Чʹәʹв Бьдьнә Мәләкед Амьн

1-2. а) Әм чьда жь мәләка щӧдә нә? б) Әм кʹижан алийада мина мәләка нә?

ГАВА Йаһоԝа Хԝәде тӧ ани сәр рʹийа рʹастийе, тӧ кʹәти малбәтәкә мәзьн, йа хьзмәткʹаред Хԝәде. Ве малбәта һʹәзкьрида бь милйона мәләкед амьн жи һәнә (Данийел 7:9, 10). Һәмьки мәләк жь мә гәләк щӧдә нә. Мәсәлә, әԝана гәләк ԝәхт пешийа мәрьва һатьбунә әʹфьрандьне (Ибо 38:4, 7). Ԛәԝата ԝан жь йа мә зедәтьр ә. Ӧса жи, жь бо ԝе йәке кӧ әм мәрьвнә ԛьсурдар ьн, әм нькарьн мина ԝан рʹаст у пироз бьн (Луԛа 9:26).

² Диса жи, әм гәләк алийада мина һәв ьн. Мәсәлә, мина мәләка, әм жи дькарьн чʹәʹв бьдьнә һʹӧнӧред Йаһоԝа у азайа бьжартьна мә жи һәйә. Чаԝа навед ԝана һәнә, ӧса жи навед мәйи шәхси һәнә, хәйсәтед һәр йәки жь мә, жь һәв щӧдә йә у щурʹә-щурʹә щабдарийед мә һәнә, чаԝа йед ԝан. У мина мәләка, һʹәԝщәтийа мә һәйә Хԝәде бьһʹәбиньн (1 Пәтрус 1:12).

3. Әм жь мәләкед амьн чь дькарьн һин бьн?

³ Әм гәләк алийада мина мәләка нә, ләма жи әм дькарьн чʹәʹв бьдьнә ԝан у гәләк тьшта жь ԝан һин бьн. Ве готареда әме бьвиньн кӧ әм ча дькарьн чʹәʹв бьдьнә мьлуктийа мәләкед амьн, ӧса жи һʹәзкьрьн у сәбьра ԝан у ве йәке, кӧ әԝана чь дькьн, сәва кӧ щьвате тʹәмьз хԝәй кьн.

МӘЛӘК МЬЛУК ЬН

4. а) Мәләк мьлуктийа хԝә ча дьдьнә кʹьфше? б) Мәләк чьма мьлук ьн? (Зәбур 89:7)

⁴ Мәләкед амьн щерʹьбанди нә, ԛәԝат у биланийа ԝан гәләк ә, ле диса жи әԝана мьлук ьн у гӧһ дьдьнә тʹәмийед Йаһоԝа Хԝәде (Зәбур 103:20). Гава әԝана щабдарийед хԝә тиньн сери, әԝана тʹӧ щара бона кьред хԝә у ԛәԝата хԝәйә мәзьн пәсьне хԝә надьн у хԝә накьнә чʹәʹва. Һәрге навед ԝан әʹйан нибьн жи, әԝана рʹази нә кӧ ԛьрара Йаһоԝа биньн сериa (Дәстпебун 32:24, 29; 2 Пʹадшати 19:35). Әԝана нахԝазьн ԝан пәсьна бьстиньн, кʹижан кӧ Йаһоԝарʹа дькʹәвә. Гәло мәләк чьма ӧса мьлук ьн? Чьмки әԝана Йаһоԝа һʹәз дькьн у ԛәдьре ԝи дьгьрьн (Бьхунә Зәбур 89:7).

5. Мьлуктийа мәләк ча әʹйан бу, чахе әԝи ширәт да Йуһʹәннайе шанди? (Бьньһерʹә ӧса жи шькьл.)

