Çi wê Bê Serê Dîn û Baweriyên Sexte?

1. Gelo Xwedê hemû dîn û baweriyan qebûl dike?

Rast e ku di hemû dîn û baweriyan de kesên dilpak hene. Xwedê wan kesan dibîne û xema wan dixwe. Lê çi heyf e ku dînên sexte gelek xerabiyê dikin (2. Korîntî 4:3, 4; 11:13-15). Li hemû dinyayê, hin dîn tev li teror, komkujî, şer û îstismara zarokan dibin. Kesên dilpak seba vî halê xerab pir xemgîn in!​—Metta 24:3-5, 11, 12 bixwîne.

Dînê rast hurmet û rûmetê dide Xwedê, lê dîn û baweriyên sexte dilê wî xweş nakin. Fikir û hîndariyên dînên sexte di Kitêba Pîroz de derbas nabin. Mesela, ew li ser Xwedê û li ser halê miriyan derewan dikin. Lê Yehowa dixwaze ku her kes rastiya di heqê wî de hîn bibe.​—Waiz 9:5; 1. Tîmotêyos 2:3, 4 bixwîne.

2. Çi wê bê serê dîn û baweriyên sexte?

Xwedê îbadeta dînên sexte qebûl nake, yên ku dibêjin ku ew ji Xwedê hez dikin, lê bi eslê xwe bi dinyaya Îblîs ve girêdayî ne (Aqûb 4:4). Kitêba Pîroz hemû dînên sexte wek “Babîla Mezin” bi nav dike. Piştî Tofana Nûh, dînê sexte li bajarê Babîlê dest pê kir. Ji wê demê û pê ve, dînên sexte mirovan dixapînin û bindest dikin. Di demeke nêzik de, Xwedê wê van dînên sexte ji nişka ve xera bike.​—Peyxam 17:1, 2, 5, 16, 17; 18:8 bixwîne.

Mizgîn ev e: Yehowa dizane ku di dînên sexte de kesên dilpak hene, û ew alî wan dike ku ew bên ser riya rastiyê.​—Yûhenna 6:45 bixwîne.

3. Kesên dilpak gerek çi bikin?

Yehowa xema kesên ku ji rastî û ji qenciyê hez dikin, dixwe. Xwedê dixwaze ku ew ji dînê sexte derkevin. Mirovên ku ji Xwedê hez dikin hazir in ku dev ji xerabiyê berdin da ku Xwedê ji wan razî be.​—Peyxam 18:4 bixwîne.

Li sedsala yekê, kesên dilpak gelek şa bûn gava wan mizgîna Xwedê bihîst. Yehowa ji wan re riyeke nû hîn kir û dilşadî û hêvî da wan. Wê baş be ku em jî mîna wan mizgîna Xwedê qebûl bikin û guh bidin Yehowa.​—1. Selanîkî 1:8, 9; 2:13 bixwîne.

Kesên ku dev ji dînê sexte berdidin dikarin bikevin malbata xizmetkarên Xwedê. Bi vî awayî, ew dikarin bibin dostên Xwedê û heyata bêdawî bistînin.​— Marqos 10:29, 30; 2. Korîntî 6:17, 18 bixwîne.

4. Xwedê wê halê dinyayê çawa rast bike?

Di demeke nêzik de, Xwedê wê hemû dîn û baweriyên sexte helak bike û dinyayê ji zordestî û derewên wan bifilitîne. Li wê demê, hemû mirov wê di yekîtiyê de ji Yehowa re îbadetê bikin.​—Peyxam 18:20, 21; 21:3, 4 bixwîne.