Бона Мә Баш ә Незики Хԝәде бьн!

1-2. (а) Әм гәрәке чь бькьн ԝәки достийа незик тʹәви кәсәки ԛазанщ кьн? (б) Ве готареда әме чь шеԝьр кьн?

ԚӘ ҺӘВАЛӘКИ тәйи незик һәйә? Тә ча һәвалтийа незик тʹәви ԝи саз кьрийә? Дьԛәԝьмә тә тʹәви ԝи ԝәʹдә дәрбаз дькьр, дәрһәԛа һʹале ԝи пеһʹәсийайи у ӧса жи пеһʹәсийайи кӧ чь ԝи хԝәш те у чь на. Тә һʹӧнӧред ԝийә баш дитьн у хԝәст чʹәʹв бьди ԝи. Бь ви щурʹәйи тә дәстпекьр һәвале хԝә һʹәз бьки у һун бунә достед незик.

² Ԝәхт у хирәт лазьм ә ԝәки әм тʹәви кәсәки һәвалтийа незик саз кьн. Бәле, сәва кӧ бьбьнә достед Йаһоԝа, бона ве йәке жи лазьм ә кӧ әм ԝәʹдә вәԛәтиньн. Ве готареда әме бьвиньн кӧ әм ча дькарьн незики Хԝәде бьн, у ӧса жи пебьһʹәсьн, кӧ әв йәк чь кʹаре дькарә мәрʹа бинә. Бәри пешьн ԝәрә әм дина хԝә бьдьне, кӧ чьрʹа фәрз ә ԝәки әм незики досте хԝәйи лапи баш, Йаһоԝа бьн.

3. Чьрʹа фәрз ә дәрһәԛа кʹара достийа мәйә тʹәви Йаһоԝа бьфькьрьн? Мәсәле бинә.

³ Бе шьк тӧ жи ԛайил и, ԝәки бона мә баш ә незики Йаһоԝа бьн. Ле гава әм дьфькьрьн кӧ әв йәк чьԛас баш ә, хԝәстьна мә зедә дьбә ԝәки һе незики ԝи бьн (Зәбур 63:6-8). Мәсәлә, әм гьшк заньн кӧ хԝарьна керһати, спорт, һесабун у вәхԝарьна аве бона мә гәләк баш ә. Диса жи һʹәчʹи зәʹф мәрьв ван тьшта накьн у сьһʹәт-ԛәԝата хԝә набьнә хԝәйи. Ләма жи, сәва кӧ әм ван тьшта хԝәрʹа бькьнә хәйсәт, әм гәрәке дьһа зедә сәр кʹара ван тьшта бьфькьрьн. Мина ве йәке, әм заньн кӧ бона мә баш ә незики Йаһоԝа бьн, ле сәва кӧ әм хирәт бькьн дьһа незики ԝи бьн, әм гәрәке бьфькьрьн ԝәки достийа тʹәви ԝи чь кʹарәкә мәзьн ԝе мәрʹа бинә (Зәбур 119:27-30).

4. Зәбур 73:28-да зәбурбеж чь гот?

⁴ Бьхунә Зәбур 73:28. Ньвискʹаре Зәбура 73 жь бәрәка Леԝи бу, у әԝи пʹарьстгәһа Йаһоԝада ча сазбәнд хьзмәт дькьр. Ча те кʹьфше әԝи гәләк сала бь амьни Йаһоԝарʹа хьзмәт дькьр. Диса жи әԝи хԝәст бежә, кӧ чьԛас «ԛәнщ ә, незики Хԝәде» бьн. Гәло достийа тʹәви Йаһоԝа чь кʹаре тинә?

ДОСТИЙА ТʹӘВИ ХԜӘДЕ МӘ БӘХТӘԜАР ДЬКӘ

5. (а) Достийа тʹәви Йаһоԝа чьма мә бәхтәԝар дькә? (б) Сәр һʹиме Мәтʹәлок 2:6-16 мәсәла бинә, кӧ нишан дькьн ԝәки биланийа Йаһоԝа ча дькарә кʹаре тәрʹа бинә у тә бьпʹарезә.

