«Хирәт кьн кӧ Һун Йәктийеда Бьминьн»
ПАԜЛОСЕ шанди хушк-бьред Әфәсерʹа ӧса гот: «Бь һʹәзкьрьне һәвдӧ тәйах кьн. Бь сайа рʹӧһʹе пироз һун бунә йәк. Ләма жи әʹдьлайеда бьн у хирәт кьн кӧ һун йәктийеда бьминьн» (Әфәси 4:2, 3).
Йәктийа нав мәда «бь сайа рʹӧһʹе пироз» пешда һатийә. Чаԝа кӧ Паԝлос готьбу, һәр кәс жь мә гәрәке хирәт кә, кӧ «йәктийеда бьминьн».
Мәсәлә, бьдә бәр чʹәʹве хԝә кӧ кәсәки әʹрәбә пʹешкʹеши тә кьрийә. Гәло щабдарийа кʹе йә кӧ әʹрәбә бе хԝәйкьрьне? Һәрге әʹрәбә хьраб буйә чьмки тӧ мьԛати ве нәбуйи, әв йәк нәһәԛийа кʹе йә? Һәмьки әв нәһәԛийа ԝи мәрьви нинә, йе кӧ әԝ ча пʹешкʹеш дабу тә.
Мина ве йәке, рʹаст ә йәктийа нав мәда пʹешкʹеша жь Хԝәде йә, диса жи һәр кәс жь мә щабдар ә кӧ йәктийе бьпʹарезә. Һәрге ортʹа мә у хушк йан бьракида әʹдьлайи хьраб буйә, ԝәрен әм жь хԝә бьпьрсьн: «Гәло әз чь жь дәсте мьн те дькьм, сәва кӧ бь һʹәзкьрьне чәтьнайа ортʹа мәда сафи кьм?»
ҺӘР ТЬШТИ БЬКЬН ԜӘКИ «ЙӘКТИЙЕДА БЬМИНЬН»
Чаԝа кӧ Паԝлос готьбу, дьбәкә щарна хирәт лазьм бә ԝәки әм йәктийеда бьминьн, илаһи һәрге хушк йан бьраки дьле мә ешандийә. Сәва кӧ әм йәктийа нав хԝәда бьпʹарезьн, гәло тʹьме лазьм ә кӧ әм тʹәви ԝи кәси дәрһәԛа проблеме хәбәр дьн? На, щарна дьбәкә әв йәк нәлазьм бә. Жь хԝә бьпьрсә: «Бона пʹарастьна йәктийе, гәло хәбәрдана дәрһәԛа проблеме ԝе кʹаре бинә, йан жи проблема ортʹа мәда ԝе һе мәзьн бә?» Щарна, сафикьрьна лапә баш әв ә, кӧ чʹәʹве хԝә сәр ве проблеме дадьн у бьбахшиньнә ԝи мәрьви (Мәтʹәлок 19:11; Маркос 11:25).
Жь хԝә бьпьрсә: «Бона пʹарастьна йәктийе, гәло хәбәрдана дәрһәԛа проблеме ԝе кʹаре бинә, йан жи проблема ортʹа мәда ԝе һе мәзьн бә?»
Чаԝа кӧ Паԝлосе шанди ньвисибу, ԝәрә әм «бь сәбьр бьн у бь һʹәзкьрьне һәвдӧ тәйах кьн» (Әфәси 4:2). Ль гора канике, әв щьмлә дькарә ӧса жи бе ԝәлгәрʹандьне: «Әԝана чь щурʹәйи бьн жи, ԝана ӧса ԛәбул кә». Әв гьли тенә һʹәсабе, кӧ әм гәрәке ԛәбул кьн ԝәки хушк-бьред мә жи ԛьсурдар ьн, ча әм ԛьсурдар ьн. Һәмьки әм хирәт дькьн, ԝәки «мәрьве ну ль хԝә кьн» (Әфәси 4:23, 24). Ле әм нькарьн ве йәке бь щурʹәки беԛьсур бькьн (Рʹомайи 3:23). Һәрге әм ве рʹастийе ԛәбул кьн, мәрʹа ԝе дьһа һеса бә «һәвдӧ тәйах кьн», бьбахшиньнә һәв у «йәктийеда бьминьн».
Гава кәсәк дьле мә бешинә, әме бькарьбьн щьватеда әʹдьлайе у йәктийе хԝәй кьн, һәрге бьбахшиньнә ԝи мәрьви у ве йәке нәйньн бира хԝә. Хәбәра Йунани, йа кӧ кʹьтеба Әфәсида һатийә ԝәлгәрʹандьне ча «йәктийеда бьминьн», Колоси 2:19-да ча «мовьк» һатийә ԝәлгәрʹандьне. «Мовьк» бәнед ԛәԝи нә, йед кӧ һәстийа һәвва гьредьдьн. Мина ве йәке, һәрге һьнә гьли йан кьред хушк-бьра дьле мә дешиньн жи, әʹдьлайи у һʹәзкьрьн ԝе али мә бькьн незики ԝан бьминьн.
Ләма жи гава кәсәк дьле мә дешинә йан мә әʹщьз дькә, дәԝса кӧ әм дина хԝә бьдьнә шашийед ԝи, ԝәрә әм хирәт кьн кӧ һьндава ԝи дьлшәԝат бьн (Колоси 3:12). Бир нәкә кӧ һәр кәс гӧнәкʹар ә у ләма дьбәкә тӧ жи щарна дьле кәсед дьн дешини. Һәрге әм ве йәке бира хԝәда хԝәй кьн, әве али мә кә «йәктийеда бьминьн».