Пьрсед Хԝәндәвана

«Хԝәстьна» кӧ Йаһоԝа ԝе ԝәʹдәки незикда бькә дьле мьләта, чь йә?

Дәрһәԛа дәстпека тәнгасийа мәзьн, Әʹйанти 17:16, 17 ӧса дьбежә: «Әԝ һәр дәһә стьруйед кӧ тә дитьн, ӧса жи щәʹнәԝьр ԝе һәврʹа бьжәньнә йа ԛав. Әԝе дәсте ԝе жь һәр тьшти бькьн, ԝе тәʹзи кьн у гоште ԝе бьхԝьн, егьрда бьшәԝьтиньн. Чьмки Хԝәде әв йәк кьрә дьле ԝан, кӧ хԝәстьна ԝи бькьн у сәр нетәке бьн, пʹадшатийа хԝә бьдьнә щәʹнәԝьр, һʹәта кӧ хәбәред Хԝәде бенә сери». Бәре әʹдәбйәтед мәда дьһатә готьне, ԝәки «хԝәстьна» кӧ Йаһоԝа ԝе бькә дьле мьләта әв ә, кӧ религийед ԛәлп кʹӧта кьн.

Ле мә дит кӧ әм гәрәке ван рʹеза бь щурʹәки дьн фәʹм кьн. «Хԝәстьна» кӧ Йаһоԝа ԝе бькә дьле мьләта әв ә, кӧ әԝана «пʹадшатийа хԝә бьдьнә щәʹнәԝьр». Сәва кӧ әм фәʹм кьн, ԝәки әв гьли ԝе ча бенә сери, ԝәрә әм дина хԝә бьдьнә ван пьрса.

Ве пʹехәмбәртийеда дәрһәԛа кʹе те готьне? «Ԛав» ӧса жи ча «Бабилона Мәзьн» те навкьрьне у те һʹәсабе империйа һʹәмдьнйайе йа религийа ԛәлп. «Щәʹнәԝьр», йе кӧ рʹәнге ԝи «соре гәвәз» ә, те һʹәсабе тʹәшкиләта кӧ бона әʹдьлайа нав тʹәмамийа дьнйайеда щабдар ә, у әԝ сала 1919-да һатьбу сазкьрьне у наве ве Лига Мьләта бу, у ньһа әв Тʹәшкиләта Мьләтед Йәкбуйи йә (Әʹйанти 17:3-5). ‹Дәһә стьру› тенә һʹәсабе һʹәму һʹӧкӧмәтед кӧ пьштгьрийа щәʹнәԝьр дькьн.

Һәләԛәтийа ортʹа ԛав у щәʹнәԝьре соре гәвәз чь щурʹәйи йә? Ԛав сәр пьшта щәʹнәԝьре «сийар» буйә, тʹәви ԝи һәвкʹарийе дькә, хирәт дькә кӧ сәр ԝи һʹӧкӧм кә у һәла һе ле контрол кә жи.

Чь ԝе бе сәре ԛаве? Щәʹнәԝьр у дәһә стьруйед кӧ пьштгьрийа ԝи дькьн, ԝе ԛаве нәфрʹәт кьн. Жь бо нәфрʹәтийе, әԝана ле тʹалан кьн у хьрабийа ԝе әшкәрә кьн. Әԝана ԝе диԝана Йаһоԝа биньн сери у бь тʹәмами ле кʹӧта кьн (Әʹйанти 17:1; 18:8). Бь ԝи щурʹәйи тʹәшкиләтед религийед ԛәлп ԝе бь тʹәмами бенә һьлдане. Ле пешийа кӧ әв йәк бьԛәԝьмә, Йаһоԝа ԝе бькә дьле мьләтед дьнйайе, ԝәки әԝана тьштәки ӧса бькьн, чь кӧ тʹӧ щар нава тʹәрихийа инсанәтеда нәԛәԝьми бу.

Йаһоԝа ԝе чь бькә дьле мьләта? Йаһоԝа ԝе «хԝәстьна» хԝә бькә дьле ‹дәһә стьруйа› ԝәки әԝана «ԛәԝат у һʹӧкӧме хԝә бьдьнә щәʹнәԝьр [йе соре гәвәз]», демәк Мьләтед Йәкбуйи (Әʹйанти 17:13). Бьфькьрә кӧ әв йәк чь те һʹәсабе. Гәло сәрԝертийед дьнйайе ԝе хԝәха сафи кьн кӧ ԛәԝат у һʹӧкӧме хԝә бьдьнә щәʹнәԝьр? На! Кʹьтеба Пироз дьдә кʹьфше, кӧ Хԝәде ԝе әве хԝәстьне бькә дьле ԝан (Мәтʹәлок 21:1; бәрамбәр кә Ишайа 44:28). Гәло әв йәк ԝе һеди-һеди бьԛәԝьмә? На! Ча те кʹьфше, әв йәк ԝе ньшкева бьԛәԝьмә. Паше, щәʹнәԝьр ԝе диԝана Йаһоԝа бинә сери у һʹәму тʹәшкиләтед религийед ԛәлп ԝе бь тʹәмами ԛьрʹ кә.

Ахьрийеда ԝе чь бьԛәԝьмә? Әʹсәйи нинә кӧ әм дина хԝә бьдьнә нучәйед кӧ нишан дькьн, ԝәки һʹӧкӧмәтийед дьнйайе чьԛас дьчә, дьһа зедә пьштгьрийа Мьләтед Йәкбуйи дькьн. Йаһоԝа ԝе ньшкева хԝәстьна хԝә бькә дьле мьләта, ԝәки әԝана һʹӧкӧмәтийа хԝә бьдьнә щәʹнәԝьр. Һьнге әме фәʹм кьн кӧ тәнгасийа мәзьн бәр шемике йә. Һʹәта кӧ әԝ ԝәʹдә бе, ԝәрә әм «һʹьшйар бьминьн у сәр һʹьше хԝә бьн», чьмки гӧһастьнед мәзьн пешийа мә нә! (1 Тʹесалоники 5:6)