NAMEYA JI TÎTOS RE

1 Ez Pawlos, xulamê Xwedê û şandiyê Îsa Mesîh im. Bawerî û xizmeta min li gor baweriya wan kesan e, ên ku Xwedê hilbijartine. Wekî din, bawerî û xizmeta min li gor rastiya* ku bi xizmeta dilsoz ve girêdayî ye 2 û li ser esasê hêviya jiyana herheyî ye. Xwedayê ku nikare derewan bike ji demên berê ve ev hêvî wek soz daye. 3 (Wî di wexta rast de peyva xwe bi saya belavkirina mizgîniyê eşkere kiriye, mizgîniya ku wî emanetî min kiriye. Ev yek li gor emrê Xelaskarê me Xwedê bû.) 4 Ez vê nameyê ji Tîtos re, yê ku di baweriyê de wek kurê min e, dinivîsim:

Bila qenciya mezin û aştiya Bavê me Xwedê û Xelaskarê me Mesîh Îsa li ser te be!

5 Min tu li Girîtê hiştî, da ku tu tiştên ku gerek bên serrastkirin, serrast bikî û wek ku min emir li te kiribû, li her bajarî rîspiyan tayîn bikî. 6 Gerek rîspî zilamekî wisa be ku kesek nikare wî sûcdar derxîne, û gerek ew tenê bi jinekê re zewicî be. Wekî din, gerek zarokên wî bawermend bin û wek kesên bêedeb* û serhildêr neyên sûcdarkirin. 7 Çimkî wek xizmetkarekî Xwedê, gerek çavdêr yekî wisa be ku kesek nikare wî sûcdar derxîne. Gerek ew ne serhişk be*, zû hêrs nekeve, bi zêdeyî venexwe*, ne zordar be û ji aliyê madî ve ne çavbirçî be. 8 Lê gerek ew mêvanhez be, ji qenciyê hez bike, aqildar be*, rastdar be, dilsoz be û yekî ku bikare xwe bigire be. 9 Gava ew kesên din hîn dike, gerek ew xwe li peyva Xwedê bigire, da ku ew bikare bi destê hîndariya rast* hem dilan xurt bike hem jî kesên ku li dijî vê hîndariyê ne, serrast bike.

10 Çimkî gelek kes serhildêr, zimandirêj û xapînok in, bi xisûsî yên ku piştgirên sinetê ne. 11 Gerek devê kesên wisa bê girtin, çimkî ew ji bo xêra xwe tiştên ku gerek neyên hînkirin, hîn dikin û bi vê yekê baweriya hin malbatan bi temamî xera dikin. 12 Zilamekî Girîtî, yê ku pêxemberê wan bû, wisa got: “Girîtî her tim derewan dikin, ew wek heywanên wehşî bitalûke ne û xwarinxwerên tembel in.”

13 Ev gotin rast in. Ji ber vê yekê bi awayekî cidî wan serrast bike, da ku baweriya wan xurt be* 14 û ew guh nedin çîrokên Cihûyan û emrên mirovên ku dev ji rastiyê berdaye. 15 Ji bo mirovên paqij her tişt paqij e. Lê ji bo mirovên nepaqij û bêbawer, tu tişt ne paqij e, çimkî hem hişê wan hem jî wijdanê wan nepaqij e. 16 Ew li ber mirovan dibêjin ku ew Xwedê nas dikin, lê ew wî bi kirinên xwe înkar dikin. Çimkî ew kesên pîs û neguhdar in û feydeya wan ji bo tu karekî qenc tune ye.

2 Lê belê, tu bi dewamî li gor hîndariya rast* xeber bide. 2 Bila zilamên extiyar di her tiştî de terazdar bin, sergiran bin, aqildar bin*, di baweriyê de xurt bin, tehemul bikin û ji kesên din hez bikin. 3 Bi eynî awayî, bila jinên extiyar di rabûn û rûniştina xwe de hurmetkar bin, ne buxtanker* bin û bi zêdeyî şerabê venexwin*, lê bila ew tiştên qenc hîn bikin. 4 Bi vî awayî, ew dikarin jinên ciwan perwerde bikin ku ew ji zilamê xwe û ji zarokên xwe hez bikin, 5 sergiran bin û ji aliyê exlaq ve paqij bin. Wekî din, bila ew îşê malê bikin, qenc bin û bi ya mêrê xwe bikin, da ku tu kes bi xerabî li ser peyva Xwedê xeber nede.

