NAMEYA DIDUYAN A PETRÛS

1 Ez Şîmûn Petrûs, xulam û şandiyê Îsa Mesîh, vê nameyê ji kesên ku bi saya rastdariya Xwedayê me û Xelaskarê me Îsa Mesîh wek me bûne xwediyê eynî baweriya biqîmet re dinivîsim:

2 Ez dua dikim ku Xwedê we bi destê zanîna rast a li ser wî û Efendiyê me Îsa bi comerdî bibereket bike û alî we bike ku aştî li ba we hebe. 3 Çimkî qudreta Xwedê bi destê zanîna rast a li ser yê ku ji ber rûmet û qenciya xwe gazî me kiriye her tiştê ku ji bo jiyan û ji bo vê yekê ku em ji Xwedê re dilsoz bin lazim e wek hediye daye me. 4 Xwedê li gor rûmet û qenciya xwe sozên biqîmet û bêemsal wek hediye dane me, da ku em bibin hevparên sifetên wî û wek wî bibin ruh. Wî ev yek kir ji ber ku em ji bêexlaqiya vê dinyayê, ya ku ji xwestekên xerab tê, dûr ketine.

5 Ji ber vê yekê, çi ji destê we tê bikin ku baweriya we hebe û hûn tiştên baş û biexlaq bikin. Çi ji destê we tê bikin ku zanîna we hebe 6 û xwegirtin li ba we hebe. Çi ji destê we tê bikin ku hûn tehemul bikin û ji Xwedê re dilsoz bin. 7 Çi ji destê we tê bikin ku hûn ji hemû birayan û ji her kesî hez bikin. 8 Çimkî eger hûn xwediyê van sifetan bin û ew di nav we de zêde bibin, hûnê li gor zanîna rast a li ser Efendiyê me Îsa Mesîh hereket bikin û bê ber nemînin.

9 Lê kesê ku ev sifet li ba wî tune ne, ew kor e, çimkî ew çavê xwe digire ku ronahiyê nebîne*. Û ew ji bîr dike ku gunehên wî yên berê hatine efûkirin. 10 Loma birano, çi ji destê we tê bikin ku hûn vê îmtiyaza xwe ku hûn hatine gazîkirin û hilbijartin ji dest nedin. Eger hûn van tiştan her tim bikin, hûnê tu caran ji rê dernekevin. 11 Erê, hûnê têr û tije bereketan bistînin û bikevin Hukimdariya herheyî ya Efendî û Xelaskarê me Îsa Mesîh.

12 Ji ber vê yekê, her çi qas hûn van tiştan dizanin û di hîndariyên rast de qewî ne jî, ez her tim dixwazim van tiştan bînim bîra we. 13 Heta ku ez di vê bedenê de* bim, ez vê yekê wek mesûliyeta xwe dibînim ku van tiştan bînim bîra we. 14 Çimkî çawa ku Efendiyê me Îsa Mesîh ji min re eşkere kiriye, ez dizanim ku ezê bi tenê wexteke kin di vê bedenê de* bimînim. 15 Ezê her tim çi ji destê min tê bikim ku hûn piştî mirina min* bikarin van hemû tiştan bînin bîra xwe.

16 Gava me ji we re behsa qudret û hazirbûna Efendiyê me Îsa Mesîh kir, gotinên me ne li ser esasê çîrokên mirovan bûn, lê li ser esasê vê yekê bûn ku me mezinahiya wî bi çavê xwe dît. 17 Wî ji Bavê me Xwedê hurmet û rûmet stand, gava Xwedayê rûmetê ji wî re wisa got: “Ev e Kurê min ê delal, ez ji wî razî me.” 18 Erê, gava em bi wî re li ser çiyayê pîroz bûn, me ev gotin ji ezmên bihîstin.

19 Loma em hê zêdetir baweriya xwe bi vê yekê tînin ku hemû tiştên ku Xwedê gotine wê bên cih. Baş bala xwe bidin van hemû tiştan. Bila ev gotin di dilê we de bibin wek çirayê ku li cihekî tarî şewq dide. Heta ku sibeh zelal dibe û stêra sibehê derdikeve vê yekê bikin. 20 Hûn dizanin ku tu pêxembertiya Nivîsarên Pîroz ji nêrîna şexsî ya mirovan nayê. 21 Çimkî pêxembertî tu caran ji aliyê mirovan ve nehatine, lê ruhê pîroz rêberiya mirovan dikir, da ku ew gotinên Xwedê bibêjin.