⁵ Ԝәрә әм дина хԝә бьдьнә сәрһатике, кʹижан кӧ мьлуктийа мәләка әʹйан дькә. Незики сала 96 Д.М., мәләкәки кӧ әм наве ԝи ньзаньн, хәйаләкә әʹщебмайи нишани Йуһʹәннайе шанди кьр (Әʹйанти 1:1). Чахе Йуһʹәнна әв хәйал станд, әԝ бәр мәләк кʹәтә сәр чока у хԝәст сәре хԝә бәр ԝи дайнә. Ле әв мәләке амьн нәһишт кӧ Йуһʹәнна ве йәке бькә. Әԝи гот: «Әз жи һәвал-хӧламәки мина тә у ԝан хушк-бьред тә мә . . . Сәре хԝә ль бәр Хԝәде дайнә!» (Әʹйанти 19:10). Щабәкә чьԛас бь мьлукти бу! Мәләк нәхԝәст кӧ жерʹа рʹумәт йан пәсьн бе дайине, ләма әԝи дина Йуһʹәнна кʹьшандә сәр Йаһоԝа Хԝәде. Хенщи ве йәке мәләк Йуһʹәннарʹа нәда кʹьфше, кӧ әԝ жь ԝи четьр ә. Рʹаст ә әԝи мәләки ида ԝәʹдәки дьреж Йаһоԝарʹа хьзмәт кьрьбу у жь Йуһʹәнна ԛәԝаттьр бу, диса жи әԝи бь мьлукти гот, кӧ әԝ хӧламәки мина ԝи йә. У гава лазьм бу, кӧ мәләк ширәте бьдә Йуһʹәнна, әԝи әв йәк сәрт жерʹа нәгот. Мәләк фәʹм дькьр, ԝәки Йуһʹәнна жь бо тьштед кӧ дит әʹщебмайи мабу, ләма жи әԝи бь нәрми ширәт да Йуһʹәнна.

6. Әм ча дькарьн чʹәʹв бьдьнә мьлуктийа мәләка?

⁶ Әм ча дькарьн чʹәʹв бьдьнә мьлуктийа мәләка? Әм жи дькарьн щабдарийед хԝә ӧса биньн сери, кӧ пәсьне хԝә нәдьн у дина мәрьва нәкʹьшиньн сәр пешдачуйинед хԝә (1 Корьнтʹи 4:7). Ӧса жи әм гәрәке хԝә жь мәрьвед дьн четьр һʹәсаб нәкьн жь бо ве йәке, кӧ мә ԝәʹдәки дьреж Йаһоԝарʹа хьзмәт кьрийә, йан жи мә һьнә щабдари стандьнә. Бь рʹасти, щабдарийед мә чьԛас зедә бьн жи, һаԛас әм гәрәке хԝә ньмьз һʹәсаб кьн (Луԛа 9:48). Әм жи мина мәләка дьхԝазьн кәсед дьнрʹа хьзмәт кьн у нахԝазьн хԝә бәр чʹәʹве мәрьва бьльнд кьн.

7. Гава лазьм дьбә кӧ әм ширәте бьдьнә кәсәки, әм ча гәрәке ве йәке бькьн?

⁷ Гава лазьм дьбә кӧ әм ширәте бьдьнә кәсәки, мәсәлә зарʹа хԝә, хушк йан бьра, әм дькарьн ве йәке бь мьлукти бькьн. Дьбәкә щарна әм гәрәке рʹастә-рʹаст ширәта бьдьн. Диса жи, мина мәләке кӧ бь нәрми ширәт дабу Йуһʹәнна, әм жи дькарьн ӧса бь нәрми ширәта бьдьн у тʹӧ кәси ньмьз нәкьн. Һәрге әм хԝә жь мәрьва четьр һʹәсаб нәкьн, әме ширәта жь Кʹьтеба Пироз бь ԛәдьр у дьловани бьдьнә ԝан (Колоси 4:6).

МӘЛӘК МӘРЬВА ҺʹӘЗ ДЬКЬН

8. а) Ль гора Луԛа 15:10, мәләк чаԝа әʹйан дькьн кӧ мәрьва һʹәз дькьн? б) Шьхӧле бәлакьрьна мьзгинийеда, рола мәләка чь йә? (Бьньһерʹә ӧса жи шькьл.)

