Кʹаһине Мәйи Мәзьн, Иса, Дьлрʹәʹм ә

1-2. а) Йаһоԝа чьма Кӧрʹе хԝә шандә сәр әʹрде? б) Ве готареда әме дәрһәԛа чь хәбәр дьн? (Ибрани 5:7-9)

ԜӘКӘ 2 000 сал пешда, Йаһоԝа Хԝәде Кӧрʹе хԝәйи әʹзиз шандә сәр әʹрде. Йаһоԝа әв йәк кьр, ԝәки инсанәте жь гӧнә у мьрьне хьлаз кә у зьрара кӧ Мире-щьна дайе, бьдә һьлдане (Йуһʹәнна 3:16; 1 Йуһʹәнна 3:8). Йаһоԝа заньбу, ԝәки жийина сәр әʹрде ԝе али Иса бькә кӧ әԝ һʹале мәрьва рʹьнд фәʹм кә, дьлшәԝат бә у дьлрʹәʹм бә. Ӧса әԝе бькарьбуйа кʹьфшкьрьна хԝә, кӧ бьбә Кʹаһине Мәзьн бь щурʹе лапи баш, бьанийа сери. Иса Мәсиһ сала 29 Д.М.-да, паши ньхӧмандьна хԝә бу Кʹаһине Мәзьн.a

² Ве готареда әме бьвиньн, кӧ жийина Исайә сәр әʹрде ча али ԝи кьр, ԝәки әԝ һʹале мәрьва рʹьнд фәʹм кә, дьлрʹәʹм бә у бькарьбә ве кʹьфшкьрьна хԝә бинә сери. Чьԛас баш әме фәʹм кьн кӧ ча Иса бона кʹьфшкьрьна хԝә «гьһиштә кʹамьлийе», һаԛас мәрʹа ԝе дьһа һеса бә Йаһоԝарʹа дӧа бькьн, гава әм жь бо гӧнә у кемасийед хԝә дьлтәнг дьбьн (Бьхунә Ибрани 5:7-9).

ХԜӘДЕ КӦРʹЕ ХԜӘЙИ ҺʹӘЗКЬРИ ДЬШИНӘ ДЬНЙАЙЕ

3-4. Гава Иса һатә сәр әʹрде, әԝ рʹасти кʹижан чәтьнайа һат?

³ Гава әм мала хԝә бар дькьн у дьчьн щики жь малбәт у һәвалед хԝә дур, әв йәк дькарә бона мә гәләк чәтьн бә. Ле һʹале тʹӧ кәси мина һʹале Иса чәтьн нибу. Сәр әʹзмана әԝ нав мәләкада йе һәри пешьн бу. Йаһоԝа ԝи һʹәз дькьр, у әԝ жи тʹьме бь шабуне кʹеләка Баве хԝә бу у жерʹа хьзмәт дькьр (Зәбур 16:11; Мәтʹәлок 8:30). Ле чаԝа кӧ Филипи 2:7 дьдә кʹьфше, әԝ һазьр бу «тʹәрка һәр тьшти» бьдә у сәр әʹрде нав мәрьвед гӧнәкʹарда бьжи.

⁴ Ӧса жи, бьдә бәр чʹәʹве хԝә бьчʹуктайа Иса. Жь ве йәке кӧ де-баве ԝи паши буйина ԝи ԛӧрбанәкә әрзан пʹешкʹеш кьрьн, те кʹьфше ԝәки әԝана кʹәсиб бун (Ԛануна Кʹаһинтийе 12:8; Луԛа 2:24). Гава Һеродәс Пʹадша дәрһәԛа буйина Иса бьһист, әԝи хԝәст ԝи бькӧжә. Ләма жи, де-баве ԝи мәщбур бун тʹәви ԝи бьрʹәвьнә ԝәлате Мьсьре у ԝедәре ча кʹочʹбәр бьжин (Мәтта 2:13, 15). Бәле, жийина Исайә сәр әʹрде жь жийина ԝийә сәр әʹзмана гәләк щӧдә дьбу!

5. Иса сәр әʹрде чь дьдит, у ча әв тьшт ԝи бона кʹьфшкьрьна кӧ бьбә Кʹаһине Мәзьн һазьр кьрьн? (Бьньһерʹә ӧса жи шькьл.)

