NAMEYA PÊŞÎN A PETRÛS

1 Ez Petrûs, şandiyekî Îsa Mesîh vê nameyê ji civatên li herêmên Pontos, Galatya, Kapadokya, Asya û Bîtînyayê re dinivîsim. 2 Bavê meyî ezmanî hûn li gor pêşzanîna xwe hilbijartine. Wî ruhê pîroz daye we ku we pîroz bike. Wî wisa kir, da ku hûn guh bidin wî û bi destê xwîna Îsa Mesîh bên paqijkirin.

Ez dua dikim ku Xwedê we bi comerdî bibereket bike û alî we bike ku li ba we aştî hebe.

3 Bila pesn ji Xwedê û Bavê Efendiyê me Îsa Mesîh re bê dayîn! Çimkî em li gor dilrehmiya wî ya mezin ji nû ve çêbûn, da ku hêviya me zindî be. Ji ber ku Îsa Mesîh ji nav miriyan hat rakirin, ev hêvî li ba me heye. 4 Xwedê mîraseke ku nikare xera bibe yan bê tunekirin daye me. Wî ev mîras ji bo we li ezmanan xwedî kiriye, 5 yanî ji bo we, yên ku Xwedê bi qudreta xwe diparêze, çimkî baweriya we heye. Ew we ji bo xelasiya ku wê di dema dawiyê de eşkere bibe, diparêze. 6 Hûn bi vê yekê pir kêfxweş in, her çi qas niha belkî lazim be ku hûn ji bo demeke kin ji ber cure cure tengasiyan êşê bikişînin jî. 7 Ev yek lazim e, da ku gava Îsa Mesîh xuya bibe, hûn ji ber baweriya xwe ya ku hatiye ceribandin pesn, rûmet û hurmetê bistînin. Baweriyeke wisa ji zêrê ku her çi qas ew di êgir de hatiye helandin* jî, lê paşê xera dibe, biqîmettir e. 8 We Mesîh qet nedîtiye, lê dîsa jî hûn jê hez dikin. Hûn wî niha nabînin, lê dîsa jî hûn baweriya xwe bi wî tînin, û hûnê bi kêfxweşiyeke mezin a ku nayê zimên 9 xelata baweriya xwe bistînin, yanî xelasiya canê xwe.

10 Pêxemberên ku behsa qenciya mezin a Xwedê, ya ku hûnê bistînin, kir, di heqê vê xelasiyê de hûr û kûr lêkolîn kir û bi xîret lêgerîn kir. 11 Xwedê ji berê ve bi destê ruhê pîroz ji wan pêxemberan re gotibû ku Mesîh wê cefayê bikişîne û paşê bê rûmetkirin. Ji ber vê yekê, wan xîret dikir ku tê derxin ku çi wê bê serê Mesîh, û ev tişt wê kengê çêbin. 12 Xwedê ji pêxemberan re eşkere kir ku wan ne ji xwe re, lê ji we re xizmet dikir. Van pêxemberan li ser tiştên ku ji we re hatin gotin nivîsîn. We ev tişt ji kesên ku mizgînî dabû we, bihîstin. Wan wisa kir, çimkî ruhê pîroz, ê ku ji ezmanan hat şandin, alî wan kir. Melek jî pir dixwazin van tiştan bizanin.

13 Xwe* ji bo îş hazir bikin û di her tiştî de li ser hişê xwe bin. Hêviya xwe bi qenciya mezin ve girêdin, a ku di dema xuyabûna Îsa Mesîh de wê ji we re bê dayîn. 14 Niha hûn zarokên Xwedê ne, yên ku guhdariya wî dikin. Loma dev jê berdin ku hûn li gor xwestekên xwe yên nerast, ên ku we berê bi nezanî dikirin, hereket bikin. 15 Lê belê, çawa ku yê ku gazî we kiriye pîroz e, hûn jî di hemû rabûn û rûniştina xwe de pîroz bin. 16 Çimkî wisa nivîsî ye: “Pîroz bin, çimkî ez Xwedayê pîroz im.”

