Пьрсәкә Һеса, Йа кӧ Һәр Кәс Дькарә Бьдә Хәбате

Ԝи ԝәлатида, кʹидәре кӧ Мәрйәм у мере ԝе, Щон,a дьжин, гәләк кʹочʹбәред жь Филипинайе дьхәбьтьн, у мәщала Мәрйәме у Щон һәйә, ԝәки шәʹдәтийе бьдьнә ԝан. Ԝәʹде пандәмийа COVID-19, Мәрйәме һьм ԝи ԝәлатида, һьм жи ԝәлатед дьнда тʹәви гәләк мәрьва һинбуна Кʹьтеба Пироз дәстпекьрийә. Гәло чь щурʹәйи?

Мәрйәме жь хԝәндәкʹаред хԝә ӧса дьпьрси: «Тӧ ԛә кәсед дьн жи нас дьки, йед кӧ дьхԝазьн Кʹьтеба Пироз һин бьн?» Гава хԝәндәкʹара дьгот, ԝәки мәрьвед ӧса һәнә, әԝе дьгот кӧ дьхԝазә насийа хԝә бьдә ԝан. Бәле, бь сайа пьрсәкә ӧса һеса тьштед гәләк һʹәԝас дькарьн бьԛәԝьмьн. Гәло чьрʹа? Чьмки гәләк мәрьв, йед кӧ Кʹьтеба Пироз ԛимәт дькьн, дьхԝазьн ԝәки һәвал у мәрьвед ԝан жи дәрһәԛа ве йәке пебьһʹәсьн. Гәло паши пьрса Мәрйәме чь ԛәԝьми?

Хԝәндәкʹарәкә Мәрйәме бь наве Жасмин, Мәрйәм тʹәви чар кәса да наскьрьне, йед кӧ дьхԝәстьн Кʹьтеба Пироз һин бьн. Йәк жь ԝан, Кристина бу, йа кӧ жь һинбуна Кʹьтеба Пироз шабунәкә ӧса мәзьн дьстанд, кӧ готә Мәрйәме, ԝәки әԝ һʹәфтийе дӧ щара тʹәви ԝе һинбуне дәрбаз кә. Мәрйәме жь Кристинайе жи пьрси, кӧ әԝ кәсед ӧса нас дькә, йед кӧ дьхԝазьн Кʹьтеба Пироз һин бьн. Кристинайе гот: «Бәле, әзе һәвалед хԝә тʹәви тә бькьмә нас». Нав чәнд һʹәфтийада, Кристинайе Мәрйәм тʹәви чар һәвалед хԝә да наскьрьне, йед кӧ дьхԝәстьн Кʹьтеба Пироз һин бьн. Паше, Кристинайе әԝ тʹәви чәнд һәвалед хԝәйә дьн жи да наскьрьне, у жь ԝан һьнәка жи, Мәрйәм тʹәви чәнд мәрьвед дьн данә наскьрьне.

Кристинайе дьхԝәст, ԝәки малбәта ԝе жи, кӧ Филипинайеда дьжит, Кʹьтеба Пироз һин бьн. Ләма жи әԝе дәрһәԛа һинбуна Кʹьтеба Пироз ԛиза хԝә Андрейарʹа жи гот. Серида Андрейа ӧса дьфькьри: «Религийа Шәʹдед Йаһоԝа гәләк әʹщеб ә, әԝана Иса Мәсиһ баԝәр накьн, у тʹәне Пәймана Кәвьн дьһʹәбиньн». Ле чахе тʹәви ԝе щарәке һинбуна Кʹьтеба Пироз дәрбаз кьрьн, әԝе ньһерʹандьна хԝә гӧһаст. Ԝәʹде һинбуне әԝе тʹьме ӧса дьгот: «Һәрге Кʹьтеба Пирозда ӧса те готьне, демәк әв йәк рʹаст ә!»

