WEK ÎSA MESÎH BIJÎ

Taybetiyeke Nû ji bo Civînan

Ji meha Çileyê ya sala 2018an û pê ve, notên lêkolînê, resim û vîdeoyên çapa lêkolînê (li ser înternetê) ya Wergera Dinyaya Nû (nwtsty) wê li civînên nava heftiyê bên muzakere kirin – çapa lêkolînê bi zimanê Kurmancî hazir nebe jî. Ev melûmat wê alî te bike ku hazirîkirina ji bo civînan hê jî bifeydetir be. Bi ser de, em hêvîdar in ku bi saya vê melûmatê, tuyê nêziktirî Bavê meyî dilovan Yehowa bibî!

NOTÊN LÊKOLÎNÊ

Notên lêkolînê ji bo gelek ayetên Kitêba Pîroz melûmatên kultur, coxrafî û zimannasiyê didin.

Metta 12:20

Fitîla ku dû dike: Mal bi çiraxên axîn, ên ku bi donê zeytê tije ne, dihatin ronî kirin. Fitîleke keten runê zeytê dikişand û ew dibir alavê. Bi îhtimaleke mezin, peyva Yewnanî ya ji bo “fitîla ku dû dike” ji bo fitîleke ku hê dişewite, lê dike ku bitemire dihat xebitandin. Pêxembertiya Îşaya 42:3 ji berê de gotibû ku Îsa wê dilovan be û çirûska dawîn a hêviya însanên dilnizm û belengaz netefîne.

Metta 26:13

Bi rastî: Peyva Yewnanî “amen”, a ku ji peyva Îbranî “amen” tê, tê maneya “bila wisa be” an “mutleqe”. Bi vê peyvê, Îsa gelek caran bala guhdarvanên xwe dikişand li ser rastiya gotin, soz û pêxembertiyên xwe. Wek li kitêba Yûhenna tê dîtin, Îsa ev peyv carinan dubare digot (amen amen) (Yh 1:51).

RESIM Û VÎDEO

Resim û vîdeo hin teferûatên Kitêba Pîroz hê zelaltir nîşan didin.

Beytfac, Çiyayê Zeytûnê û Orşelîm

Ev vîdeo riya ku ji rojhilatê diçe Orşelîmê nîşan dide. Ji gundê et-Tûr (yanî Beytfaca Kitêba Pîroz), rê hildikişe Çiyayê Zeytûnê. Beytanya li rojhilata Beytfacê, li ser dawa rojhilatê ya Çiyayê Zeytûnê ye. Wexta ku ew diçûn Orşelîmê, Îsa û şagirtên wî li Beytanyayê diman. Beytanya îro wek el-Ezariye tê bi nav kirin. Bi zimanê Erebî, ev nav tê maneya “cihê Lazar”. Îsa bê guman li mala Lazar, Merta û Meryemê dima (Mt 21:17; Mq 11:11; Lq 21:37; Yh 11:1). Çaxa Îsa ji mala wan diçû Orşelîmê, dibe ku ew li ser riya ku di vîdeoyê de tê nîşan dayîn dimeşiya. Li 9 Nîsanê ya sala 33an a P.M., wexta ku Îsa li dehşikekî siwar bû û ji Çiyayê Zeytûnê çû Orşelîmê, dibe ku ew li Beytfacê bi rê ket.

Riya ji Beytanyayê heta Beytfacê
Beytfac
Çîyayê Zeytûnê
Newala Qidronê
Çiyayê Perestgehê

Mixekî li Hestiyê Paniyê

Ev foto kopyayeke hestiyekî paniyê nîşan dide, yê ku bi mixekî hesin (11,5 cm) hatibû mix kirin. Hestiyê ji demên Romayî ji aliyê arxeologan ve li sala 1968an li Orşelîma bakur hatibû dîtin. Ev hestî îsbat dike ku wexta ku yekî dihat îdam kirin, ew bi mixan li ser dîrekekê dihat mix kirin. Ev mix belkî dişibe mixên ku leşkerên Romayî xebitandibûn ji bo ku ew Îsa Mesîh li ser dîrekê mix bikin. Ev hestî û mix di qutiyeke kevir de hatibûn dîtin. Piştî ku goşt rizîbû, hestiyên ziwa yên miriyan dihatin li qutiyên wisa xwedî kirin. Ev yek nîşan dide ku kesên îdamkirî jî dihatin defn kirin (Mt 27:35).