Em çawa dikarin xwe ji bo îbadetan hazir bikin?

Eger hûn bi Şahidên Yehowa re bi şikilekî muntezam Kitêba Pîroz tetkîk bikin, bi îhtimaleke mezin hûn beriya her tetkîkekê xwe hazir dikin. Ji bo ku hûn bikarin tam ji îbadetan feydeyê bigirin jî, hûn gerek bi eynî şikilî xwe hazir bikin. Wexta ku hûn vê yekê bi planekê ve girê bidin, dikarin netîceya herî rind bi dest bixin.

Qirarê bidin ku hûn vê yekê kîjan wextê û li ku derê bikin. Hûn kîjan wextê dikarin bi şikilekî pirr rind konsantre bibin? Eceba sibehê beriya ku hûn dest bi rojê bikin, an ku êvarê piştî raketina zarokan? Eger hûn nikarin di yek carekê de heta zemanekî dirêj tetkîk bikin jî, ji xwe re wextekê tayîn bikin. Û îzinê nedin ku di nava vê wextê de, qet tiştekî din dîqeta we belav bike. Ji bo ku hûn xwe li wê derê hazir bikin, cihekî bêdeng ji xwe re tercîh bikin. Dengê radyo, televîzyon û telefona xwe ya destan qapat bikin. Gava hûn dest bi tetkîkê dikin, pêşî dua bikin. Ev yek ji we re yardim dike ku hûn ji endîşeyên wê rojê dûr bikevin. Hûn bi vî şikilî xwe li ser kelama Xwedê yanî Kitêba Pîroz konsantre dikin (Filîpî 4:6, 7).

Li bin nuqteyên sereke îşaret bikin û cewaban hazir bikin. Beriya ku hûn qisimekî weşanê mizakere bikin, di heqê wê de fikirekî genel bistînin. Li ser sernivîs û binsernivîsên meqaleyê mijûl bibin û bifikirin hela çi îrtibata wan bi meseleyê re heye. Bi yardima resim û pirsên tekrar, fikirên muhîm bi dîqeteke mezin di ber çavan re derbas bikin. Paşê her paragrafekê yek bi yek bixwînin û bişixulin ku hûn cewaba pirsa paragrafê bibînin. Ayetên ku navên wan tê de derbas dibin, ji Kitêba Pîroz vekin û bixwînin. Bixebitin ku hûn fam bikin ka hela ew ayet fikirên di paragrafê de çawa destek dikin (Karên Şandiyan 17:11). Gava hûn cewabê bibînin, li bin çend kelîmeyên ku cewabê weynin bîra we, îşaret bikin. Paşê eger hûn bixwazin, dikarin di îbadetê de destê xwe hildin û bi gotinên aîdî xwe cewabên kin bidin pirsan.

Çiqas ku hûn her hefte di îbadetên me de, meseleyên çeşîd bi çeşîd mizakere bikin, hûn ewqas zanîna nû distînin. Hûn li ser “xezîneya” ilimê ku ji Kitêba Pîroz bi dest dixin, rind talîm dibin (Metta 13:51, 52).

• Ji bo ku hûn xwe ji îbadetan re hazir bikin, gerek hûn planeke çawa çêbikin?

• Ji bo ku hûn di îbadetê de cewabê bidin, gerek hûn xwe çawa hazir bikin?