Йаһоԝа Али Мә кьр ‹Гәш бьн Ԝедәре, Кʹидәре кӧ Әм Дьһатьнә Чандьне›

Сала 1979-да Анн-Катрин у Метс чунә Мәкʹтәба Гиләде. Паши мәкʹтәбе ԝана шандьнә Иране, Мәԝритусе, Мйанмаре, Танзанйайе, Угандайе у Зайире. Әв ширәт ԝана Мәкʹтәба Гиләдеда жь дәрсдаре хԝә Щек Редфорд стандьн, у әве ширәте али ԝан кьр ԝәки ԝан щийада, кʹидәре кӧ «дьһатьнә чандьне», пешдачуйи бьн, чьмки әԝана гәләк щара щигӧһасти дьбун. Ԝәрә әм гӧһ бьдьнә ԝан.

Метс, жь кʹәрәма хԝә мәрʹа гьли кә кӧ тӧ ча буйи Шәʹде Йаһоԝа?

Метс: Ԝәʹде Шәрʹе Һʹәмдьнйайейә II, баве мьн ль Полонистане дьжит. Ԝедәре, Дера Католикида әԝи гәләк дӧрʹути дит. Диса жи әԝи гәләк щара дьгот: «Әз баԝәр ьм кӧ религийа рʹаст һәйә у рʹожәке әзе ве бьвиньм!» Ԝәхт шунда рʹасти жи ӧса бу. Гава әз щаһьл бум, мьн хԝәрʹа гәләк кʹьтеб дькʹьрʹин. Йәк жь ԝан кʹьтебәкә бь наве Рʹастийа кӧ Дьбә бәрбь Жийина Һʹәта-Һʹәтайе бу. Наве кʹьтебе гәләк дина мьн кʹьшандә сәр, у шәва кӧ мьн әԝ кʹьрʹи, мьн әԝ һʹәта хьлазийе хԝәнд. Гава сьбәһ сафи бу, мьн ида фәʹм кьр кӧ мьн рʹийа рʹаст дитийә!

Дәстпебуйи жь Нисана сала 1972 мьн гәләк әʹдәбйәтед дьн, йед Шәʹдед Йаһоԝа, хԝәндьн, у бь аликʹарийа ԝан әʹдәбйәта мьн щабед пьрсед хԝәйә дәрһәԛа Кʹьтеба Пироз стандьн. Мьн хԝә мина базьргане жь мәтʹәлока Иса тʹәхмин дькьр, йе кӧ һʹәму мал-мьлкʹе хԝә фьрот ԝәки «кәвьрәки ԛимәт» хԝәрʹа бькʹьрʹә. Мьн нета хԝә кӧ һәрʹьм занингәһе у бьбьм һʹәким «фьрот», демәк тʹәрка ве да, ԝәки бькарьбьм ‹кәвьре ԛимәт› йе рʹастийе бькʹьрʹьм (Мәтта 13:45, 46). У сала 1972-да, 10 Кануна Пешьн, әз һатьмә ньхӧмандьне.

Нава саләкеда, де-баве мьн у бьре мьни бьчʹук жи рʹастийа Кʹьтеба Пироз ԛәбул кьрьн у һатьнә ньхӧмандьне. Тирмәһа сала 1973, мьн дәстпекьр ча пешәнге һәртʹьм хьзмәт кьм. Нава пешәнгед хирәт щьвата мәда, хушкәкә дәлал бь наве Анн-Катрин бу, йа кӧ гәләк Йаһоԝа һʹәз дькьр. Дьле мә кʹәтә һәв у сала 1975-да әм зәԝьщин. Паши дәʹԝате әм чар сала Шԝедйайеда, шәһәре Стромсундеда ман. Ви бажаре бәдәԝда, гәләк кәс һазьр бун гӧһ бьдьнә мьзгинийе.