⁵ Гава Иса сәр әʹрде бу, әԝи кӧл-дәрдед мәрьва дьдитьн. Ча те кʹьфше, әԝи мьрьна чәнд һәвал у мәрьвед хԝә дит, мәсәлә мьрьна зьрʹбаве хԝә Усьв. Ләма жи әԝи рʹьнд заньбу, кӧ еша мьрьне тьштәки чьԛас гьран ә. Хьзмәтийа хԝәда әԝи мәрьвед кʹоти, кор у сәԛәт дьдитьн, ӧса жи мәрьвед кӧ зарʹед хԝә ӧнда кьрьбун дьдит, у дьле ԝи сәр ԝан һʹәмуйа дьшәԝьти (Мәтта 9:2, 6; 15:30; 20:34; Маркос 1:40, 41; Луԛа 7:13). Рʹаст ә гава әԝ һе сәр әʹзмана бу әв тьшт дьдитьн, ле сәр әʹрде әԝ ча мәрьв ида бь щурʹәки дьн кӧл-дәрдед мәрьва дит (Ишайа 53:4). Бь сайа әʹмьре хԝәйи сәр әʹрде, Иса рʹьнд фәʹм дькә кӧ мәрьв чь тʹәхмин дькьн, бона чь хәмгин дьбьн у ешәкә ча дькʹьшиньн. Мина мәрьвед дьн, Иса жи дьԝәстийа, хәмгин дьбу у бәр хԝә дькʹәт.

ИСА МӘСИҺ ЙӘКИ ДЬЛРʹӘʹМ Ә

6. Гьлийед Ишайа пʹехәмбәр дәрһәԛа дьлрʹәʹмийа Иса чь нишани мә дькьн? (Ишайа 42:3)

⁶ Ԝәʹде хьзмәтийа хԝә, Иса һьндава кәсед һесир у бәләнгаз дьлрʹәʹм бу. Ӧса әԝи тьштед кӧ пешда дәрһәԛа ԝи һатьбун пʹехәмбәртикьрьне, ани сери. Ньвисаред Пирозда, кәсед дәԝләти у пешдачуйи щарна бәрамбәри бахчәки бәрдар йан даред мәзьн дьбьн (Зәбур 92:12; Ишайа 61:3; Йерәмйа 31:12). Ле кәсед бәләнгаз у кʹәсиб бәрамбәри «ԛамише пʹәрчʹьԛанди» у «фьтила» кӧ дьтәмьрә дьбьн (Бьхунә Ишайа 42:3; Мәтта 12:20). Жь бина бәр Хԝәде, Ишайа пʹехәмбәр бь сайа ван хәбәра пешда да кʹьфше, кӧ Мәсиһ ԝе һьндава мәрьвед ньмьзкьри дьлован у дьлрʹәʹм бә.

7-8. Иса гьлийед Ишайа пʹехәмбәр ча ани сери?

⁷ Мәтта Мьзгинийа хԝәда нишан дькә, ԝәки гьлийед Ишайа пʹехәмбәр сәр Иса һатьнә сери: «Әԝе ԛамише зийанкʹәти нәпʹәрчʹьԛинә, у фьтила кӧ ду дькә нәтәмьринә». Һьнә мәрьвед кӧ хԝә пʹәрчʹьԛанди йан бечʹарә тʹәхмин дькьрьн, жь кʹәрәмәтед Иса кʹар стандьн. Мәсәлә, мерәки кӧ бь кʹотибуне нәхԝәш бу, дьԛәԝьмә дьфькьри кӧ ԝе тʹӧ щар нькарьбә ԛәнщ бә у вәгәрʹә щәм малбәт у достед хԝә (Луԛа 5:12, 13). Ӧса жи мерәки кәрʹ һәбу, йе кӧ нькарьбу бь зәлали хәбәр да. Һәла бьфькьрә кӧ гава кәсед дьн бь шабуне тʹәви һәв хәбәр дьдан, әԝи хԝә ча тʹәхмин дькьр (Маркос 7:32, 33).

