Гәло Әм Гәрәке Сәре Хԝә Бәр Пʹута Дайньн?

Щаба Кʹьтеба Пироз

На, әм гәрәке ве йәке нәкьн. Дәрһәԛа ԛанунед кӧ Хԝәде дабу Исраелийа, Әнсиклопедийа Католикийә Тʹәзәда ӧса те готьне: «Жь щурʹә-щурʹә пʹаред Кʹьтеба Пироз те кʹьфше, ԝәки һʹәбандьна рʹастда пʹут нәдьданә хәбате». Ԝәрә әм дина хԝә бьдьнә чәнд рʹезед Кʹьтеба Пироз:

• «Тʹӧ пʹути мина дьлԛе тьштәкида хԝәрʹа ченәки, нә жор ль әʹзмен, нә жер ль сәр әʹрде, нә жи нава авед бьн әʹрдеда. Бәр тʹӧ пʹути та нәби у хӧламтийа ԝан нәки, чьмки әз Хӧдан Хԝәдейе тә Хԝәдеки кʹӧмрʹәш ьм, кӧ бона нәһәԛийед бава тиньмә сәре зарʹа, һʹәта ньсьле сьсийа у чара кӧ дьжәньнә мьн» (Дәркʹәтьн 20:4, 5). Хԝәде дьхԝазә ԝәки әм «бь тʹәмамийа дьле хԝә» ԝи һʹьз бькьн. Әԝ нахԝазә кӧ әм сәре хԝә бәр шькьла у пʹута дайньн, у нә жи тьштед дьн бона һʹәбандьне бьдьнә хәбате (Луԛа 10:27).

• «Әзе рʹумәта хԝә нәдьм йәки дьн, пәсьне хԝә нәдьм пʹута» (Ишайа 42:8, ИМ). Хԝәде хԝәш найе гава бь сайа пʹута ԝи дьһʹәбиньн. Чахе һьнә Исраели бона һʹәбандьне голькәк рʹо кьрьн, Хԝәде гот кӧ әԝана «жь рʹе шьһʹьти» нә (Дәркʹәтьн 32:7-9).

• «Гәрәке әм Хԝәде аһа нәшьбиньн мина зерʹ, зив, йан кәвьре кӧ бь һʹьш у һостатийа мәрьва һатьнә кʹоландьне» (Кʹаред Шандийа 17:29). Ԝәʹде һʹәбандьна хӧданед ԛәлп, мәрьв ван пʹута дьдьн хәбате, кʹижан «кӧ бь һʹьш у һостатийа мәрьва һатьнә кʹоландьне», ле әм Мәсиһи пәй рʹебәрийа Кʹьтеба Пироз дьчьн, «чьмки әм бь баԝәрийе дьжин, нә кӧ бь дитьна чʹәʹва» (2 Корьнтʹи 5:7).

• «Хԝә жь пʹутпʹарьстийе хԝәй кьн» (1 Йуһʹәнна 5:21). Ван ԛанунада кӧ Хԝәде дабунә Исраелийа у Мәсиһийа, рʹастә-рʹаст дьһатә готьне кӧ Хԝәде ԛәбул накә, ԝәки һʹәбандьнеда шькьла у пʹута бьдьнә хәбате.