2 Çawa ku di nav xelkê Îsraîl de pêxemberên sexte hebûn, di nav we de jî mamosteyên sexte wê hebin. Ewê bi dizîka mezhebên ku baweriyê xera dikin bixin hundir. Ewê xwediyê ku ew kirîne înkar bikin, û ji ber ku ew wisa dikin, ewê zû helak bibin. 2 Wekî din, gelek kes wê çav bidin hereketên wan ên bêedeb, û ji ber van kesan mirov wê bi xerabî di heqê rêya rastiyê de xeber bidin. 3 Û ji ber çavbirçîtiya xwe ewê we bi gotinên xapînok ji bo xêra xwe bi kar bînin. Cezayê wan ji berê ve hat qerardayîn û ewê dereng nemîne, û bê guman ewê bên helakkirin.

4 Xwedê melekên ku guneh kiribû efû nekirin, lê wî ew ceza kirin û avêtin Tartarusê*. Wî ew bi zincîran girêdan* ku ew di kûrahiya tarîstanê de li benda hukmê xwe bin. 5 Wekî din, Xwedê dinyaya berê jî efû nekir, lê ceza kir û tofan anî serê dinyaya ku tijî mirovên ku ji Xwedê natirsin bû. Lê wî mizgînvanê rastdariyê Nûh bi heft kesên din re xelas kirin. 6 Xwedê bajarên Sodom û Gomorayê mehkûm kirin û ew kirin xwelî. Bi vî awayî, Xwedê nîşan da ku çi wê bê serê kesên ku ji wî natirsin. 7 Û wî mirovê rast Lût, ê ku ji ber jiyana bêedeb a kesên xerab pir xemgîn dibû, xelas kir. 8 Çimkî ev mirovê rast di nav wan mirovên xerab de dijiya, û ew her roj ji ber tiştên ku wî didîtin û dibihîstin, dilê wî pir diêşiya. 9 Erê, Yehowa dizane ku ew çawa kesên ku ji wî re dilsoz in ji ceribandinê xelas bike. Û ew dizane ku çawa mirovên neheq ji bo roja hukim bihêle, 10 bi xisûsî mirovên ku dixwazin bi kesên din re bêexlaqiya cinsî bikin, da ku wan pîs bikin, û mirovên ku serweriyê kêm dibînin.

Ev mamosteyên sexte bêşerm* û qure ne, û ew natirsin ku bi xerabî li ser kesên ku rûmet ji Xwedê standine, xeber bidin. 11 Her çi qas hêz û qudreta melekan ji ya van kesan mezintir e jî, melek ji ber ku ew qedrê Yehowa digirin van kesan bi heqaret sûcdar nakin. 12 Lê mirovên wisa bi xerabî li ser tiştên ku ew fehm nakin xeber didin. Ewê li gor rêya xwe ya xerab wek heywanên bêfehm, ên ku hatin dinyayê ku bên girtin û kuştin, bên helakkirin. 13 Ewê ji ber kirinên xwe yên xerab bên cezakirin.

Heta di nava rojê de jî, ew ji jiyana dewlemend* kêfê distînin. Ew wek leke ne ku civatê qirêj dikin, û gava ew bi we re kêf dikin, ew hez dikin ku kesên din bi hîndariyên sexte bixapînin. 14 Çavên wan ji zinayê têr nabin, û ew nikarin dev ji guneh berdin. Ew kesên ku di baweriyê de sist in dixapînin. Dilê wan hînî çavbirçîtiyê bûye. Ew zarokên lanetkirî ne. 15 Wan dev ji rêya rast berdaye û ew jê dûr ketine. Ew ketin pey rêya Balamê kurê Beor, ê ku hez dikir ji bo kirinên xwe yên xerab xelatê bistîne. 16 Lê ew ji ber gunehê xwe hat serrastkirin. Kerê bê zar û ziman bi dengê mirovan xeber da û rê li ber pêxember girt ku ew tiştên bêaqil neke.

17 Ew wek kaniyên bêav in û wek ewr in, ên ku li ber ba diçin. Tarîstana reş li benda wan e. 18 Ew wisa xeber didin qey gotinên wan muhîm in, lê bi eslê xwe gotinên wan pûç û betal in. Ew bi xwestekên xwe yên gunehkar û bi hereketên bêedeb mirovên ku nû ji van tiştên xerab dûr ketine, dixapînin. 19 Ev mamosteyên sexte ji kesên din re soz didin ku ewê azad bibin, lê ew bi xwe xulamên helakê ne. Çimkî mirov dibe xulamê kesê ku wî bindest dike. 20 Eger wan zanîna rast a li ser Efendî û Xelaskarê me Îsa Mesîh bi dest xist û dev ji kirinên pîs ên vê dinyayê berda, lê paşê dîsa vegeriyan û ketin bin destê van tiştan, hingê halê wan ji dema ku wan hîndariyên rast nedizanîn, xerabtir e. 21 Li şûna ku ew emrê pîroz bistînin û dev jê berdin, wê çêtir bûya ku wan rêya rastdariyê qet nizanibûya. 22 Tiştê ku hat serê wan li gor vê gotina pêşiyan bû: “Kûçik vegeriya vereşîna xwe û xenzîr* piştî şûştinê dîsa xwe di nav heriyê de digevizîne.”

