Наве Йаһоԝа бона Тә Чьԛас Фәрз ә?

1-2. Әм жь кʹӧ заньн ԝәки наве Йаһоԝа бона Иса гәләк фәрз ә?

НАВЕ Йаһоԝа бона Иса гәләк фәрз ә. Әԝ жь һәр кәси зедәтьр пьштгьрийа наве Баве хԝә дькә. Чаԝа кӧ жь готара пешийа ве һатә кʹьфше, Иса һазьр бу бона наве Йаһоԝа әʹмьре хԝә жи бьдә. Ӧса әԝи избат кьр, ԝәки Йаһоԝа пироз ә у һʹәму кьред ԝи рʹаст ьн (Маркос 14:36; Ибрани 10:7-9). Паши Сәрԝертийа Һʹәзарсали, Иса ԝе һазьр бә һʹӧкӧмәтийе бьдә дәсте Баве хԝә, чьмки әԝ дьхԝазә ԝәки һʹәму һӧрмәт-рʹумәт ԝирʹа бе дайине (1 Корьнтʹи 15:26-28). Хенщи ве йәке, һʹәзкьрьна Иса һьндава наве Хԝәде гәләк тьшт дьдә кʹьфше дәрһәԛа һәләԛәтийа ԝийә тʹәви Йаһоԝа. Әв йәк чь кӧ Иса бона Баве хԝә кьрийә избат дькә, ԝәки әԝ гәләк Баве хԝә һʹәз дькә.

² Иса бь наве Баве хԝә һатә сәр әʹрде (Йуһʹәнна 5:43; 12:13). Әԝи наве Баве хԝә шагьртед хԝәрʹа әʹйан кьр (Йуһʹәнна 17:6, 26). Иса бь наве Йаһоԝа һин дькьр у кʹәрәмәта дькьр (Йуһʹәнна 10:25). Щарәке Иса жь Йаһоԝа рʹәща кьр ԝәки әԝ «жь бо хатьре наве хԝә» шагьрта бьбә хԝәйи (Йуһʹәнна 17:11). Зәлал ә, ԝәки Иса наве Йаһоԝа гәләк ԛимәт дькьр. Һәрге ӧса нә, мәрьв ча дькарә хԝә ча шагьрте Иса һʹәсаб кә, ле наве Хԝәде ньзаньбә йан жи нәдә хәбате?

3. Ве готареда әме чь пебьһʹәсьн?

³ Әм шагьртед Иса нә у хирәт дькьн ԝәки һәр тьштида чʹәʹв бьдьнә ԝи, ләма әм жи наве Баве ԝи гәләк ԛимәт дькьн (1 Пәтрус 2:21). Ве готареда әме бьвиньн, кӧ чьрʹа Йаһоԝа наве хԝә дайә сәр мәрьвед кӧ «мьзгинийа Пʹадшатийе» бәла дькьн (Мәтта 24:14). Ӧса жи әме бьвиньн, кӧ наве Йаһоԝа бона мә гәрәке чьԛас фәрз бә.

«ЩЬМӘʹТӘКЕ БОНА НАВЕ ХԜӘ»

4. а) Пешийа кӧ Иса вәгәрʹийа әʹзмана, әԝи чь щабдари да шагьртед хԝә? б) Жь бо гьлийед Иса, кʹижан пьрс пешда те?

⁴ Пешийа кӧ Иса вәгәрʹийа әʹзмана, әԝи шагьртед хԝәрʹа ӧса гот: «Һуне ԛәԝате бьстиньн гава рʹӧһʹе пироз бе сәр ԝә, у һуне бьбьнә шәʹдед мьн ль Оршәлиме, ль тʹәмамийа Щьһустане у Самәрйайе, у сәр тʹәмамийа дьнйайе» (Кʹаред Шандийа 1:8). Демәк әԝи гот ԝәки мьзгини ԝе нә кӧ тʹәне Исраеледа, ле сәр тʹәмамийа дьнйайе бе бәлакьрьне. Бь сайа ви шьхӧли, мәщала мәрьвед жь һʹәму мьләта һәйә ԝәки бьбьнә шагьртед Иса (Мәтта 28:19, 20). Ле дина хԝә бьдьне, кӧ Иса чь гот: «Һуне бьбьнә шәʹдед мьн». Гәло шагьртед тʹәзә гәрәке наве Йаһоԝа бьзаньбуна, йан әԝана гәрәке бьбуна тʹәне шәʹдед Иса? Гьлийед жь Кʹаред Шандийа сәре 15 али мә дькьн, ԝәки әм щаба ве пьрсе бьстиньн.