⁵ Әм чьԛас незики Йаһоԝа бьн, әме һаԛас бәхтәԝар бьн (Зәбур 65:4). Гәләк мәʹнийед ве йәке һәнә. Мәсәлә, әм кʹарәкә мәзьн дьстиньн чахе биланийа Кʹьтеба Пироз әʹмьре хԝәда дьдьнә хәбате. Әв билани мә дьпʹарезә жь тьштед кӧ дькарьн зийане бьдьнә мә, у али мә дькә кӧ әм шашийед мәзьн нәкьн (Бьхунә Мәтʹәлок 2:6-16). Кʹьтеба Пироз ӧса дьбежә: «Хԝәзи ль ԝи мәрьви кӧ сәрԝахтийе дьбинә у ль ԝи мәрьви кӧ билантийе дьстинә!» (Мәтʹәлок 3:13).

6. Зәбурбеж чьма шабуна хԝә ӧнда кьр?

⁶ Һәмьки, достед Йаһоԝа жи щарна хәмгин дьбьн. Гава фькьред негатив кʹәтьнә дьле ньвискʹаре Зәбура 73, әԝи шабуна хԝә ӧнда кьр. Ԝирʹа ӧса һатә кʹьфше ԛәй кәсед хьраб, йед кӧ гӧһ нәдьданә Хԝәде у ԛанунед ԝи, бь әʹмьрәки рʹьһʹәт дьжин. Ләма жи әԝи һʹәвсудийа ԝан кьр. Әԝ шаш бу у фькьри кӧ мәрьвед зӧлм у позбьльнд ԛә алийе материйалида хәма накʹьшиньн, сьһʹәта ԝан баш ә у тʹӧ дәрде ԝан тʹӧнә (Зәбур 73:3-7, 12). Щарәке әԝ һәла һе фькьри, гәло бь рʹасти һежа йә ԝәки әԝ Йаһоԝарʹа хьзмәт кә. Зәбурбеж һаԛас хәмгин бу кӧ гот: «Кӧ ӧса йә бадиһәԝа мьн хԝә паԛьж хԝәйи кьрийә у дәстед хԝә пе бесущийе шуштьнә» (Зәбур 73:13).

7. Гава әм хәмгин ьн, әм дькарьн чь бькьн? (Ӧса жи бьньһерʹьн шькьл.)

⁷ Зәбурбеж чьԛас хәмгин бу жи, әԝи чәнд гавед фәрз авитьн. Әԝ кʹәтә пʹарьстгәһа Хԝәде у ԝедәре Йаһоԝа ньһерʹандьна ԝи рʹаст кьр (Зәбур 73:17-19). Гава әм хәмгин ьн, досте мә, Йаһоԝа, һʹале мә дьвинә. Һәрге әм дӧа бькьн ԝәки әԝ рʹебәрийа мә бькә, у аликʹарийа ԝи ԛәбул кьн, йа кӧ әԝ бь сайа Кʹьтеба Пироз у щьвате дьдә мә, әме бькарьбьн ԝирʹа амьн бьминьн. Гава әм бона тәнгасийед хԝә бәр хԝә дькʹәвьн, Йаһоԝа һазьр ә кӧ бәр дьле мәда бе у дьле мә рʹьһʹәт бькә (Зәбур 94:19).a

ДОСТИЙА ТʹӘВИ ХԜӘДЕ ГӦМАНЕ ДЬДӘ МӘ

8. Әме диса чь кʹаре бьстиньн һәрге незики Хԝәде бьн?

⁸ Дӧ мәʹнийед дьн жи һәнә, кӧ чьрʹа баш ә ԝәки әм незики Хԝәде бьн. Йа пешьн, чахе әм незики Хԝәде дьбьн, әм фәʹм дькьн кӧ нета жийине чь йә. Йа дӧда жи, әв йәк гӧмане бона ахьрийе дьдә мә (Йерәмйа 29:11). Ԝәрә әм ньһа кʹара ван тьшта дьһа рʹьнд шеԝьр кьн.

9. Чахе әм дьһа незик Йаһоԝа нас дькьн, әв йәк ча сәр жийина мә һʹӧкӧм дькә?

