Кәсед Әʹмьрда Мәзьн бона Щьвате Ԛимәт ьн

Дьбәкә тӧ жи ида кал йан пир буйи, у ԛәԝата тә ида мина йа бәре нинә. Дьԛәԝьмә ида гәләк сал ьн кӧ тӧ бь амьни Йаһоԝарʹа хьзмәт дьки, ле тӧ дьфькьри кӧ ньһа нькари хьзмәтийеда һаԛас тьшт бьки, чаԝа бәре. Дьбәкә тӧ һʹале хԝәйи бәре бәрамбәри һʹале хԝәйи ньһа дьки. Ле гәло чь дькарә али тә бькә, ԝәки тӧ шабуна хԝә ӧнда нәки?

ЙАҺОԜА ҺИВИЙЕ ЙӘ КӦ ТӦ ЧЬ БЬКИ?

Жь хԝә бьпьрсә: «Сәва кӧ Йаһоԝа жь мьн рʹази бә, гәрәке әз чь бькьм?» Әв гьлийед жь Маркос 12:30 дькарьн дьле тә рʹьһʹәт бькьн: «Йаһоԝа Хԝәдайе хԝә бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә һʹәз бькә».

Ль гора ве рʹезе, Йаһоԝа дьхԝазә кӧ тӧ бь тʹәмамийа дьле хԝә, щанийа хԝә у ԛәԝата хԝә ԝирʹа хьзмәт бьки. Әԝ фькьр дькарә али тә бькә, ԝәки тӧ хԝә тʹәви кәсед дьн йан тʹәви һʹале хԝәйи бәре бәрамбәр нәки.

Һәла бьфькьрә: Гава тӧ щаһьл буйи, тә ча Йаһоԝарʹа хьзмәт дькьр? Фәʹмдари йә, һьнге тә чьԛас дькарьбу һаԛас Йаһоԝарʹа хьзмәт дькьр. Иро тӧ ча Йаһоԝарʹа хьзмәт дьки? Бәле иро жи, тӧ диса чьԛас дькари, һаԛас дьки. Демәк тӧ диса жи мина бәре Йаһоԝарʹа хьзмәт дьки. Бәле, бәре тә йа һәрә баш дьда Йаһоԝа, у һʹәта иро тӧ диса ӧса дьки.

КӘСЕД ДЬН ДЬКАРЬН ЖЬ ЩЕРʹЬБАНДЬНА ТӘ КʹАРЕ БЬСТИНЬН

Ӧса жи бьра калбун йан пирбуна тә, тәрʹа нәбә синор кӧ тьштәки бьки, ле әԝе һʹәсаб кә ча мәщал кӧ али мәрьва бьки. Бь рʹасти ньһа жь бо әʹмьре хԝәйи мәзьн, тӧ дькари һьнә ԝан тьшта бьки, кʹижан кӧ тә щаһьлтийа хԝәда нькарьбу бькьра. Мәсәлә, тӧ дькари ве йәке бьки:

Кәсед дьнрʹа гьли кә тьштед кӧ тӧ һин буйи. Һәла бьньһерʹә Кʹьтеба Пироз чь дьбежә:

Даԝьд Пʹадша: «Әз зарʹ бумә у ньһа жи мәзьн бумә, мьн нәдитийә йе рʹаст ԝеда авити, йан жи зарʹед ԝи кӧ нен пʹарс кьн» (Зәбур 37:25).

Йешу: «Ньһа әз дьчьм ԝе рʹийа кӧ һʹәму дьнйа дьче. Һун һʹәму жи бь һʹәму дьле хԝә у бь һʹәму щане хԝә заньн кӧ жь һʹәму тьштед баш йед кӧ Хԝәдайе ԝә Хӧдан ль сәр ԝә гот, тʹӧ тьшт жи вала дәрнәкʹәт. Һʹәму жи пек һатьн, тьштәки вала дәрнәкʹәт» (Йешу 23:14, ИМ).

Дьԛәԝьмә тӧ жи ӧса дьфькьри. Даԝьд Пʹадша у Йешу дәрһәԛа щерʹьбандьна хԝә гьли дькьрьн. Ԝана дәрһәԛа ԝан тьшта дьгот, кʹижан кӧ нава гәләк салада пе чʹәʹве хԝә дитьбун, у ләма жи ԛимәте готьнед ԝан дьһа мәзьн бу.

Һәрге тӧ ида гәләк сала Йаһоԝарʹа хьзмәт дьки, тӧ жи дькари кәсед дьнрʹа дәрһәԛа кʹәрәмед кӧ тә стандийә гьли ки. Бәʹса хәбәре, гьли кә тә әʹмьре хԝәда чаԝа дәсте Йаһоԝа дьдит. Сәрһатийед тә дькарьн дьле кәсед дьн ԛәԝи кьн, ԝәки әԝана жи бь дьл у щан Йаһоԝарʹа хьзмәт кьн (Рʹомайи 1:11, 12).

Ӧса жи чьԛас дькари һәрʹә щьвата, ԝәки хушк-бьра ԛәԝи ки. Бь ве йәке те хԝәха жи кʹаре бьстини. Кони, йа кӧ мә жоре бәʹса ԝе кьр, ӧса дьбежә: «Гава әз дьчьмә щьвата, әв йәк али мьн дькә кӧ әз мерхасийа хԝә ӧнда нәкьм. Ода Щьватеда, һʹәзкьрьна хушк-бьра һаԛас ԛәԝи йә, кӧ мәрьв нә жи дькарә ԝедәре хәмгин бә. Әз хирәт дькьм пе пʹешкʹешед бьчʹук рʹазибуна хԝә ԝанрʹа нишан кьм. Ӧса жи әз бәрдәԝам дькьм тʹәви хушк-бьра һәрʹьм хьзмәтийе».

