Йаһоԝа Тә Гәләк Ԛимәт Дькә!

1-2. Әм ча дькарьн избат бьн, ԝәки Йаһоԝа мә ԛимәт дькә?

ХЬЗМӘТКʹАРЕД Йаһоԝа мәрьвед гәләк ԛимәт ьн, ле һьнәк жь ԝан хԝә беԛимәт у ньмьз һʹәсаб дькьн. Дьԛәԝьмә мәʹни әԝ ә кӧ кәсәки әԝана беһӧрмәт кьрьнә. Һәрге әм хԝә беԛимәт һʹәсаб дькьн, гәло әм ча дькарьн избат бьн кӧ Йаһоԝа мә ԛимәт дькә?

² Ԝәрә әм дина хԝә бьдьнә һьнә рʹезед кӧ дьдьнә кʹьфше, ԝәки Йаһоԝа ча сәр мәрьва дьньһерʹә. Мәсәлә, Иса ԛәдьре мәрьва дьгьрт у һьндава ԝанда ԛәнщ бу. Бь ве йәке әԝи нишан кьр, ԝәки әԝ у Баве ԝи гәләк ԛимәт дькьн ԝан мәрьва, йед кӧ хԝә беԛимәт һʹәсаб дькьн (Йуһʹәнна 5:19; Ибрани 1:3). Ве готареда әме пебьһʹәсьн 1) кӧ Иса ча али мәрьва дькьр, ԝәки әԝана бьзаньбьн кӧ бәр чʹәʹве Йаһоԝа гәләк ԛимәт ьн у 2) әм ча дькарьн избат бьн, ԝәки Хԝәде бь рʹасти мә ԛимәт дькә (Һагай 2:7).

ИСА ЧА АЛИ МӘРЬВА ДЬКЬР ԜӘКИ БЬЗАНЬБЬН КӦ ӘԜАНА БӘР ЧʹӘʹВЕ ЙАҺОԜА ԚИМӘТ ЬН?

3. Гава бьнәлийед Щәлиле жь Иса аликʹари хԝәстьн, әԝи чь кьр?

³ Гава Иса щара сьсийа ль Щәлиле мьзгини бәла дькьр, гәләк мәрьв һатьн ԝәки гӧһ бьдьнә ԝи у бь кʹәрәмәти бенә ԛәнщкьрьне. Иса дит кӧ әԝана «мина пәзед бе шьван, бьриндар у бәрʹәдайи бун» (Мәтта 9:36). Рʹожед Исада, сәрԝеред религи ԛә мәрьв ԛимәт нәдькьрьн, у ԝана әԝ «ньфьрʹкьри» һʹәсаб дькьрьн (Йуһʹәнна 7:47-49). Ле Иса һьндава мәрьвада дьлован бу, у әԝи ԛәдьре ԝан дьгьрт. Ләма жи әԝи әԝана һин дькьрьн у йед нәхԝәш ԛәнщ дькьрьн (Мәтта 9:35). Сәва кӧ али дьһа зедә мәрьва бькә, әԝи ӧса жи шандийед хԝә һин кьр мьзгинийе бәла кьн, у ԛәԝат да ԝан ԝәки әԝана жи бькарьбьн мәрьвед нәхԝәш ԛәнщ кьн (Мәтта 10:5-8).

4. Әм чь педьһʹәсьн жь ве йәке кӧ Иса һьндава мәрьвед мьлук у шкәстида ча бу?

⁴ Иса һьндава гӧһдаред хԝә дьлован бу, у әԝи ԛәдьре ԝан дьгьрт. Бь ԝи щурʹәйи әԝи нишан дькьр, кӧ әԝ у Баве ԝи ԛимәт дькьн ԝан мәрьва, йед кӧ алийе кәсед дьнда дьһатьнә ньмьзкьрьне. Һәрге тӧ хьзмәткʹаре Йаһоԝа йи, ле хԝә беԛимәт һʹәсаб дьки, бинә бира хԝә кӧ Иса ча дьньһерʹи сәр ԝан мәрьвед мьлук у шкәсти, йед кӧ дьхԝәстьн жь ԝи һин бьн. Әв йәк дькарә али тә бькә фәʹм ки, кӧ Йаһоԝа чьԛас тә ԛимәт дькә.

5. Һʹале кʹӧлфәтәкә жь Щәлиле ча бу?