⁸ Сәрда жи, рʹожед Исада гәләк Щьһуйа баԝәр дькьрьн, ԝәки кәсед нәхԝәш жь бо гӧнед хԝә йан гӧнед де-баве хԝә, һатьнә щәзакьрьне (Йуһʹәнна 9:2). Бона ве баԝәрийа шаш, кәсед дьн сәр ԝан ча сәр кәсед ньмьз дьньһерʹин. Чаԝа кӧ Ишайа пʹехәмбәр пешда готьбу, Мәсиһ һьм мәрьвед нәхԝәш ԛәнщ дькьр, һьм жи нишани ԝан дькьр, кӧ Хԝәде дькʹәвә һʹәйра ԝан. Әв йәк чьда мә дьдә баԝәркьрьне?

9. Ль гора Ибрани 4:15, 16, Кʹаһине мәйи Мәзьн һьндава мәда чаԝа нә?

⁹ Бьхунә Ибрани 4:15, 16. Әм дькарьн баԝәр бьн, кӧ Иса мә фәʹм дькә. Гәло әв йәк чь те һʹәсабе? Мәрьве фәʹмкʹар дәрдед кәсед дьн дьвинә у һәстед ԝан фәʹм дькә. Хәбәра Йунани, йа кӧ ча «фәʹм дькә» һатийә ԝәлгәрʹандьне, те һʹәсабе кӧ дьле кәсәки сәр мәрьвед кӧ дәрд дькʹьшиньн, дьшәԝьтә. Рʹезед кӧ бәʹса кʹәрәмәтед Иса дькьн, дьдьнә кʹьфше, ԝәки дьле ԝи чьԛас сәр мәрьва дьшәԝьти. Мәʹнийа сәрәкә кӧ чьма әԝи мәрьв ԛәнщ дькьрьн әԝ нибу кӧ әв борщдар бу, ле әԝ бу кӧ әԝи мәрьв һʹәз дькьрьн у дьхԝәст али ԝан бькә. Мәсәлә, гава әԝи мере кӧ бь кʹотибуне нәхԝәш бу ԛәнщ кьр, әԝи дькарьбу һьнәки дурва ԝи ԛәнщ кьра. Ле Иса незики ԝи бу у дәсте хԝә дани сәр ԝи. Дьбәкә бь гәләк сала тʹӧ кәси дәсте хԝә нәдабу ԝи. Ӧса жи, пешийа кӧ Иса мере кәрʹ ԛәнщ кьра, әԝи әԝ жь мәрьва дур хьст, ԝәки әԝ хԝә рʹьһʹәт тʹәхмин кә. Щарәке жи, кʹӧлфәтәкә кӧ гӧне хԝә тʹобә дькьр, ньгед Иса бь һесьред хԝә шушт у бь пʹорʹе хԝә зьһа кьр. Ферьси сәр ԝе ча сәр кәсе ньмьз ньһерʹи, ле Иса пьшта ԝе кʹӧлфәте гьрт у сәрт ньһерʹандьна Ферьси рʹаст кьр (Мәтта 8:3; Маркос 7:33; Луԛа 7:44). Бәле, Иса хԝә жь кәсед нәхԝәш йан жь кәсед кӧ гӧнед гьран кьрьбун, дур нәдьгьрт, ле әԝана ԛәбул дькьрьн у дьле ԝан ԛәԝи дькьр. Әм дькарьн баԝәр бьн кӧ әԝ һьндава мәда жи һәма ӧса нә!

ЧʹӘʹВ БЬДӘ КʹАҺИНЕ МӘЙИ МӘЗЬН

10. Әм ча дькарьн али кәсед кәрʹ у кор бькьн? (Бьньһерʹә ӧса жи шькьл.)

¹⁰ Әм шагьртед Иса нә, ләма жи әм дьхԝазьн һʹәзкьрьн, бәрдьли у дьлрʹәʹмийеда чʹәʹв бьдьнә ԝи (1 Пәтрус 2:21; 3:8). Һәмьки әм нькарьн мәрьвед кәрʹ у кор ԛәнщ кьн, ле әм дькарьн али ԝан бькьн бьбьнә достед Хԝәде. Мәсәлә, әʹдәбйәтед сәр һʹиме Кʹьтеба Пироз ида сәр зедәтьри 100 зьманед кәрʹ-лала һәнә. Бона мәрьвед кор, әʹдәбйәтед бь ньвисара Браиле сәр 60 зьмани зедәтьр һәнә, у аудио-шьровәкьрьнед видеойед мә сәр 100 зьмани зедәтьр тенә дәрхьстьне. Әв әʹдәбйәт али кәсед кәрʹ у кор дькьн, ԝәки әԝана Йаһоԝа у Кӧрʹе ԝи нас кьн у незики ԝан бьн.