5. Шанди у рʹуспийед Оршәлиме ча нишан кьрьн, ԝәки һәр кәс гәрәке наве Йаһоԝа бьзаньбә? (Бьньһерʹә ӧса жи шькьл.)

⁵ Сала 49 Д.М.-да шанди у рʹуспийед Оршәлиме тʹоп бун, ԝәки шеԝьр кьн һәла мәрьвед жь мьләтед дьн, йед кӧ сьнәткьри нибун, гәрәке чь бькьн ԝәки ча шагьртед Иса бенә ԛәбулкьрьне. Хьлазийа шеԝьркьрьне, бьре Иса Аԛуб ӧса гот: «[Пәтрус] һур бь һур гьли кьр кӧ Хԝәде чаԝа щара пешьн дина хԝә да мьләтед дьн, ԝәки нав ԝанда щьмәʹтәке бона наве хԝә тʹоп кә». Гәло Аԛуб бәʹса наве кʹе дькьр? Әв йәк жь гьлийед Амос пʹехәмбәр, йед кӧ Аԛуб ԝәкʹьланд, әшкәрә дьбә: «Кәсед майи у мәрьвед жь һʹәму мьләта, йед кӧ наве мьн сәр ԝан ә, бь хирәт Йаһоԝа бьгәрʹьн. Ве йәке Йаһоԝа дьбежә» (Кʹаред Шандийа 15:14-18). Хенщи ве йәке кӧ шагьртед тʹәзә гәрәке дәрһәԛа Йаһоԝа һин буна, ӧса жи һатьбу пʹехәмбәртикьрьне ԝәки ‹наве ԝи ԝе сәр ԝан бә›. Әв йәк дьһатә һʹәсабе, ԝәки әԝана ԝе һʹәмуйарʹа наве Хԝәде әʹйан кьрана у бь наве Хԝәде бьһатана наскьрьне.

6-7. а) Иса чьма һатә дьнйайе? б) Мәʹнийа лапә сәрәкә кӧ Иса һатә сәр әʹрде, чь бу?

⁶ Наве «Иса» те һʹәсабе «Йаһоԝа хьлаз дькә». Бь рʹасти жи, Йаһоԝа мәрьвед хԝәдехоф бь сайа ԝи хьлаз дькә. Иса һатә дьнйайе сәва кӧ әʹмьре хԝә бона мәрьва бькә ԛӧрбан (Мәтта 20:28). Бь сайа ԛӧрбане әԝи рʹе вәкьр, ԝәки мәрьв хьлаз бьн у әʹмьре һʹәта-һʹәтайе бьстиньн (Йуһʹәнна 3:16).

⁷ Ле гәло чьрʹа мәрьв һʹәԝще ԛӧрбана Иса бун? Чаԝа кӧ әм жь готара пешийа ве пеһʹәсийан, бахче Еденеда мәрьвед пешьн, Адәм у Һеԝа мьԛабьли Йаһоԝа рʹабун у мәщала жийина һʹәта-һʹәтайе ӧнда кьрьн (Дәстпебун 3:6, 24). Ләма жи Иса һатә дьнйайе, ԝәки зӧрʹәта Адәм у Һеԝайе жь гӧнә у мьрьне хьлаз кә. Ле мәʹникә дьһа фәрз жи һәбу. Бахче Еденеда, Мире-щьна бӧхдан авитә наве Йаһоԝа (Дәстпебун 3:4, 5). Ләма лазьм бу ԝәки наве Йаһоԝа бе пирозкьрьне. Иса заньбу кӧ хьлазкьрьна мәрьва пирозкьрьна наве Йаһоԝава гьредайи йә. Жь бо ве йәке кӧ Иса дәԝса Йаһоԝа мәрьварʹа хәбәр дьда у наве Йаһоԝа сәр ԝи бу, әԝи пирозкьрьна наве Йаһоԝада роләкә сәрәкә дьлист.

8. Һʹәму шагьртед Иса гәрәке чь фәʹм кьрана?