17 Madem ku hûn ji Bav re dua dikin, ê ku li gor kirinên her kesî bê ferq û cudahî hukim dide, îcar ji bo vê dema kin a ku hûn li vê dinyayê dijîn bi hal û hereketên xwe nîşan bidin ku hûn ji Xwedê ditirsin. 18 Çimkî hûn dizanin ku hûn ji jiyana xwe ya pûç, a ku we ji bav û kalên xwe standiye, ne bi tiştên ku wek zêr û zîv dirizin, hatine azadkirin, 19 lê hûn bi xwîna Mesîh a biqîmet hatine azadkirin. Ev xwîn wek xwîna berxekî bêsûc û bêleke ye. 20 Rast e, Xwedê berî avakirina dinyayê Mesîh hilbijartibû, lê ew di dawiya deman de ji bo xêra we xuya bû. 21 Bi saya Mesîh hûn bi Xwedê bawer dikin. Xwedê ew ji nav miriyan rakir û rûmet da wî, da ku bawerî û hêviya we bi Xwedê hebe.

22 Ji ber ku hûn guhdariya hîndariya rast dikin û we canê xwe paqij kir, hûn wek bira bê durûtî ji hevdû hez dikin. Loma niha ji dil û bi dilgermî ji hevdû hez bikin. 23 Hûn ne ji toximê ku dirize, lê ji toximê ku jiyanê dide û narize ji nû ve çêbûne. Erê, hûn bi saya peyva Xwedayê herheyî ji nû ve çêbûne. 24 Çimkî nivîsî ye: “Hemû mirov wek giya ne, û temamiya rûmeta wan wek kulîlka deştê ye. Giya hişk dibe, û kulîlk diçilmise, 25 lê peyva Yehowa her û her dimîne.” Û ev “peyv” mizgîniya ku ji we re hatiye dayîn e.

2 Loma xwe ji hemû xerabî, hîle, durûtî, çavnebarî û her cure buxtanê* dûr bixin. 2 Çawa ku zarokên nûbûyî şîrê dayika xwe dixwazin, hûn jî daxwaza xwe ji bo şîrê saf ê peyva Xwedê zêde bikin, da ku hûn bibin kesên gihîştî û xelas bibin. 3 Çimkî we tehm kiriye* ku Efendiyê me qenc e.

4 Mirovan kevirê zindî red kir, lê Xwedê ew hilbijart û wî biqîmet dibîne. Gava hûn nêzîkî wî dibin, 5 hûn jî wek kevirên zindî ji bo maleke ruhî tên avakirin. Bi vî awayî, hûn dibin kahînên pîroz, da ku hûn bi destê Îsa Mesîh qurbanên ruhî pêşkêş bikin, ên ku li Xwedê xweş tên. 6 Çimkî di Nivîsarên Pîroz de tê gotin: “Va ye, ezê li Siyonê kevirê hilbijartî, yanî kevirê biqîmet û herî muhîm ê bingehê, deynim. Û kesê ku baweriya xwe bi wî tîne wê tu caran xeyalşikestî nebe*.”

7 Ji ber ku hûn bi wî bawer dikin, ev kevir ji bo we biqîmet e. Lê ji bo kesên ku bi wî bawer nakin, ev kevir ne biqîmet e. Di Nivîsarên Pîroz de wisa tê gotin: “Kevirê ku avakaran red kir bûye kevirê sereke*”, 8 û ‘kevirekî ku wê bibe sebebê ketina mirovan, û zinarekî ku wan aciz bike’. Ew kes dikevin, çimkî ew guhdariya peyva Xwedê nakin. Dawiyeke wisa li benda wan e. 9 Lê hûn “xelkekî hilbijartî, kahînên ku wek padîşah xizmet dikin, miletekî pîroz û milkê wî yê xisûsî ne, da ku hûn li her derê behsa sifetên bêemsal ên Xwedê bikin”, ê ku hûn ji tariyê gazî ronahiya xwe ya xweşik kirine. 10 Berê hûn ne xelkê Xwedê bûn, lê niha hûn xelkê wî ne. Berê dilovanî li we nedihat kirin, lê niha dilovanî li we tê kirin.