⁵ Хенщи ве йәке кӧ Иса мәрьв бь кʹомед мәзьн һин дькьрьн, әԝи йәк бь йәк жи дина хԝә дьда мәрьва. Мәсәлә, гава Иса ль һәрема Щәлиле хьзмәт дькьр, әԝи дина хԝә да кʹӧлфәтәкә нәхԝәш, «кӧ ида 12 сал бу сәр хуне вәбьбу» (Маркос 5:25). Әԝ кʹӧлфәт жь бо ве нәхԝәшийе сәр һʹиме Ԛануна Муса нәпаԛьж дьһатә һʹәсабе, у ль гора Ԛануне, һәрге кәсәки дәсте хԝә бьда ԝе, әԝе жи нәпаԛьж бьһата һʹәсабе. Ләма жи, ча те кʹьфше әԝ тʹәне дьма. Ӧса жи әԝ нькарьбу бьчуйа кʹьниште, нә жи дькарьбу бьчуйа сәр щәжьна ԝәки тʹәви мәрьва Йаһоԝа бьһʹәбанда (Ԛануна Кʹаһинтийе 15:19, 25). Бе шьк, әԝе кʹӧлфәте жь бо нәхԝәшийа хԝә һьм еш дькʹьшанд, һьм жи хԝә беԛимәт һʹәсаб дькьр (Маркос 5:26).

6. Кʹӧлфәта кӧ сәр хуне вәбьбу, ча ԛәнщ бу?

⁶ Кʹӧлфәта нәхԝәш дьхԝәст, ԝәки Иса ԝе ԛәнщ кә. Ле әԝ рʹастә-рʹаст нәчу бал ԝи. Гәло чьма? Дьбәкә әԝе жь бо нәхԝәшийа хԝә шәрм дькьр. Йан жи дьбәкә әԝ дьтьрсийа, ԝәки жь бо ве йәке кӧ әԝ ль гора Ԛануне нәпаԛьж ә, Иса ԝе һерс кʹәвә, чьмки әԝ һатьбу нав мәрьва. Ләма жи әԝе дьзикава дәсте хԝә да кʹьнще ԝи, чьмки әԝ баԝәр бу кӧ ӧса ԝе ԛәнщ бә (Маркос 5:27, 28). Бь рʹасти жи ӧса ԛәԝьми. Гава Иса пьрси кʹе дәсте хԝә да ԝи, кʹӧлфәте ани сәр хԝә, ԝәки әԝе дәсте хԝә да кʹьнще ԝи. Һьнге Иса чь кьр?

7. Иса һьндава ве кʹӧлфәтеда кӧ жь нәхԝәшийа хԝә дьчәрчьри, ча бу? (Маркос 5:34)

⁷ Иса һьндава ве кʹӧлфәтеда һʹәйф у бь ԛәдьр бу. Әԝи дит кӧ кʹӧлфәт «жь тьрса ләрьзи» (Маркос 5:33). Ләма жи әԝи дьле ԝе ԛәԝи кьр у жерʹа гот «ԛиза мьн». Пе ԝан гьлийа әԝи һьм ԛәдьре ԝе гьрт һьм жи һʹәзкьрьн у дьлшәԝати нишан кьр (Бьхунә Маркос 5:34). Кʹьтеба Пироз тʹәне щарәке бәʹса ве йәке дькә, кӧ Иса кʹӧлфәтерʹа гот «ԛиза мьн». Ча те кʹьфше, Иса ӧса гот чьмки әԝи дит кӧ әԝ ча хәмгин дьбә у дьтьрсә. Бьдә бәр чʹәʹве хԝә, кӧ дьле кʹӧлфәте чьԛас рʹьһʹәт бу! Рʹаст ә әԝ жь нәхԝәшийа хԝә ԛәнщ бу, ле һәрге Иса дьле ԝе ԛәԝи нәкьра, дьбәкә әԝе диса жи хԝә нәһәԛ тʹәхмин кьра. Ле Иса пе гьлийед хԝә нишани ԝе кьр, ԝәки Йаһоԝа ԝе ча ԛиза хԝәйә ԛимәт һʹәсаб дькә.

8. Хушкәкә жь Бразилйайе рʹасти чь чәтьнайа дьһат?

⁸ Иро жи һьнә хьзмәткʹаред Хԝәде жь бо нәхԝәшийед хԝә, хԝә беԛимәт һʹәсаб дькьн у дькʹәвьнә депресийайе жи. Бразилйайеда пешәнгәкә һәртʹьм бь наве Мариаa бе ньг у бе дәсте чʹәпе һатә буйине. Әԝ дьбежә: «Мәкʹтәбеда, хԝәндәкʹаред дьн тʹьме ԛәрфед хԝә мьн дькьрьн у тьштед хьраб мьнрʹа дьготьн. Һәла һе малбәта мьн жи щарна әз ньмьз дькьрьм».