⁸ Мәләк мә бекер һʹәсаб накьн. Әԝана мәрьва һʹәз дькьн. Гава кәсәки гӧнәкʹар тʹобә дькә, демәк гава бәрхәки ӧндабуйи вәдьгәрʹә бал Йаһоԝа, йан гава кәсәк хԝә рʹаст дькә у те сәр рʹийа рʹастийе, мәләк гәләк ша дьбьн (Бьхунә Луԛа 15:10). Ӧса жи мәләк шьхӧле бәлакьрьна мьзгинийеда кʹар дькьн (Әʹйанти 14:6). Рʹаст ә мәләк хԝәха мьзгинийе нагьһиньн мәрьва, ле әԝана дькарьн рʹебәрийа мә бькьн, ԝәки әм рʹасти ԝан мәрьва бен, йед кӧ дьхԝазьн Йаһоԝа нас бькьн. Гава кәсәк те сәр рʹийа рʹастийе, һәмьки әм ньзаньн әв йәк бь рʹебәрийа мәләка бу йан на, чьмки Йаһоԝа дькарә методед дьн жи бьдә хәбате. Мәсәлә, әԝ дькарә рʹӧһʹе пироз бьдә хәбате (Кʹаред Шандийа 16:6, 7). Диса жи Йаһоԝа мәләкед хԝә гәләк щар дьдә хәбате, сәва кӧ ԝәʹде бәлакьрьна мьзгинийе али мә бькьн. Ләма жи гава әм мьзгинийе бәла дькьн, әм дькарьн баԝәр бьн, ԝәки мәләк ԝе али мә бькьн (Бьньһерʹә чаргошә, «Ԝана Щаба Дӧайед Хԝә Станд»).b

9. Әм ча дькарьн чʹәʹв бьдьнә һʹәзкьрьна мәләка, йа кӧ әԝана һьндава мәрьвада дьдьнә кʹьфше?

⁹ Әм ча дькарьн мина мәләка, мәрьва һʹәз бькьн? Гава те әʹламкьрьне кӧ кәсәк диса щьватеда һатийә ԛәбулкьрьне у вәгәрʹийайә щәм Йаһоԝа, әм дькарьн мина мәләка ша бьн у ԝи кәсирʹа бежьн, ԝәки әԝ бь хер һатийә у әм ша нә кӧ әԝ вәгәрʹийайә щьвате (Луԛа 15:4-7; 2 Корьнтʹи 2:6-8). Чаԝа кӧ мәләк бь дьл у щан Йаһоԝарʹа хьзмәт дькьн, әм жи дькарьн бь дьл у щан мьзгинийе бәла кьн (Ԝаиз 11:6). Ӧса жи, чаԝа кӧ мәләк шьхӧле бәлакьрьна мьзгинийеда али мә дькьн, әм жи дькарьн хьзмәтийеда аликʹарийе бьдьнә хушк-бьра. Мәсәлә, гәло әм дькарьн тʹәви мьзгинванәки тʹәзә дәркʹәвьнә хьзмәтийе? Гәло әм дькарьн али хушк-бьред әʹмьрда мәзьн йан али йед нәхԝәш бькьн, ԝәки әԝана жи бькарьбьн хьзмәт кьн?

10. Әм жь сәрһатийа хушка мә Сарайе чь дькарьн һин бьн?

¹⁰ Һәрге мәщала мә тʹӧнә һаԛаси хьзмәт кьн, чьԛас дьле мә дьхԝазә, әм чь дькарьн бькьн? Диса жи әм дькарьн тʹәви мәләка бәлакьрьна мьзгинийеда һәвкʹарийе бькьн. Ԝәрә әм дина хԝә бьдьнә сәрһатийа хушка мә Сарайе,c йа кӧ ль Һьндьстане дьжи. Паши ве йәке кӧ әԝе 20 сала ча пешәнг хьзмәт кьрьбу, әԝ нәхԝәш кʹәт у ида нькарьбу рʹабә сәр пʹийа. Жь бо ве йәке әԝ кʹәтә депресийа кʹур. Ле бь сайа пьштгьрийа хушк-бьра у хԝәндьна Кʹьтеба Пироз, шабуна ԝе һеди-һеди вәгәрʹийа. Һәмьки лазьм бу ԝәки әԝе ида ль гора дәрәща хԝәйә тʹәзә хьзмәт кьра. Әԝ ида нькарьбу рʹуньшта жи у нәʹмә бьньвисийа, ле тʹәне бь телефоне хьзмәт дькьр. Әԝе сәрледанед дӧбарә бь телефоне дькьр у ԝана дьпьрси, һәла әԝана кәсәки нас дькьн, кʹе кӧ дьхԝазә дәрһәԛа Кʹьтеба Пироз хәбәр дә. Әве йәке чь кʹар ани? Нава чәнд мәһада, Сарайе тʹәви 70 мәрьва һинбуна Кʹьтеба Пироз дәстпекьр. Жь бо ве йәке кӧ әԝе нькарьбу тʹәви һаԛас мәрьва һинбуна Кʹьтеба Пироз дәрбаз кә, әԝе һьнә һинбунед хԝә тʹәсмили хушк-бьред дьн кьр. Жь ван хԝәндәкʹара гәләк кәс ньһа тенә щьвата. Мәләк бе шьк гәләк ша нә, чьмки әԝана тʹәви хушк-бьред хирәт, йед мина Сарайе һәвкʹарийе дькьн!