Ԝәʹдә шунда, Андрейайе Мәрйәм тʹәви дӧ һәвалед хԝә у һәвалхәбатчийед хԝә да наскьрьне, у ԝана жи дәстпекьрьн Кʹьтеба Пироз һин бьн. Хенщи ве йәке Мәрйәме ньзаньбу, кӧ мәтʹа Андрейайе жи, бь наве Анжела, йа кӧ кор бу, гӧһ дьда дәрса. Рʹожәке, Анжелайе готә Андрейайе, ԝәки әԝ ле тʹәви Мәрйәме бькә нас, чьмки әԝе жи дьхԝәст Кʹьтеба Пироз һин бә. У чь кӧ Анжела һин дьбу, гәләк ле хԝәш дьһат. Нава мәһәкеда, әԝе гәләк рʹез әзбәри кьрьн, у хԝәст ԝәки һʹәфтийеда чар щара тʹәви ԝе һинбуна Кʹьтеба Пироз дәрбаз кьн! Бь аликʹарийа Андрейайе, Анжелайе дәстпекьр тʹьме пе видеоконференсийайе бькʹәвә щьвата.

Чахе Мәрйәм пеһʹәсийа, кӧ ԝәʹде һинбуне, мере Кристинайе, Щошуа жи дурва гӧһ дьда ԝан, әԝе жь ԝи пьрси кӧ дьԛәԝьмә әԝ жи дьхԝазә тʹәви ԝан рʹуне у гӧһ бьдә дәрса. Щошуа гот: «Әзе тʹәне гӧһ бьдьм, ле тьштәки жь мьн нәпьрсә. Һәрге тӧ пьрса бьди мьн әзе һәрʹьм». Ле нава пенщ дәԛед пешьнда әԝи дьһа зедә пьрс дьда, нә кӧ кʹӧлфәта ԝи, у әԝи гот, кӧ дьхԝазә бәрдәԝам кә дәрһәԛа Кʹьтеба Пироз хәбәр дә.

Бь сайа пьрса һеса, йа кӧ Мәрйәме дьда хәбате, гәләк мәрьва дәстпекьрьн Кʹьтеба Пироз һин бьн. У Мәрйәме чәнд хԝәндәкʹаред хԝә тʹәсмили хушк-бьред дьн кьр. Бь ви щурʹәйи, әԝе чар ԝәлатада тʹәви 28 мәрьва һинбуна Кʹьтеба Пироз дәстпекьр.

Хԝәндәкʹара пешьн, Жасмин, мәһа Нисане сала 2021 һатә ньхӧмандьне. Кристина мәһа Гӧлане сала 2022 һатә ньхӧмандьне, у вәгәрʹийа Филипинайе, щәм малбәта хԝә. Дӧ кәсед дьн жи, йед кӧ Кристинайе тʹәви Мәрйәме дабу наскьрьне, һатьнә ньхӧмандьне. Анжела чәнд мәһ шунда һатә ньхӧмандьне у ньһа пешәнга һәртʹьм ә. Щошуа мере Кристинайе, ԛиза ԝан Андрейа у чәнд хԝәндәкʹаред дьн жи, рʹӧһʹанида рʹьнд пешда дьчьн.

Ԛьрʹна йәкеда, шагьртед Иса һәвал у мәрьвед хԝәрʹа бәʹса мьзгинийа хере дькьрьн, у бь ви щурʹәйи мьзгини зу бәла дьбу (Йуһʹәнна 1:41, 42а; Кʹаред Шандийа 10:24, 27, 48; 16:25-33). Тӧ жи дькари жь хԝәндәкʹаред хԝә у жь кәсед дьн, кʹижанарʹа Кʹьтеба Пироз һʹәԝас ә, бьпьрси: «Гәло тӧ кәсәки нас дьки, йе кӧ дьхԝазә Кʹьтеба Пироз һин бә?» Кʹе занә, кӧ бь сайа ве пьрса һеса, йа кӧ һәр кәс дькарә бьдә хәбате, чәнд мәрьв дәстпекьн Кʹьтеба Пироз һин бьн!