Анн-Катрин: Гава һьндьк мабу ԝәки баве мьн занингәһе хьлаз кә, әԝи дәрһәԛа мьзгинийе бьһист. Ԝи чахи әз 3 мәһи бум, ле баве мьн әз дьбьрьмә щьвина у хьзмәтийе. Әв йәк дийа мьн хԝәш нәдьһат у әԝ әʹщьз дьбу. Әԝе дьхԝәст избат кьра кӧ баԝәрийа Шәʹдед Йаһоԝа нәрʹаст ә, ле нькарьбу, ләма жи ԝәхт шунда әԝ жи һатә ньхӧмандьне. Гава әз 13 сали бум, әз һатьмә ньхӧмандьне, у гава әз 16 сали бум, әз бумә пешәнг. Әз сәр ԝәхтәки дәрбази шәһәрәки бь наве Умао бум, сәва кӧ ԝедәре хьзмәт кьм, кʹидәре кӧ мьзгинван һьндьк бун. Паши ве йәке әз һатьмә кʹьфшкьрьне ча пешәнга мәхсус.

Паши дәʹԝата мә, мә шабунәкә мәзьн станд жь ве йәке кӧ али чәнд мәрьва кьр бенә сәр рʹийа рʹастийе. Йәк жь ԝан, кәчʹькәкә бь наве Мивор бу. Әве кәчʹьке тʹәрка карийера хԝәйә спорте да, у хьзмәтийа пешәнгтида бу һәвалкʹара хушка мьнә бьчʹук. Сала 1984-да, әԝана тʹәвайи чунә Мәкʹтәба Гиләде, у ньһа Әкԝадореда ча мисйонер хьзмәт дькьн.

Ԝәʹде хьзмәтийа мисйонерти, ԝә ча гӧһ да ве ширәте кӧ «гәш бьн ԝедәре, кʹидәре кӧ тенә чандьне»?

Метс: Әм гәләк щар тʹәзәда дьһатьнә «чандьне», чьмки мә щурʹә-щурʹә щийа кʹьфш дькьрьн. Сәва кӧ әм һини щийед тʹәзә бьн, мә һʹәму ԛәԝата хԝә дьда хәбате, ԝәки чʹәʹв бьдьнә һʹӧнӧред Иса, илаһи мьлуктийа ԝи (Колоси 2:6, 7). Мәсәлә, дәԝса кӧ һивийе бьн ԝәки хушк-бьра һини мә бьн, мә хирәт дькьр хԝәха һини култур у ньһерʹандьн ԝан бьн. Бь сайа ве йәке кӧ мә чʹәʹв дьда Иса, мә хԝә һʹәму щийа ӧса тʹәхмин дькьр, те бежи әм кʹеләка аве чанди бун, у әм дькарьбун һʹәму кʹьфшкьрьнед хԝәда гәш буна (Зәбур 1:2, 3).

Анн-Катрин: Гава щийе бахәке те гӧһастьне, жерʹа гәрмайа тәʹве лазьм ә ԝәки әԝ диса шин бә. Йаһоԝа тʹьме бона мә мина ‹тәʹве› бу (Зәбур 84:11). Сәва кӧ әм щийед тʹәзәда шин буна, Йаһоԝа мә кʹәрәм дькьр бь һәвалтийа тʹәви хушк-бьред дьлгәрм. Мәсәлә, хушк-бьред жь щьвата мәйә бьчʹук ль Тәһране (Иран) гәләк меванһʹәз бун, чаԝа кӧ ԝәʹде пʹехәмбәрада. Мәйе бьхԝәста ль Иране бьмана, ле мәһа Тирмәһе сала 1980-да, Шәʹдед Йаһоԝа ԝедәре һатьнә ԛәдәхәкьрьне, у әм гәрәке нава 48 сьһʹәтада жь ԝәлет дәркʹәтана. Һьнге тʹәшкиләте әм шандьнә Зайире (ньһа те навкьрьне Конго), ль Африкайе.

Гава мәрʹа готьн кӧ әм гәрәке һәрʹьнә Африкайе, әз гьрийам. Мьн бьһистьбу кӧ Африкайеда мәʹр у нәхԝәшийед хьраб һәнә, у әз жь тьштед ӧса гәләк дьтьрсийам. Ле жьн-мерәки кӧ гәләк ԝәхт пешда чубунә ԝедәре, мәрʹа готьн: «Һун ԛә нәчунә ԝедәре. Һәла һәрʹьн у бьвиньн кӧ Африка щики чьԛас хԝәш ә!» Рʹасти жи ӧса бу! Ԝедәре хушк-бьра гәләк дьлгәрм бун. Гава шәш сал шунда лазьм бу кӧ әм жь Зайире һәрʹьн, чьмки Шәʹдед Йаһоԝа ԝедәре һатьнә ԛәдәхәкьрьне, әз дьле хԝәда кʹәнийам, чьмки ищар мьн Йаһоԝарʹа дӧа дькьр, ԝәки әм Африкайеда бьминьн.