⁹ Гава әм незики Йаһоԝа дьбьн, әм фәʹм дькьн кӧ нета жийине чь йә. Иро гәләк мәрьв баԝәр накьн ԝәки Хԝәде һәйә. Әԝана дьфькьрьн кӧ нета жийине тʹӧнә у ахьрийеда ԝе сәр әʹрде мәрьв тʹӧнә бьн. Ле әм жь Кʹьтеба Пироз пеһʹәсийанә, кӧ «Хԝәде һәйә у ԝе ԝан хәлат кә, кʹижан кӧ ль ԝи дьгәрʹьн» (Ибрани 11:6). Йаһоԝа әм ӧса әʹфьрандьнә, ԝәки ԝирʹа хьзмәт кьн. Ләма жи гава әм сафи дькьн ԝирʹа хьзмәт кьн, әм жь әʹмьре хԝә дьһа зедә ләзәте дьстиньн (Ԛануна Дӧщари 10:12, 13).

10. Зәбур 37:29-да дәрһәԛа ахьрийа кәсед кӧ итʹбарийа хԝә Йаһоԝа тиньн, чь те готьне?

¹⁰ Иро гӧмана гәләк мәрьва тʹӧнә йә. Әԝана тʹәне дьхәбьтьн, дьзәԝьщьн, зарʹа тиньн у пʹәра тʹоп дькьн, ԝәки паше бькарьбьн хԝә хԝәй кьн. Әԝана ньзаньн кӧ ԛьрара Хԝәде чь йә. Ле хьзмәткʹаред Йаһоԝа гӧмана хԝә ԝи тиньн у заньн ԝәки әԝе тʹӧ щар ԝан нәһелә (Зәбур 25:3-5; 1 Тимотʹейо 6:17). Әм итʹбарийа хԝә Хԝәде тиньн у әм баԝәр дькьн, кӧ созед ԝи ԝе әʹсәйи бенә сери. Гӧмана мә һәйә, ԝәки зутьрәке әме сәр әʹрде Щьнәте һʹәта-һʹәтайе Йаһоԝарʹа хьзмәт кьн (Бьхунә Зәбур 37:29).

11. Достийа незик тʹәви Хԝәде ча сәр мә у сәр ԝи һʹӧкӧм дькә?

¹¹ Гәләк мәʹнийед дьн жи һәнә кӧ чьрʹа бона мә керһати йә незики Хԝәде бьн. Мәсәлә, Йаһоԝа соз дайә кӧ әԝе гӧнед ԝан мәрьва, йед кӧ тʹобә дькьн у незики ԝи дьбьн, бьбахшинә (Ишайа 1:18). Ләма жи нәлазьм ә ԝәки әм бона гӧнед кӧ мә бәре кьрьбу, бәр хԝә кʹәвьн (Зәбур 32:1-5). Ӧса жи әм бәхтәԝар ьн, чьмки әм дьле Йаһоԝа ша дькьн (Мәтʹәлок 23:15). Бәле, бь сайа ве йәке кӧ әм дьбьнә достед Хԝәде, әм гәләк кʹәрәма дьстиньн. Ле әм ча дькарьн дьһа незики Хԝәде бьн?

БӘРДӘԜАМ КӘ НЕЗИКИ ХԜӘДЕ БӘ

12. Сәва кӧ незики Хԝәде би, тә ида чь гав авитьнә?

¹² Һәрге тӧ ньхӧманди йи, тә ида гав авитьнә сәва кӧ незики Йаһоԝа би у тӧ буйи досте ԝи. Тӧ дәрһәԛа Йаһоԝа Хԝәде у Иса ида гәләк тьшт зани, тә гӧнед хԝәйә бәре тʹобә кьрийә, тә баԝәрийа хԝә Хԝәде анийә у тә хирәт кьрийә ԝәки ль гора хԝәстьна ԝи бьжийи. Ле сәва кӧ тӧ дьһа незики Хԝәде би, тӧ гәрәке бәрдәԝам ки ван тьшта бьки (Колоси 2:6).

