бьн ԛәнщийа Йаһоԝа у Иса дәрен, ле әм дькарьн һәр рʹож пе рʹабун-рʹуньштьна хԝә ԝанрʹа рʹазибуне бьдьнә кʹьфше (Колоси 3:15). Ӧса жи, әм дьчьн Биранине, ԝәки һʹьзкьрьна ԝан биньн бира хԝә у нишан кьн кӧ әм жи ԝана һʹьз дькьн.

15. Чьма һьм кәсед бь рʹӧһʹ кʹьфшкьри һьм жи пәзед дьн, ԛӧрбане гәләк ԛимәт дькьн?

¹⁵ Әм ԛӧрбане гәләк дьшекьриньн (Мәтта 20:28). Ԛӧрбан бона кәсед бь рʹӧһʹ кʹьфшкьри гәләк ԛимәт ә, чьмки бь сайа ԛӧрбане, әԝ бунә хԝәйе һевикә мәхсус. Әԝана баԝәрийа хԝә ԛӧрбана Иса тиньн, ләма жи Йаһоԝа ԝана ча кәсед рʹаст һʹәсаб дькә у ча зарʹед хԝә ԛәбул дькә (Рʹомайи 5:1; 8:15-17, 23). Пәзед дьн жи бона ԛӧрбане рʹази нә. Сәр һʹиме баԝәрийа ԝан һьндава Иса, Хԝәде ԝана ча кәсед бе ләкʹә ԛәбул дькә, у әԝана дькарьн ԝирʹа хьзмәт бькьн у ԝәʹде «тәнгасийа мәзьн» сах бьминьн (Әʹйанти 7:13-15). Һәр сал, һьм кәсед бь рʹӧһʹ кʹьфшкьри һьм жи пәзед дьн, бона Биранине һазьр дьбьн у бь ве йәке нишан дькьн, ԝәки бона ԛӧрбане рʹази нә.

16. Мәʹнийа дьн чь йә, кӧ әм дьчьнә сәр Биранине?

¹⁶ Хенщи ве йәке, әм дьчьн сәр Евара Биранине, чьмки дьхԝазьн гӧһ бьдьн Иса. Һевийа мә чь бә жи, әм гӧһ дьдьн ве тʹәмийа Иса, кʹижан кӧ әԝи сәр евара Биранинейә пешьн, да: «Ве йәке бона биранина мьн бькьн» (1 Корьнтʹи 11:23, 24).

ҺӘР КӘС ЖЬ МӘ ЧЬ КʹАРЕ ДЬСТИНӘ?

17. Биранин ча али мә дькә, ԝәки әм дьһа незики Йаһоԝа бьн?

¹⁷ Әм дьһа незики Йаһоԝа дьбьн (Аԛуб 4:8). Чаԝа мә дит, Биранин мәщале дьдә мә, ԝәки әм сәр һевийа кӧ Йаһоԝа дайә мә у сәр һʹьзкьрьна ԝийә мәзьн, кʹур бьфькьрьн (Йерәмийа 29:11; 1 Йуһʹәнна 4:8-10). Гава әм дәрһәԛа һевийа хԝә у һʹьзкьрьна Йаһоԝа дьфькьрьн, әм дьһа незики ԝи дьбьн (Рʹомайи 8:38, 39).

18. Гава әм сәр мәсәла Иса кʹур дьфькьрьн, хԝәстьна мә зедә дьбә кӧ әм чь бькьн?

¹⁸ Хԝәстьна мә зедә дьбә, ԝәки чʹәʹв бьдьнә Иса (1 Пәтрус 2:21). Рʹожед пешийа Биранине, әм дьфькьрьн дәрһәԛа һʹәфтийа пашьн йа жийина Исайә сәр әʹрде, у ӧса жи дәрһәԛа мьрьн у рʹабуна ԝи жь мьрьне. Паше, готара кӧ сәр Евара Биранине те хԝәндьне, тинә бира мә ԝәки Иса чьԛас мә һʹьз дькә (Әфәси 5:2; 1 Йуһʹәнна 3:16). Чахе әм дәрһәԛа ԛӧрбана Иса дьхуньн у кʹур сәр дьфькьрьн, хԝәстьна мә зедә дьбә кӧ ӧса бьжин «чаԝа Иса жит» (1 Йуһʹәнна 2:6).

19. Әм чаԝа дькарьн һʹьзкьрьна Хԝәдеда бьминьн?

¹⁹ Әм һе зедә дьхԝазьн нава һʹьзкьрьна Хԝәдеда бьминьн (Щьһуда 20, 21). Сәва кӧ әм нава һʹьзкьрьна Хԝәдеда бьминьн, гәрәке әм чь жь дәсте мә те бькьн, ԝәки гӧһ бьдьн Хԝәде, наве ԝи пироз кьн у дьле ԝи ша кьн (Мәтʹәлок 27:11; Мәтта 6:9; 1 Йуһʹәнна 5:3). Евара Биранине мә һелан дькә һәр рʹож ль гора хԝәстьна Йаһоԝа ӧса бьжин, кӧ те бежи әм ԝирʹа дьбежьн: «Әз дьхԝазьм һʹәта-һʹәтайе һʹьзкьрьна тәда бьминьм!»

20. Чьрʹа фәрз ә кӧ әм бенә сәр Биранине?

²⁰ Һевийа мә чь бә жи, фьрԛи тʹӧнә жийина һʹәта-һʹәтайе сәр әʹзмана йан сәр әʹрде, диса жи гәләк мәʹнийед фәрз һәнә кӧ әм бенә сәр Биранине. Һәр сал, чахе әм сәр Биранине тʹәвайи тʹоп дьбьн, әм мьрьна Иса Мәсиһ тиньн бира хԝә. Йа һәри фәрз, әм тиньн бира хԝә, кӧ гава Йаһоԝа Кӧрʹе хԝә ча ԛӧрбан бәрва да, әԝи һʹьзкьрьнәкә гәләк мәзьн әʹйан кьр. Исал, Биранин ԝе рʹожа Инийе, 15 Нисане, сала 2022 бе дәрбазкьрьне. Әм Йаһоԝа у Иса гәләки һʹьз дькьн, ләма жи әме чь дәсте мә те бькьн, ԝәки әʹсәйи бенә сәр Евара Биранине!