11 Birayên delal, hûn li vê dinyayê wek kesên xerîb û mêvan in. Ez ji we rica dikim ku hûn xwe ji xwestekên nefsê, yên ku li dijî we şer dikin, dûr bigirin. 12 Bila rabûn û rûniştina we di nav miletan de qenc be. Eger ew li dijî we xeber bidin jî û bibêjin ku hûn tiştên xerab dikin, ewê kirinên we yên qenc bibînin, û ewê di roja ku Xwedê diceribîne* de wî birûmet bikin.

13 Ji bo xatirê Efendiyê me, bi ya wan kesan bikin, ên ku li ser we hukimdariyê dikin. Ferq nake ew padîşah be, yê ku di ser we hemûyan re ye, 14 yan jî walî be, yê ku ji aliyê wî ve hatiye şandin, da ku ew kesên ku xerabiyê dikin ceza bike û pesnê kesên ku qenciyê dikin bide. 15 Çimkî Xwedê dixwaze ku hûn bi kirinên qenc devê kesên ku bi nezanî xeber didin û ne maqûl in bigirin. 16 Wek kesên azad bijîn, lê azadiya xwe ji bo xerabiyê bi kar neynin. Lê wek kesên ku ji Xwedê re xizmet dikin bijîn. 17 Hurmetê bidin hemû cure mirovan, ji hemû xwişk û birayan hez bikin, ji Xwedê bitirsin, hurmetê bidin padîşah.

18 Bila xulam qedrê axayên xwe bigirin û bi ya wan bikin. Bila ew hem bi ya axayên qenc û maqûl hem jî bi ya axayên ku bi zehmetî dilê wan tê razîkirin, bikin. 19 Çimkî kesekî ku dixwaze ku wijdanê wî li ber Xwedê paqij be û ji ber vê yekê zehmetiyan tehemul dike û bi neheqî cefayan dikişîne, Xwedê jê razî ye. 20 Eger ji ber ku hûn guneh dikin li we tê xistin û hûn vê yekê tehemul dikin, ma ev ji bo we sebebê serbilindiyê ye? Lê eger ji ber ku hûn qenciyê dikin hûn cefayan tehemul dikin, Xwedê ji we razî ye.

21 Erê, ji ber vê yekê Xwedê hûn hilbijartin, çimkî Mesîh jî ji bo we cefa dikişand û ji we re mînakek hişt, da ku hûn di her tiştî de li pey şopa wî herin. 22 Wî qet guneh nekir, û tu peyveke bi hîle ji devê wî derneket. 23 Gava mirovan heqaret li wî dikir, wî heqaret li wan nekir. Gava wî cefa dikişand, wî kesên ku cefa li wî dikir, tehdîd nekirin, lê wî xwe dispart destê yê ku bi edalet hukim dide. 24 Gava Mesîh li ser dar hat bizmarkirin*, wî bi bedena xwe gunehên me hilgirtin, da ku em ji gunehan xelas bibin û ji bo rastdariyê bijîn. Û “hûn bi birînên wî hatin qenckirin”. 25 Çimkî hûn wek miyên windabûyî bûn, lê niha hûn vegeriyan ba şivan û çavdêrê canê xwe*.