9. Хушк-бьра ча али Мариайе кьрьн бьвинә, ԝәки әԝ бона Йаһоԝа гәләк ԛимәт ә?

⁹ Гәло Мариайе ча аликʹари станд? Гава әԝ бу Шәʹде Йаһоԝа, хушк-бьра дьле ԝе рʹьһʹәт кьрьн у али ԝе кьрьн, ԝәки әԝ пе чʹәʹве Йаһоԝа сәр хԝә бьньһерʹә. Әԝ дьбежә: «Рʹупʹелед дәфтʹәра мьн тʹере накьн, ԝәки әз дәрһәԛа һʹәму мәрьва бьньвисьм, йед кӧ али мьн кьрьнә! Әз гәләк жь Йаһоԝа рʹази мә, чьмки әԝи малбәтәкә бь һʹәзкьрьне тʹьжә дайә мьн». Бәле, бь сайа хушк-бьра Мариайе фәʹм кьр, кӧ әԝ чʹәʹве Хԝәдеда гәләк ԛимәт ә.

10. Кʹижан чәтьнайед Мәрйәма Мәгдәлани һәбун? (Бьньһерʹә ӧса жи шькьл.)

¹⁰ Бьдьнә бәр чʹәʹве хԝә, кӧ Иса ча али Мәрйәма Мәгдәлани кьр, йа кӧ һʹәфт щьн кʹәтьбунә ԝе (Луԛа 8:2). Дьԛәԝьмә әԝе жь бо һʹӧкӧме щьна тьштед әʹщеб дькьр, у кәсед дьн хԝә жь ԝе дур дьгьртьн. Дәрде ԝе бь рʹасти жи гьран бу. Дьбәкә әԝе хԝә бечʹарә у инкʹаркьри тʹәхмин дькьр. Ча те кʹьфше, Иса щьнед кӧ Мәрйәм әʹщьз дькьрьн, дәрхьстьн у әԝ жи бу шагьрта Иса. Гәло Иса ча али ԝе кьр кӧ бьвинә, ԝәки әԝ бона Хԝәде ԛимәт ә?

11. Иса ча нишани Мәрйәма Мәгдәлани кьр, ԝәки әԝ бона Хԝәде ԛимәт ә? (Бьньһерʹә ӧса жи шькьл.)

¹¹ Иса Мәрйәма Мәгдәлани тʹәглиф кьр, ԝәки әԝ тʹәви ԝи у шагьртед ԝи гӧнд бь гӧнд мьзгинийе бәла кә.b Ӧса мәщал жерʹа вәбу бьбьһе, кӧ Иса ча мәрьва һин дькә. Ӧса жи чахе Иса һатә сахкьрьне, әԝ жерʹа хӧйа бу. Бь ви щурʹәйи Мәрйәм йәк жь ԝан мәрьвед пешьн бу, йед кӧ ԝе рʹоже Иса дитьн. Иса һәла һе жерʹа гот жи, кӧ әԝ һәрʹә бал шандийа у ԝанрʹа бежә, ԝәки әԝ жь мьрьне рʹабуйә. Бь ве йәке Иса нишани ԝе кьр, кӧ әԝ бона Хԝәде гәләк ԛимәт ә (Йуһʹәнна 20:11-18).

12. Чьма Лидийайе хԝә беԛьмәт тʹәхмин дькьр?

¹² Мина Мәрйәма Мәгдәлани, иро жи гәләк мәрьв хԝә беԛимәт тʹәхмин дькьн. Испанйайеда, хушкәкә бь наве Лидийа дьбежә, ԝәки пешийа кӧ әԝ бьһата буйине, дийа ԝе дьхԝәст ԝе бәр хԝә бькә. Һәла һе гава әԝ бьчʹук бу, дийа ԝе дина хԝә нәдьда ԝе у гьлийед сәрт у хьраб дьготә ԝе. Лидийа дьбежә: «Мьн тʹьме дьхԝәст ԝәки мәрьв мьн ԛәбул кьн у һʹәз кьн. Әз дьтьрсийам кӧ әзе тʹӧ щар һежайи һʹәзкьрьне нибьм, чьмки дийа мьн әз дабумә баԝәркьрьне, кӧ әз йәкә хьраб ьм».

13. Чь али Лидийайе кьр кӧ фәʹм кә, ԝәки әԝ бона Йаһоԝа ԛимәт ә?