⁸ Һʹәму шагьртед Иса, демәк ча Щьһу ӧса жи жь мьләтед дьн, гәрәке ԛәбул кьрана ԝәки хьлазбуна ԝан Йаһоԝава гьредайи йә (Йуһʹәнна 17:3). Мина Иса, әԝана жи гәрәке бь наве Йаһоԝа бьһатана наскьрьне. Ԝана гәрәке фәʹм кьра, ԝәки чьԛас фәрз ә кӧ әв нав бе пирозкьрьне. Хьлазбуна ԝан Ԝива гьредайи бу (Кʹаред Шандийа 2:21, 22). Жь бо ве йәке лазьм бу ԝәки һʹәму шагьртед Исайә амьн, һьм дәрһәԛа Йаһоԝа һьм жи дәрһәԛа Иса занәбун бьстандана. Ләма жи Иса хьлазийа дӧайе хԝәда ӧса гот: «Мьн наве тә ԝанрʹа әʹйан кьр у әзе диса жи әʹйан кьм, ԝәки әԝана жи мәрьва ӧса һʹәз бькьн, чаԝа кӧ тә әз һʹәз кьрьмә, у ԝәки әз тʹәви ԝан йәктийеда бьм» (Йуһʹәнна 17:26).

«ҺУН ШӘʹДЕД МЬН ЬН»

9. Әм ча дькарьн нишан кьн, кӧ наве Йаһоԝа бона мә фәрз ә?

⁹ Жь ве йәке чь кӧ мә шеԝьр кьр, әʹйан ә ԝәки әм жи гәрәке чʹәʹв бьдьнә Иса у наве Йаһоԝа пироз кьн (Мәтта 6:9, 10). Наве Йаһоԝа бона мә гәрәке наве һәри фәрз бә, у әм гәрәке ве йәке бь рʹабун-рʹуньштьна хԝә нишан кьн. Гәло әм ча дькарьн наве Йаһоԝа пироз кьн у жь бӧхданед кӧ Мире-щьна авитийә ԝи, паԛьж кьн?

10. Кʹьтеба Ишайа сәре 42 һʹәта 44-да дәрһәԛа кʹижан диԝана симболик те готьне? (Ишайа 43:9; 44:7-9) (Бьньһерʹә ӧса жи шькьл.)

¹⁰ Кʹьтеба Ишайа сәре 42 һʹәта 44, дина мә дькʹьшиньн сәр ве йәке, кӧ әм гәрәке наве Йаһоԝа пироз кьн. Ван сәрийада, ча бежи ԝәʹде диԝана симболик, Йаһоԝа ԝан мәрьварʹа кӧ жерʹа хьзмәт накьн, дьбежә ԝәки әԝана избат кьн, кӧ хӧданед ԝан бь рʹасти һәнә. Ӧса жи әԝ дьбежә кӧ бьра шәʹдә дәркʹәвьн у ве йәке избат кьн. Ле бь рʹасти шәʹдед ӧса тʹӧнә нә (Бьхунә Ишайа 43:9; 44:7-9).

11. Ль гора Ишайа 43:10-12, Йаһоԝа хьзмәткʹаред хԝәрʹа чь дьбежә?

¹¹ Бьхунә Ишайа 43:10-12. Йаһоԝа сәр хьзмәткʹаред хԝә ӧса дьбежә: «Һун шәʹде мьн ьн кӧ әз Хԝәде мә, ИМ». Йаһоԝа жь ԝан ӧса дьпьрсә: «Хенщи мьн Хԝәде һәйә?» (Ишайа 44:8, ИМ). Мәрʹа ԛәдьрәки мәзьн һатийә дайине, ԝәки щаба ве пьрсе бьдьн. Бь хәбәрдан у кьред хԝә әм дькарьн ча шәʹдә диԝанеда избат кьн, ԝәки тʹәне Йаһоԝа Хԝәдайе рʹаст ә. Бь щурʹе әʹмьре хԝә әм дькарьн избат кьн, кӧ әм Йаһоԝа бь рʹасти һʹәз дькьн у Мире-щьна чь жи бькә, әм Йаһоԝарʹа амьн дьминьн. Ӧса мәщал мәрʹа те дайине, ԝәки әм наве Ԝи пироз кьн.

12. Гьлийед жь Ишайа 40:3, 5 ча һатьнә сери?