13. Кʹижан се тьшт дькарьн али мә бькьн, дьһа незики Йаһоԝа бьн?

¹³ Чь ԝе али мә бькә, кӧ әм дьһа незики Йаһоԝа бьн? (1) Әм гәрәке тʹьме Кʹьтеба Пироз бьхуньн у лекʹолин кьн. Гава әм Кʹьтеба Пироз дьхуньн, бәс нинә кӧ әм тʹәне тьштед сәрәкә дәрһәԛа Йаһоԝа пебьһʹәсьн. Хенщи ве йәке, лазьм ә ԝәки әм ньһерʹандьн у ԛьрара Хԝәде пебьһʹәсьн, у ль гора принсипед ԝи бьжин (Әфәси 5:15-17). (2) Әм гәрәке бьфькьрьн кӧ Йаһоԝа ча һʹәзкьрьна хԝә мәрʹа дьдә кʹьфше. (3) Әм гәрәке бәрдәԝам кьн ван тьшта нәфрʹәт кьн, чь кӧ бәр чʹәʹве Йаһоԝа рʹәш ә, у тʹәви ԝан мәрьва һәвалтийе нәкьн, йед кӧ ван тьштед хьраб дькьн (Зәбур 1:1; 101:3).

14. Ль гора 1 Корьнтʹи 10:31, әм дькарьн чь бькьн ԝәки дьле Йаһоԝа ша кьн? (Бьньһерʹә ӧса жи шькьл.)

¹⁴ Бьхунә 1 Корьнтʹи 10:31. Гәрәке әм тьштед ӧса бькьн, чь кӧ Йаһоԝа хԝәш те. Бәс нинә кӧ әм тʹәне дәркʹәвьн хьзмәтийе у һәрʹьн сәр щьвата. Сәва кӧ Йаһоԝа жь мә рʹази бә, әм гәрәке жийина хԝәйә һәррʹожида тьштед ӧса бькьн, чь кӧ ԝи хԝәш те. Мәсәлә, гава әм һәр тьштида һʹәлал ьн у дәствәкьри нә, дьле Йаһоԝа ша дьбә (2 Корьнтʹи 8:21; 9:7). Ӧса жи әԝ дьхԝазә ԝәки әм әʹмьре хԝә ԛимәт кьн, чьмки әԝи әʹмьр пʹешкʹеши мә кьрийә. Ләма жи әм гәрәке һаж хԝә һәбьн, кӧ чь дьхԝьн у вәдьхԝьн, у ӧса жи әм гәрәке һәр алийава сьһʹәт-ԛәԝата хԝә бьбьнә хԝәйи. Гава Йаһоԝа бьвинә кӧ әм һәр тьшти дькьн, ԝәки дьле ԝи ша кьн, әԝе дьһа зедә мә һʹәз кә (Луԛа 16:10).

15. Йаһоԝа дьхԝазә кӧ әм һьндава кәсед дьнда чаԝа бьн?

¹⁵ Йаһоԝа һьндава һәр кәсида ԛәнщ ә, һьм һьндава кәсед рʹастда, һьм жи кәсед нәрʹастда (Мәтта 5:45). Әԝ дьхԝазә кӧ әм жи һьндава кәсед дьнда рʹәʹм бьн. Мәсәлә, Кʹьтеба Пироз дьбежә кӧ әм гәрәке «кәсәки беһӧрмәт нәкьн, шәрʹуд нибьн, ле мьлук бьн у ширьнайийа хԝә һьндава һʹәму мәрьвада бьдьнә кʹьфше» (Тито 3:2). Ләма жи әм ԝан мәрьва, йед кӧ Йаһоԝарʹа хьзмәт накьн ньмьз һʹәсаб накьн (2 Тимотʹейо 2:23-25). Гава әм һьндава һәр кәсида рʹәʹм у дьлован ьн, әм дьһа незики Йаһоԝа дьбьн.

БЬРА ШАШИ РʹИЙА ТӘ НӘГЬРЬН НЕЗИКИ ЙАҺОԜА БИ

16. Чахе ньвискʹаре Зәбура 73 чәнд сал Йаһоԝарʹа хьзмәт кьр, әԝи хԝә ча тʹәхмин дькьр?