3 Bi eynî awayî, hûn jinno, bi ya mêrê xwe bikin. Hingê kesên ku guhdariya peyva Xwedê nakin jî, belkî ne ji ber gotin, lê ji ber rabûn û rûniştina we bibin kesên bawermend, 2 ji ber ku ew rabûn û rûniştina we ya qenc* û vê yekê ku hûn gelek qedrê wan digirin, dibînin. 3 Bila xemla we ne bi tiştên berbiçav, yanî ne bi honandina* poran, ne bi zêran, ne jî bi kincên biha ve girêdayî be. 4 Lê bila xemla we di vê yekê de bê dîtin ku hûn di dilê xwe de kesên çawa ne. Ji ber vê yekê, xwe bi aramî û sernermî* bixemilînin. Xemleke wisa narize, çimkî ew di çavê Xwedê de pir biqîmet e. 5 Di demên berê de jî, jinên pîroz, ên ku baweriya xwe bi Xwedê dianîn, xwe wisa dixemiland. Wan bi ya zilamên xwe dikir. 6 Mesela, Sarayê bi ya Birahîm dikir û ji wî re digot “Axayê min”. Eger hûn bi dewamî qenciyê bikin û netirsin, hûn keçên wê ne.

7 Bi eynî awayî, hûn mêrno, ji jinên xwe baş fehm bikin û li gor vê yekê bi wan re hereket bikin. Hurmetê bidin jinan, çimkî ew ji we sisttir in û wek firaqeke nazik in, û Xwedê li gor qenciya xwe ya mezin ji we re û ji wan re jî hediyeya jiyanê mîras daye. Eger hûn wisa nekin, Xwedê wê duayên we qebûl neke.

8 Xwişk û birano, hûn hemû hemfikir bin, dilşewat bin, ji hevdû hez bikin, dilrehm bin û dilnizm bin. 9 Gava kesên din xerabiyê li we dikin, hûn xerabiyê li wan nekin. Gava kesên din heqaretê li we dikin, hûn heqaretê li wan nekin. Li şûna vê, qenciyê li kesên din bikin, çimkî Xwedê ji bo vê yekê gazî we kiriye, û ewê qenciyê li we bike.

10 Çimkî nivîsî ye: “Yê ku ji jiyanê hez dike û dixwaze rojên xweş bibîne, gerek hay ji xwe hebe ku zimanê wî tiştekî xerab nebêje û peyveke bi hîle ji devê wî dernekeve. 11 Bila ew xwe ji xerabiyê dûr bixe û qenciyê bike. Bila ew li aştiyê bigere û bikeve pey wê. 12 Çimkî çavên Yehowa li ser kesên rast in, û guhên wî hawara wan dibihîzin. Lê Yehowa ji kesên ku xerabiyê dikin nefret dike.”

13 Eger hûn bi xîret qenciyê bikin, kî wê zerarê bide we? 14 Lê eger hûn ji ber ku hûn ya rast dikin, cefayê bikişînin jî, hûn dilxweş in. Ji ber tiştên ku ew ji wan ditirsin*, hûn netirsin û xeman nexwin. 15 Lê Mesîh di dilê xwe de wek Efendiyê xwe pîroz bikin. Her tim hazir bin ku hûn hêviya xwe li ber kesên ku pirsan ji we dipirsin, biparêzin. Lê vê yekê bi nermî û bi qedrekî mezin bikin.

16 Bila wijdanê we paqij be, da ku eger kesek li dijî we tiştekî xerab bibêje, ew bê şermezarkirin ji ber ku rabûn û rûniştina we wek şagirtên Mesîh qenc e. 17 Eger ev daxwaza Xwedê be, çêtir e ku hûn ne ji ber kirinên xerab, lê ji ber kirinên qenc cefayê bikişînin. 18 Çimkî heta kesekî rast, yanî Mesîh, ji bo kesên nerast bi tenê carek ji bo her û her mir, da ku wan ji gunehan azad bike. Wî wisa kir ku hûn bi Xwedê re li hev werin. Ew wek mirov hat kuştin, lê wek ruh ji mirinê hat rakirin. 19 Ew di bedeneke ruhî de çû ku xebera hukim bide ruhên* ku di hebsê de bûn, 20 ên ku di rojên Nûh de neguhdar bûn. Di wan rojan de, dema ku gemiya Nûh dihat çêkirin Xwedê bi sebir li hêviyê bû, û di wê gemiyê de tenê çend kes, yanî heşt kes di avê de xelas bûn.