¹² Чахе әм наве Йаһоԝа дьпʹарезьн, бь ве йәке әм чʹәʹв дьдьнә Иса. Ишайа пʹехәмбәр бәреда готьбу, ԝәки рʹе бона Йаһоԝа гәрәке һазьр кьрана (Ишайа 40:3). Гәло әв гьли ча һатьнә сери? Йуһʹәннайе Ньхӧмдар бона Иса рʹе вәкьр, йе кӧ бь наве Йаһоԝа һат у бь наве Йаһоԝа хәбәр дьда (Мәтта 3:3; Маркос 1:2-4; Луԛа 3:3-6). Ӧса жи Ишайа готьбу, ԝәки ԝе «рʹумәта Хӧдан хӧйа бьбә» (Ишайа 40:5, ИМ). Бь рʹасти жи ӧса ԛәԝьми. Гава Иса һатә сәр әʹрде, әԝи һʹӧнӧред Йаһоԝа бь щурʹе ӧса кʹамьл әʹйан дькьр, те бежи хԝәха Йаһоԝа һатьбу дьнйайе (Йуһʹәнна 12:45).

13. Әм ча дькарьн чʹәʹв бьдьнә Иса?

¹³ Мина Иса, әм жи Шәʹдед Йаһоԝа нә. Наве Йаһоԝа сәр мә йә у әм һәр кәсирʹа дәрһәԛа кьред ԝийә гьринг гьли дькьн. Сәва кӧ әм шәʹдәтийа баш бьдьн, әм гәрәке мәрьварʹа бежьн кӧ Иса ча наве Йаһоԝа пироз дькьр (Кʹаред Шандийа 1:8). Иса Шәʹде Йаһоԝайә һәри мәзьн ә у әм пәй ԝи дьчьн (Әʹйанти 1:5). Диса ча әм дькарьн нишан кьн, ԝәки наве Йаһоԝа сәва мә гәләк ԛимәт ә?

НАВЕ ЙАҺОԜА СӘВА МӘ ЧЬ ТЕ ҺʹӘСАБЕ

14. Ль гора Зәбур 105:3, наве Йаһоԝа бона мә чьԛас фәрз ә?

¹⁴ Әм пе наве Йаһоԝа фьрнаԛ дьбьн (Бьхунә Зәбур 105:3). Йаһоԝа хԝәш те кӧ әм бь наве ԝи фьрнаԛ дьбьн (Йерәмйа 9:23, 24; 1 Корьнтʹи 1:31; 2 Корьнтʹи 10:17). Бәле, әм сәрбьльнд ьн жь бо ве йәке кӧ Йаһоԝа Хԝәдайе мә йә, у бона мә ԛәдьрәки мәзьн ә рʹумәте бьдьнә наве ԝи у мәрьварʹа бежьн, ԝәки һʹәму кьред ԝи рʹаст ьн. Әм гәрәке тӧ щар шәрм нәкьн һәвалхәбатчи, һәвалдәрс у щинаред хԝәрʹа бежьн, ԝәки әм Шәʹдед Йаһоԝа нә. Мире-щьна дьхԝазә кӧ әм тʹӧ кәсирʹа бәʹса наве Йаһоԝа нәкьн (Йерәмйа 11:21; Әʹйанти 12:17). Бь рʹасти, Мире-щьна у кәсед кӧ дәрәԝед ԝи бәла дькьн дьхԝазьн, ԝәки наве Йаһоԝа бе биркьрьне (Йерәмйа 23:26, 27). Ле жь бо ве йәке кӧ әм наве Йаһоԝа һʹәз дькьн, әм «тʹәмамийа рʹоже» бь наве Ԝи ша дьбьн (Зәбур 5:11; 89:16).

15. Әм ча дькарьн гази наве Йаһоԝа кьн?

¹⁵ Әм тʹьме гази наве Йаһоԝа дькьн (Йоԝел 2:32; Рʹомайи 10:13, 14). Әв йәк найе һʹәсабе тʹәне наве Хԝәде бьзаньбьн у бьдьнә хәбате. Әм гәрәке рʹьнд ԝи нас бькьн, хԝә бьсперьн ԝи у ӧса жи аликʹари у рʹебәрийа ԝи бьгәрʹьн (Зәбур 20:7; 99:6; 116:4; 145:18). Хенщи ве йәке, әм гәрәке мәрьварʹа дәрһәԛа наве ԝи у һʹӧнӧред ԝи гьли кьн у ԝанрʹа бежьн, ԝәки әԝана тʹобә кьн у хԝә рʹаст кьн, сәва кӧ Йаһоԝа жь ԝан рʹази бә (Ишайа 12:4; Кʹаред Шандийа 2:21, 38).

16. Әм ча дькарьн избат кьн, ԝәки Мире-щьна дәрәԝин ә?

