Аликʹарийа бона Жьнед кӧ Рʹасти Зорбәтийе Тен
«НАВ тʹәмамийа дьнйайеда бь милйона жьн у кәчʹьк, рʹасти зорбәтийе тен. Дьԛәԝьмә тӧ жи рʹасти ве йәке һати? Пебьһʹәсә кӧ чьрʹа бона Хԝәде фәрз ә, ԝәки тӧ бехофийеда би у Әԝе чь бькә һьндава зорбәтийе, рʹасти кʹижани жьн тен».
Готара сәр jw.org бь наве «Бехофийа Жьна—Ньһерʹандьна Кʹьтеба Пироз» бь ван гьлийед жоре дәстпедьбә. Бь сайа линка кӧ хьлазийа готареда һәйә, тӧ дькари ве готаре бь формата PDF бькʹьшини, нәшьр ки у мина бәлавоке ԛәт ки. Хушкәкә жь Америкайе наве кʹижане Стейси йә, дәрһәԛа ве готаре дьбежә: «Мьн чәнд һʹәв нәшьр кьрьн у тʹәви хушкәкә дьн бьрә сьтʹаргәһәкә бона жьна, йа кӧ мьһала щьвата мәда бу».
Хәбатчикә ве сьтʹаргәһе жь мә пьрси, кӧ диса чәнд һʹәв бәлавок һәнә, ԝәки әԝ бьдә кәсед дьн жи. Ахьрийеда дӧ хушк чун у ԝана диса 40 бәлавок у 30 картед jw.org бәла кьрьн. Щарәкә дьн, менещера сьтʹаргәһе хԝәст ԝәки хушкед мә нишани жьна бькьн, кӧ һинбуна Кʹьтеба Пироз ча дәрбаз дьбә.
Стейси у дӧ хушкед дьн чун сьтʹаргәһәкә дьн жи. Ԝедәре, ԝана пенщ бәлавок дан жьнед кӧ ԝедәре дьман, ле ԝана дьһа зедә бәлавок хԝәстьн. Хәбатчикә сьтʹаргәһе ӧса гот: «Әв бәлавок ԝе али жьнед ль вьр бькә». Ӧса жи әԝе гот: «Жьнед ль вьр бь рʹасти жи һʹәԝще ве йәке нә». Ԝәʹде сәрледанәкә дьн, чәнд жьн тʹәвайи тʹоп бун ԝәки бьвиньн, кӧ һинбуна Кʹьтеба Пироз ча дәрбаз дьбә, у жь ԝана дӧда хԝәстьн хьлазийа һʹәфтийе бенә щьвате.
Стейси ӧса дьбежә: «Әм әʹщебмайи дьминьн кӧ гава мәрьв ве готара хԝәш дьстиньн, әԝ чьԛас ша дьбьн. Нәшьркьрьн у бәлакьрьна ве готаре методәкә баш ә, ԝәки әм ԝан жьнарʹа, йед кӧ рʹасти зӧльм у зорбәтийе тен, дәрһәԛа Сәрԝертийа Хԝәде гьли кьн. Әм гәләк ша дьбун, чахе мә дьдит кӧ әԝана ча гӧһ дьдьнә мә. Әм гӧман ьн кӧ Йаһоԝа ԝе хирәта мә кʹәрәм кә у али мә бькә, ԝәки әм ԝан кʹӧлфәтарʹа дәрһәԛа мьзгинийе гьли кьн».