¹³ Чахе Лидийайе һинбуна Кʹьтеба Пироз дәстпекьр, һʹале ԝе һатә гӧһастьне. Бь сайа дӧайед шәхси, хԝәндьна Кʹьтеба Пироз у ве йәке кӧ хушк-бьра пе гьли у кьред хԝә һьндава ԝеда ԛәнщи дьданә кʹьфше, әԝе фәʹм кьр, кӧ әԝ бона Йаһоԝа ԛимәт ә. Әԝ дьбежә: «Мере мьн гәләк щара мьнрʹа дьбежә, кӧ әԝ мьн гәләк һʹәз дькә. Әԝ у һәвалед мьн тʹьме дина мьн дьдьнә сәр һʹӧнӧред мьнә баш». Дьбәкә щьвата тәда жи һьнә кәсед мина Лидийайе һәнә, кʹижана кӧ тӧ дькари пе гьли у кьред хԝә бьди баԝәркьрьне, ԝәки әԝ бәр чʹәʹве Йаһоԝа ԛимәт ьн.

ӘМ ЧА ДЬКАРЬН БЬ ЧʹӘʹВЕ ЙАҺОԜА СӘР ХԜӘ БЬНЬҺЕРʹЬН?

14. Ча 1 Самуйел 16:7 али мә дькә пе чʹәʹве Йаһоԝа сәр хԝә бьньһерʹьн? (Бьньһерʹә чаргоша бь наве «Йаһоԝа Чьма Хьзмәткʹаред Хԝә Ԛимәт Дькә?»)

¹⁴ Бир нәкә, кӧ Йаһоԝа мина мәрьвед ве дьнйайе сәр тә наньһерʹә (Бьхунә 1 Самуйел 16:7). Мәрьвед ве дьнйайе тʹьме дина хԝә дьдьнә бәжн-бала мәрьва, хԝәндьна ԝан у һәбука ԝан. Ле ньһерʹандьна Йаһоԝа бь тʹәмами щӧдә йә (Ишайа 55:8, 9). Ләма жи, ԛимәте хԝә нә ль гора ньһерʹандьна дьнйайе, ле ль гора ньһерʹандьна Йаһоԝа һʹәсаб кә. Кʹьтеба Пирозда, дәрһәԛа ԝан мәрьва бьхунә, йед кӧ щарна хԝә беԛимәт тʹәхмин дькьрьн, мәсәлә дәрһәԛа Елйас, Наһомийайе у Һаннайе, у дина хԝә бьде, кӧ ча Йаһоԝа һʹәзкьрьна хԝәда ԝана дьда баԝәркьрьне. Хенщи ве йәке, тӧ дькари дәрәщед әʹмьре хԝә, йед кӧ избат дькьн, ԝәки Йаһоԝа бь рʹасти тә һʹәз дькә у тә ԛимәт дькә, хԝәрʹа бьньвиси. Ӧса жи тӧ дькари әʹдәбйәтед мәда информасийайе бьгәрʹи, йа кӧ нишан дькә ԝәки тӧ бона Йаһоԝа ԛимәт и.c

15. Йаһоԝа чьма Данийел ԛимәт дькьр у ԝи һʹәз дькьр? (Данийел 9:23)

¹⁵ Бир нәкә, ԝәки Йаһоԝа тә ԛимәт дькә, чьмки тӧ жерʹа бь амьни хьзмәт дьки. Щарәке, гава Данийел пʹехәмбәр ԝәкә 100 сали бу, әԝ гәләки ԝәстийайи у дьлтәнг бу (Данийел 9:20, 21). Гәло Йаһоԝа ча дьле ԝи ԛәԝи кьр? Хԝәде бь мәләк Щьбрайил Данийелрʹа да кʹьфше, ԝәки әԝ йәки гәләк ԛимәт ә (Бьхунә Данийел 9:23). Хԝәде чьма ӧса Данийел ԛимәт дькьр? Гәләк һʹӧнӧред ԝийи баш һәбун. Мәсәлә, әԝи рʹасти һʹәз дькьр у әԝ йәки амьн бу (Һәзәԛел 14:14). Йаһоԝа әв сәрһати Кʹьтеба Пирозда да ньвисаре, ԝәки бәрдьлийе бьдә мә (Рʹомайи 15:4). Бәле, Йаһоԝа гӧһ дьдә дӧайед тә жи, у әԝ тә ԛимәт дькә, чьмки тӧ жи рʹастийе һʹәз дьки у бь амьни ԝирʹа хьзмәт дьки (Миха 6:8; Ибрани 6:10).