6 Bi eynî awayî, dilê xortan bi dewamî ava bike ku ew aqildar bin, 7 û bi kirinên xwe yên qenc di her tiştî de bibe emsaleke baş. Bi sergiranî tiştên pak hîn bike*. 8 Bila xeberdana te saxlem û bifeyde be, da ku lome lê neyê kirin. Hingê kesên ku li dijî me radibin wê bên şermezarkirin, çimkî ewê nikaribin tiştekî xerab li ser me bibêjin. 9 Bila xulam di her tiştî de bi ya axayên xwe bikin û xîret bikin ku dilê wan razî bikin. Bila ew li dijî gotinên wan ranebin, 10 tu tiştî ji wan nedizin, lê nîşan bidin ku ew bi rastî kesên pêbawer in. Bi vî awayî, ewê hîndariyên Xelaskarê me Xwedê ji her aliyî ve bixemilînin.

11 Çimkî qenciya mezin a Xwedê hatiye eşkerekirin û hemû cure mirovan ber bi xelasiyê ve dibe. 12 Ev qenciya wî me perwerde dike ku em xerabî û xwestekên dinyayê red bikin, di vê dinyayê de bi aqildarî û rastdarî bijîn û di xizmeta Xwedê de dilsoz bimînin. 13 Û em li benda vê yekê ne ku hêviya me ya dilxweş bê cih, û Xwedayê meyî mezin û Xelaskarê me Îsa Mesîh di rûmetê de xuya bibin. 14 Mesîh jiyana xwe ji bo me feda kir, da ku me ji her cure neheqiyê xelas bike û komeke mirovan paqij bike ku ew bibin yên wî. Ev kom xelkê wî yê xisûsî ye û bi dil û can qenciyê dike.

15 Her tim li ser van tiştan xeber bide, şîretan bide û tembîh bike, û vê yekê li gor mesûliyeta ku ji te re hatiye dayîn, bike. Bila tu kes te kêm nebîne.

3 Bi dewamî bîne bîra xwişk û birayan ku ew bi ya hukûmet û serokan bikin, guhdariya wan bikin û ji bo her karê qenc hazir bin. 2 Bila ew li ser tu kesî bi xerabî xeber nedin û ne şerhez bin, lê bila ew maqûl bin û bi hemû mirovan re nerm bin. 3 Çimkî berê em jî kesên nefehmdar û neguhdar bûn, em dihatin xapandin û xulamên cure cure kêf û xwestekan bûn. Wekî din, me xerabî û çavnebarî dikir, em mirovên pîs bûn û me ji hevdû nefret dikir.

4 Lê belê, Xelaskarê me Xwedê qencî û hezkirina xwe ji mirovan re nîşan daye. 5 Wî em xelas kirin, ne ji ber ku kirinên me rast in, lê ji ber ku ew dilovan e. Wî em paqij kirin, da ku em jiyana nû bistînin, û bi destê ruhê xweyî pîroz em nû kirin. Bi vî awayî wî em xelas kirin. 6 Bi saya Xelaskarê me Îsa Mesîh, wî ev ruh bi comerdî li ser me rijand. 7 Wî ev yek kir ku em jiyana herheyî, ya ku em li hêviyê ne, wek mîras bistînin. Ev yek mumkin e, çimkî wî qenciya xwe ya mezin li me kiriye, ya ku me di çavê wî de wek kesên rast derdixe.

8 Ev gotin pêbawer in, û ez dixwazim ku tu her tim behsa wan bikî, da ku kesên ku baweriya xwe bi Xwedê aniye, bala xwe bidinê ku qenciyê bikin. Ev tişt ji bo mirovan qenc û bifeyde ne.

9 Lê tu xwe ji minaqeşeyên bêaqil, navnameyên bav û kalan û şer û pevçûnên li ser Qanûnê dûr bixe, çimkî ew pûç û vala ne. 10 Piştî ku te carek du car bi awayekî cidî şîret li zilamekî ku mezhebekî bi pêş dixe, kir, wî red bike. 11 Çimkî tu dizanî ku kesekî wisa ji rêya rast derketiye û yekî gunehkar e û xwe ji ber kirinên xwe sûcdar derxistiye.

12 Gava ez Artemas û Tixîkos bişînim ba te, xîret bike ku tu bi lez werî Nîkopolîsê ba min, çimkî min qerar daye ku ez zivistanê li wê derê derbas bikim. 13 Tiştên ku ji Zênasê qanûnzan û Apolos re lazim in bide wan, da ku di rêwîtiya wan de hewcedariya wan bi tiştekî tune be. 14 Bila birayên me jî hîn bibin ku qenciyê bikin û di hal û rewşên lazim de alîkariyê bidin, da ku xizmeta wan bênetîce nemîne.

15 Hemû yên ku bi min re ne, silavan li te dikin. Silavên min li kesên ku ji me hez dikin û di baweriyê de ne, bike.

Bila qenciya mezin bi we hemûyan re be!