¹⁶ Щарна дьбәкә жь бо шашийед хԝә әм бьфькьрьн, ԝәки әм һежайи һʹәзкьрьна Йаһоԝа ниньн. Чаԝа мә пешда шеԝьр кьр, тьштәки ӧса һатьбу сәре ньвискʹаре Зәбура 73 жи. Әԝи гот: «Һьндьк мабу әз жь рʹе бькʹәтама у мук мабу гавед мьн бьшьмьтийана» (Зәбур 73:2). Әԝи гот кӧ бәр Йаһоԝа, әԝ бьбу йәки «бефәʹм у нәзан» у «мина һʹәйԝан» (Зәбур 73:21, 22). Гәло әԝ дьфькьри кӧ жь бо шашийа хԝә, әԝ ида һежайи һʹәзкьрьна Йаһоԝа нинә?

17. (а) Гава зәбурбеж хԝә гәләк хьраб тʹәхмин дькьр, әԝи чь кьр? (б) Жь сәрһатийа зәбурбеж әм чь һин дьбьн? (Бьньһерʹә ӧса жи шькьл.)

¹⁷ Фькьра зәбурбеж кӧ Йаһоԝа жь ԝи нәрʹази йә, зу дәрбаз бу. Әʹйан ә кӧ гава әԝи хԝә гәләк хьраб тʹәхмин дькьр, әԝи фәʹм кьр кӧ гәрәке дьһа незики Хԝәде бә. Әԝи Йаһоԝарʹа ӧса гот: «Ле әз тʹьме тʹәви Тә мә, Тӧ дәсте мьни рʹасте дьгьри. Тӧ пе ширәтед Хԝә рʹе нишани мьн дьки у паше жи бь рʹумәте мьн ԛәбул дьки» (Зәбур 73:23, 24). Гава әм хԝә сьст у бечʹарә тʹәхмин дькьн, әм гәрәке хԝә бьсперьн зьнаре хԝә Йаһоԝа (Зәбур 73:26; 94:18). Һәрге әм шашийа бькьн жи, әм дькарьн вәгәрʹьн бал Йаһоԝа, чьмки әԝ һазьр ә бьбахшинә мә (Зәбур 86:5). Илаһи гава әм хԝә хьраб тʹәхмин дькьн, гәләк фәрз ә ԝәки әм дьһа незики Хԝәде бьн (Зәбур 103:13, 14).

ҺʹӘТА-ҺʹӘТАЙЕ НЕЗИКИ ХԜӘДЕ БӘ

18. Әме чьма тʹьме бькарьбьн дьһа незики Йаһоԝа бьн?

¹⁸ Чьԛас ԝәхт дәрбаз бә жи, әме тʹьме бькарьбьн дьһа незики Йаһоԝа бьн. Әме һʹәта-һʹәтайе дәрһәԛа ԝи тьштед тʹәзә пебьһʹәсьн. Кʹьтеба Пироз дәрһәԛа Йаһоԝа ӧса дьбежә: «Чьԛаси кʹур ьн дәԝләмәндти, сәрԝахти у занәбуна Хԝәде! Гәло кʹи дькарә ԛьраред ԝи фәʹм бькә, у кʹи дькарә рʹийед ԝи бьзаньбә?» (Рʹомайи 11:33).

19. Кʹьтеба Зәбур дәрһәԛа ахьрийе чь дьбежә?

¹⁹ Зәбур 79:13 ӧса дьбежә: «Ле бәле әм щьмәʹта Тә у пәзе мерга Тә, әме һʹәта-һʹәтайе шькьрийе бьдьнә Тә у ԛӧрʹнә-ԛӧрʹнә рʹумәта Тә сальх кьн бежьн». Чьԛас тӧ незики Хԝәде би, һаԛас тӧйе баԝәр би ԝәки әԝе кʹәрәмед һʹәта-һʹәтайе бьдә тә, у тӧйе ӧса бежи: «Хԝәде йә ськʹана дьле мьн у һʹәта-һʹәтайе пʹара мьн» (Зәбур 73:26).