МӘЛӘК СӘБЬРЕ ДЬДЬНӘ КʹЬФШЕ

11. Мәләкед амьн ча сәбьре дьдьнә кʹьфше?

¹¹ Мәләкед амьн алийе сәбьрева жи мәрʹа мәсәлә нә. Бь һʹәзара сала ԝана мьԛабьли нәһәԛи у хьрабийе сәбьр кьрийә. Ԝана дитьбу кӧ Мире-щьна у гәләк мәләкед дьн, йед кӧ бәре тʹәви ԝан хьзмәт дькьрьн, чаԝа мьԛабьли Йаһоԝа дәркʹәтьн (Дәстпебун 3:1; 6:1, 2; Щьһуда 6). Кʹьтеба Пироз бәʹса мәләкәки амьн дькә, йе кӧ рʹастә-рʹаст тʹәви щьнәки ԛәԝи шәрʹ дькьр (Данийел 10:13). Ӧса жи дәстпебуйи жь рʹожед Адәм у Һеԝайе, мәләка дитийә, кӧ тʹәне һьнә мәрьв Йаһоԝа дьһʹәбиньн. Диса жи, мәләкед амьн бь хирәт у шабуне Йаһоԝарʹа хьзмәт дькьн. Әԝана заньн кӧ ԝәʹде кʹьфшкьрида, Хԝәде ԝе нәһәԛийе бьдә һьлдане.

12. Чь дькарә али мә бькә сәбьр кьн?

¹² Әм ча дькарьн чʹәʹв бьдьнә сәбьра мәләка? Мина мәләка, дьбәкә әм жи нәһәԛийе бьвиньн йан жи рʹасти пәйкʹәтьне бен. Ле мина ԝан, әм жи баԝәр ьн, кӧ Хԝәде ԝе ԝәʹде кʹьфшкьрида хьрабийе бьдә һьлдане. Ләма жи мина мәләкед амьн, әм жь ԛәнщикьрьне наԝәстьн (Галати 6:9). Ӧса жи Хԝәде соз дайә кӧ әԝе али мә бькә, ԝәки әм бькарьбьн сәбьр бькьн (1 Корьнтʹи 10:13). Әм дькарьн Йаһоԝарʹа дӧа бькьн, ԝәки әԝ рʹӧһʹе хԝә бьдә мә, кʹижан кӧ сәбьр у шабуне пешда тинә (Галати 5:22; Колоси 1:11). Һәрге тӧ рʹасти пәйкʹәтьне бейи, тӧ дькари чь бьки? Хԝә бь тʹәмами бьсперә Йаһоԝа у нәтьрсә. Йаһоԝа ԝе һәртʹьм али тә бькә у ԛәԝате бьдә тә (Ибрани 13:6).

МӘЛӘК БОНА ТʹӘМЬЗАЙА ЩЬВАТЕ ЩАБДАР ЬН

13. Ԝан рʹожед пашьнда, чь щабдарийа мәхсус мәләкарʹа һатийә дайине? (Мәтта 13:47-49)