21 Em dikarin tiştên ku di van rojan de çêbûn bişibînin vaftîza* ku me niha bi destê rabûna Îsa Mesîh xelas dike. (Vaftîz qirêja bedenê paqij nake, lê ew ricayeke ji bo wijdanekî paqij li ber Xwedê ye.) 22 Gava Mesîh hilkişiya ezmanan, ew li aliyê rastê yê Xwedê rûnişt. Û Xwedê melek û qudret xistin bin destê wî.

4 Madem ku Mesîh wek mirov cefa dikişand, hûn jî xwe hazir bikin ku nêrîna we wek ya Mesîh be. Çimkî kesê ku cefayê dikişîne nîşan dide ku wî dev ji guneh berdaye, 2 da ku ew wexta mayî, ya ku ew wek mirov dijî, ne ji bo xwestekên nefsê, lê ji bo ku daxwaza Xwedê pêk bîne, bijî. 3 Tiştên ku mirovên vê dinyayê dikin, we jî berê têra xwe dikirin. Mesela, hereketên we bêedeb bûn, hûn diketin pey şehwetên xwe, we bi zêdeyî vedixwar, we bê sînor û bê edeb kêf dikir, we şahî çêdikirin ku serxweş bibin û we li dijî qanûnê pûtperestî dikir. 4 Mirovên vê dinyayê fehm nakin ku hûn çima êdî bi wan re li ser vê rêya pîs nameşin, loma ew heqaretê li we dikin. 5 Lê ewê li ber Mesîh, ê ku wê hukmê kesên sax û mirî bide, hesab bidin. 6 Loma mizgînî ji miriyan re jî hat dayîn, da ku her çi qas mirovan ew li gor dîtinê mehkûm kiribin jî, ew di çavê Xwedê de ji aliyê ruhî ve sax bin.

7 Lê belê, dawiya her tiştî nêzîk bûye. Loma aqildar bin* û her tim hazir bin ku dua bikin. 8 Berî her tiştî ji hevdû gelek hez bikin, çimkî yê ku hez dike her tim hazir e ku kesên din efû bike*. 9 Ji hevdû re mêvanhez bin û vê yekê wek barekî giran nebînin*. 10 Bila her kes li gor dayîna ku wî ji Xwedê standiye ji hevdû re xizmet bike, wek çavdêrên ku alî kesên din dikin ku ew feydeyê ji qenciya mezin a Xwedê bistînin, a ku bi gelek awayan eşkere dibe. 11 Eger kesek xeber dide, bila ew wek kesekî ku xeberên Xwedê tîne zimên, xeber bide. Eger kesek xizmet dike, bila ew xwe bispêre qeweta ku Xwedê dide, da ku Xwedê bi saya Îsa Mesîh di her tiştî de bê birûmetkirin. Ew her û her hêjayî rûmet û qudretê ye. Amîn.

12 Birayên delal, gava hûn tengasiyên giran* dikişînin, şaş nemînin û nefikirin ku qey tiştekî ecêb hat serê we. 13 Lê kêfxweş bin ku hûn wek Mesîh ji ber eynî sebeban cefayê dikişînin. Hingê hûnê di dema xuyabûna rûmeta wî de şa û dilgeş bin. 14 Eger ji ber xatirê navê Mesîh heqaret li we tê kirin, hûn dilxweş in, çimkî ev yek nîşan dide ku ruhê rûmetê, yanî ruhê Xwedê li ser we ye.