ЙАҺОԜА АМЬНИЙА ТӘ ԚИМӘТ ДЬКӘ

Кʹьтеба Пироз бәʹса гәләк мәрьва дькә, йед кӧ жь бо синор у һʹале хԝә ида нькарьбун гәләк тьшт бькьрана, ле диса жи Йаһоԝа әԝана һʹәз дькьрьн. Ԝәрә дина хԝә бьдьнә мәсәла мәрьвәки әʹмьрда мәзьн бь наве Шимәйон, йе кӧ ԝәʹде Исада дьжит. Гава Шимәйон дьчу пʹарьстгәһе, әԝи дьбәкә дьдит кӧ меред щаһьл чаԝа шьхӧл дькьн. Шимәйон дьԛәԝьмә бәр хԝә дькʹәт, чьмки әԝ ида кал бу у нькарьбу мина ԝан хьзмәт кьра. Ле Йаһоԝа ԝи гәләк ԛимәт дькьр. Ль гора Кʹьтеба Пироз, әԝ «мәрьве рʹаст у хԝәдехоф» бу. Ләма жи Йаһоԝа мәщал да Шимәйон, ԝәки әԝ Исайе бьчʹук пе чʹәʹве хԝә бьвинә. Һәла һе жи Йаһоԝа бь сайа ԝи пʹехәмбәрти кьр, кӧ Иса ԝе бьбә Мәсиһ (Луԛа 2:25-35). Әʹйан ә кӧ Йаһоԝа дина хԝә нәдьда ве йәке кӧ Шимәйон ида кал бьбу, ле әԝи әԝ һʹәсаб дькьр ча мәрьвәки бь баԝәрийа мәзьн, йе кӧ «рʹӧһʹе пироз сәр ԝи бу».

Тӧ жи дькари баԝәр би кӧ һәрге синоред тә һәбьн жи, Йаһоԝа ԛимәт дькә хьзмәтийа тәйә амьн. Әԝ «дьхԝазә кӧ мәрьв һаԛаси бьдә, чьԛас дькарә, нә кӧ чьԛас нькарә» (2 Корьнтʹи 8:12).

Ләма жи дина хԝә бьдә тьштед кӧ тӧ дькари бьки. Мәсәлә, һәрге тӧ нькари гәләк сьһʹәта хьзмәт ки жи, тӧ дькари һаԛас хьзмәт ки чьԛас ԛәԝата тә дьгьһиже. Ӧса жи тӧ дьбәкә дькари хушк-бьрарʹа тʹеле хи йан нәʹма бьшини. Тьштед ӧса дькарьн хушк-бьра һелан кьн, илаһи чьмки тӧ йәки щерʹьбанди йи, у тә гәләк сала Йаһоԝарʹа хьзмәт кьрийә.

Һьнә хушк-бьра рʹасти проблемед сьһʹәт-ԛәԝатева гьредайи тен. Дина хԝә бьдьнә сәрһатийа жь Африкайа Рʹоһьлате, йа кӧ те гьликьрьне ве чаргошеда «Әԝ бь Сайа Рʹастийа Кʹьтеба Пироз Сах Ма».

Бир нәкә кӧ баԝәри у амьнийа тә дькарә дьле кәсед дьн ԛәԝи кә. Әʹмьре хԝәда тә сәбьра мәзьн дайә кʹьфше, у тӧ дькари ван готьнада баԝәр би: «Хԝәде һәԛ ә, у әԝ кьред ԝә у һʹәзкьрьна кӧ ԝә бона хатьре наве ԝи дайә кʹьфше, бир накә. Бәле, әԝ бир накә хьзмәтийа кӧ ԝә пирозарʹа кьрийә у һун һʹәта ньһа жи дькьн» (Ибрани 6:10).

ԚӘԜАТА ТӘ ЧЬԚАС ДЬГЬҺИЖЕ ЙАҺОԜАРʹА ХЬЗМӘТ КӘ

Лекʹолинед зандара нишан дькьн кӧ чахе кәсед әʹмьрда мәзьн али кәсед дьн дькьн, сьһʹәт-ԛәԝата ԝан һе баш дьбә, мәжийе ԝан дьһа рʹьнд дьхәбьтә у әʹмьре ԝан дьһа дьреж дьбә.

Һәмьки, кьред ԛәнщ нькарьн һʹәму синор у чәтьнайед калбун у пирбуне бьдьнә һьлдане. Тʹәне Сәрԝертийа Хԝәде дькарә һʹале мәйи гӧнәкʹар, демәк сәбәбе сәрәкә йе калбун у пирбуне у мьрьне, бьдә һьлдане (Рʹомайи 5:12).

Һʹәта ԝе дәме, хьзмәтийа тә у әв йәк кӧ тӧ али мәрьва дьки, ԝәки әԝана Йаһоԝа нас кьн, гӧмана тә ԛәԝи дькә у бона сьһʹәт-ԛәԝата тә керһати йә. Хушк-бьред әʹмьрда мәзьн, тʹӧ щар бир нәкьн кӧ Йаһоԝа хьзмәтийа ԝә ԛимәт дькә, у щьват баԝәрийа ԝәйә ԛәԝи гәләк ԛимәт дькә!