Хьзмәтийеда ԝә чь кʹәрәм стандьнә?

Метс: Мә мьзгинванед мисйонер жь щурʹә-щурʹә мьләт у култура нас кьрьн, у әм бунә достед һәв. Һьнә щийа, мәщала мә һәбу тʹәви гәләк мәрьва һинбуна Кʹьтеба Пироз дәрбаз кьн. Щарна һәр йәки жь мә тʹәви 20 мәрьва һинбун дәрбаз дькьр! Ӧса жи, һʹәзкьрьн у меванһʹәзийа хушк-бьред Африкайе тʹьме бира мьнда нә. Гава мә Танзанйайеда тʹәсәлийа щьвата дькьр у кʹеләка малед хушк-бьра әʹрәба хԝә дьда сәкьнандьне, кʹижанида әм дьман, ԝана бона мә «жь ԛәԝата хԝә дәр» жи хәм дькьр (2 Корьнтʹи 8:3). Хьлазийа һәр рʹоже, әз у Анн-Катрин, әм рʹудьньштьн, у дәрһәԛа тьштед кӧ ԝе рʹоже ԛәԝьмибун, мә хәбәр дьда у рʹазибуна хԝә Йаһоԝарʹа дьда кʹьфше бона ве йәке, кӧ әԝи али мә кьрьбу. Әв бона мә ԝәʹдәки гәләк мәхсус бу, чьмки мә әв ԝәʹдә гәләк һʹәз дькьр у нав кьрьбу «ԝәʹде гьликьрьна сәрһатийа».

Анн-Катрин: Гәләк мьн хԝәш дьһат тʹәви хушк-бьред жь щурʹә-щурʹә мьләта бьжим. Әм чәнд зьманед тʹәзә һин бун, мәсәлә Фарьси, Франси, Луганда у Сԝаһили, у әм һини гәләк щурʹә култура бун. Мә мәрьвед тʹәзә анинә нава рʹастийе, хԝәрʹа достед баш дитьн у «мьл бь мьл» тʹәви ԝан хьзмәтийеда кʹар дькьр (Сефанйа 3:9, ИМ).

Ӧса жи әм ль һʹәму щийа жь бәдәԝбуна тʹәбийәте һʹӧжмәкʹар дьман. Һәр щар, чахе мә хьзмәтийеда щабдарикә тʹәзә дьстанд, әв йәк бона мә ӧса бу, те бежи әм дькʹәтьнә рʹеԝитийе, у Йаһоԝа жи рʹебәре мә бу. Бейи Йаһоԝа, мәйе нькарьбуйа тьштед һаԛас хԝәш бьдита.

Гава һун рʹасти чәтьнайа дьһатьн, ԝә чь дькьр?

Метс: Нава салада әм бь чәнд нәхԝәшийа нәхԝәш кʹәтьн, мәсәлә, бь маларйе. Ӧса жи чәнд щара ньшкева лазьм бу кӧ Анн-Катринерʹа операсийайе бькьн. Хенщи ве йәке, әм бона де-бавед хԝәйә әʹмьрда мәзьн бәр хԝә дькʹәтьн, ләма жи әм рʹази нә кӧ хушк-бьред мьн у Анн-Катрине әв щабдари һьлдабунә сәр хԝә. Ԝана әв щабдари бь сәбьр, шабун у бь һʹәзкьрьне анинә сери (1 Тимотʹейо 5:4). Мә чьԛас жь дурва аликʹари дьда ԝан жи, әм щарна әʹщьз дьбун, чьмки мә дьхԝәст дьһа зедә бона ԝан бькьра.

Анн-Катрин: Сала 1983-да, гава әм ль Зайире бун, әз бь холерайе гьран нәхԝәш кʹәтьм. Доктор Метсрʹа гот: «Ләз кʹәвә һәма иро жьна хԝә жь вьра дәрхә, бьвә!» Рʹожәк шунда, әм бь сайа тәйарәке кӧ бона щигӧһастьна һур-мура бу, чунә Шԝедйайе, чьмки тәйаред дьн тʹӧнә бун.