¹⁶ Әм һазьр ьн бона наве Йаһоԝа бьчәрчьрьн (Аԛуб 5:10, 11). Гава әм ԝәʹде тәнгасийа Йаһоԝарʹа амьн дьминьн, әм избат дькьн ԝәки Мире-щьна дәрәԝин ә. Рʹожед Ибода, Мире-щьна сәр хьзмәткʹаред Йаһоԝа ӧса готьбу: «Мәрьв жь бо щане хԝә һәр тьшти дьдә» (Ибо 2:4, ИМ). Мире-щьна гот кӧ мәрьв ԝе тʹәне ԝи чахи Йаһоԝарʹа хьзмәт бькьн һәрге һʹале ԝан баш бә, ле һәрге әԝана бькʹәвьнә тәнгасийе, ԝе пьшта хԝә бьдьнә Йаһоԝа у ԝи бьһельн. Ибо бь амьнийа хԝә избат кьр, кӧ гьлийед Мире-щьна дәрәԝ ьн. Ԛәдьрәки мәзьн мәрʹа һатийә дайине кӧ Мире-щьна мьԛабьли мә чь жи бькә, әм дькарьн избат кьн ԝәки әме тʹӧ щара пьшта хԝә нәдьнә Йаһоԝа. Әм дькарьн ԛә дӧдьли нәбьн, ԝәки Йаһоԝа ԝе бона хатьре наве хԝә мә бьбә хԝәйи (Йуһʹәнна 17:11).

17. Ль гора 1 Пәтрус 2:12, әм ча дькарьн рʹумәте бьдьнә наве Йаһоԝа?

¹⁷ Әм ԛәдьре наве Йаһоԝа дьгьрьн (Мәтʹәлок 30:9; Йерәмйа 7:8-11). Жь бо ве йәке кӧ наве Йаһоԝа сәр мә йә, әм бь рʹабун-рʹуньштьна хԝә дькарьн йан рʹумәте бьдьнә ԝи йан жи ләкʹә биньн сәр наве ԝи (Бьхунә 1 Пәтрус 2:12). Ләма әм чьԛас гӧнәкʹар ьн жи, әм диса жи дькарьн рʹумәте бьдьнә наве Йаһоԝа, һәрге хирәт бькьн кӧ бь хәбәрдан у кьред хԝә пәсьна бьдьнә ԝи.

18. Әм ча дькарьн нишан кьн, ԝәки наве Йаһоԝа бона мә фәрз ә? (Ӧса жи бьньһерʹә спартьн.)

¹⁸ Әм жь наве хԝә зедәтьр дина хԝә дьдьнә наве Йаһоԝа (Зәбур 138:2). Гәло әв йәк чьрʹа фәрз ә? Дьбәкә мәрьвед дәр-дора мә, мә нәфрʹәт кьн жь бо ве йәке кӧ әм наве Йаһоԝа һʹәз дькьн.a Гава Иса һатә кӧштьне, мәрьва әԝ ча ԛачах сущдар кьр. Ле Иса һазьр бу бь мьрьнәкә ӧса шәрми бьмьрә, сәва кӧ рʹумәте бьдә наве Йаһоԝа. Әԝи «шәрм бәр тьштәки һʹәсаб нәкьр», демәк бона ԝи фәрз нибу кӧ мәрьв дәрһәԛа ԝи чь дьфькьрьн (Ибрани 12:2-4). Әԝи һәри зедә дина хԝә дьда ԛәдандьна ԛьрара Хԝәде (Мәтта 26:39).

19. Тӧ сәр наве Йаһоԝа ча дьньһерʹи у чьма?

¹⁹ Әм пе наве Йаһоԝа дьфьрʹьн, у бона мә ԛәдьрәки мәзьн ә кӧ әм ча Шәʹдед Йаһоԝа тенә навкьрьне. Наве Йаһоԝа бона мә гәләк ԛимәт ә, ләма жи әме бәрдәԝам кьн пәсьне наве ԝи бьдьн һәла һе ԝи чахи жи, гава сәва ԝе йәке мәрьв мә беһӧрмәт кьн. Мире-щьна һьмбәри мә чь жи бькә, ԝәрә әм һәртʹьм пәсьне наве Йаһоԝа бьдьн. Ӧса әм дькарьн избат кьн, ԝәки наве Йаһоԝа бона мә жи ӧса фәрз ә, чаԝа кӧ бона Иса фәрз ә.