3 Birayên delal, ev êdî nameya min a diduyan e, ya ku ez ji we re dinivîsim. Wek di nameya pêşîn de, ez dixwazim bi vê nameyê jî tiştên ku hûn jixwe dizanin bînim bîra we, da ku we hişyar bikim ku hûn bi zelalî bifikirin. 2 Ev yek wê alî we bike ku hûn gotinên* pêxemberên dilsoz û emrên Efendî û Xelaskarê me, yên ku bi destê şandiyan ji we re hatin dayîn, bînin bîra xwe. 3 Gerek hûn vê yekê bizanin: Di rojên dawîn de mirov wê bi tiştên qenc bikenin û li gor xwestekên xwe xerabiyê bikin, 4 û ewê wisa bibêjin: “Ka soza hazirbûna Mesîh li ku derê ma? Ji roja ku bav û kalên me mirine* û pê ve, her tişt wek ji destpêka dinyayê ve bi eynî awayî dewam dike.”

5 Lê ew van tiştan bi qesdî davêjin pişt guhê xwe ku ji berê ve erd û ezman hebûn, û erd bi gotina Xwedê ji nav avê hilkişiya û di navbera avê de sekinî, 6 û paşê wexta ku temamiya erdê dîsa ket bin avê, mirovên berê helak bûn. 7 Erd û ezmanên ku niha hene, ew bi eynî gotina Xwedê ji bo helakkirina bi êgir û ji bo roja hukim û helakkirina mirovên ku ji Xwedê natirsin, tên hiştin.

8 Lê belê, birayên delal, vê yekê ji bîr nekin: Ji bo Yehowa rojek wek hezar sal e û hezar sal wek rojekê ye. 9 Hin kes difikirin ku Yehowa pêkanîna soza xwe dereng dixe, lê ne wisa ye. Ew li we sebir dike, çimkî ew naxwaze ku kesek helak bibe, lê ew dixwaze ku her kes tobe bike. 10 Roja Yehowa wê wek diz bê. Hingê ezman wê bi guregureke mezin winda bibin, û tiştên li ezmên û li ser erdê wê bişewitin û helak bibin. Û erd û tiştên ku li ser rûyê erdê çêdibin wê eşkere bibin.

11 Ji ber ku ev hemû tişt wê bên wêrankirin, baş bifikirin ku gerek hûn mirovên çawa bin. Gerek hûn di rabûn û rûniştina xwe de pîroz bin û ji Xwedê re dilsoz bin. 12 Wekî din, li benda roja* Yehowa bin û wê rojê ji bîr nekin*. Wê rojê ezman wê di nav êgir de helak bibe, û tiştên li ser erdê û li ezmanan wê bişewitin û bihelin! 13 Lê em li gor soza wî li benda erd û ezmanekî nû ne. Û li ser rûyê erdê û li ezmanan rastdarî wê hebe.

14 Loma, birayên delal, madem ku hûn li benda van tiştan in, çi ji destê we tê bikin ku hûn li dawiyê di çavê Xwedê de wek kesên bêleke û bêkêmasî bên dîtin û bi wî re di aştiyê de bin. 15 Wekî din, sebra Xudanê me wek xelasiya xwe bibînin. Birayê meyî delal Pawlos jî li gor hîkmeta ku wî ji Xwedê standiye, eynî tişt ji we re nivîsî. 16 Pawlos di hemû nameyên xwe de behsa van tiştan dike. Lê belê, di van nameyan de hin tişt hene ku fehmkirina wan zehmet e. Mirovên nezan* yan yên ku di baweriyê de sist in van tiştan û temamiya Nivîsarên Pîroz ne tam rast şîrove dikin, û bi vî awayî dibin sebebê helakbûna xwe.

17 Îcar hûn, birayên delal, ji ber ku hûn van tiştan ji berê ve dizanin, hay ji xwe hebin ku hîndariyên sexte yên mirovên xerab we ji rê dernexînin û ku hûn ji bingeha ku hûn saxlem li ser sekinîne, nekevin. 18 Lê bi dewamî wisa bijîn ku hûn bi zêdeyî qenciya mezin ji Efendî û Xelaskarê me Îsa Mesîh bistînin, û zanîna xwe li ser wî zêde bikin. Bila hem niha û hem jî her û her rûmet ji wî re bê dayîn. Amîn.