11. Тʹәшкиләта Йаһоԝа ча мина Иса бона һʹәму мьләта хәм дькә? (Кʹаред Шандийа 2:5-7, 33) (Бьньһерʹә ӧса жи шькьл.)

¹¹ Тʹәшкиләта Йаһоԝа хирәт дькә кӧ али мәрьвед жь һʹәму мьләта бькә. Паши кӧ Иса жь мьрьне һатьбу сахкьрьне, әԝи рʹӧһʹе пироз да шагьртед хԝә, ԝәки һʹәму мәрьвед кӧ Рʹожа Пенщийә Һʹәсаб тʹоп бьбун, бькарьбьн мьзгинийе сәр зьмане хԝә бьбьһен (Бьхунә Кʹаред Шандийа 2:5-7, 33). Ль гора рʹебәрийа Иса, тʹәшкиләта мә әʹдәбйәтед сәр һʹиме Кʹьтеба Пироз сәр 1 000 зьмани зедәтьр дәрдьхә. Сәр һьнә жь ван зьмана тʹәне һьнә мәрьв хәбәр дьдьн. Мәсәлә, һьнә зьманед мьләтед чʹәрмәсор һәнә, йед кӧ ль Америкайа Бакӧре у Башуре дьжин, у мәрьвед кӧ сәр ԝан зьмана хәбәр дьдьн, гәләк һьндьк ьн. Ле диса жи, әʹдәбйәтед мә бь зедәтьри 160 зьманед ӧса һатьнә ԝәлгәрʹандьне, ԝәки мәрьвед кӧ сәр ԝан зьмана хәбәр дьдьн, мьзгинийе бьбьһен. Ӧса жи әʹдәбйәтед мә сәр зедәтьри 20 зьманед Рʹомани тенә дәрхьстьне. Бь һʹәзара кәсед кӧ сәр ван зьмана хәбәр дьдьн, бунә хьзмәткʹаред Йаһоԝа.

12. Тʹәшкиләта Йаһоԝа диса ча али мәрьва дькә?

¹² Хенщи ве йәке кӧ тʹәшкиләта Йаһоԝа рʹебәрийа шьхӧле бәлакьрьна мьзгинийе дькә, әԝ аликʹарийе дьдә кәсед кӧ жь бо тʹәшԛәлед тʹәбийәте зьраре дьстиньн. Бь һʹәзара мәрьв һазьр ьн али ԝан хушк-бьра бькьн. Тʹәшкиләта мә ӧса жи одед щьвата ава дькә, ԝәки мәрьв бькарьбьн ԝедәре тʹоп бьн у дәрһәԛа һʹәзкьрьна Хԝәдейә һьндава ԝан пебьһʹәсьн.

КʹАҺИНЕ МӘЙИ МӘЗЬН ДЬКАРӘ АЛИ ТӘ БЬКӘ

13. Иса ча али мә дькә?

¹³ Иса шьване мәйи ԛәнщ ә, ләма жи әԝ дина хԝә дьдә һʹәԝщед мәйә шәхси, ԝәки әм бькарьбьн һәләԛәтийа незик тʹәви Йаһоԝа хԝәй кьн (Йуһʹәнна 10:14; Әфәси 4:7). Щарна жь бо тьштед кӧ тенә сәре мә, дьбәкә әм хԝә мина фьтиләкә кӧ дьтәмьрә, йан мина ԛамишәки пʹәрчʹьԛанди тʹәхмин кьн. Дьбәкә әм жь бо нәхԝәшикә гьран, шашикә хԝә йан проблемәкә кӧ ортʹа мә у хушк йан бьракида һәйә, хәмгин бьн. Йан жи дьԛәԝьмә мәрʹа чәтьн ә дина хԝә бьдьнә гӧмана хԝә у бона дәрдед хԝә бәр хԝә нәкʹәвьн. Ле бир нәкә, кӧ Иса һʹале тә дьвинә у һәстед тә фәʹм дькә. Әԝ дьлрʹәʹм ә, у һазьр ә али тә бькә. Мәсәлә, гава ԛьдуме тә тʹӧнә, әԝ дькарә бь аликʹарийа рʹӧһʹе пироз ԛәԝате бьдә тә (Йуһʹәнна 16:7; Тито 3:6). Ӧса жи Иса дькарә һьм бь аликʹарийа рʹуспийед кӧ бона мә «ча пʹешкʹеш» ьн, һьм жи бь аликʹарийа хушк-бьред дьн һелане бьдә мә у пьштгьрийа мә бькә (Әфәси 4:8).

