Рʹебәрийа Рʹаст у Нәрʹаст: Кʹьтеба Пироз Рʹебәрийа бь Итʹбар ә

РʹЕБӘРИЙА КӦ МӘРʹА ЛАЗЬМ Ә

Кʹьтеба Пирозда те готьне кӧ Йаһоԝаa Хԝәде дьхԝәст, ԝәки мәрьв рʹебәрийе жь ԝи бьхԝазьн, нә кӧ пәй рʹебәрийа хԝә һәрʹьн (Йерәмйа 10:23). Ләма жи әԝи нормед нав-намусийе дайә мә, йед кӧ әм дькарьн Кʹьтеба Пирозда бьхуньн. Әԝ мәрьва һʹәз дькә у дьхԝазә жь ахьрийа хьраб у жь сафикьрьнед нәбаш мә хԝәй кә (Ԛануна Дӧщари 5:29; 1 Йуһʹәнна 4:8). Хенщи ве йәке, әԝ ча Әʹфьрандаре мә, дькарә рʹебәрийа лапә баш бьдә мә, чьмки занәбун у биланийа ԝи һәйә (Зәбур 100:3; 104:24). Диса жи, Хԝәде тʹӧ щар зоре мәрьва накә, ԝәки әԝана ль гора нормед ԝи бьжин.

Йаһоԝа мәрьвед пешьнрʹа, Адәм у Һеԝайерʹа һәр тьшт да сәва кӧ әԝана бәхтәԝар бьн (Дәстпебун 1:28, 29; 2:8, 15). Әԝи ӧса жи рʹебәрийед һеса да ԝан у жь ԝан һивийе бу, кӧ әԝана ԝе гӧһ бьдьнә ԝи. Ле әԝи азайа бьжартьне да ԝан, ԝәки әԝана хԝәха сафи кьн, гӧһ бьдьнә рʹебәрийед ԝи йан на (Дәстпебун 2:9, 16, 17). Йазьх, Адәм у Һеԝайе сафи кьрьн ль гора нормед хԝә бьжин, нә кӧ ль гора нормед Хԝәде (Дәстпебун 3:6). Ахьри чь бу? Гәло мәрьв жь Хԝәде четьр дькарьн хԝәха сафи кьн, чь бона ԝан рʹаст ә у чь на? На. Тʹәрихи избат кьр, кӧ һәрге мәрьв нормед Хԝәде пьшт гӧһе хԝәва давежә, әв йәк нә шабун нә жи әʹдьлайа һәрһәйи тинә (Ԝаиз 8:9).

Фьрԛи тʹӧнә әм жь кʹижан мьләти нә, рʹебәрийед жь Кʹьтеба Пироз мә һʹәмуйарʹа лазьм ьн сәва кӧ сафикьрьнед билан бькьн (2 Тимотʹейо 3:16, 17; бьньһерʹә чаргошә «Кʹьтеб бона Һʹәму Мәрьва»). Бьфькьрә кӧ чаԝа Кʹьтеба Пироз һин дькә ве йәке бькьн.

Һе зедә пебьһʹәсә кӧ чьма Кʹьтеба Пироз дькарә бе навкьрьне «хәбәра Хԝәде» (1 Тʹесалоники 2:13). Бьньһерʹә видео бь наве Ньвискʹаре Әʹсли йе Кʹьтеба Пироз Кʹи йә? сәр jw.org.

ЧАԜА КʹЬТЕБА ПИРОЗ РʹЕБӘРИЙА ХԜӘДЕ ӘʹЙАН ДЬКӘ

Кʹьтеба Пирозда ньвисарә дәрһәԛа һәләԛәтийа Йаһоԝа тʹәви мәрьва. Ӧса жи әв кʹьтеб ширәтед керһати дьдә мә, йед кӧ дькарьн али мә бькьн фәʹм кьн, кӧ Хԝәде сәр рʹастийе у нәрʹастийе ча дьньһерʹә, ӧса жи ль сәр тьштед керһати у тьштед кӧ зийане тиньн (Зәбур 19:7, 11). Әԝ ширәтед кӧ әм һин дьбьн, али мә дькьн бь билани сафикьрьна бькьн дәрһәԛа нормед нав-намусийе.

Мәсәлә, бьфькьрьн сәр ширәта Мәтʹәлок 13:20: «Кʹи кӧ тʹәви билана рʹе дьчә, ԝе бьбә билан, ле кʹаре кʹе тʹәви беаԛьла йә, ԝе зьраре кʹәвә». Әв принсип ча ԝәʹде бәре керһати бу, ӧса жи ԝәʹде мәда керһати йә. Кʹьтеба Пирозда хенщи ве принсипе, диса гәләк принсипед дьнә керһати у ԛимәт һәнә. Бьньһерʹьн чаргошә «Биланийа Керһати жь Кʹьтеба Пироз».

Ле дьԛәԝьмә һун бьфькьрьн, «Ча әз дькарьм баԝәр бьм, кӧ нормед нав-намусийе йед кӧ жь Кʹьтеба Пироз ьн, иро жи керһати нә?» Готара дьнда ԝе бе шьровәкьрьне дәрһәԛа сәрһатийед реали.