Метс: Әм дьфькьрин кӧ әме ида нькарьбьн ча мисйонер хьзмәт кьн, ләма жи әм гәләк гьрийан. Рʹаст ә доктор готьбу кӧ Анн-Катрин ԝе ԛәнщ нәбә, диса жи әԝ һеди-һеди ԛәнщ бу у саләк шунда әм һазьр бун вәгәрʹьн Зайире. Ве щаре әм чунә щьватәкә бьчʹук сәр зьмане Сԝаһили, йа кӧ бажаре Лубумбашийеда бу.

Анн-Катрин: Гава әм ль Лубумбашийе бун, әз һʹәмлә мам, ле зарʹ бәр мьн чу. Бь рʹасти нета мә тʹӧнә бу, кӧ зарʹе биньн, ле диса жи, ӧндакьрьна зарʹе бона мьн дәрдәки гьран бу. Ле гава әм гәләк хәмгин бун, Йаһоԝа пʹешкʹешәкә ԛимәт да мә. Ԝи ԝәʹдәйи мә тʹәви гәләк мәрьва һинбуна Кʹьтеба Пироз дәстпекьр. Нава чәнд мәһада һәжмара мьзгинванед щьвата мә жь 35 мәрьва һьлкʹьшийа һʹәта 70 мәрьви, у һәжмара кәсед кӧ дьһатьнә щьвате жь 40 һьлкʹьшийа һʹәта 220 мәрьви. Мә тʹьме хьзмәт дькьр у кʹәрәмед Йаһоԝа дьле мьн рʹьһʹәт дькьрьн. Диса жи әм гәләк щар бәʹса зарʹа хԝә дькьн у ль сәр ԝи дьфькьрьн. У әм гәләк һивийа ве рʹоже нә, гава Йаһоԝа бьрина дьле мә бь тʹәмами ԛәнщ кә.

Метс: Щарәке Анн-Катрин гәләк сьст бу у һʹал кʹәт. У мьнрʹа жи диагноза кʹансәра рʹувийа ԛальм йа стадийа чара данин, лазьм бу кӧ операсийа гьран бьһата кьрьне. Ле рʹожа иройин әз ида баш ьм, у Анн-Катрин жи чьԛас ԛәԝата ԝе дьгьһиже Йаһоԝарʹа хьзмәт дькә.

Паши геносида ль Рԝандайе, кӧ сала 1994-да ԛәԝьми, әм чун сәрики ԝан хушк-бьра хьн, йед кӧ зомед рʹәԝийада дьман. У мә фәʹм кьр, ԝәки нә тʹәне әм рʹасти тәнгасийа тен. Гава мә баԝәри, сәбьр у меванһʹәзийа ԝан дит, мә фәʹм кьр кӧ Йаһоԝа ԛәԝате дьдә хьзмәткʹаред хԝә, ԝәки әԝана бькарьбьн һьмбәри һʹәму тәнгасийа сәбьр кьн (Зәбур 55:22).

Анн-Катрин: Сала 2007-да, гава әм бона тʹәсмилкьрьна филиала тʹәзә чунә Угандайе, тьштәки хьраб ԛәԝьми. Паши бәрнаме, әм тʹәви 25 Бәйтʹәлвана у мисйонера рʹе кʹәтьн кӧ һәрʹьнә бажаре Наиробийе, ль Кәнйайе. Пешийа кӧ әм гьһиштьнә синор, отобусәк ньшкева жь рʹийа хԝә дәркʹәт у мә хьст. Ажован у пенщ хушк-бьра щида мьрьн, у хушкәкә дьн жи паше нәхԝәшханеда мьр. Әм пʹьрʹ хәмгин бун, у әм һʹьзрәта ве рʹоже нә кӧ ван достед хԝә диса бьвиньн (Ибо 14:13-15).

Ԝәхт шунда әз алийе физикида һьнәки баш бум. Ле әз, Метс у хушк-бьред дьн, йед кӧ ве отобуседа бун, паше жи жь бо стресе мә гәләк дәрд кʹьшанд. Щарна әз ниве шәве ньшкева жь панике һʹьшйар дьбум, у мьн хԝә ӧса тʹәхмин дькьр, те бежи дьле мьн дьсәкьни. Жь бо ве йәке әз гәләк дьтьрсийам. Ле бь сайа дӧа у рʹезед жь Кʹьтеба Пироз, мә сәбьр дькьр. Ӧса жи мә жь аликʹарийа дохдьра кʹарәкә мәзьн станд. Ньһа ида әм хԝә дьһа баш тʹәхмин дькьн у Йаһоԝарʹа дӧа дькьн, кӧ али мә бькә ԝәки әм бькарьбьн бәр дьле ван мәрьвада бен, йед кӧ кʹәтьнә һʹаләки ӧса.