14. Гава әм дьлтәнг дьбьн, әм чь дькарьн бькьн?

¹⁴ Һәрге тӧ дьлтәнг буйи, бинә бира хԝә кӧ Иса Кʹаһине мәйи Мәзьн ә. Йаһоԝа әԝ шандьбу сәр әʹрде нә тʹәне сәва кӧ әԝ әʹмьре хԝә ча ԛӧрбан бьдә, ле ӧса жи ԝәки әԝ дәрдед мәрьвед гӧнәкʹар дьһа баш фәʹм кә. Гава әм жь бо гӧнә у кемасийед хԝә дьлтәнг дьбьн, Иса һазьр ә али мә бькә (Ибрани 4:15, 16).

15. Чь али бьраки кьр, кӧ жь кәрийе Йаһоԝа дур кʹәтьбу, ԝәки әԝ вәгәрʹә щьвате?

¹⁵ Иса ӧса жи али хьзмәткʹаред Хԝәде дькә, ԝәки әԝана кәсед кӧ жь кәрийе Йаһоԝа дур кʹәтьнә, бьвиньн у аликʹарийе бьдьнә ԝан (Мәтта 18:12, 13). Мерәки бь наве Стефано,b донздәһ сал паши ве йәке кӧ щьватеда һатьбу әʹламкьрьне, ԝәки әԝ ида Шәʹде Йаһоԝа нинә, сафи кьр һәрʹә щьвате. Әԝ дьбежә: «Мьнрʹа чәтьн бу һәрʹьмә щьвате, ле мьн гәләк дьхԝәст диса вәгәрʹьм малбәта Йаһоԝа. Гава рʹуспийа әз щьватеда дитьм, әԝана гәләк ша бун. Щарна мьн хԝә беԛимәт тʹәхмин дькьр у әз дьфькьрим кӧ чʹарә тʹӧнә у әзе ида нькарьбьм диса бьбьмә Шәʹде Йаһоԝа. Ле рʹуспийа ани бира мьн, кӧ Йаһоԝа у Иса дьхԝазьн, ԝәки әз бәрдәԝам кьм ԛәԝате бьдьмә хәбате у рʹӧһʹанида пешда һәрʹьм. Гава әз щьватеда диса һатьмә ԛәбулкьрьне, һʹәму хушк-бьра незики мьн бун у ԝана бь дьлгәрми әз у малбәта мьн ԛәбул кьрьн. Ԝәʹдә шунда, кʹӧлфәта мьн жи һинбуна Кʹьтеба Пироз дәстпекьр у иро әм тʹәвайи Йаһоԝарʹа хьзмәт дькьн». Гава хушк-бьред кӧ гӧне хԝә тʹобә дькьн, аликʹарийе дьстиньн сәва кӧ вәгәрʹьнә щьвате, Кʹаһине мәйи Мәзьн бе шьк гәләки ша дьбә!

16. Тӧ чьма шекьрдар и кӧ Иса Кʹаһине мәйи Мәзьн ә?

¹⁶ Гава Иса сәр әʹрде бу, әԝи али гәләк мәрьва дькьр. Иро жи әм дькарьн баԝәр бьн, кӧ гава әм һʹәԝще аликʹарийе нә, әԝ һазьр ә али мә бькә. Дьнйа тʹәзәда әԝе али мәрьвед гӧһдар бькә, ԝәки әԝана жь һʹӧкӧме гӧнә бь тʹәмами аза бьн. Әм гәләк рʹази нә кӧ Йаһоԝа бь һʹәзкьрьн у дьловани Кӧрʹе хԝә кʹьфш кьрийә, ԝәки әԝ бьбә Кʹаһине Мәзьн, йе кӧ дьлрʹәʹм ә у мә фәʹм дькә!