¹³ Ԝан рʹожед пашьнда, Йаһоԝа щабдарикә мәхсус дайә мәләка (Бьхунә Мәтта 13:47-49). Бь сайа бәлакьрьна мьзгинийе, бь милйона мәрьв мьзгини ԛәбул кьрьнә. Жь ван кәса һьнәк хирәт дькьн, ԝәки бьбьнә Мәсиһийед рʹаст. Ле бәле, һьнә кәс нахԝазьн жийина хԝә бьгӧһезьн. Щабдарийа мәләка әв ә, кӧ «мәрьвед хьраб жь мәрьвед рʹаст вәԛәтиньн». Демәк әԝана дина хԝә дьдьне, кӧ щьватеда тʹәмьзайи бе хԝәйкьрьне. Һәмьки әв йәк найе һʹәсабе, ԝәки мәрьвед кӧ жь бо мәʹники ида пʹара щьвате ниньн, нькарьн диса вәгәрʹьнә щәм Йаһоԝа. Ӧса жи әв йәк найе һʹәсабе, ԝәки щьватеда ԝе тʹӧ щара проблем пешда нәйен. Ле бәле, әм дькарьн баԝәр бьн ԝәки мәләк һәр тьшти дькьн, ԝәки щьватед мә тʹәмьз бьминьн.

14-15. Әм ча дькарьн мина мәләка бона тʹәмьзайа щьвате хәм бькьн алийе рʹӧһʹани у нав-намусийеда? (Бьньһерʹә ӧса жи шькьл.)

¹⁴ Мина мәләка, әм ча дькарьн бона тʹәмьзайа щьвате хәм бькьн? Әм гәрәке һәр тьшти бькьн кӧ достийа хԝә тʹәви Йаһоԝа ԛәԝи хԝәй кьн. Сәва ве йәке әм гәрәке тʹәви достед Йаһоԝа һәвалтийе бькьн у хԝә жь тьштед ӧса дур бьгьрьн, йед кӧ дькарьн зийане бьдьнә һәләԛәтийа мә тʹәви Йаһоԝа. Ӧса әм дькарьн пьштгьрийа тʹәмьзайа щьвате бькьн (Зәбур 101:3). Хенщи ве йәке, әм дькарьн али хушк-бьра бькьн, ԝәки әԝана жи Йаһоԝарʹа амьн бьминьн. Мәсәлә, һәрге әм пебьһʹәсьн кӧ хушк йан бьраки гӧнәки гьран кьрийә, әм гәрәке чь бькьн? Әм ԝи һʹәз дькьн, ләма жи әм гәрәке жерʹа бежьн, ԝәки әԝ дәрһәԛа гӧне хԝә рʹуспийарʹа бежә. Һәрге әԝ ӧса нәкә, әм хԝәха гәрәке ве йәке рʹуспийарʹа бежьн. Хԝәстьна мә әв ә, кӧ хушк йан бьраки мә, кʹижан кӧ рʹӧһʹанида сьст буйә, зу аликʹарийе бьстинә (Аԛуб 5:14, 15).

¹⁵ Сәд һʹәйф ԝәки һьнә кәсед, кӧ гӧнед гьран кьрьнә гәрәке ида пʹара щьвате нибьн. Һьнге әм гәрәке һәләԛәтийа хԝә тʹәви ԝан бьбьрʹьнd (1 Корьнтʹи 5:9-13). Бәле, әв йәк фәрз ә, сәва кӧ щьват паԛьж бьминә. Ӧса жи бь ве йәке кӧ әм тʹәви ԝан һәвалтийе накьн, әм бь рʹасти ԛәнщийе ль ԝан дькьн, чьмки сафикьрьна мә дькарә али ԝан бькә, кӧ әԝана диса вәгәрʹьнә щәм Йаһоԝа. Гава кәсед ӧса вәдьгәрʹьнә щьвате, әм жи чаԝа Йаһоԝа у мәләкед ԝи, гәләк ша дьбьн (Луԛа 15:7).

16. Тӧ кʹижан алийада дьхԝази чʹәʹв бьди мәләка?

¹⁶ Әм чьԛас ша нә кӧ Йаһоԝа дәрһәԛа мәләка әʹламәти дайә мә. Бона мә ԛәдьрәки мәзьн ә, ԝәки әм дькарьн тʹәви ԝан һәвкʹарийе бькьн! Ԝәрә әм мина ԝан мьлук бьн, мәрьва һʹәз бькьн, сәбьр бькьн у бона тʹәмьзайа щьвате алийе рʹӧһʹани у нав-намусийеда хәм бькьн. Һәрге әм чʹәʹв бьдьнә мәләкед амьн, әме жи бькарьбьн һʹәта-һʹәтайе малбәта Йаһоԝада бьминьн.