15 Lê belê, ez naxwazim ku kesek ji we ji ber ku ew bû mêrkuj, yan diz, yan mirovekî xerab yan jî ji ber ku ew pozê xwe dixe meseleyên kesên din tengasiyan bikişîne. 16 Eger kesek ji ber ku ew şagirtê Mesîh e cefayê bikişîne, bila ew şerm neke, lê bila ew bi dewamî li gor vî navî bijî û bi vî awayî rûmetê bide Xwedê. 17 Çimkî niha wexta ku Xwedê hilbijartiye ku hukim bide hatiye, û ewê ji xelkê xwe* dest pê bike. Madem ku hukim wê ji me dest pê bike, gelo çi wê bê serê kesên ku guh nadin mizgîniya Xwedê? 18 Çimkî di Nivîsarên Pîroz de wisa nivîsî ye: “Lê madem ku lazim e ku mirovekî rast pir xîret bike ku Xwedê wî xelas bike, îcar çi wê bê serê gunehkaran û kesên ku ji Xwedê natirsin?” 19 Loma, bila kesên ku cefayê dikişînin ji ber ku ew daxwaza Xwedê pêk tînin bi dewamî qenciyê bikin û jiyana xwe* emanetî destê Xaliqê meyî* dilsoz bikin.

5 Ji ber ku ez wek we rîspî me, û min cefayên Mesîh bi çavên xwe dîtine, û ezê jî rûmeta ku wê bê eşkerekirin, bistînim, ez ji rîspiyên di nav we de rica dikim: 2 Şivantiya keriyê Xwedê, yê ku wî emanetî we kiriye, bikin. Wek çavdêr mesûliyeta xwe ne bi mecbûrî, lê bi dilxwazî li ber Xwedê pêk bînin. Vê xizmetê ne ji ber ku hûn ji aliyê madî ve tiştekî qezenc bikin, lê bi xîreteke mezin bikin. 3 Nebin axayên kesên ku hatin emanetî we kirin*, lê ji keriyê Xwedê re bibin emsal. 4 Hingê, gava serokê şivanan xuya bibe, hûnê xelata birûmet*, a ku qet winda nabe, bistînin.

5 Bi eynî awayî, ey hûn, birayên ciwan, bi ya birayên ku ji we mezintir in* bikin. Lê hûn hemû li hember hev dilnizm bin, çimkî Xwedê li hember kesên pozbilind disekine, lê ew qenciya xwe ya mezin li kesên dilnizm dike.

6 Loma bi dilnizmî xwe bixin bin destê Xwedayê biqudret, da ku ew we di wexta rast de bilind bike. 7 Hemû xemên xwe bixin destê wî*, çimkî ew bi we eleqedar e*. 8 Bihîkmet bin* û hişyar bin! Dijminê we Îblîs wek şêrekî dihumîne û li kesekî digere ku wî bixwe. 9 Lê hûn bi baweriyeke xurt li hember Îblîs bisekinin. Çimkî hûn dizanin ku hemû birayên we li seranserê dinyayê eynî cefayan dikişînin. 10 Xwedayê ku tijî qenciya mezin e gazî we kiriye ku hûn bi Mesîh re di yekîtiyê de bin û her û her bên birûmetkirin. Piştî ku we ji bo demekê cefa kişand, Xwedê wê bi xwe perwerdeya we temam bike. Ewê we xurt bike, ewê alî we bike ku hûn dilsoz bimînin û ewê we qewî bike. 11 Bila qudret her û her a wî be. Amîn.

12 Min bi alîkariya Sîlvanos*, ê ku ez wek birayekî dilsoz dibînim, ev nameya biçûk ji we re nivîsî, da ku ez dilê we xurt bikim û nîşanî we bidim ku Xwedê bi rastî qenciya xwe ya mezin li we kiriye. Dev ji vê qenciyê bernedin. 13 Jinika ku li Babîlê ye û wek we ji aliyê Xwedê ve hatiye hilbijartin, silavan li we dike. Wekî din, kurê min Marqos jî silavan li we dike. 14 Bi hezkirinê* silavan li hevdû bikin.

Bila aştî bi her kesê ku bi Mesîh re di yekîtiyê de ye be.