Ԝә гот кӧ гава һун нава тәнгасийада бун, Йаһоԝа һун ча «һекед хав» хԝәй дькьр. Әв чь те һʹәсабе?

Метс: Әв гьли-готьн, жь зьмане Сԝаһили те. Чаԝа кӧ мәрьв мьԛати һекед хав дьбә у ӧса назьк һьлдьдә кӧ әԝ нәшкен, Йаһоԝа жи һʹәму кʹьфшкьрьнед мәда бь назькайи али мә дькьр. Әԝи тʹьме бона һʹәԝщед мә хәм дькьр. Мәсәлә, мә һʹәзкьрьн у пьштгьрийа Йаһоԝа бь сайа дьлованийа Кʹома Рʹебәрийе тʹәхмин дькьр.

Анн-Катрин: Әз дьхԝазьм бәʹса дәрәщәке бькьм кӧ Йаһоԝа чаԝа бь щурʹе назьк али мә кьр. Рʹожәке мьн бьһист, кӧ баве мьн Шԝедйайеда кʹәтә нәхԝәшхане. Ԝе дәме, Метс тʹәзә ԛәнщ бьбу. Пʹәре мә тʹӧнә бу кӧ билетед тәйаре бькʹьрʹьн у һәрʹьн ԝәлате хԝә, ләма жи мә сафи кьр әʹрәба хԝә бьфьрошьн. Паше, дӧ щара мәрʹа тʹеле хьстьн. Пешийе, жьн-мерәки кӧ дәрһәԛа һʹале мә пеһʹәсийан, тʹеле хьстьн у готьн кӧ дьхԝазьн һәԛе билетәке бьдьнә мә. Паше жи, хушкәкә әʹмьрда мәзьн тʹеле хьст. Әԝе пʹәрә тʹоп кьрьбу у дьхԝәст бьдә кәсәки һʹәԝщәдар. Бәле, бь ви щурʹәйи нава чәнд дәԛада, Йаһоԝа һатә һәԝара мә! (Ибрани 13:6)

Нава 50 салед хьзмәтийа һәртʹьмда, һун чь һин бунә?

Анн-Катрин: Мьн фәʹм кьр кӧ һәрге әм рʹьһʹәтийе хԝәй кьн у итʹбарийа хԝә Йаһоԝа биньн, әме ԛәԝат бьн у әԝе дәԝса мә шәрʹ бькә (Ишайа 30:15; 2 Дирок 20:15, 17). Һʹәму щийа кʹидәре кӧ әм һатьбунә шандьне, чь жь дәсте мә дьһат мә дькьр, ԝәки бь дьл у щан Йаһоԝарʹа хьзмәт кьн. Ахьрийеда мә кʹәрәмед мәзьн станд. Һәрге мә рʹекә дьн бьжбарта, мәйе һаԛас кʹәрәм нәстанда.

Метс: Әз рʹьнд һин бумә кӧ чь жи бьбә, әз гәрәке хԝә бьсперьмә Йаһоԝа у һивийа ԝи бьм, кӧ әԝ ль гора созе хԝә али мә бькә (Зәбур 37:5). Бәле, әԝи тʹьме созе хԝә дьани сери у бона мә хәм дькьр. Ньһа әм Бәйтʹәла Мйанмареда хьзмәт дькьн, у иро жи әм дьвиньн кӧ әԝ ча бәрдәԝам дькә али мә бькә.

Әм баԝәр ьн кӧ гәләк хушк-бьред щаһьл, йед кӧ дьхԝазьн хьзмәтийа хԝә зедә кьн, ԝе мина мә бьвиньн кӧ Йаһоԝа чьԛас дьлрʹәʹм ә. У һәрге әԝана изьне бьдьнә Йаһоԝа, әԝе али ԝан бькә ‹гәш бьн ԝедәре, кʹидәре кӧ тенә чандьне›, у әԝана жи ԝе әʹмьре хԝәда дәсте Йаһоԝа бьвиньн.