16. Чь дькарә али тә бькә, ԝәки тӧ Йаһоԝа ча Баве хԝәйи һʹәзкьри һʹәсаб ки?

¹⁶ Йаһоԝа Хԝәде ча Баве хԝә һʹәсаб кә, йе кӧ тә һʹәз дькә. Әԝ шашийед тә нагәрʹә, ле дьхԝазә али тә бькә (Зәбур 130:3; Мәтта 7:11; Луԛа 12:6, 7). Фькьрандьна сәр ве рʹастийе кʹарәкә мәзьн ани ԝан мәрьварʹа, йед кӧ хԝә беԛимәт тʹәхмин дькьрьн. Мәсәлә, Испанйайеда хушкәкә бь наве Мишел, мере кʹижане кӧ гәләк сала ле беһӧрмәт дькьр, хԝә бекер тʹәхмин дькьр. Әԝ дьбежә: «Гава әз хԝә бекер тʹәхмин дькьм, әз дьдьмә бәр чʹәʹве хԝә, ԝәки Йаһоԝа әз дамә бәр дьле хԝә, әԝ мьн дьпʹарезә у мьн һʹәз дькә» (Зәбур 28:9). Африкайа Башуреда, хушкәкә бь наве Лаурен ӧса дьбежә: «Һәрге Йаһоԝа әз бь һʹәзкьрьне кʹьшандьмә бал хԝә, һаԛас сал незики мьн ә у мьн дьдә хәбате, ԝәки кәсед дьн һин кә, бе шьк әԝ мьн ча йәкә керһати у ԛимәт һʹәсаб дькә» (Һосәйа 11:4).

17. Чь дькарә тә бьдә баԝәркьрьне, ԝәки Йаһоԝа жь тә рʹази йә? (Зәбур 5:12) (Бьньһерʹә ӧса жи шькьл.)

¹⁷ Баԝәр бә кӧ Йаһоԝа жь тә рʹази йә (Бьхунә Зәбур 5:12). Даԝьд Пʹадша ԛәбулкьрьна Йаһоԝа бәрамбәри «диԝара» кьр, йа кӧ мәрьвед рʹаст дьпʹарезә. Әв фькьр кӧ Йаһоԝа жь тә рʹази йә у аликʹарийе дьдә тә, дькарә мина диԝарәки тә бьпʹарезә, гава тӧ дьфькьри кӧ беԛимәт и. Гәло чь дькарә тә бьдә баԝәркьрьне кӧ Йаһоԝа жь тә рʹази йә? Ча мә дит, Йаһоԝа бь сайа Кʹьтеба Пироз нишан дькә, ԝәки әԝ жь тә рʹази йә. Ӧса жи әԝ бь сайа рʹуспийед щьвате, һәвалед тә у кәсед дьн тинә бира тә, ԝәки тӧ бона ԝи гәләк ԛимәт и. Гава кәсед дьн пʹайе тә дьдьн, тӧ гәрәке чь бьки?

18. Чьма тӧ гәрәке пʹайа ԛәбул ки?

¹⁸ Гава әԝед кӧ тә нас дькьн у тә һʹәз дькьн жь дьл пʹайе тә дьдьн, гьлийед ԝан инкʹар нәкә. Бир нәкә кӧ Йаһоԝа дькарә ԝана бьдә хәбате, ԝәки нишани тә бькә кӧ әԝ жь тә рʹази йә. Хушка мә Мишел ӧса дьбежә: «Һеди-һеди, әз гьлийед ширьн жь кәсед дьн ԛәбул дькьм. Рʹаст ә мьнрʹа әв йәк чәтьн ә, ле әз заньм кӧ Йаһоԝа дьхԝазә, ԝәки әз ван пʹайа ԛәбул кьм». Мишеле жь аликʹарийа рʹуспийа жи кʹар стандийә. Ньһа әԝ пешәнг ә у жь дурва аликʹарийе дьдә Бәйтʹәле.

19. Тӧ чьма дькари баԝәр би, кӧ Йаһоԝа тә ԛимәт дькә?

¹⁹ Чаԝа кӧ Иса готийә, Баве мәйи әʹзмана мә гәләк ԛимәт дькә (Луԛа 12:24). Ләма жи әм дькарьн баԝәр бьн, кӧ әв йәк бь рʹасти жи ӧса йә. Ԝәрә әм ве йәке тʹӧ щара бир нәкьн! Ԝәрә әм ӧса жи али кәсед дьн бькьн, ԝәки әԝана жи баԝәр бьн кӧ бәр чʹәʹве Хԝәде гәләк ԛимәт ьн!